قصة ولنا في الخيال حياة

الوضع بالنسبه ليهم كان طبيعي شديد...حاولت اطلع من القوقعه دي..فبقيت بدل يحكو لي المواقف بألفها واعيشهااا...يعني حرفيا كنت عايشه احلام ورديه زي ما بقولو ... وطايره في السما... 

يوم مشيت ناس براءه... لقيتها هي واخوانها بلعبو نط االحبل بالخرطوش... 

معاذ و نهله كل زول ماسك طرف و بلفو لي براءه الخرطوش  وهي بتنط... يلا معاذ عشان قصيير كل ما يلف الحبل يطق ليك براءه في راسها وهي تكورك وتقول ليهو ارفع يدك فوق يا معاذ ياخ  وهو قدر ما يحاول يرفع يدو فوق برضو بطقهاااا بالخرطوش في راسها ...

انا بقيت اضحك و طلعت التلفون حق ابوي الله يرحمو بشتغل بيهو في الاجازات  بقيت اصور فيهم... وهي بتقول لي معاذ... راسي ورم... ورم عدييل اقسم بالله...هاااك امسك الخرطوش دقني عدييل بعد دا  يا معاذ  ... 

نهله : جيبي الخرطوش وقت نفسك تتدقي واالله بجلدك جلده ليها ضلللل اصلا نفسي اتلفشى الجلد البجلدوني ليهو في المدرسه دا...وخالتو سلوى بتقول ليها غايتو قدر العلم الكان في راسك طار... يحليل مهاد و تعبها و شرحهااا..لمن تنزلي سنه تالته الا تبتدا ليك من الف باء تاء ثاء... اتلفتو لقوني واقفه بصور...قعدو يضحكو...

نهله : بت حلال والله... تعالي العبي معانا.. 

خالتو سلوى : فاتحه نفسك و كمان بتعزمي للعب... ديل خلصو امتحاناتهم... الترابه في خشمك انتي ياا الممتحنه... 

براءه قعدت تضحك فيها و قالت ليها هدي مهاد زاتو جات امشي شوفي قرايتك.. ما دايرين معاك لا حبل لا نط

نهله بضحك : مهاد بتمشي مصيرك ترجعي لي... االموز بجيبك يا كلبه.. و مشت تقرا... 

انا سلمت عليهم وعلي  جدو عبدالرحمن و خالو احمد  ومعاذ.. و دخلت مع براءه غرفتها هي ونهله ... براءه تشيل و تعيد  في الفيديو وتضحك.. قالت لي غايتو الفيديو دا كان شافو زول برستيجي حيروح في خبر كان.. 

نهله رفعت راسها من الكتاب : برستيجي؟ اسكتي عليك الله  الكلمه زاتو في خشمك ما جايه...

براءه فلقتها بالمخده وقالت ليها خليك في قرايتك... ما شفتي انا موقفه الحركه كيف.. اولاد الحله كلهم مرسلين لي طلبات صداقه في الفيس.. لكن انا م شغاله بيهم 

نهله بضحك : مش ياهو ملزق ولا فلزق دا... ولا واحد تاني... 

براءه : اسمو فرزدق... انا بقيت اضحك 

نهله : المهم يازوله ... هو اصلا ما عندو شغله غير يخت كرسيهو قدام الباب  نهايه اليوم ... ويقعد يشاغل في بنات المدارس...العاطل 

براءه قالت ليها الحمد لله الما قبلت طلبو ... وقبلت علي قالت لي  بي مناسبه الفيس...انتي ما تعملي ليك صفحه يا مهاد.. قلت ليها ما حأستفيد منها حاجه.. قالت لي بالعكس والله بتغيري جوو... ممكن تقري روايات... وتتعرفي على ناس جديده.. موضوع والله في الاجازه دي.. لفت نظري موضوع الروايات دا...قلت ليها خلاص اعملي لي صفحه... 

وبقيت اعاين ليها و هي بتعمل الصفحه كيف.. و شرحت لي انو ممكن اعملها برقم او ايميل..قلت ليها اعمليها بي اي شي ما مشكله... عملتها لي  و بقت ترسل في طلبات صداقه ليها ولي نهله و لي صحباتنا في المدرسه او بالاصح صحباتها هي وانا كنت بقعد معاهم... و تتابع لي في الصفات الظابطه... و تدخلني في القروبات... وورتني كيف ادخل  و كيف اطلع.. و كيف انزل بوست المهم شرحت لي كل حاجه... وقالت لي على فكره حتى سرايركم العايزين تبيعوها ممكن تبيعيها بالفيس... ودخلتني كم دلاله بتاعت اثاثات... اتحمست قعدت معاهم شويه..و طوالي رجعت البيت...حكيت لي امي بي كلام براءه... وبديت اصور في السرارير... و انشر الصور في القروبات.. كتبت رقم امي للاستفسار... فعلا تاني يوم من الصباح ضربو لينا كم نفررر ما اتفقنا معاهم... زي الضهر كدا ضربت وحده عايزه الاربعه سراير بي بالانبوبه... اتفقت معانا... و جات رفعت السراير... وطوالي امي مشت دفعت عربون  لي ناس المدرسه و اتعاقدت معاهم لي مده خمسه سنه هي حتكون ماسكه المقصف...

المساء مشيت ناس براءه عشان احكي ليهم... و عشان خالتو سلوى تشوف لينا وحده مضمونه تمسك لينا  المقصف ... 

وانا بسلم على خالو احمد  و بسألو من صحتو جا داخل ولد سلم على خالو احمد سلام حاااار... و خالو احمد كان بلوم فيهو انو طول الغيبه.. وهو ببرر ليهو انو جاري مع الشغل... و كان في دبي مشا يجيب بضاعه ... انتبه لي اني قاعده سلم علي ببشاشه زي الكأنو بعرفني من زمان و قال لي كيفك كويسه ...اما انا  سلمت عليهووو وراسي في الارض حتي حشمي م فتحتو ولا كلفت نفسي اقول ليهو الحمد لله  اكتفيت بي انو امد يدي و اسحبها .. ما كنت بقدر اعاين لي زول ما بعرفو  في عيونو وانا بسلم عليهوو... حتى لمن اتكلم مع زول غريب  بعاين في كل الاتجاهات الا عيون الشخص البتكلم معاي ... الولد قعد جنب خالو احمد ... و انا سلمت علي جدو في راسو و طلعت لي ناس براءه... سلمت عليها وعلى خالتو سلوى...نهله كانت نايمه... 

معاذ رغم انو كلامي قليل لكن كان بحبني شديد يمكن لاني كنت بميل للسمع اكتر من الكلام.. فكنت بسمع كل كلامو البقولو لي من غير ملل بالعكس بكون مبسوطه...جا داخل الولد عشان يسلم على ناس خالتو سلوى لقا معاذ بتونس معاي..وقف وبقا بسمع فبنا ... 

معاذ : كان شفتي يا مهاد... عندنا ولد كل يوم امو بتحشي ليهو فول.. ما بحشي اي شي غير الفول..

انا : عادي يا معاذ .. يمكن ما عندهم غير فول... انت خالتو سلوى بتحشي ليك كل يوم حاجه... لكن هو يمكن امو ما بتقدر تحشي ليهووو كل يوم حاجه مختلفه.. 

معاذ : لي ما بتقدر... ما تشتري حاجات زي ماما و تحشي ليهووو.. 

انا : ما كل الناس بتقدر تشتري.. يمكن ما عندهم قروش.. عشان كدا انت قول الحمد لله لانو انت كل يوم بتقدر تحشي حاجه جديده وغيرك ما بقدر.. دي نعمه مفترض تحمد ربنا عليها... 

معاذ اتأثر شديد و قال الحمد لله... قاطعنا الولد وهو بقول لي معاذ انا عندي ليك فكره حلوه... 

معاذ جرا ليهووو وهوو بكوورك وبضحك وبقول محمد جاااااااا...محمد جااااااا..

محمد شال معاذ وهو بضحك : عايز تسمع الفكره الحلو ولا ما عايز... 

معاذ بفرح : عايز... 

محمد : رايك شنو تصاحب الولد دا... وكل يوم ووقت الفطور تقول ليهوو انا بحب الفول اقسم لي من سندوتشك نص.. و انا بقسم ليك نص من سندوتشي .. و بكدا انت تكون ساعدتو من غير ما هو يزعل او يتحسس..و في النفس الوقت كدا هو حيكون مبسوط انو اداك حاجه بتحبها.. وربنا حيدييك اجرر كتييييير...فكره حلوه ولا ما حلوه... 

معاذ بفرح : فكرررره حلوه... شديد... 

محمد بقا يضحك و جضمووو وقال ليهوو.. اجري قول لي ناس ماما محمد جااا عشان اسلم عليهم... 

انا طوالي جا في بالي محمد ولد عمتهم... و بقيت بتزكر وسرحانه... دا محمد؟.. دا محمد البتتحكي عنوو الحكاوي والانجازات دييك كلها؟ البكون مستنيه متييين براءه تجيب سيرتو وتحكي لي بيهووو؟.. قطعت افكاري براءه الجات جاريه من هناك بتكورررك محمووووووووووااااااد جبت الابتوب؟ 

محمد وهو بضحك : وعليكم السلام  انا كويس والله و عمتك كويسه و بتسلم عليك... 

براءه وهي بتتكلم بي يدينها سرعه سرعه : الله يسلمها و يسلمك... و يسلم الاهل و الجيران والاصحاب وامه لا اله الا الله  كلها يا محمد عليك الله... جبت الابتوب؟ 

هنا صوت ضحكت محمد ملا المكان وقال ليها جبتو يا براءه... جبتووو هداك  في العربيه برااا ومدا ليها المفتاح.. هي طوالي ختفت الفتاح وجرت وهو  بضحك فيها.. 

جات خالتو سلوى قالت ليهو سألتك من الابتوب صاح..بتحسب في الايام.. كل يوم بتقول محمد بجي بكره محمد بجي الليله.. عملت لينا سافوته في راسنا دا...

براءه جات شايله ليها كيس و هي طاير من الفرح... قعدت في نص السرير.. وفتحت الابتوب  وهي بتقول لي محمد خاتيهو في العربيه اسي كان اتسرق..ولد مهمل خلاص.. الغريبه محمد كان بعاين ليها مبسوط و بضحك وهو بقول ليها غايتو الله يكبرك و يعقلك

خالتو سلوى : اريتها تكبر و تعقل يا ولدي..واشرت على.. بس كان شالت لي حبه من روقه مهاد دي تاني ما عايزه شي..و مشت تعمل عصير لي محمد.. 

انا اصلا ما كنت معاهم..كنت لسه بحاول اربط شخصيه محمد القدامي دي.. بي الحكاوي البتتحكي لي عنووو... ما وعيت الا بعد سمعت محمد بقول لي... بالله انتي مهاد؟... اشرت ليهو براسي بمعنى ايوا وانا مستغربه هو بعرفني من وين؟

محمد : انتي عارفه لمن عمتي سلوى قالت لي بت اختي قدر براءه بتشجع في امها تفتح مقصف في مدرسه ... الموضوع كان بالنسبه لي عادي شديد ماف حاجه جديده اي زول  ممكن تجيهو الفكره دي.. وبعدين المقصف دا شغل مواسم...يعني في الاجازه التلاته ولا اربعه شهور حتقعدو من غير دخل؟ 

انا هنا شعرت بي احباط ما عادي.. والدنيا ضاقت علي والحماس كلو اتلاشى في كسر من الثانيه.. حسيت انو كلامو صح وين الجديد..اتملكني احساس رهييب بالفشل.. و بقا في صوت جواي بقول لي انتي م حتنجحي.. لكن ما حسستو خالص انو كلامو اثر فيني ... ملامحي كانت هاديه و بارده شديد.. عكس اعصابي الكانت تالفه.. 

براءه رفعت راسها من الابتوب  : دا شنو يا محمد من متين انت بتحبط الناس بالطريقه دي ؟ 

قاطعتها  بكل برود و جمود.. قلت ليها كلامو  صح اي  زول ممكن تجهيو الفكره.. لكن ما اي زول بقدر يطبقها... وزي ما قدرت اعمل مشروع يوفر لي دخل 9 شهور سنويا.. ما بغلبني اوفر دخل التلاته او الاربعه شهور الهو بتكلم عنها دي... 

محمد كان بعاين لي و في وشووو ابتسامه عرييضه .. براءه وقفت  في السرير الهي كان قاعده فيهو  عشان تبقا مستواهو في الطول... هبشت جبهتو وقالت ليهوو محموم انت؟ البت طيرت جبهتك وختتك في فتيل.. بتتبسم مالك؟ 

محمد قعد يضحك وقال ليها ما اتبسمت ولا شي.. 

براءه : م اتبسمت شنو عيني لي ضرسك الاخير مسوس..

محمد وهو ميت من الضحك: ركزي.. ركزي مع الابتوب بتاعك دا .. خليني مع مهاد انا و هي بنتفاهم..و قبل علي... قال لي انتي اسمك مهاد منو؟ 

انا بي استغراب : مهاد كمال.. 

محمد  : صدقيني لو واصلت بي القوه و العقليه دي... عشره سنه بالكتير واسم مهاد كمال.. حيكون معروف بالنسبه للصغير والكبير... انا كنت قاصد احبطك.. عشان اشوف رد فعلك.. لانو انتي بالنسبه ليك المنافسه هي البتفشل اغلب المشاريع.. لكن انا بالنسبه لي الاحباط هو اساس الفشل ... بالعكس طول ما في منافسه طول ما انتي حيكون عندك دافع عشان تنجحي...حتحسي كيف بي طعم النجاح لو ما نافستي؟.. دي المعلومه العايز اوصلها ليك...ما تخلي زول يحبطك..و يقلل من افكارك.. خليك مقتنعه انو فكرتك ونظرتك للحاجه  مهما كان بسيطه والناس شايفاها تافهه..نفس الناس الكان شايفاها تافهه دي حتجي تنبهر بيك و تتمنى تكون مكانك لمن تنجحي و تبدعي فيها اتفقنا اشرت ليهو بي راسي بمعنى تمام... قال لي مهاد.. قلت ليهووو نعم... قال لي م تخلي زول شنووووو؟؟ قلت ليهو يحبطني و ابتسمت ليهو ابتسامه رضاااااا و امتناااااان... كل الاحباط الحسيت بيهو بي سببو  في لحظه محمد قدر يحولو لي طاااقه اجابيه كبييره... يعني بي كلمتيين قدر ينزل  معنواياتي الارض... و بي كلمتين تاني رفعهم السما...

براءه   : اسي في داعي تصرف العربي الكتير دا..م تقول ليها كلام الناس ارمي البحر و خلاص... انا قعدت اضحك.. ومحمد كورك لي خالتو سلوى قال ليها يا عمتي البت دي دايرنهاااا؟ ضحكت و قالت ليهو لا... اتلفت على براءه و قال ليها شكلي  حأرميك انتي البحر ما كلام الناس..

براءه ضحكت و قالت ليهو... ارميني البحر قايلني ما بعرف اعوم... 

خالتو سلوى وهي بتوزع لينا في العصير  : من متين بتعرفي تعومي... محمد قال ليها عارفها كضابه ساي. 

براءه : والله بعرف اعوم و اسي بثبت ليكم..

محمد : عايزه  تجيبي طش.. تعومي لينا فيهو ولا شنو..قالت ليهو اصبر و طلعت  

بعد شويه جات داخله شايله تلفونها و فاتحه غنيه (عومي يا وزززه اللمان بي.. والقلب هزااا اللمان بي) و بترقصصص وتعوم مع الغنيه ... 

نحن كلنا انفقعنا بالضحك... 

بعد شويه جا داخل خالو احمد و خالتو سلوى جابت الشاي... وبقو يتونسو و يهظرو مع بعض..انا بس كنت ساكته بعاين بعيوني بس  ما بشارك... خالتو سلوى سألتني عملنا شنو في السراير.. حكيت ليها ووريتها انو امي دفعت حتى العربون...بس بعد دا  عايزين زول مضمون يمسك لينا المقصف... 

محمد : انا بعرف وحده محتاجه شغل.. مره طيبانه شديد على ضمانتي.. بشوفها ليكم..

انا بفرحه : بالجد حتشوفها لينا؟

محمد بي ابتسامه : بالجد حأشوفها ليكم يا مهاد...شكرتو و قلت ليهم انا امشي بعد دا  الزمن اتأخر... 

خالتو سلوى : تمشي شنو في الليل دا م تبيتي..

انا : امي براها والله  يا خالتو... بمشي عادي البيت ما بعيد 

محمد : انا اصلا طالع عندي واحد صحبي منتظرني... كملي شايك و اقعدي حبه.. انا بوصلك.. قلت ليهو تمام و سكت.. 

فعلا اتونسنا حبه و طلعنا.. مشت معانا خالتو سلوى عشان تسلم على امي  ركبت قدام.. وانا ركبت ورا..في العربيه قام محمد سألني قال لي مهاد انتي القروش الفضلت ليكم من الحاجات البعتوها... قاعده في البيت؟.. قلت ليهو اي.. قال لي وكان اتسرقت؟.. عايني يا مهاد .. انتي كزوله بزنس م تخلي قروش كتيره  في البيت.. و ما تخليها جنيه سوداني.. يعني اي فلس احمر عندك حوليهو دولار عشان ما يفقد قيمتو.. خالتو سلوى قالت ليهو وكان الدولار نزل ... قلت ليها كان الدولار نزل الحاجات كلها بتنزل معاهو يعني السوق بطلع و بنزل مع الدولار .. قال لي الله يفتح علييييييك... اسي انا حأشيل القروش احولها دولار واخليها... عندي.. لمن تحتاجو ليها تديني تلفون تمام؟... قلت ليهو تمام.. وصلنا دخل معانا البيت سلمو هو خالتو  على امي... ومحمد شرح ليهااا و طمنها و شال القروش... وطلع دفتر شيكات من جيبو...كتب لينا شيك بالمبلغ.. واداهو لي امي.. شلت الشيك رجعتو ليهو قلت ليهو ما بحتاج...نحن واثقين فيك... 

محمد بضحك : مهاد..انتي حتكبري و حتبقي زوله ناجحه ان شاء الله.. لازم تتعلمي انو تكون معاملاتك مع الناس بي ورق موقع  وضمان.. مهما كان ثقتك في الزول قدر شنووو فهمتيني ...

شلت الشيك.. و ابستمت ليهووو قلت ليهو فهمتتتك يا محمد..كنت قاصده اقول اسمو... حسيت بإحساس حلو شديد وانا بقول فيهو  ما عارفه لي.. ولا عارفه انا مالي اصلا.. المهم اني مبسووطه..امي حنستووو عشان يشرب حاجه رفض كلو كلو... قال ليها انا اتأخرت... قالت ليهو معليش يا ولدي اخرناك اعفي لينا... قال ليهااا مهاد تستاهل كل خير العفو يا خالتي و سلم علينا و طلع.. 

______________

محمد بعد وصل خالتي سلوى البيت.. اتحرك على صحبو... 

رماح: جااااي ليي عليك الله... انت مواسيررررك دي م بتخليها كلو كلو... 

محمد بضحك : سلم كدي... لمن تخلي انت الاشتباكات انا بخلي المواسير...

رماح : م بسلم ولا بتاع.. اختاني.. تاني شفت اوعك ترفع لي سماعه تلفون تقول لي ارح نشرب جبنه.. 

محمد وهو ميت من الضحك : كل مره بتقول  كدا.. 

رماح وهو قايم : غلطان انا.. جبنتك دي اشربها مع الكراسي دي كويس... محمد وهو ما قادر يمسكو من الضحك... يا رماح عليك الله م تخرب القعده..

رماح قعد بي اخر نفس .. وولع ليهو سجاره.. وسألو اتأخرت مالك بقا يحكي ليهو بي مهاد  ..

محمد : والله يا رماح لو شفت ملامحهاا مريحه كيف... بت هاديه م بتتكلم خالص.. لكن لمن تجي تتكلم بتتكلم كلام موزون تحلف عمرها ما 16 سنه بس .. زوله واعيه.. و افكرها افكار زول  كبير...انا لمن عمتي سلوى حكت لي بيها جاني فضول اشوفها.. قادر تتخيل انو بت عمرها 16 سنه دايره تبدا مشروع.. و دارساهو من كل الجوانب... و عارفه هي عايزه تعمل شنو...انت عارف لمن جيت احبطها عشان اشوف رد فعلها.. ردت لي بكل هداوه رددد... لمن كيفتني... لقيت نفسي تلقائيا عايز اساعدها..

رماح : عايز تساعدها كيف؟ ماديا يعني ولا تشغلها معاك 

محمد : م عارف بس الحاجه العارفهااا انو انا عايز اساعدها واكون مصدر دعم ليهااا.. مهاد تستاهل تكون زوله ناجحه يا رماح... 

____________

انا كنت قاعده بحضر في الفيديو بتاع براءه... و بضحك... بعد شويه بقيت بتزكر في محمد و كلامو و تفاصيلووو...

اتزكرت قصه  وحده من صحباتنا اسمها رنا الولد البحبها ..كل ما يكون في امتحان.. لازم يشوفها قبل الامتحان بي ساعه.. بأخر شغلو مخصوص .. عشان يراجع ليها و يسمع ليها و يطمنها قبل الامتحان.. ... غمضت عيوني.. واتزكرت محمد الما هماهو انو اتأخر بي سببي.. و قال انا استاهل كل خير .. .. بقيت بتخيل لو كنت  انا مكان رنا.. و محمد البجي يطمني قبل الامتحان... زي م طمني الليله و اداني دفعه اجابيه و قال انا حكون زوله ناجحه واسمي معروف للصغير و الكبير ... ساعه تقريبا وانا قاعده مغمضه عيوني.. ما نفسي افتحهااا...

امي : مهاد نمتي...

انا : لالا...

امي خلاص قمي سوي لي شاي الله يرضا عليك.. فتحت عيوني وانا مبسووطه سويت لي امي الشاي.. و صليت العشاء وبقيت بقلب في في الفيس... لقيت منشور مكتوب فيهو  (مرات بكون نفسك حاجات كتيييره تحصل في حياتك...وبكون نفسك تعرف لو حياتك دي اخدت مسار معين غير المسار العايشو حاليا  حيحصل شنووو؟...)..المنشور فيهو كذا الف لايك... و كذا الف تعليق.. تلقائيا لقيت نفسي بعلق ليهو بي (انت بي يدك  تخلي اي حاجه انت عايزها  في حياتك تحصل.. و بي يدك انك تعيش حياه في المسار الانت عايزووو.. و بالطريقه الانت عايزها)...وواصلت تصفح عادي... فجأه جاني اشعار ( تم الرد علي تعليقك بواسطه... Mohamed Jad)...اتفاجأت.. العرفتو من التعليقات انو شخصيه معروفه.. عشان كدا نهائي ما  اتوقعت انو يرد من بين الاف التعليقات دي ... فتحت لقيتو كاتب لي (كيف؟)... رديت ليهووو  (بسيطه... ولنا في الخيااال حياااة.. )...

ما  اتوقعت انو يرد من بين الاف التعليقات دي ... فتحت لقيتو كاتب لي (كيف؟)... رديت ليهووو بي (ولنا في الخيااال حياااة.. )...و قفلت التلفون و نمت..صحيت الصباح لقيتو متفاعل على تعليقي بي لاف.. ومرسل لي طلب صداقه.. قبلت الطلب كأي طلب عادي...و قمت صليت.. وبديت نضافه.. وولعت الفحم و ختيتو في الكانون عشان اعمل الفطور...بقيت بعاين للفحم وهو بولع لحدي م بقا رماد..اتزكرت كلامنا بتاع امبارح عن الاحباط و كلام الناس...لقيت نفسي بولع في  فحمه صغيره... و ماسكه التلفون و بصور فيها وبتكلم في نفس الوقت و بقول (تقريبا بالنسبه لي اغلب الناس دي فحمه مولعه  عاديه... لكن لو عاينت ليها من جانب تاني... حتلقا انها بتوصل ليك رساله...خلونا نتخيل انو الفحمه دي بتمثلنا نحن كبشر... والنار دي كلام الناس السام المحبط و البعاني منو كتييير مننا...

في المرحله دي الفحمه يادوب بتطقطق و عايزه تولع... من الجانب التاني دي نفس المرحله البتكون فيها نحن سمعنا كلام محبط و بدا  يطقطق في راسنا والوسواس بدا يلعب بينا.. وزي م النار بتدت تاكل في الجزو الاسود من الفحم.. انت الاحباط والوساويس  بدت تاكل في عقلك و شويه وشويه حتبدا تشك في قدراتك في النجاح.. لحدي م تصل المرحله دي اللهي الفحمه ولعت و بقت حمراء بالكامل... هنا انت استوييت و بقيت عباره عن كومه كبيره بتاعت احبااااط..حتبدا تحس بي انك انسان فاشل.. ما قادر تنجز حاجه في حياتك.. عرفت لي حبوبتنا بقولو كلام الناس ارمي البحر..؟..عشان تطفي النار قبل نهايتك  تكون زي نهايه الفحمه دي.. كوووم بتاع  رماااااااد ...عشان كدا بي مجرد م تسمع كلمتين محبطات... حاول طفي النار بي مويه... و ادي نفسك دفعه معنويه و ارمي كلام الناس ورا ضهرك.. و شق طريقك... انت المستفيد من نجاحك  و انت المتضضر من فشلك.. بتدخل طرف تاني لي؟ و قفلت الفيديو على كدا)... 

جات امي لقتني واقفه قالت لي انتي لسه ي بت... دا كلو بتعملي في شنووو... النار راحت... خلاص شليي الحاجات و ارح سخني الاكل عند ناس سلوى... و نفطر معاهم...فعلا مشينا... فطرنا معاهم.. نهله كانت في المدرسه.. و معاذ في الروضه.. و خالو احمد شغال ...و براءه نايمه كالعاده.. فطرنا انا و امي و جدو.. خلصنا الفطور... و غسلت العده و عملت لي ناس خالتو سلوى الشاي... دخلت الغرفه عشان اصحي براءه زي ما خالتو سلوى قالت لي.... لقيتها واقفه في السرير... و شايله تلفوني و بتنطط...

انا :بسم الله مالك يا براءه..

براءه بفرح و هي لسه بتنطط : اجررررريييي تعالي شوفي دااااا.... لمن جيت لقيتها عملت صفحه بتاعت تك توك... و هي اصلا شاطره في امور التصميم و الدبلجه... و الحاجات دي..عشان كدا كان نفسها يكون عندها لابتوب... ظبطط الفيديو بتاعي ونشرتووو في كل المواقع ... خلال نص الساعه الفديووو عمل الاف التعليقااااات... و الايكااااات.. و اتشير بطريقه خرافيه...

انا بزعللل: براءه دا شنو العملتيهو دا... لي نشرتيهو.. 

برو : يا بت انتي عويره... دي موهبه.. عايزه  تدفنيها كدا سااااي؟... تصويرك مع صوتك حاجه رهيييبه شديد يا مهاد.. انا كبراءه الماعندي هم في الدنيا وانا بسمع في الفيديو اتحركت جواي حاجات كتيييييره شدييييد... صوتك مرييييح ووصلتي المعلومه بكل لطافه و بساطه... مهاد ما تبقي انتي النار وتولعي في روحك.. و ضحكت كان في كوز مويه جنبها رشتني بالمويه... و قالت لي انا لازم اطفيك قبل تبقي رماد... عشان تشقي طريقك في المجال دا.. زول بنصح الناس ما قدر ينصح نففسووو متخلفه خلاص.. انا قعدت اضحك... برو كانت عندها القدره تحول اي موقف لي نكته... و بتقدر تمتص غضب الزول في ثواني... حرفيا نسيت كل الزعل و بقيت بفكر في كلامها...و بقول لي نفسي ما فارق  اصلا ربط الاحداث و التصوير بالنسبه لي هوايه ما خسرانه شي يا مهاد مدام انتي بتقدمي حاجه مفيده...شبه اقتنعت بالفكره..

جاتنا امي قالت لي عمك سليمان قال بكره ضابحين لي مصطفى نجح في امتحان التخصص...لازم نمشي.. قلت ليها حاضر... واتلفت على برو قلت ليها برجاء ارح معاي.. قالت لي امشي اسوي شنو انا يا مهاد ...قلت ليها خلاص ما مشكله خليك...كان نفسي تمشي معاي لاني هناك بحس نفسي غريبه لكن ما   بقدر احنس او اجبر على زول على حاجه.. لانو انا الضغط بالنسبه لي حاجه مأذيه شديد... عشان كدا بحب اخلي الناس على راحتها...و مستحييل اضغط زول على حاجه هو ما عندو الرغبه فيها...برو ضمتني  عليها.. و قالت لي عارفه انك م بتحبي تمشي هناك.. لكن والله م بقدر امشي.. لو زياره عاديه ما عندي مشكله...لكن دي ضبيحه و لمه اهلك انا امشي اسوي شنو... بادلتها الحضن..وضحكت عشان م تتحسس..

عمي سليمان الكبير... اولادو مصطفى..ونمارق.. بعدو عمي الصادق.. اولادو موفق...و ميسر... وملك.. 

بعدين عمي مالك مسمنو ابو البنات عندو ميار..و رفا و رونق 

عمتي لطيفه...عندها بس كمال ولد واحد مسمياهو على ابوي... لانها بتريدو شديد 

واخر واحد ياهو ابوي ..

______________

تاني يوم جاتني برو من الصباااااح.. شايله كيس في يدها ... قالت لي دايره اعمل ليك عمليه.. 

انا بي استغراب : عمليه؟ 

برو و هي بتضحك : عمليه تحوويل .. دايره احولك من جعفر لي انثى..و طلعت من الكيس فستان و مكياجات... قالت لي عارفاك انا حتلفحي عبايتك وتبقي مارقه..قعدت اضحك واشرت ليها على الحبل... اتلفتت لقت العبايه معلقه... هي زاتا بقت تضحك.. 

استحميت و لبست الفستان.. لكن رفضت اعمل مكياج... وبرو بقت تحنسسس فيني... لمن خلاص قربت استسلم ليها.. جاها تلفون من محمد حمدت ربنا انو انقذني منها..قالت لي واااي ياخ سماعتي نسيتها في البيت.. و سماعه تلفوني كعبه... وردت وفتحت الاسبيكر...

محمد بصوت نعسان : برويتي.. 

برو بضحك : صباح الخير... 

محمد : صباح النور... غريبه مصحصه..لمن اضرب االصباح بجيني صوت هنيق تحلفي تقولي حمار... يطير النوم من العين من شده ما كعب... اسي انا ضارب ليك عشان النومه تطير..

انا لا اراديا قعدت اضحك..

براءه وهي بتضحك : حمار يرفسك يا محمد...تاني بس كدي ارفع لي سماعه تلفون... 

محمد :  رماح ببقا ليك شنوو.. انتو الجمله دي.. حفظوكم ليها ولا شنو...هو امبارح وانتي الليله... اسي اديني رقم مهاد و تاني رقمك زاتو بحظرو..

حسيت نبره  براءه وملامحها  اتغيرت لمن قال ليها كدا.. لكن ما ركزت مع الموضوع كتيير..كنت مركزه مع انووو محمد عايز رقمي ودا المهم انبسطت شديد..وبقيت مركزه مع مكالمتهم اكتررر...عشان اعرف هو عايز رقمي  لي شنووو؟...لكن امي كوركت لي طلعت ليهااا... وهم واصلو مكالمتهم عادي... 

براءه بجديه : عايز بيهو شنو رقم مهاد يا محمد؟ 

محمد : الله... دا جديد كمان ولا شنو.. عايزها تقابل حجه نفيسه.. المره القلت ليكم محتاجه شغل.. عشان يتفقو على موضوع المقصف.. 

براءه بضحك : اهاااا لو كدا تمام.. برسلو ليك واتس 

محمد وهو بضحك : افكارك زريييييبه.. وقفل في وشها الخط...جيت داخله لقيتها بتضحك.. قلت ليها مالك قالت لي قفل في وشي الخط... ابتسمت ليها لكن م سألتها اذا ادتو رقمي او لا... مع انو الموضوع بسيط عادي مممن اسأل لكن بالنسبه لي انا صعب... بعداك براءه طلعت بيتهم... ونحن مشينا ناس عمي... 

_______________

افتكرتها ضبيحه عاديه و خلاص... لكن طلعو عاملين موضوع... ماشاء الله.. حتى عاملين صيوان للرجال.. و صيوان للحريم... يعني الما عارف دي كرامه.. بفتكرهاااا مناسبه ... من شده ما الناس كتار... دخلنا امي بقت تسلم على الناس... وانا اقرب كرسي لقيتووو قدامي قعدت فيهووو...شفت اعمامي من بعيد.. قاعدين براهم التلاته... مشيت سلمت عليهم و باركت ليهم... زي و زي باقي الناس... يعني ما كان عندي احساس انو انا بت اخوهم... نهائي ما حسيت الاحساس دا.. حسيت اني ضيفه عاديه..جايه تبارك و خلاص... بعكس زمان لمن كنت بجي مع ابوي...كانو بقعدوني في رجولهم.. و تقريبا ما كنت بمشي برجليني دايما عمي سليمان بكون شايلني ولافي بي.. ولو قلت عايزه لبن الطير بجيبوهو لي... ضحكت و قلت سبحان الله.. جاتني عمتي لطيفه لحدي عندي واخدتني بالحضن...الوحيده الكنت بحس انها بالجد عمتي و بتحبني..حضنتني مسااافه وهي بتقووول لي الغاليه بت الغالي..انا تلقائيا لفيت دموعي جرت... مسحتهم لي.. و قالت لي اعفي لينا مقصريييين يا بتي وبقت تبكي .. كان نفسي اقول ليها انو حنيتك  دي براها بالدنيا... كونو بس انا لمن اجي بتقابليني بكل محنه و لطف ومتزكره ابوي.. دي. كفايه بالنسبه لي.. لكن م قدرت مرات كتيييره بكون نفسي اعبر عن الجواي... لكن م بقدر... اكتفيت بي اني ابوسهاااا في راسهاااا مسافه وامسح ليها دموعهاااا و ابتسم ليها... خلت كل الناس وقعدت معانا انا وامي و بقت تتونس و تتزكر في ابوي الله يرحمووو... وانوو عمر لي اخوانو كلهم بيوتهم... و بعد اتأكد انو اي واحد فيهم عندو ضل يلمو ويلم اولادو...  بدا يشتري في قطع الاراضي عشان يعمل بيت لي نفسو...لكن ربنا اخد امانتووو.. قالت لي ابوك عندو فضل علينا كلنا يا بتي... لو ما هوو ما كان في واحد فينا حيكون عندو بيت..سرحتتت مسااااافه وبقيت بتأمل في بيت عمي سليمان.. شبر شبر... كل حيطه  في البيت دا ابوي هو البانيهااا.. اقل شي ممكن يتقال عن البيت انو رهييب..بييت كبييير يشيييل اسررر ما اسره وحده.. لكن هو استخسر فينا اوضه نقعد فيها انا وامي.. طمنت روحي و قلت معليش كل شي لي خييير يا مهاد.. والمال دا كتيرو وقليلو رايح.. والحمد لله نحن اسي مستورين وما محتاجين لي زول... وما حنحتاح ان شاء الله

جو بنات واولاد اعمامي  كل وحده كانت اجمل من التانيه... سلمو علينا ومشووو... وعمتي جابت لينا صينيه الفطور بي نفسها و فطرت معانا... بعد الفطور همست لي امي قلت ليها نمشي بعد دا... عمتي حنسنتنا نقعد لكن اصرينا نطلع.. 

في المواصلات.. البت الجنبي كانت فاتحه تلفونها... بعد شويه..سمعت صوتي... (تقريبا بالنسبه لي اغلب الناس دي فحمه مولعه عاديه..الخ) دا الفديو بتاعي؟... فتحت تلفوني بسرعه.. لقيت كميه من المكالمات من بروو.. و لقيت كل مواقع التواصل بتتكلم عنووو..بإختصار الفيديووو بقا ترنددد... نزلت لي كميه من الرسايل.. و ططبااااات الصداقه...وكيه الشير كانت م طبيعيه... و تقريبا جاني الفيين فولو في الانستا والتكتوك...فتحت التعليقات.. كلها بتتكلم عن صوتي.. وعن فكره الفيديووو...واغلب الناس بقت تحكي قدر شنو هي كانت محبطه... و بعد شافت الفيديووو قررت تبدا من جديد... وناس تانيه كانت بتقول لي واصلي في المحتوى نحن محتاجين ليك... وواحد معلق انو صوتي براهو دفعه ايجابيه بغض النظر عن الفيديووو... و كميه تعليقات خلتني طايره من الفرح... 

دخلت الماسنجر... لفتتني رسالتين من محمد جاد فتحتها لقيتو كاتب لي.. (شكرا ليك مره.. )و (شكرا ليك للمره التانيه.. ..

وفي الواتس لقيت رساله من محمد.. عرفتو من البروفايل حقوو.. مرسل (مهاد يا مهاد)

دخلت الماسنجر... لفتتني رسالتين من محمد جاد فتحتها لقيتو كاتب لي.. (شكرا ليك مره.. )و (شكرا ليك للمره التانيه.. ) ..

وفي الواتس لقيت رساله من محمد.. عرفتو من البروفايل حقوو.. مرسل (مهاد يا مهاد)... رديت ليهو بلهفه..(اهلين محمد كيفك..).. ورجعت رديت لي محمد جاد... قلت ليهوو (مع اني م عارفه عملت شنو يستحق الشكر... لكن عفوا مره.. و عفوا ليك للمره التانيه.. ). دا كلو ونحن في المواصلات... وصلنا البيت زي الساعه ٢ ضهر...صليت وغيرت ملابسي.. واول حاجه عملتها رجعت لي برو بي تلفون.. ردت لي بسرعه وقالت لي جيتي... قلت ليها اي... قالت لي م تنومي انا جاياك هسي... وفي ثواني جات هي و نهله يكوركو من الشارع شفتي الفيديوووو؟ ...و كل وحده بتتكلم بي اتجاه... بقيت بعاين لي دي حبه .. و بعاين للتانيه حبه... كانو مبسوطين شدييييد..  تقريبا اكتر منيييي..وكل مره وحده تقرا لي تعلييق... ضحكت وفتحت تلفوني عشان اشوف محمد ردا لي او لااا..لقيتو كاتب لي العصر فاضين اجي اسوقكم بيت حجه نفيسه...المرا الحتمسك ليكم المقصف؟.. استغربت.. قلت مش هي المفروض تجينا بما انو هي المحتاجه شغل؟..تاني قلت ما مشكله نمشي لينا او تجينا واحد المهم كدا الامور ظبطط..وقبل ما اسأل امي زاتو رسلت ليهو فاضين انت بس رسل لينا العنوان و نحن بنمشي برانا... قبلت على مهاد و حكيت ليها.. قلت ليهااا ارح معانا قال لي خلاص تمام  امشي اكلم امي واديك تلفون ...نهله قالت لي انا زاتي ماشه... ضحكت قلت ليها طوالي... برو طوالي اشتبكت معاها قالت ليها انتي مش عندك قرايه يا بت الناس شوفي قرايتك... ما بتبارينا... نهله قال ليها قرررر ينفخك بمشي ماشه مع مهاد انا ما ماشه معاك... و طلعو وهم بتناقرو الاتنين...وانا بضحك فيهم.. مشيت اكلم امي قالت لي  خلاص نتغدى غدا بدري و نطلع عشان ما نتأخر.. قلت ليها تمام..زي الساعه 3 اتغدينا..  ضربت لي برو عشان اسألها جاهزه او لا... قالت لي انا جاهزه و ضربت لي محمد جاي علينا.. قلت ليها ما كان في داعي يجي  بنمشي بالمواصلات عادي ... قالت لي استغفر الله انا غايتو الله يصبرني معاك و قفلت في وشي الخط.. 

بعد شويتين.. سمعت صوت بوري قوي... و برو مسكلت لي... عرفت انهم جووو...طلعنا انا وامي سلمنا على محمد... قال لي دي شنو الحركات دي يا مهاد زعلت منك والله.. انتي بقيتي زيك وزي نهله و برو... قلت ليهو ما عايزه اتعبك معانا.. 

محمد : كونو حتشغلو حجه نفيسه معاكم دي  انتو قدمتو لي خدمه العمر يا مهاد.. وبعدين انا التعبتكم انا مفترض اجيبها ليكم لحدي عندكم.. لكن هي عندها ظروف م بتقدر تطلع بعد الساعه ٤ تاني من البيت.. اعفو لي.. 

امي ببشاشه : عادي يا ولدي الناس ظروف.. ماف تعب..وانا ابتسمت ليهو تأييد لي كلامها.. 

براءه كانت راكبه قدام..امي لمن فتحت الباب الورا وعايززه تركب.. كوركت ليها تعالي يا خالتي هناااا انا راجعه ورا ركبت قدام بس اشوف الدرج دا فيهو شنو...لقيت فيهو لبان..وقالت لي محمد زح كدا حبه خليني ارجع ورا  وتلبت ورا بي الفرقه البين الكرسين القدام بدل ترجع بالباب... محمد قال ليها القميص ابيض يا برووو ياخ وسختيهو بي شبطك دا ...

نهله : في اختراع اسمو باب على فكره.. 

بروو  : احلفي 

امي ضحكت وقالت ليها انا م عارفه الكبيره انتي ولا نهله يا برو.. برو ضحكت قالت ليها م تقولي ليها كدا يا خالتو اسي تقوم تطلع لي في راسي... نهله قالت ليها هو وينو الراس انتي كان عندك راس م بتعملي حركتك دي.. 

محمد : حتسكتو ولا انزلكم الاتنين؟... طوالي سكتووو..و برو بقت توزع لينا في اللبان.. 

محمد اول ما دور العربيه الرادي اشتغل والناس دي كلها سكتت... 

(للفقراء الذين أحصروا في سبيل الله لا يستطيعون ضربا في الأرض يحسبهم الجاهل أغنياء من التعفف تعرفهم بسيماهم لا يسألون الناس إلحافا  وما تنفقوا من خير فإن الله به عليم) 

_____________

لمن وصلنا حسيت انو محمد... فتح الجزو دا من سوره البقره مخصوص... عشان يوصف لينا حاله ناس حجه نفيسه بطريقه غيير مباااشره... يعني ناس بسيطه كل البساطه..عامله مطبخها من شواويل الخيش... و عندهم شجر ليمون و شجررر كتييير في الحوش لمن عامل ضل كبييير زي الراكوبه بس من الشجر .. خاتين تحتو سراير ... سلمت علينا بكل الحب الفي الدنيا.. برو همست ليها في اضانها يا خالتو الحمام بي وين ضحكت و اشرت ليها على الحمام... نهله قرصتها قالت ليها انتي غايتو اصلك م شافعه مرقه..انا قعدت اضحكت حرفيا برو جواها و براها واااااحد.. بتتعامل بكل تلقائيه و من غير حواجز... 

برو : اها دا نداء الطبيعه فيهو شافعه مرقه و ما شافعه مرقه..شافعه انتي دي و مشت الحمام.. عاينت لي محمد لقيتو بعاين لي نهله و برو و بضحك..

بعد شويه حجه نفيسه قطعت ليمون و كوركت لي وحده اسمها عسجد قالت ليها يا بت يا عسجد تعالي ... محمد جا معاهو ضيوف..وهي بتتكلم كدا جا ولد قاعد في عجله.. شكلو معزور ما بقدر يمشي..قال ليها امي تعاالي.. بعد شويه انتبه لينا.. سلم علينا زي سلام امووو بترحيب و محبه كبيره.. وبعد داك مشا بالعجله  على محمد سلم عليهو..وقال ليهو طولت شديد يا محمد .. قال ليهو شغل بس والله يا عمر لكن تاني ما بطول ان شاء الله .. عمر عمل نفس حركه اموو و كورك لي عسجد قال ليها يا عسجد تعالي جيبي مويه.. 

جات بنوته كدا في عمرنا او اكبر مننا حبه  جميله جمال ما طبيعي يعني سبحان الله مش بقولو جمال رباني... بس البت دي حرفيا جمالها رباني ... البعاين ليها مره تاني م بقدر ينزل عيونو منها... سلمت اول شي على محمد رغم انو كان واقف بعييد جنب الباب...مشت فينا نحن الواقفين جنبها.. واتجهت على محمد سلمت عليهوو بي لطافه كدا حسيت فيها تصنع... محمد سألها من الشغل ماشي معاها كيف.. قالت ليهو كويس والله هسي مفترض اطلع اتأخرت... قال ليها خلاص انا بوصلك.. بعداك يادوب اتزكرت انو نحن واقفين جات سلمت علينا... وقالت لي محمد نطلع؟..

محمد جا وقف جنبي انا وامي.قال لينا خلصو مواضيعكم. كلها و اتفقو انا نص ساعه و بجي اسوقكم.. واخد إذنا وطلع معاها.. بقيت بعاين ليهم وهم طالعين...وبقول اذا كان اخوها الولد الولد سلم علينا اول لانو نحن اقرب و محمد واقف شديد ... هي البت بكل وقاحه تمشي فينا و تسلم على محمد..وكمان عادي عندها انو يوصلها و براهم؟.. تاني قلت انا مالي.. 

برو بعد طلعت من الحمام.. شافت عمر جات سلمت عليهو.. وقعدت وهو دخل جوا... وحجه نفيسه جابت الجبنه.. بعدها العصير... و قالت لينا والله لو م قلتو متغدين كان ختيت ليكم غدا..يعني برغم انهم م عندهم شي لكين كريمين كل الكرم الفي الديناااا.. بدينا نتقاقش في موضوع المقصف...قالت لينا زي ما شايفين ولدي محتاج عنايه.. لازم اكون االساعه 3 في البيت.. لانو عسجد بتقعد معاهو الفتره الصباحيه.. وانا بقعد معاهو الفتره المسائيه و هي بتمشي الشغل... بيني و بين نفسي قلت و عسجد دي ما بتقرا يا ربي؟.. واصلت كلامها انا والله محتاجه للشغل دا.. لكن بما انها مدرسه خاصه ما ح اقدر اقعد نهايه اليوم لحدي م التراحيل دي كلها  تتحرك و اخر طالب يطلع لانو الزمن حيكون فات... و  ما بكضب عليك... الطلبه ديل بشترو نهايه اليوم اكتر من الفسحه حقت الفطور... ما عايزه اخسركم واقيدكم معاي.. 

امي :ولا يهمك بتتسهل... انتي اطلعي من اتنين ونص نحن بنلقا لينا حل.....اتفقنا على اي حاجه... و بعد داك قلبو ونسه..ومحمد لسه م جا.. 

____________

موفق: يا ميسر تعال شوف الفيديو دااا...

ميسر : اي شفتو ...اعلاناتنا محتاجه صوت وعقليه زي دي... يعني البت دي من مجرد  فحمه مولعه  قدرت تعمل جوطه قدر الليله و بكره في السوشال ميديا...

كمال : حتقدرو تصلو ليها كيف لكن..

ميسر :بحاول ادخل عليها بي اكاونت الشركه... المهم بتصرف 

____________

بعد ساعه الا تلت محمد جااا..حجه نفيسه  ودعتنا... و قالت لينا عليكم الله تعالو لينا ..قلنا ليها حاضر و طلعنا..امي قالت لي محمد نزلنا كلنا عند ناس سلوى.. وفعلا نزلنا و نزل عشان يسلم علي خالو... 

خالتو سلوي و خالو احمد سألونا حصل شنو... بدينا نحكي ليهم بالتفصيل... محمد قال لينا حجه نفيسه دي عندها ماشاء الله خمسه بنات متزوجات لكن وحده فيهم بتسأل من امها ولا اخوانها ماف..رغم انو اخوهم  عمر دا عمل حادث... و محتاج جلسات علاج طبيعي عشان يقدر يمشي... لكن ولا على بالهم... امهم رفضت تشيل قروووش من اي زووول... و قالت بتعالجو براها..قدر ما حاولنا معاها ابت كلو كلو وقالت الله في والله العالم بي حالنا انا متوكله وقرش ما بشيلو من زول...نحمد الله عمرنا ما نمنا جعانين..حالنا احسن من غيرنا في ناس اقل مننا و محتاجين ادوهم القروش دي... البشوفها و هي مبسوطه و بشوشه و بتستقبل الناس و بيتها مفتوح للكل بقول نايمه ليها على خزنه...كانت بتقول الداير يساعدني فيكم   بس  يشوف لي شغل.. عشان كدا انا كنت ساعي  تشتغل معاكم... لانها مره طيبانه و بتقدرو تستأمنوهااا... وفي نفس الوقت هي تكون شغاله مع ناس مضمونين...

امي :فعلا مرا طيبانه ربنا يفتحها عليهااا و يشفي ليها ولدها يا رب...ويديك الفي المرادك يا ولدي.. 

محمد : امين يا رب..ويفتحها عليك يا خالتي... 

انا دخلت لي معاذ في البرنده و خليتهم في الحوش... بقيت بتونس معاهو و بسألو من الروضه...وهو بقا يحكي لي انو هو والولد بقو اصحاب... و كل زول بقسم للتاني من سندوتشوو...نهله و برو كانو في المطبخ بعملو في الشاي.. عملوهو وجو قعدو معاي انا و معاذ.. جانا محمد داخل.. قال لينا من قبيل بقول انا ناسي شنو.. اسي اتزكرت دايركم تحضرو الفيديو دا انا اول ما شفتو اتزكرت نقاشي مع مهاد عن الاحباط و كلام الناس .. بعد تحضروهو  صدقوني تاني م حتشتغلو بكلام زول..وبكدا يا مهاد اكون اثبت ليك انو الحباط اساس الفشل ما المنافسه... وفتح الفيديو واذا به الفيدو بتاعي.... برو ونهله فكوهااااا ضحكهههههه.... 

برو وهي بتضحك : جاي تثبت ليها بالفيديو بتاعهاااا...

محمد وهو مستغرب : ما فاهم... 

نهله بضحك  : الفيديو دا عاملاهو مهاد... زاتهاااا يا محمد... محمد بقا يعاين لي وهو ما مصدق.. دا صوتك؟ 

برو : رهيييب صح اتخيل العويره دي.. زعلت لمن نشرتو انا لقيتو بالصدفه في تلفونها ... و ظبطتو و نشرتووو... 

محمد : طيب مقصف شنو العايزه تفتحيهو يا مهاد.. انتي هزيتي الميديا.. واصلي في المحتوووى دا.. الميديا في حد زاتها بزنس... يعني لو نجحتي في المجال دا حتدخلي دولارات...و في نفس الوقت حيكون في ناس كتيره استفادت.. حاولي طوري نفسك... 

نهله : حتشتهري يا مهااااااااد... 

انا : انا ما عايزه شهره... اسي وطو صوتكم ناس امي ما يسمعوكم.. عليكم الله انا ما عايزه زول يعرف انو دي انا... 

برو : شفت البت دي يوم حتجلطني...

محمد : خلاص م شرط زول يعرف انو دي انتي المهم تواصلي... 

انا : اصلا انا قررت اواصل في الموضوع كهوايه بغض النظر عن اي شي اصلا انا بحب اصور... فلو الناس حتسفيد ما عندي مشكله انشرها.. بس الموضوع يكون بيناتنا ما عايزه زول يعرف انو دي انا... 

نهله: على. الاقل طيب انشريهم بي مهاد كمال.. في ميه مهاد كمال غيرك.. 

محمد : نهله كلامها صح... اصلا ماف زول حيشك انو دي انتي لانو كلامك قليل شديد.. 

برو : قليل شنو معدوم عديل 

محمد بهظار : اسي انا ما مصدق انو دي انتي...خليك من الناس 

ضحكت و قلت ليهم لالا انا حانشرهم كدا بس من غير اسم... حتى صفحاتي ما عاملاهم بي اسمي... انا كدا مرتاحه... 

سكتو وما حبو يناقشوني كتيير.. محمد قال لي المهم تنشريهم..

________________

رماح اتصل لي محمد... قال ليهوو اها الليله وين... محمد قال ليهوو... مشيت وصلت مهاد وامها لي حجه نفيسه... قال ليهو مهاد مهاد مهاد... محمد انت ناسي انت اديت كلمه لي خالك و قلت ليهو انك داير براءه بعد تخلص قرايتها... صح براءه ما عارفه انك دايرهاااا... لكن اعمل حسابك انت اديت كلمه راجل... 

محمد : انت يا ولد راسك دا ما تمام... انا من يومي داير براءه... و ما حأفكر في غيرهاااا... 

رماح : انا نصحتك.. بعد دا انت حررر... اعمل حسابك انت ماشي على منحدر خطير....

____________ 

عدت الايام و محمد انقطع خالص... حتى قروشي كلم خالتو سلوى.. قال ليها انا حأسوق خالتو نجلاء واعمل ليها حساب في البنك.. واعرفها على.. واحد صحبي تاجر عمله متى ما احتاجت تحول قروشها... تتصل عليهووو... لاني حأنشغل شديد الفتره الجايه دي... 

كنت بشوفو متصل في الواتس.. وبكون نفسي ارسل ليهو لكن ما بقدر.. بي ياتو صفه؟.. محمد قطع كل السبل والاعزار البتوصلني ليهووو.. كنت بمشي لي ناس برو على امل اني اشوفو لكن ما بصادفووو.. فقدتو شديد  ورجعت زي زمان عايشه على حكاوي برو ونهله عنووو... و على شويه زكريات ومواقف  بغمض عيني نهايه اليوم واحاول اتزكرها و اعيشها من جديد..

نزلت تقريبا تلاته فيديوهات جديده بي دعم من برو الكان بتظبطهم لي وبي لمساتها بتزيدهم رهابه .. كل مره متابعني كانووو بزيدووو...و الناس بقت تنتظر فديوهاتي بفارغ الصبر... و ناس تانيه بتقترح علي مواضيع اتكلم ليهم عنهاااا... وناس بتطلب مني اشجعها... حسيت انو انا حرفيا بقدم في حاجه مفييد...

في يوم دخلت الانستا وانا بقلب في الرسايل ... لقيت رسايل من شركه الموفق والميسر للاعلانات... سألت امي قلت ليها انتي اولاد عمو الصادق... شركتهم اسمها شنو.. قالت لي تقريبا اسمها الموفق والميسررر على اساميهم...

قالت لي اسمها الموفق والميسر تقريبا على 

اساميهم..فتحت الرساله لقيتهم مرسلين لي ( صاحبه الصوت الرنان MK...نرجو منك قبول دعوتنا بالقدوم الى مقر شركتنا المتواضع...لنال شرف اللقاء بك.. وشرف التعرف على تلك الشخصيه انتي بهرتنا وابهرت الجميع) وتحت مرسلين لي اللوكيشن حق الشركه.. ضحكت و قلت سبحان الله الدنيا دي ضيقه شديد.. وبقيت بتزكر لمن امي كانت محتاجه ليهم وطلبت منهم واحد واحد يشوفو ليها شغل في وحده من شركاتهم  ان شاء الله في السكرتاريه او الحسابات ...لكن قالو ليها ما عندنا طريقه نشغلك معانا رغم انو امي زوله متعلمه و شاطره شديد...وغير شهادتها الجامعيه عندها شهاده بتاعت محاسبه الكترونيه...بتذكر قالت لي اذا كان اولاد عمك ابو يشغلوني بي شهادتي... الحيشغلني منو تاني؟ البلد دي عشان تمشي فيها لي قدام محتاجه واسطه.. ونحن  حتى الواسطه العندنا رفضت تشغلنا... في النهايه اشتغلت استاذه في مدرسه..

هسي الليله هم المرسلين لينا.. و طالبني طلب.. وما عارفين اني بت عمهم.. رسلت ليهم رساله عاديه بالدارجيه.. ولا كلفت نفسي اتكلم زيهم بالباقه و تكلف.. ( اذا قدمتو لي الدعوه دي عشان اشتغل معاكم في شركتكم الاعلانيه بعتذر..انا ما بقبل اشتغل تحت زول بحب اشتغل مستقله بزاتي  ... اما اذا كانت الدعوه عشان اعمل ليكم اعلان لي شركتكم في الصفحتي الشخصيه... فرسلو لي الاعلان وانا بنشرو ليكم بكل صدر رحب..دمتم بخير)..

_____________

موفق وهو بضحك : هسي انت زعلان مالك وجايط.. 

ميسر : زعلان مالي؟ كيف يعني زعلان مالي... نحن شركتنا ليها اربعه سنه معرووووفه للكل... تجي وحده بدت امبارح عشان عملت ليها فديوهين تلاته تقول لينا لو عايزين تعملو اعلان لي شركتكم انشرو ليكم في صفحتي الشخصيه؟... 

كمال وهو ميت بالضحك : مستفزه والله... لكن حلوه منها... البت واثقه من روحها شديد كيفتني.. 

موفق : شكلها ما محتاجه زاتو تشتغل معانا... لانها لو محتاجه قروش او شهره كان نشرت فيديوهاتها دي بي اسمها وخلاص...

كمال : اصلا واضح انها م محتاجه لزول.. البت قالت ليكم بتحب تشتغل مستقله..تاني في شنو 

ميسر : ما محتاجه.. ما محتاجه يلا في ستين نحن زاتنا ما محتاجين ليها... 

موفق وهو بضحك : الحاله ما محتاجين ليها... ميسر انت اول مره تطلب من زول غريب يشتغل معانا ... طول عمرك الناس بتطلب منك تشتغل معاك وانت بترفض..

كمال بضحك : عشان كدا انا مبسوط منها.. اتعاملت معاك زي الكأنها بتعرفك بنفس اسلوبك الاستفزازي البتتعامل بيهو مع الناس..وضحك قال ليهو جدعه والله شربتك من نفس الكاس البتشرب منو الناس..

ميسر ضحك وقال ليهو شربتني والله لمن اتشرقت.. ما اتوقعت ترفض كلو كلو..

_______________

عدت الايام... ونهله امتحنت تامن... ونزلت كورس انجليزي و برو نزلت دورات تدربيبيه بتاعت تصميم ورسم .. بتشجيع من محمد..مرات كتييره بكون نفسي اكون مكان بروو... الفي قلبي على لساني.. وزوله فرفوشه... و ماشايله هم للدنيا...واهم حاجه محمد ولد عمتي و داعمني في كل صغييره و كبييره...صح انا بتخيل نفسي مكان ناس كتيير.. لكن عمري ما اتوقعت انو في يوم حأتخيل نفسي مكان برووو بالزات...ويمكن السبب رئسي في اني افكر اخت نفسي مكانها  اني جربت دعم محمد.. و بقيت نفسي اكون انا  الوحيده البدعمها..

زمان لمن ازهج كنت بمشي ليهم.. هسى هم زاتهم بقو ما فاضين  .. فبقيت اغلب الوقت بكون قاعده براي مع التلفون لحدي م ازهج وانوم... 

في مره صحيت من النوم زهجانه شديد...وحاسه اني بالحد فاقده  محمد.. ما عارفه الخلاني فجأه اتزكر محمد جاد شنو..فمشيت فتشتو بين الدردشات لقيت دردشتو نزلت تحت شديد.. فتحتها لقيتو قرا اخر رساله رسلتها ليهو وما رد عليهااا... من غير ما اشعر رسلت ليهو انا مضايقه...رد لي في نفس اللحظه صلي ركعتين و اقري قران ... فعلا عملت زي ما قال لي و حسيت نفسي مرتاحه شديد... 

استمر الحال على كدا لحدي ما انتهت الاجازه...يا كل ما احس نفسي زهجانه... برسل لي محمد جاد ادردش معاهو... وهو برد لي في نفس اللحظه ما حصل يوم نهائي اتأخر علي في الرد.. يا بمشي ناس برو  عشان اسلم عليهم او عشان بكون عندي فيديوو عايزاها تظبطو لي..يا هم  كلو ما يكونو فاضين بجوني يتونسو معاي... ويحكو لي بي الدرمات البتحصل معاهم.. نهله قالت لي اتخيلي محمد المره الفاتت لمن جا  يرجعنا البيت من الكورس... تزكري بت حجه نفيسه النجفه ديك... لقيناها راكبه معاهو قدام ماشفتي برو اتخلعت كيف هي المره الفاتت ما شافتها.. فضحتنا مع البت.. 

 برو : نجفه ساي هي لكن.. انا لو  غتسوني في برميل بتاع كريمات ما بلحقا.. ما فضحتكم ولا شي محمد مشغل اغاني مصريه وانا ما بحبها... 

نهله وهي ميته بالضحك : عشان م بتحبي الاغاني المصريه  تقومي تفصلي تلفونو.. و تشغلي اغاني من تلفونك.. و كمان من دون الاغاني تشغلي ليها غنيه ( انتي سوي التسويييي..... انا محمد ما بخلييييي.... عشم ابليس في الجنه كان اخلي ليك زوووووليييي.) و تقعدي. تغني مع الغنيه...دخلتي. البت في ضفورها.. 

انا رغم اني حسيت بطعنه في قلبي... لكن ضحككككت من جواااا قلبي بالجد في حركتهااا.. وانبسط من ناحيه تانيه لاني كنت شامه البت شديد... 

برو : ولد عمتي يا زوله.. مالك انتي..

نهله : ولد عمتنا كلنا... كان بتحبي قولي بحبو... ما تقعدي تلفي و تدوري.. انا هنا بقيت مركزه بكل حواسي منتظره رد براءه... 

برو : حب شنو يا بت الناس.. انا بس البت دي ما ارتحت ليها..

حسيت بي راحه... و سألت نفسي وانتي يا مهاد؟.. جاوبت لي نفسي و اقنعتها اني بحب دعمو ووقفتو معاي وفاقداهم بس  ما اكتر.. 

_______________

عسجد كانت بتحاول دايما  تتقرب من محمد عشان القروش..  كانت واهمه ناس البيت انها شغاله في بوتيك... ومحمد كم مره وصلها البوتيك دا على اساس انها شغاله هناك.. لكن هي اصلا...بتقضيها حوامه من دا لي دا.. مستغله جمالها وبتوهم الاولاد انها عايزاهم لي قدام  و بتخليهم يصرفو عليهاااا... لحدي ما في يوم اتعرفت على وضاح عن طريق محمد... ووضاح حباهاااا...

________________

نزلنا تالته و دخلنا انا و برو الاتنين ادبي... بس هي فنون وانا دراسات اسلاميه... امي حولت القروش و اشترت كل الحاجات البحتاج ليها المقصف... ما كنا متوقيين القروش تجيب لينا كل الحاجات دي و تفضل كمان ... خالتو نفيسه كانت بتقعد لحدي الساعه اتنين و نص.. بعداك امي بتكون خلصت حصصها فبتمسك مكانا..لحدي ما المدرسه تقفل ابوابها واخر طالب يطلع... الحمد لله المقصف من اول شهر  دخل قرووش نحن زاتنا ما كنا متوقعنها.. ومن اول شهر حجه نفيسه قدرت تبدا لي عمر ولدها جلسات العلاج الطبيعي...

__________

بدت  امتحانات الفتره الاولى..كنت متحمسه شديد لي حكاوي رنا الاتعودنا عليها فتره الامتحانات عن خطيبها البطمنها ويسمع ليها قبل الامتحان..دايما كان بتكون مبسوووطه و فرحانه وهي بتحكي قدر شنو هي بتدخل جلسه الامتحان بي نفسيات عاليه شديد.. وانها بتقرا و بكون نفسها تنجح و تجيب درجات حلوه عشانو... بس اتفجأت بي رنا تانيه... رنا شاحبه... وزنها ناقص شديد و مطفيه...رنا بتحكي لينا قدر شنو هي تعبانه و ما قادره تواصل حياتها لانو ببساطه  خلاهااا... انتهت الامتحانات.. رنا جزو حضرتو و جزو كانت عيانه... النتيجه طلعت...ورنا الكانت بتنافس الأوائل درجاتها كانت في الارض...بعكس دراجتنا انا و برووو الكانت حلوه شديد الحمد لله ادتنا حافز انو نزيد ساعات القرايه... 

رجعت البيت... و سرحت في كم نفر في الدنيا دي زي رنا؟كتييييير شديد... طيب لي.. لي الزول لو ماعندو القدره يواصل مع زول يعشمووو... حسيت اني عايزه اقدم شويه دعم  لرنا والناس الزيها .. فتحت الكاميرا و بديت اصور (حصل حسيتو انو انتو مدمنين شخص معين وبتحبوهو حتى بعيوبو؟ ... شخص بتتعاطو من خلالو جرعات حياه عشان تقدرو تمارسو حياتكم اليوميه... بس للاسف الشخص دا طلع ما بستحق كل القيمه الانتو اديتوها ليهو لانو مشا و خلا فراغ كبيير في حياتكم... لدرجه انو انتو لحدي اسي ما قادرين تتعافو  وتملو الفراغ دا وحاسين بالضياع وانو الحياه ما عندها قيمه  ؟حاولتو تنسوووهو كتييير و ما قادرين؟.. انا متأكده انو  كتيييير منكم حيقول حصصصل... ما شرط الشخص دا يكون حبيب على فكره ممكن يكون صديق لانو الخذلان دا ما شرط يكون في العلاقات العاطفيه بس..الخذلان بحصل في كل العلاقات بغض النظر عن مسمياتها... فلو انت لسه بتحاول تنسى الشحص دا... انا جايه اقول بطل تحاول لانو انت ماحتنسى عارف لي؟ حأوريك لي..  اي واحد فيكم اكيد عندو جرحه او ندبه  قديمه عامله ليهو اثر في جسمو... طيب اضغط على الجرحه دي شديييد وجعتك؟ اكيد لا... طيب انت نسيت سبب الحرجه دي كان شنو؟ اكيد لا برضو... بنفس الطريقه انت ما حتنسي زول جرحك في ويوم من الايام... لكن حتتحاوز صدقني حتتجاوز...حاول صاحب ناس جديده.... وركز مع الناس البتحبك...حب نفسك وخت قائمه اهداف لي مستقبلك.. وخليك قريب من ربنا.. حتلقا نفسك بديت تشوف انو الحياه واسعه وما وقفه على زول.. حتلقا نفسك بطلت تفكر في الشخص دا.. وطالما العقل بطل يفكر فيهو معناها القلب بطل يستجيب ليهو.. وبقا زيو و زي الجرحه القديمه... اثرو موجود لاكن ما بوجعك...عشان كدا دايما حاول تتجاوز.. ما تحاول تنسى... وما تفرطو في مشاعركم لي ناس ما بتستاهلها... حبو نفسكم واتزكرو انو دايما  في فرصه حلوه مستنياكم بس انت كيف تصبرو ...)...لبست عبايتي و جريت لي برو عشان تشوف الفيديوووو...

شافتو وبقت تصرخ .. قالت لي  مهاد... انتي متأكده انك قدرنا؟... انا بحس بيك زوله كبيره والله..أم أم كدا 

نهله : هي ما كبيره هي واعيه لكن  انتي العويره و شافعه.. انا بقيت بضحك فيهم.. 

برو بضحك وهي بتطقطق اصابعينهااا وتفتح في الابتوب : خلينا نظبط الفيديو دا... وننزلو عشان نكسر الميديا... بعد داك بوريك الشافعه منووو.. وبدت تشتغل في. الابتوب...

انا كان نفسي  اعرف محمد بعد يشوف الفيديو دا رايو حيكون شنووو...يعني انا بنصح في الناس كيف تبطل تفكر في زول ما مديها قيمه.. وانا بفكر في محمد قعدت اضحك على نفسي...فتحت الماسنجر  اصلا كل ما افكر في محمد بلقا نفسي تلفائيا رسلت لي  محمد جاد... لفت انتباهي انو اصلا ما كان خاتي صوره بروفايل.. واسي خاتي صوره... طوالي دخلت صفحتو الشخصيه.. و فتحت الصوره... فإذا بها صوره محمد الما بغباني زاتووو

فإذا بها صوره محمد الما بغباني..نهله مدت راسها في التلفوني قالت لي بتعايني في شنو انتي مركزه كدا.. لقتني بعاين في صوره محمد ...عاينت لي بي استغراب و هي عاقده حواجبها.. 

قلت ليها سرعه سرعه وانا ببررر في موقفي : كنت ضايفاهووو عندي وما عارفه انو دا محمد لانو ما  كان خاتي صوره بروفايل.. هسي ركزت لقيتو مغير بروفايلو... فدخلت عشان اشوف الصوره لقيتوو محمد..وقبلت ليها التلفون عشان تشوف.. 

نهله بحيره : فعلا والله مغير بروفايلو قبل ساعه... لكن الغريبه محمد مستحيل يخلي بروفايلو من غير صوره.. يمكن عشان الشبكه ما كان ظاهره ليك... حتى عايني وفتحت لي صفحت محمد عندها.. اتفجأنا بي انو الحساب الهي ضايفاهو عندها والحساب الانا ضايفاهو عندي ما واحد...نهله قالت لي يا ربي يكون عندو صفحه تانيه بعرض بيها في القروبات بضاعتو البجيبها من دبي .. لانو حكا لينا انو بفتش ليهو في بتاع توصيل.. عشان في ناس  ما بتجي المحل.. بتطلب منو اون لاين..قلت ليها بكووون ما عارفه والله.. وسكتنا على كدا.. برو اصلا ما كانت مركزه معانا.. مركزه مع الابتوب...لحدي المسا هي شغاله في الفيديووو ... حرفيا  النتيجه  كانت مبهره وتستحق تعبها دا كلو..دبلجت صوتي في رسوم سوداء بتتحرك على خلفيه بيضاء...والرسوم بتعمل رأكشنات على حسب الكلام البقولو.. .. من رهابتو كنا متحمسين نشوف التفاعل حيكون قدر شنوووو...خالتو سلوى جات لقت حالتنا كالاتي.. انا متربعه في نص السرير وبنزل في الفيديوو... و نهله و برو كل وحده متكله فيني بي اتجاه والتلاته مادين راسنااا في التلفون وكل وحده بتلز في راس التانيه عشان تشوف.. 

خالتو سلوي : خشو جوا التلفون عليكم الله بعد دا... 

برو بضحك : في زول جوا.. بعد يطلع بنخش..خالتو سلوى قعدت تضحك و ضربت يدها بالتانيه و طلعت برا الغرفه... 

الفيديووو من اول ٥ دقايق التفاعل عمل تلاته الف.. ولسه ماشي زايد.. برو قعدت تضحك... قالت لي الفيديو دا الا يكون نزل بي لايكاتووو.. اصلو ما بتقنعيني انهم حضروهو في خمسه دقايق...نهله قالت ليها كيف ما ينزل بي لايكاتو الاعداد مهاد كمال... برو لبسهت نضاره امها حقت القرايه بفشخره زي الكأنها بتلبس في نظره شمسيه وهي بتقول  احم احم والمونتاج براءه احمد..نهله بقت تصفق ليهااا ... و هي ركبت في السرير وتشيل تدنقر  وتوزع في البوسات لحدي ما النضاره وقعت منها اتكسرت 

نهله وهي خاته يدها في راسها : امممممك...شفتي دي نهايه العواره يلا اتشهدي بس...برو لمت النضاره سرعه سرعه... و ختتها في كيس وربطتوو.. وشالت الكيس طلعت بيهو برا وجات زي الكأنها ما عملت حاجه قالت لينا انتو نضاره امي وين؟.. كانت في التربيزه دي قبل شويه.. شفتوها ؟..

نهله وهي بتضحك : نحن شفنا النضاره.. لكن ما شفناك وانتي بتكسريها... 

برو بضحك : بنشط ليك شهررر... وتنكري انك ما شفتيني زاتو...لحدي ما اشوف لي حل واصحها

نهله : ما شفتك شنو.. انا اصلا ما بعرفك انتي منووو؟.. ارح بس نشطي.. 

...انا متتت ضحك عاينت لي الساعه لقيتها ماشه على 9... قلت ليهم هييي انا انا ماشه اتأخرت..قالو لي اقيفي نقدمك.. قدموني الاتنين لحدي البيت معاهم معاذ ورجعوو.. صليت و شربت الشاي امي قالت لي اوعك تساهري في التلفون بكره عندك مدرسه.. قلت ليها حاضر.. مسكت التلفون عشان اظبط المنبه جاتني رساله من محمد (عمرك ما فشلتي في انك تبهريني يا مهاد  ..)انا كنت راقده قمت قعدت في نص السرير... ورديت ليهووو (يعني انت عارف انو انا.. انا؟ ) 

محمد : (عارف انو انتي.. انتي )..

انا :(طيب لي دا كلو..).. 

محمد :(لي دي خليها للزمن).. 

انا ابتسامتي حدها بقا اخرررر ضرس..وعديت الليل داك كلو ونسه مع محمد انا زاتي ما حسيت بي روحي وانا بحكي ليهو كيف برو ظبطط الفيديو.. و كيف جاتني فكرتو..ماسكت كلوكلو.. 

محمد:( يعني الواحد كل يوم بكتشف فيك حاجه جديده.. طلعتي  وناسه وروحك حلوه) رديت ليهو ( تصدق لو قلت ليك انا برضو هسي اكتشت اني بعرف اتونس ).. 

محمد : (بما انك اكتشفتي خليك كدا يا مهاد.. شاركي مع الناس في الونسه اضحكي وفرفشي ما تقفلي على نفسك..) قلت ليهو ( ما اظن أقدر.. انت حتكون شايفها حاجه ساهله.. لكن صعبه بالنسبه لي) 

محمد  حتقدري..زي ما قدرتي تشجعي امك وتعملو مقصف.. وزي ما قدرتي تخلي الميديا كلها تتكلم عن فيديوهاتك.. بنفس الطريقه حتقدري تكوني زوله اجتماعيه بس انتي كيف تحاولي.) قريت الرساله تقريبا عشرين مره و  نمت وانا ماسكه التلفون في يدي ولي اول مره انوووم من غير ما  اتخيل نفسي مكان زوول... لي اول مره انوم مبسوطه بي موقف حقي انا براي... من غير ما احتاج اتزكر مواقف ناس تانيه واتمنى اكون مكانهم.. لي اول  مره احب كوني مهاد.. 

________________

اصبحت الصباح كلي طاقه...خاته في راسي حاجه وحده بس محمد قال انا حأقدر ... بقيت بحاول اقعد مع البنات... تاني بديت اتونس حبه حبه..وبعد شويتين الموضوع قلب هظار... قدرت شويه شويه اطلع من الشرنقه الكنت عاملاها لي نفسي.. وبقيت زي الفراشه بتونس و بضحك وزوله اجتماعيه .. والفضل كلو برحع لي محمد الكنت بحكي ليهو تفاصيل يومي بالتفصيل الممل... وهو بشجعني اكتر و بقول لي  مش قلت ليك حتقدري..امي وخالتو سلوى وبرو ونهله... كلهم كانو مستغربين في التغير الحصل دا...لكن خالص  ما حكيت ليهم انو محمد السبب... فديوهاتي م وقفتها.. و في نفس الوقت ما كنت مهمله قرايتي... يعني كنت منظمه وقتي اي حاجه عندها وقتها... بقو يدخلو لي كتيير من الناس عشان اعمل ليهم اعلانات في صفحتي مقابل مبالغ محترمه بحولوها لي في حساب امي.. الكانت فامهه اني شغله تسويق بالتلفون.. ودي كلها عمولات... دا غير الدخل البدخلو لينا المقصف... يعني حياتي الحمد لله كانت ماشه سمن على عسل... 

_________________

امي و حجه نفيسه بقو صحبات شدييييد... والبيناتهم بقا اكبر من شغل.. وعشان يوم التلات في مدرستنا اجازه للفصل الادبي...كنت كل ما يكون ما عندي قرايه.. بمشي مع امي المقصف عشان اساعدهم... يوم حجه نفيسه جاتنا بتبكي... اتخلعنا قلنا ليها مالك... قالت لي امي يا نجلاء عمر بقااااا يقيييف...يا نحلاء  العلاج ماشي معاهو كويس... بي بكاها نحن زاتنا بقينا نبكي من الفرح...قلنا ليها ان شاء الله الفرحه تبقى فرحتين و تشوفيهو ماشي برجلينو 

_________________

موفق وهو بضحك : اسمعني ما تشوف لي MK دي رسل ليها بي اكاونت الشركه   قول ليها الموفق  بدور ليهو عروس... 

ميسر : موفق اختاني... واطرانا بالخير اسي جايب لينا سيرتها مالك... 

كمال وهو ميت بالضحك : اتخيل كدا تجي من الشغل زهجان و قافله معاك ... تطبطب عليك بي صوتها الحنين داك.. وتقول ليك كلو بهوون يا موفق.... 

موفق بي انبراش  : احيااااا يا كمال.. ما تقول لي يا موفق.. تقول لي بتهون يا فوقي... والله اتخيلت الموقف ساي.. قررت اقعد معاها في البيت واخلي الشغل...انا كان عندي صوت حنين زي دا في البيت البجيبني لي وش ميسر الحامض دا تاني شنو 

كمال : كبير كدا تقول ليك فوقي.. 

موفق : حلالي انت الحشرك شنو.... كمال قعد يضحك... وميسر ضحك غصب عنو و طلع خلا ليهم المكتب وهو بقول ليهم انا زاتي المقعدني معاكم شنو.. طالع ماشي لي مصطفى.. 

_____________________

رماح : عسجد.. كلمي ناس البيت.. انا والله زهجت.. واللف والدوران دا ما بنفع معاي..

عسجد : لف ودوران قصدك انا بتاعت لف ودوران يا رماح... 

رماح: وطي صوتك وانتي بتتكلمي ميه مره قلت ليك.. هسي نحن بنتناقش نقاش عادي... انا زول جاهز داير اجي بالباب.. عشان انا الحاسي نفسي بلف وبدور.. هسي انا قلت ليك انتي بتاعت لف ودوران؟

عسجد : رماح ما تكورك فيني..

رماح بزهج وهو بخت يدو في وشو  : اللهم لا اعتراض في حكمك.. يا ربي الصبر.. هسي البكورك فينا منو يا عسجد؟.. كل ما افتح معاك موضوع اني عايز اجي البيت تقلبيها مشكله... 

عسجد : يعني انا بتاعت مشاكل صح... عايز بي وحده بتاعت مشاكل شنووو... و شالت تلفونها و شنطتها عايزه تقوم و تطلع..

رماح قال ليها  بي اخر نفس عسجد لو فكرتي مجرد تفكير انك تعملي الحركه بتاعت انك تشيلي حاجاتك وتمشي تخليني قاعد زي الطرطور الناس كلها بتتفرج علي دي ماتجيني راجعه وريتك بس .. لانو نحن ما في وحده من مسلسلاتك التركيه البتحضريها ديك.. اللهم قد بلغت اللهم فشهد.. انتي حره بعد دا عايزه تقعدي و نتفاهم براحه  اقعدي.. عايزه تعملي فيها انك في مسلسل تركي وتتطلعي اطلعي بس م تجيني راجعه لاني ما مهند ولا انتي نور...واتكل على الكرسي و هو بعاين ليها عشان يشوفها حتعمل شنو

اتكل على الكرسي وهو بعاين ليها عشان يشوفها حتعمل شنو...عسجد حسبتها في راسها وقعدت وهي صاره ليهو وشها  بس ما عشانو... عشان ما عايزه تخسر  رماح الكل ما تكون محتاجه قروش بديها وما ببخل عليها على اساس هم في النهايه حيلمهم بيت واحد.. وهو اصلا عارف ظروفهم مسبقا من محمد الحكا ليهو بي حجه نفيسه وعمر ولدها  المابمدو  يدهم لي زوول لو دايرين  يموتو .. وعمرهم ما حسسو زول انهم محتاجين.. و على  الاساس دا كان بتعامل مع عسجد...ما عارف انها عكسهم تماما وبتحب القروش زي عيونها... ومستعده  تمد يدها و تسرق المهم بس يكون في يدها في قروش..

رماح ضحك وقال ليها شفتي لمن تسمعي الكلام بتبقي حلوه كيف بغض النظر عن صره وشك دي ...

عسجد : ما تقعد تتغزل و تعمل نفسك بتحب فيني  نحن ما اتراك زي ما قلت 

رماح وهو بضحك : خلاص اديني رقم اخوك.. و خليني ابقا سوداني واصيييل... واجي البيت من بابووو..

عسجد : يا ربي انا من الموضوع دا.. رماح انا في شنو وانت في شنووو.. انا لو ما عمر اخوي دا مشا برجلينو ما حأفكر في عرس..

رماح بقله حيله   : خير يا عسجد ان شاء الله بحصل كل خيير ... هسي مش مواصل في جلساتو.. وماشه معاهو كويس...

عسجد بحزن مصطنع : مواصل و بقا يقدر يقيف مسافه و يقعد تاني.. لكن القروش قطعت حنضطرا نوقف ليهوو الجلسات  .. عشان كدا انا هسي بفتش لي دوام بعد اطلع من البوتيك..

رماح : دوام  شنو البعد الساعه 8 ... عايني قومي  ارح.. ارح خليني اوصلك عليك الله .. الواحد يكون مزاجو راييق..ترفعي ليهو كثافتو ...عسجد قامت وهي بتضحك عارفه انو رماح اختو بعد المغرب مابخليها تطلع براها... اكيد هي م حيخليها تشتغل بعد 8 وهو اصلا معترض على شغلها بليل..عارفه انو زول متحفظ  شديد.. عندو الصح صح والغلط غلط.. جنو وجن الكذب.. لمن اتعرف عليها وبقا عارف نفسو عايزها لي قدام... قعدها هي ومحمد... قال ليها اسمعيني .. مش دا محمد صحبي واتعرفت عليك عن طريقو تتواصلي معاهو في حد الضروره الشديده بس .. قدامو بقول ليك وهو عارفني كويس .. قصه فلان دا صحبي.. وفلان دا ود جيرانا... ودا ود خالتي ودا اتربيت معاهو دي ما بتنفع معاي..وقتها محمد ضحك وقال ليها بي اختصار يا عسجد م تتنفسي.. رماح دا النفس زاتو عندو معاهو مشكله وما بنفع معاهو  .. قال ليك  يمين يمين.. شمال.. شمال.. تسمعي الكلام وانتي كاتمه نفسك.. واوعك تموتي بي كتمه نفس  لانو لو موتي حيقتلك تاني.. عشان موتي  قبل تسمعي كلامو للنهايه.. رماح حمر ليهو..وعسجد بقت تضحك... وهي اصلا ما فارق معاها كلامهم الاتنين.. هي عايزه منو حاجه معينه وبتعرف تطلعها منو كيف... رماح لمن مشا يدفع الحساب.. محمد قاال ليها عسجد ما عشان رماح صحبي.. لكن والله.. الله اداك راجل ما تفرطي فيهوو... انتي حتحسيهو كاتم على نفسك.. لكن دا كلو من حبو ليك.. و صدقيني ورا  اخلاقو الضيقه و كواريكو دي   قلب لين.. بس انتي اعرفي  كيف  تتعاملي معاهو... وتمتصي غضبو...

_______________

العلاقه بيناتنا انا ومحمد اتطورت شديد... ورسايل الماسنجر قلبت مكالمات... بقيت ما بعمل شي من دون ما اكلمو واخد رايووو... بقيت بهتم بي نفسي كبت... وحبيت نفسي اكتر بسببو...في يوم وانا بتكلم معاهو و بقول ليهو يا محمد والله انا زهجت من التاريخ دا... قدر ما احفظو ما بنتهي ممل شديد ياااخ...محمد قال لي  هو ما ممل انتي بتقريهو غلط .. شيلي كتابك و امشي لي برووو.. قولي ليها انتي اقري الدرس الفلاني وانا بقرا الدرس الفلاني.. وبعد كل وحده تقرا الدرس العليها... تحاول تحكي القصه ببساطه للتانيه... حتلقي انك لمن حكيتي ليها القصه ثبتي المعلومه عندك.. وفي نفس الوقت برو لمن تجي تقرا الدرس حيبقا ليها ساهل لانها مسبقا سمعت قصتو منك..وبنفس الطريقه انتي لمن برو تحكي ليك حتثبت معلومتها وحتسهل عليك انتي قرايه الدرس الجديد...وبعد تخلصو من باب حلو امتحاناتو كلها... وما تمشو تقلبوها ونسه... حددو زمن مثلا ساعه قرايه ونص ساعه ونسه...وحاولو ما تكرهو الماده وتختو في راسكم انها صعبه عشان م حتقدرو تقروها...وهو بتكلم معاي امي فتحت باب الغرفه.. انا اتلبشت وقفلت الخط ودسيت التلفون... امي عاينت لي. مسافه.. وقالت لي جنيتي انتي بتتكلمي براك؟.. قلت ليها بتوتر كنت بسمع لي نفسي... قالت لي خلاص تعالي اكلي ليك حاجه و طلعت .... انا اتحمست لطريقه محمد شديد...لبست لي توووب وكوركت لي امي قلت ليها ماشه لي برو اقرا معاها.. و طلعت سرعه سرعه قبل ما تقول لي اكلي و اطلعي..

 معاد فتخ لي الباب سلمت عليهو  ودخلت سلمت على جدو ... وقلت ليهو عليك الله يا جدو ادعي لي.. بعد داك دخلت لي خالتو سلوى و نهله في الطبخ.. سلمت عليهم و قلت ليهم برو وين قالو لي عامله فيها بتقرا... مشيت ليها لقيتها  متمحنه و ماسكه كتاب التاريخ.. و بتقول انا مالي و مال المهدي و عبد الله التعايشي.. عليك الله حررو الخرطوم دي  لي... اسي كان نكون مستعمرين ...الزول الصباح وهو طالع على المدرسه يفتح الباب كدا.. يلقا ليهووو ولد حلاتو  شعرو اشقررر عيونو ملونه قاعد في الكرسي وبقرا في الجريده.. بدل فرزدق اب جلحات البنصطبح بي وشو كل يوم الصباح دا...خالتو سلوى ونهله جو شايلين صينيه الغدا.. اشرت ليهم هسسسسوطلعت التلفون و بقيت بصور فيها وهي لسه مواصله.. العجب المواصلات وانا راكبه في كرسي الكمساري ابو حديده داك... اتكي على الحديده كدا واعاين بالشباك.. ما اعرف اعاين لي العيونو خضر ولا العيونو زرق ولا الشعرو بني ولا الشعرو اصفر... احييي بس اسي  كانت عرست لي اجنبي و جبت ليها شافع حلاتو عيونو خضر وخشمو زي العامل ليهو روووج... غايتو حرمتنا من المزز يا التعايشي انت وصحبك المهدي... نحنا فكيناها ضحكه هي لمن اتخلعت... قالت لينا انتو هنا من متين... 

خالتو سلوى وهي بتضحك : من كرسي الكمساري.. 

انا : وانا من الفرزدق اب جلحات.. 

نهله اصلا ما كانت قادره تتكلم من الضحك...

برو : اضحكو  انا القرايه دي اصلا خليتها ليكم... خالتو سلوى قالت ليها قدر القرايه يا يمه حالتك صعبه يا بتي الله ينجحك غايتو ... تعاالي  اكلي عشان تمشو تشوفو قرايتكم... فعلا اتغدينا و شرحت ليها طريقه محمد طبعا من غير ما اكلمها انو محمد القال لي...وبدينا نقرا... ما حسينا بالزمن ونحن بنقرا... لانو اصلا ما كنا حاسين انو نحن بنقرااا طريقه محمد بتخليك تحس انو انت حرفيا  بتتونس...دا غير شرح برو البضحك... و نكاتها البتدخلها في نص الشرح...

برو عجبتها الطريقه شديد لانو بنتشجع بي بعض قالت لي عشان  مواد الادبي كلها حفظ... نعمم الطريقه في كل المواد.. كل وحده تقرا حزئيه معينه و تجي تشرحها للتانيه.. نهائي ما كنت بديها فرصه تتونس وقت القرايه قرايه.. وقت الونسه ونسه... وحتى نهله لمن تجي تتونس بطردهااا.. 

___________

يوم امي قالت لي حجه نفيسه تعبت الليله... قلت ليها بكره م تحي المقصف اصلا بكره التلات مهاد بتساعدني.. قلت ليها يحيليها الحمل عليها تقيل... تشتغل النهاار و المسا ترجع... تقعد مع عمر... ما قاعده ترتاح... و ضربت ليها تلفون كفرت ليها و حنستها ما تجي.. قالت يا بتي انتي ممتحنه م تدخليني في زنبك.. قلت ليها بشيل معاي. كتابي.. و اصلا انا قريت الجمعه والسبت كويس الحمد لله... بعد تحانيس حتى رضت... 

تاني يوم مشيت مع امي المقصف...لقينا عسجد قاعده منتظرانا .. امي قالت ليها ما كان تتعبي هدي مهاد جات...سلمت علينا و قالت ليها بي اخر نفس عادي  امي اصرت اجي اساعدكم ..

فتحنا المقصف..و امي قالت لي عندي حصص يا مهاد كنت حأكنسلها لكن بما انو معاك عسجد  رصو الحاجات و جهزوهااا مع بعض ... لحدي ما اخلص واجيكم.. قلت ليها حاضر... هي مشت وانا بديت ارتب في المكان 

عسجد جرت الكرسي و قعدت بقت ماسكه تلفونها... وانا رصيت الحاجات كلها براي ...حاولت اتونس معاها حسيت بيها بتختصرني... قمت سكت.. بعد شويه جاها تلفون من واحد اسمو رماح بقت تتمايص ليهو.. و تدلع... بعد شويه قالت ليهووو... لي حولت القروش يا رماااح... انا كنت بقدر اوفر حق جلسات عمر قلت ليك بفتش في شغل...بعد شويه قالت ليهو يا رماح م تكورك فيني... وتاني قالت ليهو خلاص بشيلها بي اعتبارها دين ووقت ما القا قروش برجعها ليك.. و رجعت تتمايع معاهو تاني... وتحكي ليهو انو امها عيانه.. وانها اسي شغاله.. بي مجرد ما قفل.. رجعت لي واحد تاني اسمو خالد تقريبا .. بتتكلم معاهو وتضحك بي نبره مقرفه بعكس رماح الكانت محترمه معاهوو... قفلت من خالد ضربت لي واحد تاني اسمو ميسر و هكذا... الفسحه جات وهي لسه مستمره... من دا لي دا... مشيت كل الطلبه براي و بقيت م مركزه معاهااا... امي جات فطرت و رجعت لي حصصها تاني.. قالت لي الجدول مليان... بقيت واقفه في المقصف براي.. وكل مره استاذ يجي يقول عايز حاجه.. م قعد كلو كلو...زي الساعه وحده كدا.. قلت ليها عسجد انا ماشه اصلي معليش لو جا زووول مشيهوو.. و مشيت صليت ورجعت..نهايه اليوم ونحن بنحسب في القروش عشان امي تمشي توردها... حسيت انو دي مستحيل تكون دي القروش كلها.. يعني انا بعت للبنات و استلمت منهم القروش بي يدي... المبلغ دا بسييط مقارنه بالطلبه الاشترتو... تاني قلت يا مهاد استغفري..ما توهمي نفسك ساي بكون ياهو...بس انتي عشان شغاله براك حسيتي الناس كتيره.. وقفلت الموضوع على. كدا... في البيت امي قالت لي انتي يا مهاد الليله ما اشترو ناس كتار ولا شنو... الليله القروش دي م زي كل يوم...قلت ليها والله الناس كتييره..قالت يحليلها حجه نفيسه المره دي مبروكه والله..في اي شي يوم واحد بس ما جات القروش قلت...قلت ليها الله يديها الصحه والعافيه يا رب.. والله تعبانه.. اسي انا الليله عيوني ما قادره افتحها بالتعب.. هي كل يوم بتكون شغاله كدا.. ربنا يقويها... ومشيت اتكلمت مع محمد حبه ونمت...

__________________

الخميس المسا امي جاتني في الغرفه قالت لي  عمتك لطيفه جات معاها ولدها كمال... استغربت لانو اعمامي عموما كلهم بجونا من عيد لي عيد او في المناسبات... ونحن نفس الشي..يعني نادر ما نمشي لي بعض بدون مناسبه... طلعت سلمت عليهم...سلمت علي بحنيه كالعاده كل ما تشوفني بتبكي و بتبكيني معاها...فكتني بعد مسافه..مشيت غسلت وشي بعداك جيت سلمت على كمال.. جبت ليهم المويه و العصير... وقعدنا...سالتني من القرايه و ماشه كيف... و سألت امي من صحتهااا... كمال قال لي علميه ولا ادبيه انتي يا مهاد.. قلت ليهو ادبيه.. ضحك وقال دفعه يعني...قعدت اضحك ولي اول مره اندمج معاهم في الونسه شديد هم زاتهم حسيت بيهم مستغربين لانو التغير كان واضح في شكلي.. و في طريقه كلامي.. بعد شويه عمتو قالت لي امي مصطفى ود سليمان.. داير يخطب ملك بت الصادق... قلت اجي اكلمكم بي الباب عديل م بضرب ليكم تلفون...امي قالت ليها م بتقصري.. بعد داك بقو يتونسو الخطوبه متين و العرس و كدا..وامي قالت لي كمال عقبالك يا ولدي... قال ليهاااا امييييين يا عمتي المشكله انا الصغير يعني لو ما ديل كلهم اتخارجو ما عندي طريقه...وضحك قال ليها ما عندي حل غير اصبر.. امي ضحكت و قالت ليهو الله يديك بت الحلال البتسعدك يا يابه..بعد شويه اسمع ليك نهله و برو بكوركو... وبدقو في الباب 

نهله : يا مهاد افتحي السجم دا...قبل اغير راي ارجع بالكيكه دي واكلها براي.. 

برووو : يا خالتوووو نجلاااااء رجليني بردووو وانا واقفه... قمت عشان افتح الباب قبل يفضحونا زياده ... كمال قال لي خليك و مشا يفتحو.. فتح الباب كدا دخلو الاتنين وهم بقولو لي سنه سنه عشان تفتحي الباب لقو كمال في وشهم... كمال ضحك و قال ليهم اتفضلو... هم صبت فيهم مطره و بقو يعاينو لي بعض و يعينو لي وانا بضحك فيهم من بعيد شمتااااانه سلمو على كماال و دخلو سلمو على عمتي... و قعدووو.  عمتي قالت نحن نمشي بعد دا...

برو : تمشو وين نحن جاين نشرب الشاي..لازم تشربو معانا..

نهله بضحك : اي لازم تضوقو كيكتي.. اول مره اعمل كيكيه..

همست لي نهله  : الله يستررر من التسممم... كمال سمعني و قعد يضحك... وعمتو قالت لي نهله  خلاص بناخد خاطرك ونضوق الكيكه ... دخلنا ظبطنا الشاي بالكيك... وعندنا بسكويت رصيتو و برو كبت  الشاي...

امي : تسلم يدك يا نهله الكيكه حلوه والله..

عمتو : حلوه شديد والله... كمال ولدي دا م بحب الكيك والسكريات  لكن  الليله اكل كيكتك دي.. 

كمال بهظار : هسي لو ما كان فتحت الباب سرعه سرعه.. كان رجت بالكيكه واكلتها براهااا..ما كان لحقنا ضوقناها..برو قعدت تضححححححك لمن شرقت  اصلا التفاهه دي بتموت فيهااا.. نهله اتحرجت وما عرفت تخش وين.. عمتو قالت ليهو وهي بتضحك يخسي عليك يا كمال احرجت البت...

امي زادت الطين بله وقالت ليهو هي ما كان رجعت بيها كان اكلتها جنب الباب.. نهله جنها حلويات...كمال ضحك و قال ليها عشان يخفف عليها الاحراج الكيكه حلوه والله تسلم يدك..نهله ضحكت بي انبساطه وقالت لينا بالهنا يا جماعه...كمال و عمتو شربو الشاي و اتونسو حبه بعد داك طلعو...نهله قالت لينا تووووووبه تاني انا افتح خشمي دا بخيتووو عديييل... 

وانا بضحك : بركه.. عشان تاني تخلي الكواريك من راس الشارع

نهله : تووبه قلت ليك.. مش خشمي دا اهاااا.. برو ضحكت و قالت ليها خلينا من خشمك.. من متين عندك ولد عمه ظريف كدا... انا بعرف مصطفى.. والكريه الاسمو ميسر داك... حكيت ليها انو دا مسمينو على ابوي وحيد امو وكدا.. و اتونسنا حبه بعد داك طلعووو.. 

__________

تاني يوم امي قالت لي اجهزي ما ظريفه لازم  نمشي نبارك لي ملك و مصطفى الليله الجمعه كلهم بكونو في البيت الكبير ... قلت ليها تمام ضريت لي محمد صبحت عليهو واتكلمت معاهو حبه وكلمتي اني ماشه... لبست لي  فستان..والمكياج اصلا عندي قلوس عملتو و طلعنا..

لمن صلنا لقينا كمال جنب الباب رحب بينا و قال لينا اتفضلووو اتفضلووو... دخلنا لي عمتو لطيفه و نسوان اعامي جوااا... سلمنا عليهم و باركنا ليهم و قعدنا... عمتو لطيفه قالت لي خشي للبنات جواااا يا مهاااااد ملك صحباتها الليله عاملين ليها قعده... قلت ليها خليها مع صحباتها علي راحتهم.. قالت يا بت انتي عويره ومسكتني من يدي قالت لي تعالي..و دقت ليهم باب الغرفه.. اتفاجئت بي عسجد الفتحت لينا الباب.. وعمتي القالت ليها بي بصغيه بتدل على انها بتعرفها عليك الله يا عسجد دخلو مهاد دي معاكم جواااا

وعمتي القالت ليها بي بصغيه بتدل على انها بتعرفها عليك الله يا عسجد دخلو مهاد دي معاكم جواااا وخلتني مع عسجد و مشت لي ناس امي  ... عسجد لمن شافتني حسيت بيها اتخلعت قال لي مهاد انتي بتعرفي ملك من وين؟ قلت ليها ملك بت عمي.. عاينت لي من فوق لي تحت وقالت لي  انتي..بالله انتي بت عم ناس ملك وميار ورنا ورونق يعني ..؟ ابتسمت ليها بالقوه يعني بت بالجد مستفزه.. قلت ليها اي انا بت عمهم وزحيتها ودخلت... لقيتهم ما خالين لبس ولا خالين مكياج يعني  حرفيا تقول انا القاعده في البيت وهم الجايني ضيوووف..سلمت علي ناس رنا  و باركت لي ملك و قلت ليهم عقبالكم... كلهم قالو لي امييييين بصوت واحد .. بعد شويه ملك بدت تعرفني على صحباتها وتعرفهم علي.. كانو اربعه بنات معاهم عسجد...ونستهم حسيتها ما بتناسبني... وزهجت شديد كلامهم كلو ماركات ومطاعم ...حسيت اني ما مرتاحه اضايقت شديد..وفي نفس الوقت كنت مستغربه و بقول... عسجد دي ما نفس الطبقه بتاعتهم قادره تتعايش معاهم كيف اذا كان انا بت عمهم ما قادره .. و بتمشي الحتات دي بي ياتو قروووش.. وحتى لبسها رهيب وواضح انو ما من السوق البنشتري منو نحن دا .. سبحان الله رنا  تقول قرت افكاري.. قالت لي عسجد.. يا عسجد انتي بلوزاتك و فساتينك دي بتطلبيها من وين... قالت ليهم من محمد جاد...كلهم قالو ليها عشان كداااااا رهيبه.. و بقو يتكلمووو عن رهابه حاجاتو...يعني انا عارفه انو محمد عندو محلات ملابس معروفه لكن ما قيلاها معروفه للدرجه دي..

رونق : محمد جاد في حد زاتو رهيب خليكم من محلاتو... 

عسجد : رهييب و دمو خفيف شديد..وحده من صحبات ملك قالت ليها و انتي خفت دمو عرفتيها من وين..عسجد ردت ليها قالت ليها محمد دا صحبي شديد يا بت انا وهو كدا ... بمشي المحل بشيل العايزاهو وقت ما تجيني قروش بدفع ما بيناتنا حساب... حسيت نفسي عايزه اقطع ليها اصابعها واديهم ليها في يدها...كلامها دا ولع فيني نار... وقدر ما اصلا انا بشمها شميتها زياده.. ملك ضحكت و قالت ليها ميسر اخوي ما سمعك وانتي بتتكلمي عنوو... رنا قالت ليها بهظار عرفيني على محمد عشان ما افتنك معاهو... عسجد اتلبشت و بقت تعاين لي.. انا طوالي ربط الحدث بي يوم المقصف... بالله ميسر الكان بتتمايع ليهو في التلفون دا ياهو ميسر ود عمي سبحااااااان الله كل يوم بكتشف انو الدنيا دي اضيق مما اتخيل... يعني كان بتتكلم قدامي بي كل الأريحيه  الفي الدنيا مستبعده تماما انو البتلعب عليهو دا ممكن يكون ود عمي...ما عارفه جاتني الجرأة من وين ورفعت ليها حاجب واحد و عاينت ليها بي ابتسامه مستفزه عشان اثبت ليها انو القصه وقعت لي... يمكن لو ما كان جابت سيره محمد ما كان عملت ليها الحركه دي و مشيت الموضوع عادي..

بقا في توتر بيناتنا و نظرات متشاحنه...الناس كلها بتتونس الا انا وهي..بعد شويه عمتو لطيفه جابت لينا الفطور.. طلعت برا عشان اغسل يديني جات لاحقاني...

عسجد بتوتر : مهاد عليك الله متجيبي سيره لي ناس ملك...انا والله كلهم بقضي بيهم زمن بس ما اكتر .. لكن ميسر جاده معاهوو... واسي حأقطع علاقتي مع اي ولد تاني.. اي زول بغلط.. وانا االشيطان لعب بي... 

انا : عايني انا كل الكلام البتقولي فيهو دا ما بهمني.. بتهمني حاجه وحده بس... محمد يطلع برا دايره قذارتك دي.. جاده معاهم ما جاده معاهم م بخصني كتير.. لو عايزاني الم خشمي علي لمي نفسك من محمد.. ومشيت خليتها واقفه... ما عارفه الكلام اترتب كيف ولا عارفه القوه دي جاتني من وين...الحاجه العارفاها اني مبسوطه من نفسي... 

بعد الفطور صحبات ملك عملو قعدتهم بتاعت الجبنه..خليتهم بتونسو... ورسلت لي محمد (محمد  اذا انا ماسكه على زول زله.. و هددتو بيها.. لكن تهديد لي مصلحه زول تاني.. انا غلطانه).. 

محمد  انتي حاسه بالزنب؟) رديت ليهو (لا) قال لي ( يبقا انتي ما غلطانه )... حسيت بي راحه وقفلت التلفون لانو صحبات ملك قالو طالعين بعد دا سلمت عليهم.. ملك ادت تلفونها لي عسجد قالت ليها هاك ميسر عايزك في التلفون وقال ليك م تطلعي معاهم هو بوصلك.. ومشت هي ورنا ورنق يقدموهم... بقينا قاعدين انا و عسجد في الغرفه برانا .. وعسجد بتتكلم مع ميسر و بتضحك.. بيني و بين فسي قلت هي طايقه ميسر دا كيف عليك الله... طلعت مشيت كلمت امي قلت ليها نمشي انا زهجت و عندي قرايه... قالت انتظري اعمامك معاهم رجال بعد يمشو بنبارك ليهم و نطلع.. قلت ليها تمام ورجعت الغرفه..اول م دخلت حسيت بي عسجد ملبوشه وبدس ليها في حاجه في شنطتها...ما اشتغلت بيها كتير..هي عاينت لي عين ما فهمتها و طلعت خلت لي الغرفه... بعد شويه جوني ناس ملك قالو لي امك بتناديك قالت ليك تعالي سلمي على اعمامك.. فعلا مشيت سلمت عليهم و قلت لي مصطفي ربنا يتم ليك على خير.. و لي موفق و ميسر عقبالكم...طلعنا من الصالون قلت لي عمتي يلا نحن ماشين... عمتي حلفت الا نتغدا ونطلع بعد الواطه تبرد اتحججت بي القرايه وقلت ليها الايام جايه بنجي .. قالت لي خلاص كمال بوصلكم بقت تكورك يا كمال.. جو طالعين ليها موفق و ميسر قالو ليها كمال ماف..انا طوالي  قلت ليها ماف داعي بنطلب ترحال...ميسر عاين لي بي استنكار وقال لي انتي عارفه اذا عايزه ترجعي من هنا لي بيتكم بي ترحال بكم ولا بتتكلمي ساي ؟ انا اصلا موصل صحبت ملك ما مشكله يعني بوصلكم في طريقي.. 

رديت ليهو بي برود : بما اني جيت من بيتنا لحدي هنا بي ترحال اكيد عارفه بكم... فشنو سعيك مشكور...وفتحت تلفوني طلبت الترحال.. ورجعنا البيت.. 

______________

زي المغرب كدا كنت نايمه صحيت مخلوعه بي صوت جوطه وكوارييك..جريت من غير ما ألبس لي توب.. لقيت عمي سليمان بكورك في امي و بقول ليها دي تربيتك يا نجلاء.؟ دي ولاده دي؟.. بما انها سرقتنا نحن؟ ما بعيد تكون بتسرق براااا؟.. وامي بتبكي و بتقول ليهو بتي ما بتمد يدها على حاجه زووول؟ و عمي الصادق بقول ليها  تخشي تناديها تطلع القروش والدهب السرقتهم ديل ولا اخش اقتلها ليك جوا وموفق ماسكو بالجلاله...انا بقيت ما فاهمه شي... قلت لي امي قروش شنو ودهب شنو يا امي.. عمي مالك قال ليهم انتو بتسألوهم لي شنو خش يا ميسر فتش البيت جوا... 

كمال مسك ميسر وقال ليهم استهدو بالله يا جماعه..تفتشو شنو... اقعدو براحه خلونا نفهم الحاصل و نسمع مهاد...ميسر لزاهوو وقال ليهو عليك الله يا كمال فكنا من مثالياتك دي ودخل البيت جوااا.. كمال دخل وراهووو وجا طالع شايل ليهو توب.. مداهو لي.. انا يادووب ركزت اني طالعه بي هدوم البيت و حالتي بالبلاء... بعد شويه ميسر طلع وهو شايل ليهو كرتونه فيها زرم بتاعت قروووش... يعني سبحان الله صحي المصائب لا تأتي فرادا.. امي امبارح من دون الايام نا وردت قروش المقصف  ...انا ختيت يدي في راسي وامي طوالي اصلا اغمى عليها..جريت عليها وانا ببكي...ميسر جاني وجدع لي الرزم في وشي.. قال لي يلا يا شاطره طلعي الدهب...

كمال  :  ميسر انت جنيت عمتي واقعه وانت بتقول ليها مرقي الدهب.. ياخ ينعل ابو القروش ياااخ... ورفع امي  في السرير... مصطفى قاس ليها نبضها ورش فيها شويه موويه لحدي ما صحصحت.. قال لي امشي جيبي مويه فيها حبه سكر و ملح.. جبت المويه شربها ليهااا.. والباقين بتفرجووو...اعمامي قالو لي قومي يا بت مرقي الدهب نحن ورانا شغل... قلت ليهم انا ما شفت لي دهب ولا شفت لي قروش.. 

ميسر وهو بأشر على رزم القروش : ودي شنو من متين انتو عندكم قروش لمن بتختوها في كرتونه؟... 

انا بكواريك : انا ما مجبوره ابرر ليك... انا ما شفت قروشكم ولا شفت دهبكم.. امشي شوفو نفسكم وديتوهم وين... عمي مالك طوالي اداني كف قال لي ما تعلي صوتك... حراميه و كمان عينك قويه.. داير يضربني تاني موفق مسكو قال ليهو ابوي من متين بتمد يدك على النسوان...بقيت اكورك بهستريا...فكو خليهو يضربني..ابوي لو كان عايش ما كان في واحد فيكم جا وقف الوقفه دي ولا اتجرأ يمد يدو علي... لكن انا ابوي مات عشان كدا اخدو راحتكم...الداير يضرب يضرب.. والداير يقول انا حراميه يقووول... اقول ليكم حاجه اسجنوني عديييل امشو افتحو فيني بلاغ ... انتو اعمام انتووو؟ ... بتعرفو عني شنو لمن بتتهموني بالسرقه؟... لو اصلا كنتو بتسألو مننا كان عرفتو انو القروش دي قروش المقصف الفتحناهو عشان نقدر نعيش منو ومفترض نوردهااا امبارح... 

انا كمهاد مقتنعه بي حاجه وحده بس ماف حاجه بتدوم.. هدا ابوووي البهزو ما كان برميهووو وكلكم عارفين اني اتولدت وفي خشمي ملعقه من دهب لدرجه انتو زاتكم كنتو بتحترموني وانت يا عمي الاهسي ادتني كف.. كنت بتشاكل البرفع صوتو علي ... هسي وينا القرووش؟ وينو ابوييي؟...ابوييي مات.. و القروش راااحت... وفتحت ليهم الباب قلت ليهم امي دي تعبانه عايزه ترتاح...

عمي سليمان : بتطردينا؟ 

انا ببرود : انا ما طردتكم...لكن انتو جاين عشان قروشكم والدهب ما جاين عشانا... وهسي قروشكم و دهبكم ما عندنا.. ماف داعي تطولو الزياره... طلعووو وهم بكوركووو... طلعت وراهم واانا شايله كرتونه القروش كشحتها ليهم وقلت ليهم ان شاء الله لمن تموتو يدفنوكم معاهااا... ميسر قعد يكورك قال لي بيناتنا المحاكم.. قلت ليهو اعلى. ما في خييلك اركبووووو.. وقفلت الباب... 

_____________

موفق : القروش دي اغلبها فكه يا ميسر.. انا حاسي انو انتو ظلمتو مهاد...بالجد دي شكلها قروش المقصف.. وبعدين ملك قالت دي ما القروش الكانترفي الدولاب... 

ميسر : عاين عسجد قالت لي انا جيت داخله الغرفه لقيتها ملبوشه وبتدخل حاجه في شنطتها... و ناس رنا وملك ورونق قالو لمن جو يقولو ليها امك بتناديك لقوها في الغرفه براهااا... وبعدين يا موفق صحبات ملك ديل كل مره بجو ما حصل فقدنا حاجه وماف زول غريب غيرهااا... 

كمال : غرييب؟ كمال البتقول عنها غريبه دي بت عمك.. انا غايتو مع موفق.. القروش دي ظاهر عليها قروش مقصف.. وبعدين هي الحاله الهي طلعت بيها مخلوعه دي ما حاله زول سرق.. البسرق دا بكون متوتر و متوقع اي حاجه تحصل.. 

ميسر: ممكن عادي تكون باعت الدهب.. وشالت القروش كلها فكه..وباقي القروش و الدهب ودتو اي مكان تاني ودا كلو تمثيل... هي لاقيه تاكل لمن تعمل ليها مقصف.. 

كمال وموفق قالو ليهو نحن الموضوع دا طلعنا منووو.. انت واعمامي بطريقتكم مصطفى زاتو قال ما عندو شغله بيكم... 

__________

عسجد بدلع : رماح ممكن اطلب منك طلب؟ 

رماح بضحك : ودا سؤال برضو... 

عسجد : صحبتي عايزه تبيع دهب امهااا عندهم ظروف ... وخايفه تمشي السوق براهااا.... وحتى لو مشت براهااا القروش كتييره شديد خايفه تتفق مع بتاع عربيه او امجاد يغدر بيها.. وما عندها زول.. ممكن نساعدهااا 

رماح عاين ليها بحب : بختي بيك والله ..

رماح وهو بعاين ليها بحب : بختي بيك والله .. وضحك وقال ليها بما انو نحن ماشين محل دهب و كدا يعني.. ما نفسك نشتري دبله بالمره واجي البيت...

عسجد : رماح انت ما ملاحظ انو نحن كل قعده لازم نفتح الموضوع دا...وكل قعده لازم ازكرك انو اخوي محتاج رعايه وامي محتاجاني 

رماح : والله يا عسجد انا مافاهم يعني... انتي عاجبك  البنعمل فيهو دا..؟..تطلعي بالدس واوصلك طرف الشارع عشان ماف زول يشوفك ...حركات بتاعت مراهقين وناس ما جاده...انا صابر عشانك وعشان اخوك.. يا عسجد انا حاسي نفسي بعمل في حاجه ما بتشبهني...خليني اصل البيت بس.. وبعد اخوك يبقا كويس ان شاء الله بنتم العرس...الغموض دا والله م بنفع معاي.. مثلا اسي فلنفرض واحد من اهلك شافك معاي اقول ليهو شنو؟ اقعد اتمتم.. وانتي تقعدي تبكي و تبرري.. وريني لو فتح خشمو معاك او مساك بكلمه  انا حأعمل شنو وبي ياتو حق؟ ...لكن لو  بقا بيناتنا حاجه رسميه...ماف زول بقدر يفتح خشمو فيك بكلمه.. ولو فتحو حتكون اخر كلمه يقولها لاني حأقطع لسانو... عرفتي الفرق؟.. عسجد ما عرفت تقول شنو منطقيا رماح كلامو صح.. واتختت في حته ضيقه شديد سكتت ساي وما ردت عليهوو... رماح طوالي اتنرفز فيها وقال ليها عسجد انا بتكلم معاك ما مع الحيطه على فكره... هي طوالي عملت نرفزتو سبب وبقت تبكي وترمي في دموعها.. رماح قال ليها بزهج هسي انتي بتبكي مالك..

عسجد : انا القاها منك ولا من البيت... انا مضغوطه من كل الجهات ... شغل.. ناس بيتنا محتاجين قروش.. عمر محتاج جلسات..امي عيانه  وانت بي جاي ضاغطني في موضوع العرس انا تعبت يا رماح ... رماح حن عليهااا...وحس بالزنب ولع ليهو سجاره و مشا جاب ليها مناديل ومويه ختاهم قدامها ووهو ساكت.. 

_______________

برو : يعني دا كلو حصل ونحن ما عارفيييين.. 

خالتو سلوى: بالغتي يا نجلاء يعني لو ما مهاد غابت من المدرسه... وجينا نشوفها ما كنا حنعرف.. 

امي: يا سلوى انا ما مستوعبه الموضوع زاتو عشان احكيهو.. 

انا :  والله انا لحدي اسي ما فاهمه الحاصل شنو راسي عايز يطق.. وحاسه انو في اي لحظه ممكن اتسجن.. 

خالو احمد : سجن شنو.. مهاد زووول بقدر يعمل ليك حاجه ماف.. ما تقولي ابوي ماااات... انا ابوووك واعمامك انا البتصدى ليهم...اوعك تخافي انتي ما غلطانه... البخاف دا الزول الغلطان..انا قعدت ابكييي وخالتو سلوى ونهله وبرو التلاته حاضنني..وببكو معاي.. قالو لي انتي عويره نحن كلنا في ضهرك ..  خالو احمد قال لي احكي لي الحصل شنو بالتفصيل الممل من دخلتي لحدي ما طلعتي يا مهاد..حكيت ليهو كل الحصل ما عدا موقفي مع عسجد.. وقصه انو انا وقفت في وشها وقلت ليها اتلمي من محمد... 

نهله : القروش دي شالتها عسجد ماف تفسير غير كدا اصلا البت دي انا ارتحت ليها من البدايه... 

برو : ولا انا... قلت ليهم ولا انا برضوووو... 

امي : هي يا بنات خافووو الله... نحن الظلم م رضيناهو لي روحنا.. ما بنظلم الناس... يمكن بعد نحن طلعنا جا زول غريب شال القروش.. ومشي.. نحن ما عارفين الحصل شنو بعد نحن طلعنا... خالتو سلوى: وهسي الحل شنو طيب.. خالو احمد قال ليهااا ما عندنا حل غير نرفع يدنا لي الله وندعي ربنا يظهر الحقيقه.. انتو بس ادعو.. ويا مهاد انسي الحصل دا كلو واقري قرايتك.. اطمني ماف زول بقدر يعمل ليك شي..شويه اطمنت بعد كلام خالو احمد.. وناس برو بعد داك دخلوني جوا و غيرو الموضوع قلبو ونسه... و غيرو لي مودي 180 درجه...

برو : شفتي البت السمحه دي... سماحتها دي مااا سماحه ساااي.. 

نهله وهي بتضحك: كيف يعني سماحه ما ساي يابت  انتي متخلفه ولا شنو... في سماحه ساي وسماحه ما ساي كمان... 

برو : اي في.. اسي ميسر دا زاتو سماحتو  ما ساي... تحسيها سماحه كدا... زي سماحه الخسيسين في المسلسلات...فيها إن.. ياااخ انتو ماحتفهموني... غايتو انا بعرف الزول السمح ساي من الزول السماحتو خسيسه.. 

نهله وقفت و اخدت ليها وضعيه كدا زي وضعيه العارضه شفطط كرشتها وختت يد في نصها..  مدت بوزها.. وقالت ليها اها اسي انا سماحتي دي  ساي ولا سماحه خسيسه... 

برو : اطمني انتي ما سمحه اصلا ..نهله قعدت تضحك وقالت ليها بهظار  اخير عدم السماحه... امشي يا ام سماحه خسيسه... وقعدنا نضحك برو عندها مصطلحات كدا غايتو بتعرفها براهاااا...لكن النصيحه بتكون معبره.. 

انا بضحك : انتو ما شفتو القويه... الخسيس والخسيسه.. طلعو بحبو بعض.. 

نهله : كضابه ميسر و عسجد بحبو بعض... صحي الخبيثون للخبيثات... 

برو بضحك: الله يستر ديل لو عرسو.. حيجوبو لينا   كوم بتاع شفع خسيسن و ينشرو لينا لينا الخساسه في الكره الارضيه... انا و نهله كل وحده بقت تتكل في التانيه من الضحك...واستمر الحال بالطريقه والعواره دي لحدي ما مرقووو الصراحه جيتهم طمنتنا انا و امي و شويه نسينا الموضوع... بعد مرقو فتحت التلفون جاتني رساله من محمد في جرح كاتب لي..( ما نفسك تنزلي لينا فيديووو جديد )

_______________

موفق : االبت دي فديوهاتها بتجي في الجررح... تعالو احضرو الفيديو دا...انا غايتو طرف السوط هبشني 

كمال : انت ما عندك شغله غير اكاونت MK دي.. بتقيل فيهو عديل من فيديو لي فيديو...

ميسر : انا والله اغير كلمه السر حقت الواي الفاي...مكمل لينا الباقه كلها في المخلوقه دي...

موفق بضحك:  مالكم  ومالي..  مش عندي اسهم في الشركه دي معناها عندي حق في الواي فاي دا... احضر الداير احضرو ان شاء الله احضر طيور الجنه ما عندكم شغله...

كمال قعد يضحك وقال ليهو كدي افتح افتح الفيديو النسمع ( ربنا قال وتلك الأيام ندوالها بين الناس // يعني الدنيا دي ما ثابته على حاجه وحده الليله عندك بكره ما عندك... هسي انت زعلان.. بعدين حتكون فرحان... الليله مظلوم بكره  منصوررر بإذن الله... والعيان الليله بكره ببقا كويس.. الدنيا بتدور والاحوال بتتبدل... والحاجه البتخوف انو المشاهد حتتعاد ..يعني الكلمه الحلوه حترجع ليك  .. والشينه حترجع.. النظره بترجع.. القهر حيرجع... والوجع والاذى كلو حيرجع بعد يوم بعد سنه بعد الف سنه حيرجع بنفس الطريقه وحتكونو عارفين انو دا عملكم وانو لف ورجع ليكم تاني...عشان كدا اعمل الحاجه الحلوه والكويسه عشان الدنيا لمن تجي تدور.. تدور ليك.. وما تدوور عليك حرفيا  الدنيا دواره.. والدنيا ضيقه.. مصطلحين مرتبطين ببعض  ما حتفهم معناهم بالجد الا لمن تجي تعيشهممم.. حتعرف الدنيا ضيقه ودواره لمن يجي شخص يقول ليك انا زي الشايفك في حته؟.. وفعلا تحس شكلو مألوف.. ولمن تجو ترجعو بالزمن تلقو انكم اتلاقيتووو في مكان و سلمتو على بعض سلام هامشي.. على اساس انكم ما حتتلاقو تاني.. ولف الزمن ودار واتلاقيتووو تاني في حته اصلا ما كانت في الحسابات.. وبنفس الطريقه المواقف.. حيجي موقف يلفتك ويقول ليك انا زي الشايفك في حته..وفعلا حتحس شكلو مألوف.. ولمن تجي ترجع حتلقا انك عملتو لي زول بهامشيه وما كنت متوقع انو حيلاقيك تاني.. صدقوني يخوانا الدنيا ضيقه و بتوريك الببيعك من البشتريك.. فالناس تحاول تزرع الخير عشان تحصدووو... وتعيش الكم يوم الفاضلين ليها في الدنيا ديل بهدوووء وسلام..) 

كمال: انا غايتو خفت  وماشي لي مهاد اخد منها العفو...موفق قال ليهو وانا معاك ... ميسر صح كان عامل فيها ما شغال بي الفيديو لكن هو سمع كل كلمه اتقالت وحس بي خوفه كدا...و ضرب لي عسجد سألها قال ليها عسجد انتي متأكه انك شفتيها بي عينك... قالت ليهووو انا بعرفها من وين يا ميسر.. و مصلحتي شنو عشان اكزب فيها ... قلت ليك شفته بي عيني دي بتدخل في القروش والدهب في شنطتها... يسر اتنهد و قفل الخط وهو محتار.. و بينو و بين نفسو بقول..زي ما ام كي قالت الدنيا دواره.. نحن نتظر و نشوف الحيحصل شنووو.. مصيرو ربنا يظهر الحقيقه... كان في صوت جواهووو بقول ليهو وكان الحقيقه طلعت عكس كلام عسجد؟ 

_____________

اعمامي كانو جادين دايرين يفتحو فيني بلاغ... لكن عمتي لطيفه وقفت ليهم بالمرصاد... وقالت ليهم انتو امشو بلغو وانا والله.. امشي اقول انا الشلت الدهب و بعتو نشوفكم حتعملو شنووو.... وجاتني وهي بتبكي معاها موفق وكمال و مصطفى في البيت... وقالو لي عليك الله يا مهاد اعفي لينا... قلت ليهم انا عافيه ليكم كلكم حتى اعمامي...وما شايله في قلبي حاجه على زول... لكن تاني البيت داك تاني لا انا لا امي ما بنخشو..

______

عدت الايام و امتحنا تالت...فتره الامتحانات كانت صعبه شديد علينا انا و برو لكن هونوها علينا ناس البيت.. ومحمد الكان بجيب لينا انا وبرو كوم بتاع شبسيات و شوكلاتات... عشان نفسياتنا تتصلح... ونهله كانت شغاله لينا حبشيه على قولها حتى هدومنا حقت المدرسه بتغسلها وتكويها لينا....  عمر خلال السنه دي بقا يمشييي بعد الرياضه و جلسات العلاج... ودعوات امووو... الحمد لله ربنا جبر بخاطر عمر وخاطر خالتو نفييسه...صح لسه ما بمشي مسافات طويله ولسه بعرج.. لكن على الاقل بقدر يتحرك جوا البيت.. وقادر يعتمد على روحو في كل حاجه.. والدكتور قال ليهم شويه شويه مع الرياضه حيبقا فل الفل 

عسجد باعت الدهب.. وحكت لي صحبتها انو عندهم قروش ما عارفين يستثمروها في شنو.. صحبتها قالت ليها انا عندي واحد من معارفي قال لي...بقدم لي في الجيش القطري... وبي واسطاتو و معارفو بضمن لي القبول... ارح معاي... القروش في قطر زي مطر زي يا بت... ما تضيعي قروشك اعملي بيها  اجرائاتك وارح معاي من اول شهر قروشك العملتي بيها الاجرائات دي حترجع ليك ... عسجد طوالي. الفكره دخلت راسهااا... ومشت اقنعت امها و اخوهااا... وكزبت عليهم قالت ليهم اي شي عليهم حتى مصاريف السفر والاقامه و كل حاجه انا بس علي اسافر... و بعد محاولات اقتنعووو.. عشان بعرفو صحبتهااا دي وابو البت هناك اصلا... وعسجد كانت مصره شديد وقالت ليهم عمر و بقا كويس.. وانا دفنت نفسي وخليت قرايتي عشانكم لي مره وحده خلوني اشق طرقي... ضربت لي ميسر و رماح طلبت منهم قروش كتيييره قالت ليهم اخوي طلع محتاج عمليه في رجلو اليمين... واقنعتهم الاتنين انو بعد يعمل العمليه هي مستعده يجو يتقدمو ليها رسمييي ويعملو عقد بس ويسوقوها هي ما قادره تنتظر اكتر من كدا.... وهم العورا صدقوها ورسلو ليها القروش...شالتها وسافرت بيها طوالي...اصلا هي عامله الاجراءات مسبقا بقروش الدهب و شالت القروش دي منهم مصاريف لحدي م تشتغل..

_______

رماح وميسر ضربو لي عسجر و فترووو عشان يشوفو اخوها عمل العمليه او لا...ما كان في رد... استمر الحال كدا اسبوعين.. لحدي ما ميسر قال لي ملك ارح اوديك بيت ناس عسجد شوفي لي  الحاصل عليها شنو.. لها اسبوعين مختفيه.. انا بديت اخاف...

ورماح قال لي محمد اضرب لي حجه نفيسه شوف لي عسجد دي مالها.. ليها فتره تلفونها مقفول ما قادر اصل ليها....

رماح قال لي محمد اضرب لي حجه نفيسه شوف لي عسجد دي مالها.. ليها فتره تلفونها مقفول ما قادر اصل ليها...اخوها مفترض يعمل عمليه...

محمد بخلعه: عمليه شنو عمر مالو.. ولي حجه نفيسه ما ضربت لي... 

رماح : والله يا محمد عسجد ما وضحت لي.. كل العارفو انها عمليه في رجلو اليمين... وعلى حسب كلامها مفترض تكون اتعملت ليها اسبوع...محمد قال ليهو خلاص انا بشوف الحاصل و بديك تلفوون... و شال مفاتيحو و طلع...لمن وصل البيت فتح ليهو الباب عمررر زاتووو...محمد قال ليهو بي استغراب عمررر؟ ما هدا انت كويس الحمد لله...

عمر بترحيب : محمد كيف حالك... انا كويس الحمد لله اتفضل اتفضل.. ودخلو البيت..

حجه نفيسه : طولتتتت مننا يا ولدي... كيف صحتك و كيف ناس امك ان شاء الله كويسين ما جاين قريب...

محمد : مضغووط مع الشغل بس والله..وناس امي بجو في اقرب اجازه ان شاء الله..و قبل على عمر قال ليهو عمليه شنو دي ان شاء الله خيير يا عمر..ما كنت عارف والله هسي يادووب عرفت... ومن دربي جيت بي جاي طوالي.. 

عمر وحجه نفيسه بقو يعاينو لي بعض مستغربين..  وحجه نفيسه طوالي  قالت لي عمر بخوف.. سجمي ياعمر انت مقررين ليك عمليه وداسي مني... 

عمر بي استغراب : عمليه شنو...انتي مش بتمشي وتجي معاي من الدكتور ادس منك كيف يا امي لو في عمليه اصلا الدكتور كلامو كلو  معاك انتي  .. ماف اي عمليه محمد انت جبت الكلام دا من وين.. محمد اتحرج وما عرف يقول شنو..بينو و بين نفسو بقا بنبز في رماح و بقول غايتو يا رماح عملتها فيني و قعدته.. انا كان مالي و مالكم انت وعسجد.. في النهايه قال ليهم وينا عسجد نادوها لي.. كيف بتقول  عمر عندو عمليه وعلى ياتو اساس... تاني حجه نفيسه و عمر بقو يعاينو لي بعض مستغربين.. 

حجه نفييسه بلهفه : انت متواصل مع عسجد يا ولدي من سافرت نحن ما عندنا ليها تلفون..و ماضربت لينا.. بنضرب لي ابو صحبتها ما برد..

محمد وهو عاقد حواجبو : عسجد سافرت؟ سافرت وين.. 

عمر : سافرت قطر هي وصحبتها...دايرين يقدمو في الجيش قطري...قالت تجرب فرصتها...وقال ليهو  بشك كلمتك كيف بالعمليه؟ لاقيتها متين...محمد بقا يفتش في البمرقو من الورطه الدخل فيها دي... قال ليهم سرعه سرعه  لقيت منها رساله قديمه ليها اسبوعين في الواتس مكلماني بالعمليه ...ما شفتها الا الليله لاني كنت شغال بي تلفون الشغل الفتره الفاتت دي و جادع تلفوني..

عمر قال ليهو غريبه والله ماف اي كلام زي دا..محمد حس انو في إن في الموضوع... قال لي عمر  يا زول خير المهم انت كويس الحمد لله و مامحتاج عمليه... ادوني رقم ابو صحبتهااا..اشوف لي طريقه اصل ليها بيها.. عشان اطمنكم عليهااا.. وانتو لو ضربت ليكم ادوني تلفون طمنوني... عمر و حجه نفيسه قالو ليهو تمام شال الرقم و اتونس حبه.. بعد شويه  الباب دقه... 

محمد : يلا يا جماعه انا استأذن جوكم ضيوف...هو طالع شاف ملك قال ليها السلام وعليكم ومرق وهي دخلت وهي بتقول معقوله عسجد صحبت محمد جاد لدرجه  بجي البيت؟ والحاله عندهم وحده؟... ميسر كان واقف ليها جنب الباب وقافل لي محمد الشارع... محمد قال ليهو معليش يالحبيب جر قدام حبه عشان اقدر اطلع... ميسر زح ليهووو من الطريق  ومحمد دور العربيه و اتحرك على رماح... 

________________

ميسر وهو بكورك  :كيف يعني سااافرت يا ملك؟..فهميني سافرت كيف بي ياتووو منطق... 

ملك : والله ما عارفه ياميسر... اخوها وامها ديل من ملامح  وشهم ظاهر عليهم صادقين... و بعدين لمن قلت لي خالتو نفيسه عمر مالو قررو ليهو عمليه فجأه مش جلسات العلاج الطبيعي كانت ماشه معااهو كويس ... عمر قاطعنا و قال لي عمليه شنو الانتو بتتكلمو عنها كلكم دي يا جماعه...ولمن قلت ليهم عسجد هي القالت لي قالو لي سافرت... وحجه نفيسه قالت لي قطعت قلبكم البت دي اعفو لينا.. هسي قبل شويه جانا محمد دا كانو ساكنين جيرانا زمان قال نفس كلامك دا.. ماف اي عمليه و عمر هدا قدامك الحمد لله  بمشي برجلينو.. عسجد دي جنت ولا شنو.. 

ميسر وهو لسه بكورك : جنت شنووو.. انا الحأجن.. البت دي مستهبله ولا شنووو... شايله مني ملاييين على اساس اخوها عندو عمليه و حيمشي بعديها طوالي..حتى.اتفقت معاي انو حتكلم اهلها و اجي اتقدم ... تجي تقولي لي ماف عمليه وهي  سافرت... ملك بصدمه كيف يعني؟ عسحد شالت منك قرووش...

ميسر بصوت مكسور : ملك عليك الله قفلي الموضوع دا..

ملك بزعل : اقفل الموضوع دا كيف يعني.. يا ميسررر... عسجد دي قبل ما تكون انت مرتبط معاها صحبتي..انت ناسي ولا شنووو..

ميسر بكواريك : ما تقولي لي مرتبط معاااهااا ولا زفت  سامعه... اسكتي يا ملك اسكتي قلت ليك..ملك سكتت وهي مصدومه في صحبتهااا الفتحت ليها بيتهم و عرفتها على اهلهااا... اسي حتقول لي اهلها شنوو؟ 

_____________

محمد ضرب لي رماح رد ليهو من اول جرس قال ليهو بلهفه اها عسجد وناس بيتهم كيف؟ 

محمد : اي كلهم كويسين... انت وين.. 

رماح : وعمر اخوها العمليه نجحت؟ 

محمد : عمر اخوها فتح لي الباب عديل.. ما عندو اي عوجه... كدي وريني انت وين.. 

رماح قال ليهو والفرحه ما ساعياهو... كدي تعال انا في العياده الموضوع دا داير ليهو قعده عديل... وهي قافله تلفونها مالا... ما تتصرف  ترفع ليها اي سماعه تلفون تقول نحن كويسين..

محمد : عليك الله يا رماح.. كدي انا جاي عليك...

رماح بعد محمد جا مرق ليهو في الجبنه الجنب العياده...

محمد : انت عسجد نهائي ما جابت ليك سيره سفر.. 

رماح بي استغراب : سفر؟ سفر شنو؟ ما فاهم.. 

محمد : ما قالت ليك انها مسافره.. او اهلها مسافرين او كدا.. نهائي ما جبت ليك سيره سفر... 

رماح بزهج : محمد دا شنو اللف والدوران دااا...خليك دغري معاي سفر شنو الجابت لي سيرتوو.. ما تقعد تقصد لي في الكلام.. ما شافع انا... 

محمد : ما هو عشان الجوطه.. بتاعتك دي انا بقصد ليك في الكلام اسي جايط مالك.. انا سألتك سؤال جاوب على قدرو.. 

رماح بي اخر نفس : ما جابت لي سيره اي زفت... في شنوو انجز...مسافرين يعملو العمليه برا ولا كيف... انت ما تقول الكلام عديل.. 

محمد بحزن وما عارف يقول ليهو الكلام كيف لانو عارف رماح قدر شنو بحب عسجد و خايف عليهو  : والله يا رماح... عسجد دي قالو سافرت تشتغل في قطر...ولمن سألتهم من العمليهوطلعو ما عارفين عنها حاجه وما مقررين ليهو عمليه اصلا...واسي انا ما فاهم هي لو مسافره قالت لي اخوي عندو عمليه لي؟ عادي كان تكون واضحه.. 

رمااح دا زي الكشحو فيهو مويه ناررر... عيونو دي بقت حمراااء.. وسكت ساي طلع علبه سجاير.. و بقا يولع وحده ورا التانيه وحده ورا التانيه.. لحدي ما خلص العلبه.. و فتح علبه جديده... محمد بتكلم معاهووو ولا سامعو هو بقول في شنو... 

محمد وهو بحاول يواسيهو : يا رماح.. انا شلت ليك رقم ابو صحبتهااا... بحاول اتصل عليهو عشان نعرف  هي عملت كدا لي..

رماح ببرود : انا ما عايز اعرف... وهسي يا محمد اتوكل انا عندي شغل..

محمد : يا رماح.. رماح طوالي قاطعو.. قال ليهو خليك انا الماشي وشال مفاتيحو ومشا.. 

_______________

ميسسر وهو بأشر علي ملك ورنا وميار ورنق وبكورك : انتو الاربعه...احكو لي بالتفاصيل الممله.. سامعين بالتفاصييل الممله دي ما اعيدها تاني...الحصل شنو يوم جوك كوم الكرور بتاعك داك... وركزو لي على الاسمها عسجد دي... 

كمال : هسي ديل زنبهم شنو بتكورك فيهم... 

ميسر : كمال عليك الله م تزفتها معانا.. وانتو اتزفتو افتحو خشمكم دا الحصل شنو.. بدو يحكو ليهووو... وهم خايفين منوو... 

موفق : يعني انتو لمن مشيتو تقدموهم خليتو عسجد و مهاد براهم في الغرفه..والمره الفاتتت لمن جينا سألنا الكلام دا ما قلتوهو مالكم...ما قلتو لمن جينا لقيناها براها في الغرفه... 

رونق : نحن خليناهم الاتنين لكن لمن جينا لفيناها براهااا. 

عمتو لطيفه : بسسس معناهااا مهاد لمن جات لي امهااا برااا.. وامها قالت ليها اصبري نبارك لي اعمامك معاهم رجال... خلت عسجد براهااا في الغرفه..ميسر دا راسو بقا تقييل مسكو وقعد في السرير.. 

مصطفى عاين لي ناس ملك وقال ليهم عشان صحبتكم استبعدتو انهااا تكون هي الحراميه... وما حكيتو الا الجزو بتاع مهاد بس.. زنب البت في رقبتكم وحده وحده... 

كمال قال لي ميسر يلا يا ميسرررر استلمممم انت واعمامي... بقيتو قدر السمسمه... على الظلم... البت يتيمه وشلتوو قروشهااا بتاعت المقصف.. 

___________

ونحن  قاعدين في الحوش... معانا برو و نهله هم بتونسوو مع امي... وانا بدردش مع محمد في التلفون ... الباب دقه قلت لي نهله وبرو وحده فيكم  تمشي تفتح الباب.. انا امشي البس توبي...فعلا نهله مشت فتحت الباب... وانا دخلت جوااا البس التووب لمن طلعت اشوف الجا منو... لقيت ميسر وكمال واقفين في الباب .. ونهله بتقول ليهم... جاين لي شنو وبي ياتو عين ؟ كمال قال ليها ميسر عندو كلام عايز يقولو لي مهاد و عمتي نجلاء

ميسر عندو كلام داير يقولو لي مهاد و عمتي نجلاء... نهله عاينت لي امي نظام اخليهو يخش ؟..امي طوالي  قالت لي كمال اتفضلووو..كمال دخل وراهو ميسر..

اول مره اشووف ميسر في حياتي مهزوز للدرحه دي.. طول عمرو شايف روحووو... وعامل فيها يا دنيا ما فيك الا انا... متسلط... و كلمتو ماشه على الكل... حتى اعمامي بسمعو كلامو.. رغم انو مصطفى و موفق اكبر منو لكن هو كان عاملين ليهو عظمه ومكانه...قعد قصاد امي.. وعينو في الارض.. كمال قعد جنبوو... وانا لسه كنت واقفه بعيد بعاين ليهم... ونهله وبرو دخلو المطبخ عشان يخلو لينا مساحه... 

كمال : تعالي يا مهاد اقدي جنب عمتي..قعد جنب امي وانا بقول اللهم اجعلو خير ...قال لي لمن ناس ملك مشو يقدمو صحباتهم..انتي طلعتي لي امك برا و خليتي عسجد براها في الغرفه؟... قلت ليهو ايوا... قال لي ولمن جيتي داخله حسيتي بيها ملبوشه و بتدخل حاجه في شنطتها.. قلت ليهو وانا مستغربه هو عرف كيف.. اي شفتها وما ختيت فيها حاجه لكن انت عرفت كيف ... كمال قال لي ميسر  شفت يعني حكت ليك الكلام بالقلبه.. مهاد الشافتها لكن هي عملت فيها انها الشافت مهاد..

امي بدهشه : عسجد بت حجه نفيسه؟.. 

ميسر بي استغراب  : بتعرفيها؟ 

امي : كيفن ما بعرفها امها شغاله معاي في المقصف مره طيبانه و ما بتمد يدها على حق الناس شغاله معاي سنه كامله ما حصل مره فقد قرووش .. ولدها عيان ابت تشيل قرش من زول.. واشتغلت عشان تعالجو.. انتو متأكدين من الكلام دا..ما تظلمو البنيه ساي.. الظلم حااااار نحن مجربنوو..

كمال : متأكدين يا عمتي...لو زي ما شالت الدهب...كزب على ميسر و شالت منو ملايين وهسي سافرت ما معروف مشت وين.. 

ميسر بي انكسار وهو ما عارف يقول شنو  : اعفو لي يا عمتي..اعفي لي يا مهاد انا ظلمتك.. واتهمتك قبل اسمع منك.. حنييت عليهو شديد اسوأ حاجه شعور الاحساس بالزنب..رغم انو ظلمني لكن قلت يا مها ما مشكله في النهايه هو جا و اعتذر والمهم انوو عرف انو انا ما سرقت .. قلت ليهو بي ابتسامه.. عافيه ليك يا ميسر.. انا اصلا عفيت ليك انت واعمامي من يوم طلعتو من باب بيتنا دا... وعشان عفيت ليكم ربنا نصرني و ظهر الحقيقه... ميسر عاين لي وهو مستغرب فيني انا كيف مبسطه الموضوع كدا.. رغم انو ما بالبساطه دي.. 

امي : ولا يهمك يا ولدي نحن عافين ليك.. بس عليك الله ما تحيب سيره لي حجه نفيسه بي الكلام دا المره دي طيبانه ونفسها عزيزه... لو عرفت الكلام دا بتموت... 

كمال : ماف زول حيجيب ليها سيره ما تخافي يا عمتي.. بعد داك نهله جابت ليهم كبايتين عصير ليموون.. ومشت.. كل زول شرب ليهو جغمه. وخت الكبايه.. امي حلفت عليهم الا يكملو.. كملوهو بالغصب.. بعداك قالو طالعين.. قدمناهم لحدي الباب.. وامي شالت الكبابي دخلتهم المطبخ.. جوني ناس بروو جاريين..

برو:  اها الحصل شنو ما سعنا كواريك.. مالك ما فرجتي فيهو الحله الحله الحيوان دا... قلت ليها جا سمع القصه مني وعرف الحقيقه.. وانا عفيت ليهووو في النهايه هو جا واعتذر... 

نهله بكواريك : انتي يا بت كان غبيه قولي انا غبيه..يادوب جاي يسمع القصه.. كمال لمن قال ليهو اسمع من مهاد ما قال مثاليااات يمثل راسو دا..

الباب كان متاكاا ميسر و كمال لمن جو داخلين وهم شايلين كرتونه القروش.. سمعو كواريك نهله.. وسمعوني بقول ليها انا ماشه بمبدأ  والكاظمين الغيظ و العافين عن الناس...حأستفيد شنو لمن اقول ليهو ما عافيه ليك؟ .. ولا شي.. لكن لمن اعفي ربنا حيعوضني كل خيير.. 

كمال قاطعنا وقال لي ميسر : نحن لازمانا جيه تانيه.. نطلب العفو من نهله و اختها.. لانو زعلانين اكتر من مهاد..

نهله : من اسي ما عافين ليكم ما تتعبو نفسكم تجو.. انتو قايلنا زي مهاد 

برو وهي خاته يدها في نصها وبتاعين لي  ميسر وكمال : غايتو الواحد يعمل العمله... وبعدين يبقا ليهو حار... و يقول اعفو لي.. 

كمال بضحك : اسي االيعفي لي التاني منو.. انتي مشربانا ليمون بي ملح يا ظالمه... انا بقيت بعاين لي برو ونهله..طوالي زاغو دخلو جوا.. كمال و ميسر قعد يضحكو.. ولي اول مره اشوف ميسر بضحك زيو و زي البشر.. 

ميسر وهو بخت االكرتونه : مهاد دي قروشك..قلت ليهو انا قروش حصلت بي سببها مشاكل دي.. تاني م بتخش علي.. اتصدقو بيها.. اعملو بيها العايزين تعملو.. ميسر قال لي انا غايتو ما بشيلها وطلع ركب عربيتو... قلت لي كمال عليك الله شيلها اديها لي زول محتاج انا م بعرف زول محتاج اديها ليهو... ابتسم لي برضا و شالها و مشا.. ركب العربيه واتلفت على ميسر قال ليهو بي بي استغراب : يعني القروش قاعده.. ما هبشتها.. 

ميسر : من يوم موفق فتح لينا فيديو Mk وانا ما قادر اهبش القروش دي.. حتى الكرتونه خفت اجدعها..

____________

ملك لمن ناس كمال جوو... مشت  ليهم وهي  فرحانه...

كمال : مالك؟ 

ملك : لمن مشينا لي ناس حجه عشه.. عسجد طلعت قالت لي ولد جيرانهم برضو انو اخوها عامل عمليه.. ميسر قال لي يمكن لاعبه عليهو زي ما لاعبه علي... قلت ليهو انا بعرفو اسمو محمد جاد عندو محلات معرفه.. قام ميسر قال لي انا بمشي ليهو ولو طلعت لاعبه عليهوو..كدا نحن اتنين  بنرفع فيها قضيه طوالي...و عشان ميسر مشا الليله لي ناس مهاد انا مشيت معاي رنا لي محمد جاد... و حكينا ليهو الحصل... قال ما نرفع قضيه لانو حجه عشه دي زي امو وهو بعوضنا حتى دهبنا السرقتووو...شفت يا ميسر ربنا عوضنا و حقنا حيرحع لينا... 

ميسر : انا اصلا غيرت رايي ما حأرفع قضيه..وهسي ما عايز تعويضات.. 

ملك بخلعه : لييي ما كنت مصر تندمها الغير رايك شنو ...ميسر قال ليها قررت امشي بمبدأ والكاظمين الغيظ والعافين الناس.. ومشا خلا كمال و ملك بعاينو لي بعض مستغربييين ومخلوعين فيهو.. 

____________

محمد سأل رماح.. انت عسجد شالت منك قروش؟

رماح : محمد عليك الله.. انا جاي اشرب لي جبنه وماشي  .. م تقفلها معانا.. مالك يا زول..

محمد : رماح شالت منك قروش ولا لا.. قول لي اي أو لا.. ما عايز تتكلم ان شاء الله هز لي راسك... دا شنو دا ياخ...رماح قال ليهو كل  ما اجي الجبنه تجيب سيرتهااا مش الجبنه دي خليتها يا محمد... ومشا خلاهو 

____________

اعمامي رغم انهم عرفو بي سووء التفاهم الحصل.. لكن ماف واحد كلف نفسو ولا حتى يرفع لي سماعه تلفون... ما اشتغلت بيهم كتير..اصلا ما راجيه منهم شي..

وعسجد ما منها اي خبر.. انقطعت من ناس بيتهم انقطاع تام 

_________

بعد شهر من الحاصل دا ... قلت لي امي قروشي بتااعت العمولات كويسه شديد تعالي نبدا بي محل سندوتشات.. حسبنا القروش العندنا...لقينا المبلغ كويس.. و بدل نكملو اكل و شراب اخير نشغل القروووش..نزلت في الفيس اني عايزه دكان فاضي فاتح عل الظلط للاجار...من بين عروووض كتيييره لقيت واحد سعرو مناسب... وكان لازم نمشي نشوفو ... مشينا انا وامي شفناهوو طلع ظااابط من كل النواحي...والحمد لله عملنا العقد و دفعنا مقدم تلاته شهور...

كنت فرحانه و متحمسه شديد للبدايه... شلت تلفوني دخلت المطبخ و ضربت لي محمد بقيت اتونس معاهو و احكي ليهو قدر شنو انا متحمسه للموضوع... وبحكي ليهو اني ما لاقيه اسم... للمكان... شجعني للبدايه و قال حيفتش معاااي اسم... و قال لي رايك شنو تشغلي معاك عمر... انبسط من الفكره شديد... قلت ليهو حأكلم امي تكلم حجه نفيسه...

برو جات عشان تسألني عملت شنو في موضوع اسم المحل لاني قلت ليها تفتش معاي اسم وتكلم خالو احمد يشوف لي زول يعمل لي يافطه.. دخلت المطبخ لقت التلفون في اضاني.. وانا بضحك..و بتكلم و متحمسه... اول ما شفتها اتلبشت وبقيت اتمتم.. وقفلت التلفوون طوالي.. وحاولت اشتت انتباها واغير الموضوع.. و بقيت اسألها من نهله و ناس بيتهم.. ومعاذ و جدو عبد الرحمن.. ما اديتها فرصه تسألني.. هاجمتها قبل تهاجمني.. وقلت ليها انا مارقه الحمام و طلعت.. جات وراي لقتني دخلت الحمام وختيت التلفون في مصطبه الوضايه برا... شالتو اصلا هي عارفه الرمز بقت تقلب في المكالمات بي استغراب و ختتو راجع مكانو..من اليوم داك بدت تراقبني و تراقب تصرفاتي... ولمن تلقاني بتكلم في التلفون بتنتظرني متين اختو و بتفتشو وراي... انا كنت حاسه انها بقعت قاعده معاي تقريبا 24 ساعه لكن ما ختيت في الموضوع حاجه... 

________

امي كلمت حجه نفيسه..فرحت شديد ودعت لينا تكون بدايه موفقه... اتكلمت مع عمر بالتلفون و قلت ليهو انا بثقتي في حجه نفيسه وثقت فيك... وان شاء الله تكون قدر الثقه دي.. قال لي ابشري ان شااء الله ما بتشوفي مني الا كل خير... قلت ليهوو عايزاك تشوف معاك نفرين على ضمانتك يشتغلو معاك..قال لي خير و ضرب لي محمد...قال ليهو يشوف ليهو نفرين... وااحمد لله الامور كلها مشت بفضل ربنا... خلال اسبوع بس قدرنا نظبط المكان ونشتري كل المستلزمات.. بس فضل اتفق مع بتاع مخبز يوفر لي كميه ثابته من العيش يوميا.. 

جوني نهله وبرو في البيت برو قالت لي النبي تسمي المكان دلع كرشك يا مهاد  انا ونهله قعدنا نضحك.. قلت ليها بختو ليك في القرعه ما مشكله.. نهله وصفت لي مخبز قالت لي ابوي قال ليك عيشو كويس شديد.. قلت ليها تمام.. وطلعت برا الغرفه قلت ليهم جاياكم اسي امشي اكلم امي واجي.. برو خلتني طلعت وجات بوراي ...انا ضربت لي محمد كلمتو.. قال لي لقيت ليك اسم للمكان.. قلت ليهو احلف .. ضحك وقال لي رايك شنو بكره اوديك المخبز واكلمك بالاسم  .. قلت ليهو موافقه  وقفلت وانا الفرحه ما ساعياني..حاسه نفسي عايزه اطير ...اتلفتت لقيت برو في وشي.. قالت لي موافقه على شنو؟

بقيت اتمتم.. قلت ليها دا عمر.. وراني اسعار الدقيقه.. وقال لي نشتري 5 بالمره.. قلت ليهو موافقه.. برو عاينت لي بشك و مشت... و كالعاده خلتني ختيت التلفون.. و فتشتو..

كلمت امي قلت لها بكره طالعه.. عاينت لي بي استغراب طالعه وين من متين قاعده تطلعي براك... قلت ليها لالا ما براي ماشه مع عمر و محمد نشوف المخبز الوصفو لينا خالو احمد.. قالت لي اقيفي امشي معاكم... قلت ليها لالالا يا امي ما بحتاج.. انتي تعبانه.. و اقنعتها بعد تعببب...تاني يوم صحيت بحماااس و اتحهز و قلت لي امي يلا انا طلعت..

ضربت لي محمد قلت ليهو نتلاقا هناك.. 

انا اول ما شفتو قلت ليهو بحماس  : اها الاسم شنوو..

محمد وهو بضحك : بايت معاك انا.. م تسلمي...

ضحكت و سلمت عليهووو وقلت ليهو اها يلا الاسم شنو..ضحك و قال لي اسمك راحه.. وفديوهاتك راحه... وصوتك راحه يا مهاد.. و انا  عشان متأكد انو الناس حترتاح في المكان دا سميهو المهاد بمعني الراحه

ضحك وقال لي اسمك راحه.. وفديوهاتك راحه .. وصوتك راحه يا مهاد.. وانا عشان متأكد انو الناس حترتاح في المكان دا سميهو المهاد بمعنى الراحه... ابتسمت ليهو بحب وقلت ليهو بما انك اخترت الاسم حتكون اول زول يجرب سندوتشات المهاد.. ضحك وقال لي شندوتشات يعني ما واحد..من الليله لحدي الافتتاح انا حصوم  عشان اقدر اكل اكبر كميه.. قعدت اضحك بعد شويه حسييت انو كل الناس بتعاين لي... وحتى في ناس خلت البتعمل فيهو و بقت مركزه معاي...اضايقت شديد... و قلت لي محمد انا راجعه البيت.. قال لي و العيش ما حتدخلي تتفقي مع بتاع المخبز.. قلت ليهو لا... قال لي طيب خليني اوصلك.. قلت ليهو لالا... ووقفت لي ركشه ورجعت البيت.. امي لمن سألتني الحصل شنو مالك جيتي سرعه كدا .. قلت ليها لقينا المخبز واقف الليله ما شغال ودخلت غرفتي..حاولت انوم ما قدرت...تفكيري كلو كان هم لي كانو بعاينو لي بالطريقه دي هل انا بعمل في غلط؟.. اتضايقت اكتر وانا قاعده براي .. طلعت و قلت لي امي انا ماشه ناس برو.. قالت لي انا زاتي ماشه... و طلعنا سوا..

دخلنا سلمنا عليهم و قعدنا... برو قالت لي قاشره كدا كنتي وين..قلت ليها مشيت اشوف المخبز الوصفو لي خالو احمد..

نهله بي استغراب : برااااك.؟

امي : لالا معاها عمر و محمد...

برو: محمد الواحد حقنا دا؟.. امي قالت ليها اي محمد ولد عمتك ..شكلو عمر كلمو قال ليهو يوصلهم...برو عاينت لي بنفس العين العاينو لي بيها الناس لمن كنت مع محمد..بقيت احاول اهرب من نظراتهااا... وبعاين في كل الاتجاهات واحاول ابرر..ما لقيت كلام اقولو و بقيت اقول كلام ما مفهووم...حسيتهم كلهم بعاينو لي بي استغراب... وانو انا مالي فجأه.. نجدني منهم تلفون من عمر..رديت ليهو قال لي انا اتفقت مع مخبز كويس  نجهز امورنا بكره.. و بعد بكره ممكن نعمل الافتتاح.. فرحت و قلت ليهو خلاص تمام انت شوف النواقص كلها اكتبهااا...و بكره نمشي انا و انت وامي نجيبها.... قاال لي تمام و قفل... وانا عشان اغير الموضوع حكيت ليهم بي كلام عمر...و غيرت مسار الونسه.. 

نهله : والاسم يا مهاد انتي جهزتي كل شي الا الاسم.. ضحكت و قلت ليها صحي نسيت اكلمكم... حأسميهو المهاد..

برو بهظار : والقرعه... مش قلتي حتعملي قرعه.. انا مصره نسميهوو دلع كرشك.. يا زوله نعمل قرعه بس...

خالتو سلوى بضحك : ما بنعمل قرعه..بي راي الاغلبيه.. انا غايتو اخترت المهاد..

برو :كويس يا امي .. خالتو نجلاء انتي معاي صح..

امي قعدت تضحك: مدام سلوى مع مهاد.. ما بزعلك انا معاك يا برو...

برو بضحك : واحد واحد... اها وانتي يا نهله.. 

نهله بمكاوه : انا غايتو مع مهاد اكيد يعني ما حكون معاك.. من متين نحن بنتفق..

برو وهو بضحك : حنسميهو المهاد ما مشكله ... لكن انتي وامي عيشه ما بخليكم تقرضوهااا في محلنااااا...

نهله : محلكم؟...

برو : اي محلنا..عندك اعتراض.. انا حأشتغل معاهم ضواقه.. لازم اقرم من اي سندتش قبل يطلع للزباين..

خالتو سلوى : سجمي والبشتريهو مقروم منو..

برو وهي بتضحك : عادي بالعكس حيشتهر بالقرمه دي..وحنبقا اول مكان سندوتشات ببيع سندوتشات مقرومه... اسي ما شايفه شركه الايفون دي... مشهوره بشنو ما بالتفاحه المقرومه... انا جاده معاكم  والله وشعار المحل يكون (اول قرمه علينا)... نحن بقينا نضحك ... وهي شغاله لينا بتضحكو مالكم انا والله جاده... انتو قايلني بهظر.. ولحدي ما مرقت شغاله لي فكري في كلامي دا يا مهاد..ما بتندمي.. 

_________

رنا و رونق و ميار و ملك جوني في البيت معاهم موفق و كمال و مصطفي و عمتي لطيفه...ما متزكره اخر مره ناس ملك دخلو بيتنا متين... سبحان الله يعني الحصل دا كلو يمكن لي خير شويه المسافه البيناتنا  بقت قريبه صح ما قريبه شديد.. لكن اخير من العدم.. او يمكن دا كلو لانهم حاسين بالزنب و بحاولو يصلحو موقفهم...و يتأكدو اني صافيه من اتجاهمم.. قعدو معانا مسااافه اتونسو و ضحكووو...لي اول مره احسهم بتعاملو معاي كجزو منهم... دايما كنت بحس نفسي غريبه وسطهم...ملك قالت لي جيت بنفسي انا و مصطفى عشان نكلمك بخطوبتنا ولازم تجي.. يا مهاد... سكت ما قدرت اقول ليهم اني ما بقدر اخش بيوتهم كلهم تاني لانو اعمامي بعد السمعوني ليهو استخسرو فيني  حتى كلمه معليش...موفق حس بي وزي الفهمني.. قال لي الخطوبه حتكون في صاله يا مهاد ان شاء الله تعالي الصاله طوالي.. امي قالت ليهو بنجي الصاله ما مشكله عشان خاطر ملك و مصطفى...قلت ليهم وانا برضو عازماكم الافتتاح بتاع المحل بتاعنا بعد بكره.. كان مفترض يكون بكره لكن الافته اتأخرت و يادوب حنستلمها بكره... فرحو لي شديد...و باركو لي و حفزوني...حرفيا انا العبره خنقتني... وانا بسمع في كلام كل واحد فيهم... حسيت انهم فرحانين لي بالجد... وقلت  ياريت لو كانو معاي كدا من زمان...موفق قال لي اهم شي اول يوم دا الطقه على حسابك طبعا... ضحكت و قلت ليهو ولا يهمك انت بس تعال...كمال قال لي مش الشغله فيها ملح موفق بجي بجي... كلنا قعدنا نضحك... وكلهم قالو جايين... بعد داك شربو معانا الشاي وطلعو... 

_____________

قبل الافتتاح بيوم المكان لسه كان جايط و محتاج شويه ترتيبات..محمد جاني في المحل وقال وهو بضحك  مش مفترض اول عزومه بتاعتي لزوم حقوق الاسم ووكدا... ضحكت و اشرت ليهو على المنيو الكبيير المعلق في الحيطه... قلت ليهو اختار ونحن تحت امرك يا باشا ... عمر كان واقف بعيد بعاين لينا... محمد قال لي حأجازف غايتو  واحاول اثق بزوقك اختاري لي اظبط حاجه  بما انو المحل محلك يعني ...ضحكت و مشيت لي عمر قلت ليهو كلم الشباب يجهزو لينا سندوتشين شيش.. 

عمر بي استغراب : سندوتشين.. لي منو... قلت ليهو وانا مستغربه فيهو لي و لي محمد... عاين لي مسافه و مشا...بعد شويه جا و هو شايل السندوتشات... قال لي وينو محمد عشان اسلم عليهووو... اشرت ليهو على التربيزه النحن قاعدين فيهااا قلت ليهو هداك انت ما شايفووو... 

عمر وهو بعاين لي وبعاين للكرسي : مهاد عليك الله خلي الهظار.. نحن ورانا شغل و انتي بتهظري واداني السندوتشات ومشى... وقف بعيد مننا وبقا  شغال مع الشباب... وانا مشيت اديت محمد السندوتش و قلت ليهو اديني رايك...اخد قرمه وقال لي تتزكري لمن قلت ليك عشره سنه و اسم مهاد حيبقا معروف للكل...اسي انا سحبت كلامي.. قلت ليهو بسرعه يعني ماحلو؟.. ضحك و قال لي ياعويره قصدي م حتكملي عشره سنه... اسبوعين بس والسودان كلو حيعرف مهاد كماال ويجي ياكل هنا انتي بس كتري المقاعد والفروع.. ضحكت و قلت ليهووو احلفف يعني حلوووو صح... اتلفت لقيت عمر والشباب بعاينو لي بنفس العين.. نفس العين الشفتها في عيون برو والناس الكانو جنب المخبز.. حسيت بصداع وبقيت حاسه انو انا فيني عيب... وبقيت اسمع اصوات في راسي ... وفي حاجه جواي بتقول لي اضربيهم... اي زول بعاين ليك كدا كفتيهو... كان نفسي حرفيا اشيل اقرب حاجه قدامي وافكها فيهم.. عمر جاني و قال لي بشك  مهاد انتي كويسه؟... وهو بعاين لي بنفس الطريقه... 

انا بكاوريك: فشنووووو... في شنووو بتاعينوو لي كدا... محمد مسكني قلت ليهو فكني... و بقيت اكورك زياده... و شلت شنطتي و طلعت علي البيت... 

___________

عمر ضرب لي امي قال ليها مهاد وصلت؟ قالت ليهو اي وصلت قبل شويه.. 

عمر : والله يا عمتي ما عارف اقول ليك شنو...

امي بخوف : في شنو مالك يا ولدي... الحاصل شنو 

عمر :لالا ما تخافي كل خير.. انا قريب من بيتكم  لكن ما بقدر اتكلم معاك و مهاد قاعده... ولازم اتكلم معاك.. 

امي افتكرت انو عمر عايز يطلبني منها.. فرحت شديد... وقالت ليهو خلاص بوصف ليك بيت سلوى اختي .. قريب مننا.. وانا هسي بلبس توبي و بسبقك ليهم.. قال ليها تمام وفعلا مشت وحكت ليهم انو عمر شكلو دايرني برو قالت ليها اخو الحراميه دا نحن ما بنديهو مهاد.. بعد شويه عمر دقه الباب.. فتحت ليهو خالتو سلوى وقالت ليهو اتفضل وهي مبسوطه.. 

عمر دخل.. وشرب العصير.. واتونس حبه بعد شويه قال ليهم مهاد اقرب زول ليها منووو..؟ 

امي بي استغراب : بنات سلوى اختي.. عمر قال ليها ناديهم...بررو ونهله جوو وقعدو.. عمر قال ليهم.. ما ملاحظين حاجه غريبه في مهاد الفتره الفاتت... سكتو كلهم وبقو يعاينو لي بعض 

امي بخلعه : بتي مالا يا عمر... ماف حاجه لكن الليله...في المحل ونحن بنرتب وهي بتورينا نخت الحاجات وين فجأه مشت على الباب.. وبقت تتكلم براهااا... بعد شويه بقت تأشر على المنيو الفي الحيطه.. و تضحك... وما وقفت على كدا... جات و قالت عايزه سندوتشين ليها ولي محمد... كنت قايلها بتهظر لحدي اللحظه دي و عايزه تعمل فينا مقلب... سألتها محمد وين عشان اسلم عليهو... اشرت لي على التربيزه وقالت لي ما شايفو هداااك... والتربيزه اصلا فاضيه... قلت ما مشكله مشيت واصلت شغل... وهي لسه مواصله قريب نص ساعه بتتكلم زي الكأنو في زول قدامها لدرجه انو الناس خلت الشغل و بقت بتعاين ليهااا... وواضح انها جاده وما ودا ماقلب او تمثيل... لمن سألتها انتي كويسه... بقت تكورك و تقول في شنو بتعاينو لي كدا مالكم و بتقول فكني وهي اصلا ماف زول ماسكها وطلعت خلت المكان...

برو بقت تبكي وقالت ليهو وانا برضو... كم مره لقيتها بتتكلم بي التلفون... ولمن افتش التلفون وراها بلقا اصلا ماف مكالمه... قلت يمكن بتمسح المكالمات اول بي اول... بقيت مراقباهاااا لي درجه اني بفتش وراهاااا... اكتشفت انها بتتكلم بالتلفون براها.. وانو اصلا ماف زول بتتكلم معاهو... خفت وما عرفت اكلم منووو... حاولت اقرب اكتر عشان تحكي لي لكن مهاد كتومه شديد...ولمن قالت مشت المخبز معاك انت ومحمد شكيت انو في ان في الموضوع لانو محمد كان بتكلم معاي ولو مشا مع مهاد كان كلمني ... لكن قلت ما مشكله اضرب واتأكد.. ضربت لي محمد قال لي انو اصلا مهاد اخر مره شافهاااا يوم وداها بيتكم عشان ححه نفيسه تمسك ليها المقصف.. ومن اليوم داك ما عارف عنها حاجه.. وبقت تشهق بالبكا...نهله بي بكا برو هي زاتها  بقت تبكي وقالت ليهم وانا برضو... قبل كدا لقيتها بتعاين في صوره محمد.. لمن سألتها قالت لي محمد غير صوره البروفايل وفتحت لي حسابو...طلع ما نفس الحساب الانا ضايفاهو بيهو.. قلت يمكن عمل حساب جديد وفعلا عملت بحثت ظهرو لي صفحتين بي اسموو... وحده ياها المعروفه عندنا كلنا...و وحده فيها صديق واحد بس والصديق دا مهاد ... سألت محمد انت عندك صفحتين ... قال لي لالا

سألت محمد انت عندك صفحتين.. قال لي لالا..

امي طوالي  وقفت مخلوعه :اها يعني بتي جنت؟ ... يا عمر بتي ما مجنونه... خالتو سلوى مسكتها ودمعتها في عينها وقالت ليها يا نجلاء كدي استغفري واهدي  واستهدي بالله...

امي بكواريك: يا سلوى انتي ما سامعه الاولاد ديل بقولو في شنووو.. اهدا كيفن يعني..بكواريك امي خالو احمد طلع من الصالون .. قال ليهم في شنو يا جماعه صحيتو ابوي من النوم بالكواريك... 

امي وهي بتبكي  : تعال يا احمد.. مهاد بتي جنت.. نهله وبرو وخالتو سلوى قعدو يبكو زياده... عمر قال ليهم يخوانا دا شنو البتعملو فيهو دا.. خالو احمد قاطعو قال ليهو في شنوووو والحاصل شنووو... وانت زاتك منو... 

عمر بي احراج : انا ولد نفيسه جيران ناس فاطمه  اختك زمان... خالو احمد سلم عليهووو وقال ليهو الحاصل شنو انا بالخلعه والله بقيت ما مجمع اعفي لي يا عمر  ... عمر قال ليهو العفو و حكا ليهو الحاصل.. خالو احمد شاكل برو ونهله قال ليهم مالكم ما فتحتو خشمكم من بدري.. برو قالت ليهو اقول شنووو يعني اذا كان انا كنت بقنع نفسي اني بتوهم.. اقول ليكم انتو شنوو...كلهم بقو قاعدين متمحنين وما عارفين يعملو شنو وكل واحد بعاين للتاني وفي راسو في الف حاجه ... 

عمر قام و قال ليهم وهو بحاول يطمن فيهم : يخوانا بحصل كل خير ان شاء الله.. هسي انتو اتعاملو عادي زي الكأنو ما حاصل شي...وراقبو تصرفاتها.. عشان نتأكد من الحاصل دا جد ولا في حاجه غلط ..وسلم عليم و طلع... 

_____________

صحيت من النوم لقيت امي ماف.. عرفتها حتكون عند ناس برو...مسكت التلفون وبقيت بتكلم مع محمد.. بي كل اريحيه عشان عارفه البيت فاضي..فجاة جات داخله.. وقالت لي بتتكلمي مع منووو وهي  واقفه وبتعاين لي نفس العين... خليت اي شي و بقيت مركزه في انها بتعاين لي بنفس الطريقه... قلت ليها بنبره اول مره اتكلم بيها مع امي بتعايني لي كدا مالك.؟ انتو دايرين مني شنو؟... 

امي بخلعه : بسم الله يا مهاد مالك انا سألتك سؤال عادي... 

وانا برجف : بتكلم مع برو..وطلعت خليت ليها الغرفه و مشيت المطبخ عشان اتجاهل نظراتها.. لاني حسيت اني ماسكه نفسي بالعافيه عشان ما اكسر اقرب حاجه قدامي...من المطبخ طلعت الحوش.. من الحوش تاني دخلت جوا من جوا تاني طلعت برا ... فجأة بقيت حاسه بعدم استقرار... و ما حاسه بي الراحه في اي مكان... حاسه اني اذا قعدت مع امي في نفس الحته... حتاكلني بعيونااا..عديت علي الحاله دي قريب ساعه داخله ومارقه.. وما فاهمه انا مالي...لحدي ما امي جات قالت لي انا ماشه لي عمر في المحل اشوف الحاصل شنو... حسيت  انو في دمعه في عينها... لكن ما ركزت كتير... بعد داك امي طلعت...وانا شويه ارتحت.. ما تميت نص ساعه جوني ناس برو... شكلها امي طلعت ووصتهم يجوني...انا بمجرد ما دخلو انفصمت فيهم..وبقيت اقول في كلام ما مفهووم... ودخلت الغرفه قفلتها علي...ما عارفه الخلاني افسر نظراتهم لي حقد شنو... بقيت حاسه انهم كلهم حاقدين علي...تاني بقول لي نفسي يا مهاد هم بحبوك...و تاني بلقا نفسي بقول طيب لي فجأة بقو يعاينو لي كدا كلهم؟..ماف تفسير غير انهم...بقو يكرهوك.. كلهم بعاينو ليك بنفس الطريقه... ناس المخبز ناس المحل عمر امك وناس نهله وبرو وخالتك سلوى... كلهم بعاينو ليك بنفس الاسلوب... العرفك شنو احتمال كانو عاملين فيها بحبوك. واسي ظهرت الحقيقه وانكشف المستور .. فضلت على الحال دا لحدي ما نمت.. وامي لمن جات ناس برو حكو ليها بالحصل..وكلهم بقو محتارين فيني..

______________

ميسر اتغير.. تغير ملوحوووظ بالنسبه للكل... وبقا يحاول يخلي التسلط و حب النفس بتاعووو..

موفق وهو بضحك : والله لكن مهاد اثرها واضح ي ميسر...انا لو عارف بتعمل فيك كدا كان جبتها وقعدتها مع ملك.. 

ميسر : موفق اختاني..

كمال و مصطفى قعدو يضحكو... و مصطفى قال ليي ميسر ارح معانا الافتتاح و غمزز ليهو..

ميسر : اغمز كويس  لمن اقدها ليك.. واحضرك خطوبتك بعين وحده....

كمال وهو ميت بالضحك : مالك اسي زعلان و فاير.. و غمز ليهو تاني 

موفق : اضحكو براحه وهدو اللعب يخوانا بكره عندنا افتتاح.. م يقوم يقطلع لينا لساناتنا دي يحيرنا وبكره ما نعرف نطق بي شنو كمان.. وشغلوها ليهو لحدي ما خلا ليهم المكان 

عسجد لمن جات تعمل الكشف الطبي رجلها طلعت (فلات فود) (مسطحه بالكامل  من تحت) عشان كدا ما قبلوها... لانو الفلات فود ما بستحمل وقفات التدريب الطويله.. ولا الجري و غيرها من الحاجات المطلوبه في الجيش.. فصحبتها قالت ليها عادي ممكن تعملي عمليه و تقدمي تاني...في البدايه خافت من موضوع العمليه لكن صحبتها اقنعتها بي بساطه العمليه و سهولتهااا..و مشكلتها بس بقت مشكله قروش.. فقررت ترحع السودان... تتصرف في قروش.. و ترجع تاني 

____________

يوم الافتتاح لقيت عمر مظبط كل شي....سور المكان بي سور  خشب.. و عامل اضاءات ملونه بين الخشبات.. وفرش نجيله اصطناعيه... والعقدات كانت عباره عن ترابيز خشب مدوره وكل تربيزه حوليناها تلاته كراسي ..يعني كانت حاجه في منتهى الرهابه.. مكان مريح وهادي ...صح  كلفنا مبلغ كبيير شديد... لكن كنت متفائله وواثقه انو حيكسر الدنيا وتعبنا ما حيروح ساي ..

الناس دي كان كتيييره و في زحمه شديده... عشان اليوم الاول كان مفتوح والسندوتشات مجان..... كنت مبسوطه شديد بي جيه ناس ملك وكمال ورنا ورونق و يار و موفق وعمتي كلهم جو ماعدا ميسر...ومبسوطه بي كلام ناس و حبهم للمكان... والتشجيع التحفيز الكنت بسمعووو... والاهم اني كنت مبسوطه بي جيه محمد... بس محمد ما كان شغال بي زي العاده... سلم علي ومشا اتونس مع عمر.. ومره يتونس مع ناس برو...لكن انا لا...سافهني زي الكأني شفافه ... والجنني اكتر انو كان بعاين لي بنفس نظره الحقد الكنت بشوفها في عيونهم كلهم...حاولت اتجاوز لكن ما قدرت اي زول بعاين ليه في عيونو.. بشوف في عيونو نفس النظره....فجأة زهجت واضايقت من الزحمه... و خليت الناس كلها ورجعت البيت.. 

ضربت لي امي وقالت لي بخوف... انتي وين يا بت.. قلت ليها في البيت وقفلت... استمر الحال على كدا.. وبقت تجيني هلاوس واصوات بتقول لي كلهم بحقدو عليك ... ما كنت بقدر انووم اكتر من نص ساعه... ودايما بقيت مقلقه... الموضوع اتطور لدرجه اني  بقيت بشوف محمد معانا في البيت...بديت احس انو الكلام دا ما منطقي وانو في حاجه غلط في الموضوع..معقوله محمد عادي يجي البيت... واشوفو في المطبخ.. والصاله والحوش.. وفي اي مكان... يجيني لي وبي اي صفه..؟ دخلت في دوامه تفكيير...وبقيت ما مركزه.. وما عارفه الناس بره بتعمل في شنو اصلا وقافله على نفسي الغرفه ... اهملت نفسي شديد... لحدي ما يوم امي جاتني وانا بتكلم  وهي بتبكي... قالت لي مهاد بتتكلمي مع منو انتي؟... ماف زول يا مهاد.. انتي بتتكلمي براك... يا مهاد الله يرضى عليك خليني اوديك لي شيخ يرقي ليك...رفضت و بقيت بكورك واقول ليها ميف تقولي انا بتكلم براي شايفاني مجنونه ... ودخلت في حاله هستيريه... لدرجه انو امي ضربت لي خالو احمد وهي بتبكي ...و جو كلهم من بيتهم مخلوعين  ... خالو احمد طوالي اجر  عربيه و شالني بالقوه وركبني... ومشو بي لي شيخ...الشيخ قرا لي قريب ساعه لحدي ما هديت وحسيت بي راحه... برو حضنتي زحيتها مني ومشيت قعدت بعيد منهم...كنت كارهاهم كلهم.. وما طايقه زول..مرت الايام على. هذا الموال وماف تحسن.. و صحتي ماشه ناقصه.. والهلاوس ماشه زايده...

لحدي ما في  مره وانا في المطبخ بقطع في سلطه وامي في المحل مع عمر ... فجأه بقيت مركزه مع السكينه... ومحمد جا داخل المطبخ قال لي مهاد اطعني روحك وارتاحي من الحاصل دا... اصلا ماف زول بحبك كلهم بكرهوك... كلهم حاقدين عليك ما شايفاهم بعاينو ليك كيف ... جدعت السكينه بخوف... و هنا حسيت بالخطر...وبقيت ابكي ما عرفت اكلم منو... او اشكي لي منو ما كنت حاسه بالامان ... خايفه منهم كلهم... لقيت نفسي بفتح التلفون و بسجل في فيديو وانا ببكي.. و بقول مره كلام مفهوم.. و مره كلام ما مفهوم.. والكلام كلو ما راكب مع بعض وكل المفهوم منو الجرئيه دي ( طول عمري..بدعمكم... و بحاول اطبطب عليكم.. بس المره دي انا المحتاجه دعم وطبطبه... وفجأة بقيت بقول انا خايفه... و تاني بقول انا  حموت... والكلام بقا مضارب وما مفهوم) نشرت بخلفيه سوداء.. والتعليقات نزلت مطر.. ناس بقولو لي امشي لشيخ.. و ناس بقولو لي امشي لطبيب نفسي... وناس بتحاول تدعمني معنويا.. وناس متأثره على حالتي... وناس تانيه بتقول انا بمثل عشان اشتهر اكتر ...بقيت منتظره امي متين تجي.. واول ما جات  وقفت بعيد منها.. وقلت ليها انا تعبت عايزه امشي لي دكتور نفسي.. واواصل في الرقيه... وبقيت ابكي واقول ليها انا عايزه اعرف انا مالي...امي فرحت وقعدت تبكي  عايزه تجي علي... كوركت قلت ليها م تقربي مني...طوالي رجعت لي ورا وشالت تلفونها و  كلمت ناس خالتو سلوى... برو طوالي نطت بفرح و قالت ليهم رماااح.. رماح صاحب محمد دكتور شاطر شديد...و ضربو لي محمد القال الا يجي يودينا... لكن برو قالت ليهو لا... هي براها الفيها مكفيها.. وشايفاك في كل مكان..لو جيت حتزيد الطين بله... سكت وهو خايف الحاصل علي دا يأثر على علاقتو بيها...وصف ليها العياده  ...وفعلا مشينا..

________

رماح...اول ما شافنا سلم علينا و قال لي مهاد كيفك ... اول حاجه عملتها عاينت ليهو في عيونو.. وابتسمت بتلقائيه  وانا حاسه بالامان لانو ما كان بعاين لي زيهم... حسيت اني جيت المكان الصح... دخلني غرفه كدا وقال لي نهله و برو خليكم مهاها لحدي ما اجي.. وطلع لي امي وخالتو سلوى  برا... حكو ليهو بالحاصل كلووو... 

رماح : كتشخيص اولاني.. مهاد شكلها مصابه بي فصام.. او زي ما بنسميهو نحن في علم النفس (شيزوفرينيا) او (الذهان) 

خالتو سلوى بمقاطعه : سجمي كيف يعني عندها انفصال في  الشخصيه.. 

رماح : لالا الفصام براهو.. والانفصال براهو... مريض الانفصال  دا زول عدو اكتر من شخصيه... لكين مريض الفصام بتجيهو تخيلات بكون حاسي انها حقيقيه وجزو من الواقع بتاعو... 

امي وهي بتبكي : والمرض دا بتعالج يا دكتور؟ مهاد حتبقا كويسه؟ 

رماح وهو بطمن فيها : بالمواظبه على العلاج والجلسات... ان شاء الله حتبقا تمام ما تخافووو... بس انا عايز منكم تتعاملو معاها بطبيعيه.. وما  تنظرو ليها نظره انها مريضه.. او مجنونه..

رماح وهو بطمن فيها : بالمواظبه على العلاج والجلسات... ان شاء الله حتبقا تمام ما تخافووو... بس انا عايز منكم تتعاملو معاها بطبيعيه.. وما  تنظرو ليها نظره انها مريضه.. او مجنونه..

امي وخالتو سلوى : ربنا يطمنك يا ولدي.. 

رماح : ان شاء الله بحصل كل خير و استأذن منهم وطلع ...لمن جا لقاني بكورك في برو ونهله...وبقول ليهم قلت ليكم ما تعاينو لي انتو ما بتفهمووو..وهم بحاولو يهدو فيني وانا زايده زياده..جا علي وقال لي مهاد اهدي وروقي خلاص ماف زول حيعاين ليك... واشر لي ناس برو ونهله انهم يطلعو برا...طلعو برا وانا شويه هديت... جاب لي كبايه مويه وخلاني روقت حبه... وقال لي من متين وانتي بتتكلمي مع محمد؟.. انا طوالي هاجمتو وقلت ليهو لحقو يحكووو ليك..مش مفترض انا البعاني.. وانا المفترض تسألني.. مش سألتهم اول خليهم يجاوبو ليك ؟.. 

رماح : مهاد... اول شي بما انو انتي جيتي هنا بي ارادتك وماف زول جابرك... نحن كدا قطعنا نص المسافه.. لانو دا معناهو انتي اقتنعتي انك مريضه و عايزه تتعالجي...  في ناس عشان يصلو مرحله القناعه دي بياخدو عشره سنه او اكتر عادي..

انا بزعل: مريضه؟ 

رماح بإبتسامه : ايوااااا بس جيتيني في النقطه الانا عايزك تعلقي عليهااا... لو كان عندك ملاريا مثلا ومشيتي للدكتور... و شخصك و قال ليك انتي مريضه ملاريا.. هل حتزعلي؟ قلت ليهو لااا...قال لي بنفس الطريقه يا مهاد المرض النفسي زي المرض العضوي ...لي بنزعل منووو... وهو ممكن يتعالج زيو وزي الملاريا.. وزي الصداع.. وزي اي مرض عضوي تاني..انا حسيت انو كلامو منطقي... و طوالي قلت ليهو انا بتكلم مع محمد لي سنه تقريبا...

رماح :ممكن اشوف المحادثات البينكم؟ 

عاينت ليهو بصدمه : نعمممم.. 

رماح : نحن قلنا اول شي القناعه... عارفه تاني شي شنو؟.. لازم تكوني واثقه فيني كدكتور..وصريحه معاي.. عشان نقدر نحدد الاعراض العندك اجابيه ولا سلبيه...يعني اعتبريني صحبك.. اخوك.. المهم تكوني مرتاحه وانتي بتتعاملي معاي...وكدا حنكون اختصرنا شويه زمن...قلت ليهو تمام واديتو التلفون و بديت احاول احكي لكن ما قدرت اقول ولا جمله مفيده.. ما كنت قادره اتكلم... ولا ارتب الكلام... رماح قال لي اذا حاسه نفسك ما قادره عادي يا مهاد ما مشكله...وطلع قال لي دقيقه بس وجايك ...مشا لي ناس امي وبرو عشان يحكي ليهم تفاصيل المرض...

رماح : الفصام دايما بجي للناس الحساسه والذكائها عالي شديد... بحصل  نتيجه لي خلل في افراز ماده كيميائيه في المخ اسمها (الدوبامين) الماده دي مهمه شديد بتساعد الواحد على انو يحس بالمتعه والرضا عن نفسو في الحياه بشكل عام... فلمن الافراز دا يزيد بتظهر لينا النتائج الاجابيه للمرض زي الهلوسه و الاوهام... اما لو نقص بتظهر لينا الاعراض السلبيه زي الاكتئاب والا مبالاه... وفي حاله مهاد الماده دي زايده.. عشان كدا بتاعني من هلاويس... واوهام بالنسبه ليها حقيقه...

برو : يعني اعراض مهاد ايجابيه.. 

رماح : بالضبط... والاعراض الايجابيه والسلبيه اتسمت على اساس الاستجابه للادويه والعلاجات..وعلى اساس الوضوح.. يعني مهاد ان شاء الله في اقرب فتره حتكون بخير و عافيه لو التزمت بالعلاج... 

امي : وبالنسبه للعلاجات يا دكتور... حتكون فتره معينه؟ 

رماح : العلاجات حتكون دائمه... مريض الفصام زيو وزي مريض السكري... اذا وقف العلاج طوالي بحصل انتكاس.. هسي حأكتب ليكم روشته بالادويه... و مهاد حنحولها المستشفى لازم الاسبوع دا تكون تخت الرقابه ... وما تخافو حتكون تحت رعايتي شخصيا.. لانو في المرحله  الاولى من العلاج في احتمال الهلوسه تزيد.. قال ليهم الكلام دا وناداني.. قعدت جنبهم..و بي طريقه ظريفه وصل معلومه انو انا حأقعد في المستشفى اسبوع...

______________

حرفيا دا اصعب اسبوع مراا علي كنت بعاني شديد...امي و نهله و برو وخالتو سلوى نهائي ما قصرو و رغم اني كنت بتفشاهو فيهم... لكن خالص ما كلو مني او ملووو... رماح كل راس ساعه كان  بمر علي... و يتأكد انا تمام او لا... ويطمني...انو دي فتره و حتعدي... خالو احمد عشان جدو ومعاذ في البيت.. كان بجينا مره مره...ونهله و برو كان بتبادلو وحده بتقعد في البيت و حده بتكون قاعده معاي لحدي ما الاسبوع خلص و رجعت بيتنا.. 

رماح كلهم  انو انا محتاجه الفتره دي دعم اسري مكثف.. ووصاهم على العلاجات وانو لازم لازم ما افوت ولا حبه.. لانو كل حبه حأفوتها...حيكون ليها اثر في العلاج...مع الزمن الهلاوس بدت تخف شويه شويه.. لكن لسه كنت بشوف محمد.. رماح طمني وقال لي  في المرحله والتانيه من العلاج حيعمل جلسات ادراكيه..وتاني ان شاء الله ما حيكون في تهيئات..

___________

عدت الايام والحمد لله العلاج كان عامل مفعوول... وشبه رجعت لي حياتي الطبيعيه.. ما بين العلاج... والجلسات .. عمر خالص ما قصر وكان بتعامل مع المحل كأنو محلووو...وبقا عندنا زباين ثابتين... و توصييل كمان.. 

يوم خطوبه ملك ومصطفى...حنست برو تمشي معاي ابت وقالت لي سوقي نهله  و فعلا مشينا انا ونهله  وامي... ولا اشتغلت بي اعمامي ولا باركت ليهم... باركت لي ناس كمال و موفق وميسر  و االبنات ولي نسوان اعمامي كواجب ما اكتر...موفق استلمني ليك.. شنو يعني يوم الافتتاح تمشي تخلينا..قلت ليهو جاني شغل ضروري والله.. 

كماال بضحك :  عمرها 18 سنه بتقول جاها شغل ضروري انت اقعد لي... موفق قعد يضحك و قال لي كمال طبعا انتي ما فارقه معاهو كان مشيتي ولا جيتي.. عشان نهله قاعده.. 

كمال :دا شنو الكلام البتقول فيهو دا يا محترم..

موفق بهظار : المحترم دا الوحيد الفرقتي معاهو يا مهاد.. كمال بكشف لي نهله.. وملك و مصطفي بحبو في بعض... ورنا ورونق وميار مدورين القطيعه... وانا المسكين قاعد ساااي ... انا بقيت اضحححححك... نهله جات من جنب امي مبسوووطه... قالت ليهم الضحك لينا مهاد الليله يستاهل جائزه.. كمال نطه دا سؤال.. اكيد انا ... نهله قعدت تضحك وقالت ليهم مع  اني شاماكم لكن اطلب ونحن تحت امرك...

موفق بهظار  : لاحولا انت لسه شامانا.. قلبك اسود.. نهله قالت ليهو كل يرى بعين طبعه.. 

كمال : شفت البت بتقووول حكممم يا جاهل.. بعد كنت مبسوطه بونستهم و بضحك.. اضايقت و مشيت خليتهم...كمال قرص موفق عشان يخليهو مع نهله براهم وهمس ليهو اتخارج ما تبقا سغييل... موفق ضحك وعمل فيها شاف زول ماشي يسلم عليهوو... 

كمال بهظار : الجائزه يا استاذه.. مش قلت اطلب و نحن تحت امرك.. 

نهله بضحك : اطلب طيب..

كمال : لو عندك رصيد بس عايز اضرب لي مصطفى اشوفو مالو اتأخر.. نهله عاينت ليهو بي استغراب ومدت ليهو تلفونا... طوالي مسكل في تلفونو ورفع ليها التلفون وغمز ليها ومشا وهو بضحك... جاتنا بتطنطن.. وقعدت.. ما سألتها مالا.. كنت مركزه بس متين ناس مصفطفى... يجو عشان ابارك ليهم واطلع.. واول ما جوو داخلين سلمت عليهمو باركت ليهم و ورجعنا البيت... لقينا برو قاعده متمحنه قلت ليها مالك قالت لي قالو النتيجه بعد بكره.. نهله قالت لينا انتو اشتغلتو وقريتو  كويس ما تخافووو ان شاء الله حتجيبو درجات كويسه...وبقو يطمنو فينا هي و امي وخالتو سلوى

_________

يوم النتيجه ونحن قاعدين على. اعصابنا... جات نهله من هناك تبكي... قلت خلاص معناهاااا رسبنااا.. و قعدنا نبكي انا و برووو... خالتو سلوى شالت منها التلفون و بقت تزغرت مهاد كمال 95... وبراءه احمد 88...نحن بقينا نبكي زياده بالفرح.. وخالو احمد طوالي ضبح ليناااا... والناس بقت داخله ومارقه..محمد جااا.. ودي كانت اول مره الاقي فيها محمد بعد العلاج.. الانظار كلها كانت علي...سلمت عليهو وانا برجف... وما قادره اعرفو هل هو حقيقه ولا خيال... بارك لي وطوالي انسحبت على المطبخ... بعد شويه سمعتهم هو وبرو جايطين جنب المطبخ وما عارفني جوااا...

محمد : يا برو امي جايه اجازه الاسبوع الجاي... خليني اعمل خطوه رسميه... تاني ما بجو اجازه قريب... 

برو : محمد انت في شنو وانا في شنو... انا كان ما مهاد بقت كويسه.. مازعندي اي تفاهم معاك... انا اصلا داسه منها انو انا وانت بيناتنا حاجه.. وهو يجوط وهي تجوط.. صدعت وانا بسمع فيهم وبقيت ابكي... يعني انا بقيت سبب وحرمت برو سعادتهاااا... وضحت عشاني.. رغم كل الكواريك والانفصامات البنفصمها فيها...بقيت قاعده في المطبخ...لحدي ما اصواتهم راحت بعدين طلعت.. ولمن حسيت انو البيت مليان وفي حوطه قلت ليهم انا ماشه بيتنا... ومشيت البيت طوالي ما انتظرت زول يرد لي...

صليت و بقيت احاول اتناسا الحوار الكان بين برو.. ومحمد ما قدرت..بقيت احاول اشغل نفسي بي اي شي زي ما قال لي رماح.. وما  كان معاي تلفون كنت ممنوعه منو الفتره دي ...مسكت المصحف بقيت اقرا لحدي ما هديت... 

_________

تاني يوم كان عندي جلسه.. لبست و مشينا انا و برو... قعدنا في الانتظار لانو رماح كان معاهو مريض جوااا.. بعد شويه طلع.. سلم علينا وقال لينا ببشاشه  انتظرتو كتيير؟ قلنا ليهو لا...قال لينا تمام.. واتلفت علي قال لي نمشي؟.. قلت ليهو نمشي ودخلت وراهووو...قال لي اقعدي.. قعدت... جرا كرسيهو وقعد قدامي.. وقال لي بالله(MK) اختصار لي مهاد كمال... قلعت ليهو عيوني... قعد يضحك.. قال لي انتي عارفه انو انتي عالجتيني.. قبل انا اعالجك... عقدت حواجبي بي استغراب و قلت ليهووو كيف؟قال لي انا كنت بحب وحده.. ولي ظروف انفصلنااا... وسبحان الله وانا بقلب في التك توك الفيديو بتاعك ظهر لي  زي الكأنو عارف انا حاسي بي شنو... 

قلت ليهو اي فيديووو.. قال لي بتاع ( حصل حسيتو انو انتو مدمنين شخص معين حتى بعيوبو... الخ) 

انا بخلعه : انت حافظووو؟ 

رماح : حافظو .. وزي ما قلتي في فرصه حلوه مستنيانا بس نحن كيف نصبر... انا صبرت..وحاسي انو انتي الفرصه الحلوه يا مهاد..

رماح : حافظو.. وزي ما قلتي في فرصه حلوه مستنيانا بس نحن كيف نصبر... انا صبرت..وحاسي انو انتي الفرصه الحلوه يا مهاد..

انا بقيت اتلفت يمين وشمال وقلت بتلقائيه : انا خليت محمد... و بقيت اتخيل رماح ولا كيف..رماح فكاها ليك ضححكه..ولي اول مره من انا جيت العياده اشوف رماح بضحك..دايما كنت بشوفو عاقد حاواجبو و بتكلم بي رسميه... ما حصل شفتو مره بتونس مع زملائو خالص.. كلامو معاهم في حدود الشغل... وحتى لطافتو وابتساماتو وتعاملو مع المرضى كنت بحس بيهو فيهو تصنع و تكلف لزوم شغلو ما اكتر... بعكس الليله كان فيهو حاجه كده غير.. وحتى تعاملو ما زي العاده..ودا الخلاني احس اني بتخيل.. طوالي طلعت وهو بعاين لي ولسه بضحك...ناديت بروو واشرت ليهااا على المكان القاعد فيهو رماح...

انا : برو انتي شايفه رماح قاعد هناك... 

برو بإستغراب : اي يا مهاد.. 

انا بتأكيد : يعني انا شايفه رماح بالجد بالجد صح.. 

برو وهي بتعاين لي وبتعاين لي رماح : اي شايفاهو يا مهاد القاعد في الكرسي داك رماح..وعاينت لي مسافه بعدين طلعت...دا كلو ورماح بعاين لينا..

رماح : تعالي يا مهاد.. عايز اوريك حاجه... وطلع تلفوني من درجو... وفتحو لي و فتح الفيس بوك الايت...فإذا بها صفحت محمد الكان بتكلم بيها معاي.. فتح الدردشه الوحيده الكانت قاعده اللي هي دردشتي ورسل لي نقطه.. طوالي الماسنجر عمل صوت وظهرت لي صوره دردشه محمد بالجنبه... بقيت اعاين ليهو يعني المده ديك كلها انا بتكلم مع نفسي... رماح واصل كلامو وقال لي.... بتزكر محمد حكا لي انو عايز يدعمك لانو عقليتك عجبتو... وانا حزرتو  لانو خفت قلبو يميل ليك..وهو ادا كلمه لي خالوو... وعشان محمد اول زول يدعمك ويقيف معاك... وفجأة انقطع منك...عقلك ما اتقبل الحاجه دي.. وصور ليك كل الحاجات دي  ..ولو لاحظتي انتي بديتي تشوفي محمد قدامك بعد فكرتي تفتحي المحل.. لانو كنتي عايزاهو يدعمك و يقيف معاك زي ما وقف معاك لمن فتحتي المقصف..

انا : بس انا في البدايه ما كنت عارفه انو دا محمد..واصلا لقيت بوست وعلقت ليهو.. هو قام رسل لي طلب صداقه... 

رماح : فعلا محمد نزل بوست وانتي علقتي..لكن هو ما رد ليك من بين كل الناس يا مهاد.. ودي وحده من اعراض الفصام انو بتكوني حاسه نفسك محور الكون وانو الناس دي كلها مركزه معاك.. عشان كدا اتهيئ ليك انو محمد جاد رد ليك من بين كل الناس..وانو رسل ليك طلب..كدا وقعت ليك و عرفتي لي اتخيلتي محمد بالزات؟... وعاين لي في عيوني  و قال لي يعني انا حقيقيي.. والكلام القلتو ليك قبيل داك كلو حقيقه يا مهاد.. سكت وماعرفت اقول ليهو شنو... لانو اصلا كلامو بالنسبه لي ما كان متوقع.. ولاعامله ليهو ايي حساب...لمن المده طالت وانا ساكته.. قال لي انا عارف ومتأكد انك ما حاسه بي اي شي اتجاهي...و ما بقول ليك انا بحبك... بس انا بالجد بحس اني مرتاح وانا معاك.. و حاسي بي قبول و انجزاب شديد ليك..وبسبب تجربتي الفاتت ما عايز اعيش قصص حب وكلام فارغ ... انا عايز احبك و نحن في بيتنا ... عايز احبك بالحلال يا مهاد.. وهسي انا ما ضاغط عليك اخدي وقتك واستخيري...واالخيره فيما اختاره الله... وطلع خلاني 

_____________

ونحن راجعين على البيت تفكيري كلو كان في كلام رماح...وفي نفس الوقت في نقاش برو ومحمد...

برو لكزتني :هييي سرحانه وين انتي...لالا الموضوع دا ماهو ياهووو... رماح بجلال قدره طالع بتبسم زي الكضاب... وانتي بتكلم معاك ساعه ما سامعاني..قال ليك شنو الجنا دا... 

وانا بتمتم : شنو... كيف.. ما..ما.. قال لي حاجه... 

برو بضحك : تمتمي سممممح... بعد نرجع البيت بنتفاهم في الموضوع دا..

لمن دخلنا البيت ريحه الكيك دي تلفح من باب الشارع  و نهله متربعه في نص السرير.. وماسكه تلفونا و بتتبسم.. ما شافتنا و نحن داخلين برو طوالي جاتها من ورا ختفت التلفون وقامت جاريه وبقت تقرا في المحادثه بصوت عالي... ونهله جاريه بوراها...

برو وهي بتقرا   : (نحن جاين على ناس مهاد.. م تجيني من غير كيكه وريتك وما تكلفتيها ظبطيهااا يا نهله) ... (الكيكه في الفرن يا كمال م تزهجني) ...(ما تزهجني؟ شكلك عاملاها لي من غير نفس ما تكوني عاملها لي بي ليمون وملح كمان)...(لالا ما تخاف ما عاملاها بي ليمون وملح عاملاها بي سمممم)...(انا ما بموت بي سمم لكن عارفه لي)... (اها لي)... (لاني ميت فيك من زماااااااان )... انا متتت بالضحك و برو وقفت الجري وبقتتتتت تضحك وقالت ليهااا والله يا نهله  طلعتي ما قاعده في الواطه.. وقبلت علي قالت لي عقبال ازيع محادثاتك انتي ورماح ... نهله ختفت منها التلفون وقالت ليهااا بس حركتك دي  ابقي قدرهااا.. انا محادثاتك مع محمد ما بزيعها ليك هنا... بمشي بزيعها في الجامع...خلق الله ديل كلهم يسمعو.. كمان انتو بتتكلمو ريكوردات... يعني ازاعه بي فهم...برو بعد كانت بتضحك لمن نهله جابت سيره محمد قدامي سكتت و بقت تعاين لي... وانا ضحكت عشان ما تتحسس.. و ختيت في راسي حاجه وحده بس انا ح اوافق بي رماح عشان علاقتها هي ومحمد تستقر... كفايه العملتو عشاني... حأصبر حبه واكلمو اني موافقه قبل عمتها تجي من السفر... عشان لمن تجي محمد يقدر ياخد خطوه رسميه... ويخطبها...

عشان اخفف التوتر ضحكت و قلت لي نهله الحقي كيكتك دي... ما تقومي تحرقيهااا لي كماال... برو قعدت تضحك... ونهله حمرت لينا و طلعت كيكتها من الفرن و قالت لينا ارح... جاين عشان يباركو ليكم النجاح...برو قالت ليها جاين عشان االكيك لكن عاملين النجاح كبري و غمزت ليهااا...ودورت فيها تشغيلات... ولحدي م وصلنا بيتنا هم بتناقرووو...دخلنا لقيناهم قاعدييين في الحوش كلهم... وما خالين شي ما جايبنو حلاوه وبارد بالاشكال والانواع... عمتي لطيفه اول ما شافتني بقت تزغرتتت... وقالت لي رفعتي راسنا يا مهاد..وكلهم بقو يباركو لي فرحانين..حرفيا ما بتحس بي فرحه النجاح وطعمو  الا بفرح الناس الحوليك.. الناس دي كلها كانت بتتونس و بتهظر الا ميسر بسمع بس... برو همست لي دا مالو جايبنو بالغصب ولا شنو... غصب عني قعدت اضحك... نهله قطعت الكيك وجابت العصير.. و برو وزعت الحلاوه وقعدت لي نهله وكمال بالمرصاد... ما مدياهم فرقه زاتو يعاينو لي بعض.. بعد شويه شالت صحن الكيك وقدمت ليهم كلهم ... لمن جا دور كمال قال ليهو براحه اتفضل كيك بي سم معمول مخصوص عشان خاطرك..ميسر سمعها وهو اصلا ما فاهم الموضوع كان شايل الكيكه ختاهااااا... برووو دي قعدت تضحك والناس كلها بقت تعاين ليهااا...نهله قالت ليهم معليش يخوانا اختي دي ما عليها حرج...قعدو يضحكو.. انا فجأة اضايقت.... وحسيت بي ضيييق شديييد... وقفت قلت ليهم اسكتوووووو... ومشيت خليت ليهم المكان... كلهم بقو يعاينو لي بعض... امي اتحرجت... وبعد ما ناس رنا ورونق قالو ماشين حنستهم يقعدووو وحكت ليهم بي مرضي... عمتي دي قعدت تبكي وقالت ليهم بت اخوي دا كلو خاصل معاها وانا ما عارفه...نهله حضنتها وقالت ليها هسي هي كويسه يا عمتو الدكتور طمنا عليها ما تشيلي هم...الجو شويه اتوتر وكلهم بقو متأثرين والونسه قلبت لي حاله بتاعت صمت تام ... يعني هم جو فرحانين بي ورجعو زعلانين علي 

________

موفق : ميسر اها انت حتعمل شنو مع مهاد.. 

ميسر نفخ بقله حيله وقال ليهو والله يا موفق.. ما بقدر اربط نفسي مع وحده بتتخيل راجل غيري... 

كمال :  ما بتتخيل بي ارادتها يا ميسر ...وبعدين هي حتتعالج...

ميسر : والله يا كمال ما بقدر... صح انا يمكن اكون حبيتها... لكن ما بقدر اتجاوز نقطه انو هي بتتخيل راجل غيري دي.. 

___________

عدت الايام وانا بين الجلسات... والبيت والمحل..ورماح كان خاليني على راحتي شديد نهائي ما جاب لي سيره الموضوع... ولمن جيت عمت ناس  برو قربت.. براااي مشيت و قلت ليهو رماح انا استخرت..ضحك وقال لي بما انك جيتي براك وصلني الجواب..  بكره انا بجيب امي وابوي واختي وبنجيكم... 

انا بصدمه : بكره؟ 

رماح : اي بكره والعرس بعد شهر..انا جاهز وانتي جاهزه تاني في شنو.. 

انا بتمتمه : بس.. اناااا..رماح قاطعني زي. الفهمني وقال لي...نكمل علاجنا في بيتنا .. وكان على الجامعه.. انا ما الراجل البقيف قدام مستقبل مرتو بالعكس..حأعمل كل العلي عشان تكوني انسانه ناجحه.. لانو نجاحنا تاني حيكون مرتبط ببعض. ... ابتسمت ليهووو..وانا بحمد في ربنا على تفهمووو.. وبيني وبين نفسي بقول حرفيا ما اظن في زول يتقبلني اكتر من رماح.. 

_________

كلمت امي.. وامي كلمت عمتي لطيفه واعمامي  وفعلا تاني يوم رماح جاب اهلو وجا لي خالو احمد...ولا واحد من اعمامي كلف نفسو يجي...لكن كمال و مصطفى وموفق والبنات جووو ما قصرو.. واعتزرو انو ميسر شغال ما قدر يجي... فقدت ابوي شديييد بكيت قدرتي..واتمنيت انو يكون عايش.. ويجو يطلبوني منووو...ويفرح بي.. اتمنيت اقدر احكي ليهو انو لمن مات... مات وماتت معاهو معامله اعمامي الكانو بعاملوني ليها . حددو العرس بعد شهر..وحيكون عقد بس دا كان شرطي لانو حالتي م بتتحمل الجوطه والناس الكتييره... كنت عايزه حاجه مختصره وخلاص  .. ناس امي وخالتو سلوى ونهله و برو الفرحه دي ما كانت ساعياهم.. و مبسوطيين بي شديدد... برو قال لي من بكره نبدا نلف الاسواق... ونهله طوالي دخلت النت تفتش تفصيالات فساتين... كانو متحمسيين شديد... اكتر مني انا زاتي...

 عدت الايام و انا محبوسه.. وناس برو جارين في التجهيزات.. وناس ملك كل يوم والتاني كانو بجوني يساعدوهم... في الفتره دي رماح كان بتكلم معاي..وشويه قدرت اخدت عليهووو... وحسيت اني مرتاحه.. والاهم اتأكدت انو رماح حيشيلنو في راسو... صاح هو اخلاقو ضيقه... و كواريكو كتيييره... لكن قلبو لين..

___________

يوم العقد كنت متوتره شديد وقاعده على اعصابي... واطرافي دي زي التلج... كنت سامعه جوطه الناس بره... وخايفه اني اطلع ليهم...واشوف نظراتهم البتحسسني اني ناقصه... كنت خايفه ومتوتره من طلعتي للناس اكتر من توتري كعروس راجلها حيدخل يبارك ليها بعد شويه... بعد اقل من ربع ساعه سمعت صوت الرجال بكوركوو عقدووو... عقدووووو... وزغاريت النساوين.. دخلو علي ناس برو ونهله وخالتي سلوى  وامي ببكو... باركو لي وطمنوني و طلعووو... كلهم الا خالو احمد القعد وانتظر لحدي ما رماح دخل ووصاهو علي.. وامني ليهووو... بعد داك طلع وخلانا..

رماح قرب علي مسك يديني  وباس راسي مساااافه...وضحك وقال لي دا كلو خوف...انا حاسي نفسي ماسك تلجه في يدي...ضحكت وقلت ليهو ما خايفه... بس متوتره شويه...ضحك وضماني عليهوووو... 

رماح بحب: ربنا يبارك لي فييك... ويجعلني ليك سند.. وضهر..ويبعد عننا كل سوء.. و يكتب لينا من خيروو.. ويجمعنا في طاعتو ويقدرني اصونك واسعدك يا مهاد.. رفعت راسي وقلت ليهوو اميييين يارب وزحيت منو بخجل... ضماني تاني وهو بضحك قال لي الله اسي انا قلت ليك زحي من اسي حنبدا عدم سماع الكلام ... اصبري انا لسه ما حصنتك... وخت يدو في راسي و بدا يقرا في ايه الكرسي.. والمعوذتين.. بصوت يشرح القلب 

انا لسه ما حصنتك... وخت يدو في راسي و بقا يقرا في ايه الكرسي.. والمعوذتين..بصوت يشرح القلب ...دقت لينا الباب اختو رفيده و برو ... رفيده بنوته ظريفه وفرفوشه كدا البشوفها هي ورماح ما بقول اخوان..شخصيتين مختلفات كل الاختلاف عن بعض... دخلو لقو رماح ماسكني من يديني الاتنين..

رفيده:  ما ناوين تطلعو ولا شنو... انا دخلت في ضفوري وطوالي سحبت يديني من رماح.. رماح قال ليها في حاجه اسمها استئزان.. قالت ليهو وهي بتضحك والكنت بدق فيهو دا دلوكه ولا شنو .. ما دقيت الباب انا... لكن ليك حق ما تركز والله والجمال دا كلو قدامك...

برو بهظار : يلا يا استاذ خلي لينا الجمال واطلع.. دايرين نظبط ليها التوب والمكياج... بعدين بنطلعها ليك برااا.. انتظر جنب الباب..

رماح ضحك وقبل علي قال لي شكلك عاديتني يا مهاد... سامع اصوات ناس بتتكلم... ضحكت و قلت وقلت ليهو.. انا برضو زي الشايفه برو ورفيده... قعد يتلفت وقال لي انا غايتو ماشايف زول غيرك وغمز لي ومسك يدي وقال لي  ركزي معاي انا بس... ما تركزي مع زول... ولا تحاولي تركزي الناس البرا ديل بعاينو ليك كيف تمام؟ قلت ليهو تمام... قال لي ولو حسيتي انك اضايقتي من اللمه كلميني تمام؟ قلت ليهو تمام.. 

رفيده : يخوانا البتكلم  دا اخوي؟... لالالالا دا ما رماح الانا بعرفو... رماح حقنا غير خشي جواا.. اتكلمي براحه...اعملي و افعلي ما حافظ حاجه..

رماح : براءه ادييها دبوس تدبس طرحتها دي.. وكان دبستي لي خشمها دا تكوني ما قصرتي.. 

رفيده وهي بتضحك : كدااا دا رماح اخوووي... انا و برو قعدنا نضحكككك... رماح مسكني عايزين نطلع برو وقفتو قالت ليهو اصبر قلت ليك اصلح ليها التووب... وقف وجاب لي التووب لدي حواجبي... غته الجدله كلهاااا ورجع شعري لي ورا بقا ما ظاهر.. ما فضل ليهو الا يلف لي التوب طرحه ...و قال ليهم خلاص ظبطو ليهااا...

برو ورفيده بصوت واحد : دا شنووووووو

رماح : مش قلتو عايزين تصلحو ليها التوب؟.. رفيده مسكتو من يدو وقالت ليهو خلي الشوبار... ارح ارح وساقتو و طلعت...برو صلحت لي التوب والمكياج وهي بتضحك... وبتقول لي الله يعينك غايتو رماح في البيت حيقعدك محجبه...وغتت لي وشي بالقرمصيص وطلعتني ليهو برااا...

رماح : بس دا المطلوب غتيتوها مره وحده...لكن حتشوف كيف.. برو ضحكت و قالت ليهو بتشوف انت بس امشي براحه...وهمست لي رفيده قالت ليها انتي اخوك دا ما بحضر اعراس ولا شنووو... رفيده ضحكت و همست ليها اخوي دا طير الله في بلد الله... اسي حيتفاجأ لمن يقولو ليهو ارفع القرمصيص... و حيتفاجأ اكتر لمن يرفع القرمصيص...انتي بس ركزي مع ملامحو بعدين..وقعدو يضحكو الاتنين... 

طلعنا وانا لابسه توب احمر مشغول بالدهبي.. ورماح لابس الجلابيه البيضا وتوب السرتي .. والعمه......

_____________

نهله و كمال كانو ماسكين الاغاني... 

كمال : يا نهله م تشغلي الاغنيه دي... 

نهله : اسي مالا الغنيه دي يا كمال... 

كمال : يعني يا نهله عرسان عرسان عايزه تزفيهم بي (العرس العرس يا شباب غلوو في السعر يا وليد الناس..).. 

نهله وهي بتضحك : اخير انا.. انت عايز تزفهم بي وردي  يا كمال  (حلفتك يا قلبي حلفتك  ..)..دا شنو هسي؟.. ملك جاتهم من هناك.. انتو لسسسسه...

كمال : التأخيير دا كلو من الشافعه دي انتي كلك قدر شنو لمن عايزه تختاري اغاني كمان... قال قال ( انا ايه اللي عملتو انا اييه السويتووو ) قال

نهله : يا ملك ود عمتك  تلفونو كلو اغاني من الامسس   ... من شده ما الاغاني قديمه... لمن فتح الاغنيه قامت علي الجيوب الانفيه بالتراب... سمحه م قلنا ليك حاجه لكن دي ما اغاني عرس يا الكبير يا العاقل...

كلك : اسكتووو صدعتو بي... وزحو لي انتو الاتنين... مهاد مالا ما اختارت اغاني.. مفترض تكونو جاهزه من بدري...برو جاتهم من هناك...الناس ديل طلعو شغلو الغنيه... 

_________

طلعنا بي غنيه (حصنوهم من عيون الناس واقرو ليهم سوره الاخلاص.. العروس صيده والعريس حساس.. ديل حلالم الليله تم خلاص)..ورانا  ناس ملك ورنا ورونق وميار و نهله و برو ورفيده.. كلهم لابسين فساتين بالاوف وايت  ساده فيها بس حزام عرييض  بالقرمصيص.. اتنين شايلين صينيه الجرتق.. والباقين شايلين صواني الفال.. بعد شويه جو  محمد وناس كمال و مصطفى و موفق و ميسر واصحاب رماح الباقين.. كلهم لابسين عللات بيضاء وسديريات مطرزه..مع اختلاف الالوان...ولافين العمه.. حتى معاذ لابس معاهم .. ويبشرو بالعكاكييز.. والغنيه لسه مواصل ( ديل اهلكم المعاكم طول اليوم.. العزه بيهم والفرحه ديمه تدووم)...رماح كل مره يسألني انتي شايفه ما تقومي تقعي.. واقول ليهو والله شايفه يا رماح..تاني يسألني شايفه كيف اسي يا مهاد.. و طابي يدي وبمشي فيني زي العميانه...لحدي ما قعدنا..جاتو رفيده من ورا همست ليهو اكشف ليها وشها عشان الناس تشوفها و تبارك ليهااا... رماح عقد حواجبو بي استغراب و همس ليها والناس تشوفها لي؟..

رفيده بهمس : يا رماح خلي التخلف اكشف وشها.. دي عادات لازم تكشف وشها عشان يجرتقوكم...

رماح : دايراني اكشفها بي يدي عشان  يشوفوها؟ 

رفيده : انا قلت ليك افتح عليها باب الحمام.. يا ود الناس انت حتكشف وشها بس .. 

رماح : اتكلمي زي الناس احسن ليك..دا كلو وانا سامعاهم وميته بالضحك.. عشان احل المشكله.. قلت ليهو يا رماح انا اضايقت من البتاع دا كتم لي نفسي...حمر لي رفيده و كشف لي وشي...عاين لي مسافه وبلعها في حنانو وسكت لانو الناس. بدت تبارك...حجه نفيسه و عمتي و نسوان اعمامي وناس اعرفهم وناس ما اعرفهم.. بعد شويه جو امو وامي بدوو يجرتقو فينا..واغاني الجرتق شغاله (الليل.. الليل.. العديل والزين الليله العدييله يارسووول الله)(مبرووك يالعريس عجنولك اللحنه.. وفي البيت السعيد ان شاء الله تتهنا..)الليل الليل العديل والزين.. (تتبارك عليك يا يمه تبقا سعيد تبكر بالوليد والفرحه تملى البيت) ...رماح همس لي انا داير ابكر بي بت عيونا زي عيونك وبعدين مش قالو عايزين يصلحو ليك التوب دا؟ 

ضحكت وهمست ليهوو ما صلحو هندا ما شايف.. 

رماح بغيز : التوب واقع من راسك... تقولي لي صلحوو..

انا :دا ما اسمو واقع.. دي الجدعه كدا اغتي ليك الجدله يعني... وانت لمن جيتني جوا ما كنت لابسه كدا مالك اسي متفاجئ.. 

رماح : الجدعه وواقع نفس المعنى...و انا قايلك لابسه كدا عشاني و بعد ابارك ليك حيصلحهو ليك.. ما قايلك حتطلعي كدا.. عشان كدا رفيده مرقتني برا بت اللزينه خليها تصبر لي.. انا قعدت اضحك... قال لي اي  اضحكي اضحكي حسابكم بعدين بي براءه.. وبقا يحاول يونسني.. ويطلعني من جو الجوطه.. عشان ما اضايق.. 

________

محمد : شنو لكن دورنا ما قرب؟ 

برو : لسه دورنا الصف قدامنا... 

محمد : صف شنو.. انا وحيد امي.. وانتي الكبيره... 

برو بضحك :الصف دا الا ناس...مثلا عندنا في بدايه الصف.. الجامعه.. بعدين اشتغل... بعدين اشتري عربيه..وبيت.. وكدا يعني... 

محمد بهظار : يعني دايره  تكوني نفسك... بعدين تجي تطلبيني.... اقعدي اتماطلي كدا لمن تجي مغتربه  تشلبني منك.. برووو دي ماتت من الضحك.. محمد قال ليها امي هديك انا ماشي اكلمها تكلم امك تقول ليها الاسبوع الجاي نحن جايين... ومشا خلاها بتكورك.. و تقول ليهو يا محمد اقيف... وهو ماشي ولا شغال بيها. 

_______

موفق بمكاوه : ضيعت البت من يدك ساي .. عان طلعت مزه كيف..

ميسر : عليك الله كان داير تتظارف امشي اتظارف بعيد مني... 

مصطفي : ما كلامو صح.. مالك زعلان.. مهاد تتقل بالدهب.. بت بي ميه راجل..والمرض عمرو ما عاب ليهو زول.. 

ملك : انا ندمانه على اي يوم ما كنت بعرفها فيهو والله.. رنا و رونق و ميار قالو ليها ونحن زاتنا واالله... ولحدي هسي حاسين بالزنب بالعملنا فيها 

ميسر : ما شاء الله تبارك الله.. الله يحفظا... يلا شوفو ليكم موضوع تاني.. 

موفق : الموضوع التاني.. شوفو لي عروس.. انا ما بقدر اصبر اكتر من كدا.. 

رنا بضحك : المواصفات

موفق : تكون بتقول فوقي بصوت حنين بس دي كل المواصفات.. كان جبتو لي قرد يقول لي فوقي راضي بيهو...

رونق وهي بتأشر علي رفيده : اخت العريس دي كيف وكيف 

رنا : عسووووله اقسم بالله يا موفق... دمها خفيف زيك كدا...

موفق : خلوها تقول لي  فوقي في ريكورد...

مصطفي بهظار : ملك... المخلوق دا حيكون خال اولادي؟ 

ملك بضحك : بري دا ما اخوي.. دا ود عمك.. موفق ولا اشتغل بيهم طوالي مشا لي رفيده كان واقفه مع نهله و كمال قال ليها شفتي فوقي؟ 

رفيده بي استغراب : فوقي منوو؟ 

موفق : اخوي الصغير.. كمال اداهم ضهروووو عشان ما يضحك في وش البت.. و مشا لي ناس ميسر وهو ميت بالضحك...

نهله : انتو عندكم زول اصغر من ملك؟ 

موفق وهو بحمر ليها  : اي..فوقي... 

نهله قعدت تضحك : فهمتو عايز يفتح معاها موضوع مشت خلتو معاها.. 

رفيده بقت تتلفت خايفه رماح يشوفها... موفق فهمها قال ليها لو لاقاك شافع بشبهني كدا كلميني او كلمي اي واحد من الواقفين هناك ديك عليك االله يا ربي الولد دا مشا وين .. و مشا لي ناس كمال.. لقا كمال لسه بضحك لمن دموعو دي عشره عشره... 

كمال وهو بضحك : اها شافت فوقي.. 

موفق زي الكأنو فوقي دا حقيقي : لالا ما شافتو.. لكن لو شافتو قالت بتكلمني...كلهم قعدو يضحكووو بعد شويه جات رفيده .. قالت ليهم لقيتو فوقي... ديك مسكو الضحكه بالعافيه.. موفق قال ليها اي لقيناهو رجع البيت مع امي وما كلمونا .. قالت ليهو طيب الحمد لله وادتهم ضهرها كدا.. موفق قال ليهم احيييييااا من فوقي.. لقينا فوقي خلاص يخوانا العرس الجاي عرسي ...ديك فكوها ضحكه...

ميسر وهو بضحك :  انت كنت جادي يعني.. والله الواحد بقا ما بعرفك بتهظر ولا جادي من شده ما فارغ...

موفق : كنت فارغ لكن اسي قلبي مليان بحب رفيده...

مصطفى : وبالنسبه لي فوقي... الا تتبنو ليكم اخووو يا ملك...

موفق : ومالو نتبنااا..هسي يخوانا عرسي حيكون قبل عرس ملك و مصطفى.. يعني الهدوم الاشتريتوها لي عرس ملك حتلبسوها في عرسي.. شفتو الدنيا دي كيف.. 

ملك : كدي خلي البت.. تعرف وتوافق بيك بي هبالتك دي... بعدين قول حتعرس قبليني...برو جاتهم قالت ليهم يلايلا التصوير يا شباب... 

__________

رماح غتاني بالقرمصيص زي ما كنت ..قال لي ما بتمرقي الشارع كدا..

برو : اجي يخواني.. تشوف ليك كيف... 

رماح  وهو بحاكي في برو : بتشوف ما تخافي بمشي براحه...ومسك يدي لحدي م ركبنا عربيه محمد.. انا وهو ورا.. ورفيده ومحمد قدام...برو كانت واقفه مكشره ليهو وشها ... محمد قال لينا دقيقه نزل ليهاااا قال ليها ما تخافي في الطريق بشغل ليها اغنيه( انتي سوي التسوي.. انا محمد.. ما بخلي) بالنيابه عنك... قعدت تضحك.. قال ليها بوصهم.. مسافه ياخدو الصور الفرديه بجي اسوقكم خليكم جاهزين..قالت ليهو تمام... فعلا وصلنا وجا ساقهم.. وناس ملك والبنات و جو بي عربيه مصطفى.. والباقين كل زول جا بي عربيتو.. الا ميسر قال ما بحب التصوير... خلصنا الصور الفرديه... بعداك  اتصورت انا و البنات.. بعدين الصور الجماعيه..بعد خلصنا موضوع التصوير..محمد وصلنا شقتنا ونزل لينا الشنط..ومشا..

محمد وصلنا شقتنا ونزل لينا الشنط..ومشا... كان في توتر حاصل...انا متوتره وهو متوترر... 

رماح بتوتر : انا بغير في الحمام الخارجي..وبشوف جايبين لينا شنو ناكلو ... وانتي غيري هنا وطلع خلاني .. 

فكيت ربطه التوب و بديت افك في الدبابيس..فكيتها كلهااا الا اتنين.. واحد في راسي.. والتاني فكتفي..قدر ما حاولت  ما لقيت راس الدبوس عشان كدا ما قدرت اطلعهم...  طلعت وانا بكورك لي رماح.. 

انا : رماااح.. يا رمااااح... 

رماح : في الحمام يا مهاد.. عايزه حاجه... 

انا : الدبوس ابا يتفك لي.. 

رماح : دقيقه طيب... بعد قريب نص ساعه طلع.. لقاني واقفه ليهو قدام الباب..وحالتي يرثى لها.. شايله الجزو التحت من التوب كلووو في يدي..ومدنقره عشان الجزو الفوق مشربك في راسي وكتفي ومغتي جزو من وشي ... قعد يضحك وشال مني التوب كدا... صرخت قلت ليهوو اااااييي... براحه م تجرو مشربك في شعري.. 

رماح وهو بضحك : ما جريتو والله.. خلاص خليك ماسكاهو في يدك ..تعالي اقعدي و ختا يدو في كتفي بوراااا وساقني .. وانا شايله التوب في يدي زي العويره... بقيت قريبه ليهو شديد..لدرجه حاسه ببروده جسموو عشان طالع من الحمام...جرا الكرسي وقعدني و ضحك وقال لي.. شكلك اتعودتي تغتي وشك وانا امشيك..من التوتر والخجل قلت ليهووو ااااااااا ..قعد يضحك وقال لي ولا حاجه.. الدبوس وين.. اشرت ليهو على رااسي وكتفي.. وقلت ليهو هنا في واحد.. وهنا في واحد...بدا يفتش في راس الدبوس وشغال لي ارخي التوب يا مهاد من يدك.. وأرفعي راسك حبه عشان اقدر اشوف .. وانا اقول ليهو راخياهو يا رماح براحه م تطعني..لحدي ما جرااا الدبوس من راسي..والجدله زحت مع التوب.. 

رماح بي استغراب : دا شنو يا مهاد شعرك اتملص... 

وانا ميته من الضحك : دا ما شعري دي الجدله...ورفعتها ليهو.. قلت ليهو عاين.. 

رماح قعد يضحك : غايتو عندكم اسامي غريبه خلاص.. جدله و جدعه.. واشر علي شعرو وقال لي ودا كان اسمو شنو.؟ ساعه بغسل في شعري عشان يطلع.. انا فكيتها ضحكه وقلت ليهو عشان كدا ريحتك صابون صابون.. دي اسمها ضريره.. ورفعت ليهو يدي قلت ليهو ديل اسمهم الخرزه والحريره..

رماح خلا كلامي داك كلو وفع لي حاجبو وهو بضحك وقال لي ريحتي صابون صابون...قلت ليهو وانا بتمتم رمم مماح.. يااخ.. ااا انا براي.. متوتره... وشلت التوب مشيت.. كورك لي وهو بضحك الدبوس التاني ما طلعتو ماشه وين...كوركت ليهو بطلعوووو براي زاتو ورزعت الباب وراي.. سمعتو بكورك لي براحه على ابواب الناس... قعدت اضحك اول مره يتكلم بي اريحيه كدا واشوفو بهظر و بشاغل... دايما بشوفو رسمي في تعاملو مع الناس...دخلت الحمام استحميت... ولبست لي قميص تحت الركبه بي حبه لونو كحلي بي ابيض مرسوم فيهو فله والاقزام السبعه ..دي اطول حاجه لقيتها..ولبست لي توب هزاز وطلعت من الغرفه.. لقيتو بكركب في المطبخ...ويادوب ركزت انو  لابس ترينغ تلت اربع وتشيرت.. ولسه خاتي البشكير في راسو...ابتسمت بتلقائيه وانا بعاين ليهو يعني رماح الليله بالجد مختلف عن كل مره... اتعودت اشوفو وهو كافي كم القميص.. و متشيك كدا ولابس رسمي...شكلو مختلف وهو لابس ملابس بيت مريحه ... اول ما شافني قال لي صليتي وانا المنتظرك نصلي سوااا... ضحكت وقلت ليهو ما صليت ارح نصلي المغرب قرب يأذن.. مسافه صلينا الظهر والعصر.. المغرب اذن صلينا المغرب... وتاني صلينا ركعتين ودعينا ربنا جعلو زواج مبارك ويرزقنا الذريه الصالحه..

بعد خلصنا رماح قال لي تعالي  محمد طلب لينا سندوتشات.. انا دخلتهم في المايكرويف بكونو سخنو.. قلت ليهو تمام.. ومشيت وراهو المطبخ وهو كل مره يعاين لي ويضحك... 

انا : ضحكنا معاك.. 

رماح بضحك: فكيتي الدبوس.. 

انا : فكيتو اي.. 

رماح : ما تكون اتملصت حاجه من كتفك كمان عشان كدا لابسه التوب ... انا اتغشيت والله.. 

كتمت الضحكه وقلت ليهو هاهاها لطيف...

رماح بهظار  : لا بالجد لابسه التوب مالك... يعني برا البيت جادعه التوب و جوا البيت ملفلفه بالتوب...لفليفك دا كان تعمليهو هناك..ضحكت وعشان اغير الموضوع قلت ليهو لو جينا للغش انا برضو اتغشيت..رماح قعد يضحك.. وقال لي والله؟ قلت ليهو والله... قال لي اتغشيتي في شنو طيب...قلت ليهو انا اتعرفت على رماح بشخصيه.. واسي عرسو لي رماح بشخصيه تانيه خالص...رجعو لي رماح الاتعرفت عليهو.. 

رماح وهو بضحك : يعني اسي انتي عايزه رماح الاتعرفتي عليهو.. قلت ليهو بالضبط كدااا... طوالي الابتسامه اختفت.. ورسم على وشو ملامح رسميه... وقال لي انا ما بحب الروج قبيل مسكت نفسي بالعافيه عشان ما اخرب عليك فرحتك واقول ليك امسحيهو..تاني م تعملي روج برا البيت اتفقنا.. 

انا : يعني انت يا تشغلها لي وتخجلني ... يا تديني اوامر... ما عندك وسط... قعد يضحك وقال لي  يا اسود يا ابيض ما عندنا رمادي..ومسك يدي... بي يدينو الاتنين وباس باطنهاااا مسااااافه.. وضحك قال لي ريحتك برضو صابون صابون.. الصابون دا شكلو سمح نجيب منو تاني طوالي...غصب عني ضحكت.. قال لي مهاد ما تخافي و تخجلي مني..حاولي خليك طبيعيه.. انا برضو في البدايه كنت متوتر.. لكن لمن اخدت نفس وحاولت اكون مرتاح.. طلعت معاي شخصيه رماح دي... على فكره انا برضو متفاجئ لاني اكتشفتها معاك في اللحظه دي.. انتي بنفس الطريقه يلا  اخدي نفسس...اخدت نفس.. قال لي يلا خليك مرتاحه كدا و حاولي تكوني طبيعيه..وطلعي التوب انتي في بيتك انا م حأقرب عليك الا احس انك مستعده...بعدين نحن يادوب بنتعرف على بعض..ما مستعجلين.. تمام.. ابتسمت براحه و قلت ليهو تمام...قالي وفي حاجه تانيه ما حأقول ليك حياتنا حتكون مثاليه ... لانو ماف حياه من غير مشاكل يا مهاد... بس نحن حنقد نتجاوز مشاكلنا وخلافاتنا مع بعض...من غير اي تدخلات.. مهاد اي حاجه تحصل هنا تندفن هنا وما تطلع برا الباب دا اتفقنا... ضحكت و قلت ليهو اتفقنا ماف حاجه تالته.. ضحك و قال لي الحاجه التالته  قومي... عاينت ليهو بي استغراب و قمت... فكا لي التوب وهو بضحك  وقعدني في الكرسي ومدا لي السندوتش.. قال لي هاك اكلي... و طلع عصير من التلاجه.. وهو بقول لي عارفه قصه فله والاقزام السبعه دي ولا بتلبسي ساي... 

انا فهمتو قاصد شنو طوالي قلت ليهو عارفاهااا... وبقيت عامله فيها مركزه مع السندوتش... و باكل.. 

رماح : برضو بحكيها ليك... قلت ليهو ما تحكيها لي شكرا... قال لي بخباثه خلاص بحكي لي الجزو العاجبني من القصه.. وانتي احكي لي الجزو العاجبك ... وبدا يحكي قال لي فله دي كان في ملكه بتغير منهاا لانها حلوه لكن طبعا ما احلا منك و غمز لي.. قلت ليهو رمااااااح... بقا يضحك وقال لي اصبري اتم ليك... يا زوله الملكه دي غيره منها بس ختت ليها سم في التفاحه و المزه اتسسمت واغمى عليها ...قعدت اضحك.. قال لي نجي للجزو الظابط المهم يا زوله الاقزام جابو ليها حكيم الغابه قال ليهم المزه دي ما حتبقا كويسه الا يجي امييررر ووو... طوالي قطاعتووو وقلت ليهوو. بكاورييييك رمااااااح خلي التفااااااهه احسن ليك.... 

رماح وهو ميت بالضحك : التفاهه اتسممت بيها فله... انا بي ضحكو قعدت اضحك.. قلت ليهووو قصدك المزه... و قعدنا نضحك الاتنين... بعداك قال لي غايتو راحت الهيييبه حاسي نفسي رفيده رفيده الليله....ما عارفه اتجرأت كيف وفجأة لقيت نفسي بقول ليهو  خليك معاي رفيده... لكن برا البيت دا تكون رماح سامع...رماح قعد يضحككك و قال لي وهو بضرب يدينو ببعض  بالجد رااااااااحت الهيييييبه يا رماح... اسمعيني الكلام دا يندفن هنا... انا سمعتي بضييع.. قلت ليهو ما تخاف سرك في بير...يعني حرفيا انا اكتشفت جوا رماح.. رماح جديد قدر يطلعني من جو التوتر الكنت عايشه فيهو و خلاني اندمج معاهووو...من دخلت المستشفى....بقيت لا بتونس لا بقعد مع الناس كتيير وبضايق من اصوات الضحك...لاني بحس انو الناس بتضحك فيني... يمكن الليله دي اطول مده اتونس واضحك فيها في فتره مرضي... بمجرد ما اتزكرت مرضي سرحت و بقيت اعاين في رماح... خفت اكون بتخيل.. رماح فهمني و سألني بلعتي حبوبك؟... قلت ليهو لا... قال لي مهاد كلو ولا الحبوب نحن ما عايزين نبدا من نقطه الصفر ...ومشا فتح الشنط فتش الحبوب و طلعها  و جاب لي مويه بلعتهاااا... و قال لي يلا نصلي العشاء عشان انا والله فتران عديل الليله اليوم كان طوييل.. فعلا صلينا العشاء و نمنا 

___________

محمد : يا برو رايك شنو بما انو رسمك بقا حلو .. تعملي تصميمات لي بلوزات و فساتين ولبسات جديده.. ونشتغل سوا...انا بجيب القماش من دبي.. واجيب لي خياط شاطر يشتغلها.. 

برو : محمد خلاص شكلك قطعت موضوع.. امشي نوم عليك الله... 

محمد : جادي والله انا ما بهظر معاك... جربي اصلا انتي بتحبي التصميم عموما جربي حاجه جديده.. 

برو : في رايك بنفع.. 

محمد : خطبيه محمد جاد.. كيف ما تنفعيي. 

برو بهظار : واحد انا لسه ما بقيت خطيبتك... اتنين انا حأنفع لاني براءه احمد..ما عشانك.. 

محمد بضحك : تلاته من انتي دقدق يادوب بتتعلمي المشي.. معروفه انك خطيبتي..اربعه حتنفعى لانك براءه احمد خطيبه محمد جاد.. 

برو وهي بتضحك : دقدق؟دي شنو المصطلحات البيئه دي.. 

محمد : اي دقدقي.. هسي حأمسح اسمك و اسجلو دقدق محمد...برو قعدت تضحك.. وقالت ليهو يدق لحمك.. محمد قال ليهااا وبتتكلمي عن المصطلحات البيئه انتي منبعهاااا...يعني انا ادلع.. وانت تداعي... 

برو : في زمتك دقدق دا دلع...

محمد : علي الاقل بحاول كدي انتي حاولي...قالت ليهو حموتشييي بهباله .... نهله فكتها ضحكه... وقالت ليها ارحمونااااااااا انا راحله من الغرفه دي.... ما ممكن التلوث السمعي دا.... وطلعت خلت ليها الغرفه... 

_______________

عسجد جاااات... بعد اشتغلت نضافه في مستشفى عشان تقدر تطلع حق الرجعه... واول ما دخلت البيت... عمر اخوهااااا اداهااا كف وقال ليها خلتيتي البسوااا والما بسوااااا يسألنا بتكم وين... و بتكم ما متواصلين معاهاااا... ونحن نكضب ونقول متواصلييين عشان كلام الناس ونحن اصلا ما عارفنك حيه ولا ميته... لي بسس يعني معقوله ما لقيتي تلفون ترجعي لينا بيهو تطمني قلب امك عليييك... امك قلبها مقطووع و ضغطهاااا في السماااااا... وحجه نفيسه دي بس تبكي وتحجز فيهو من عسجد.. و تقول ليهو عليك الله خليها يا عمر بركه الرجعت... وعمر يكورك و يقووول ليهاااا... خمسه بنات اخيير عدمكم... كل وحده يطقوو بيها راس التانيه ما فيكم اي فايده... واحده شايله هم امهااا ماف.. انا قلت انتي الكويسه فيهم... طلعتي اسوأ منووو... عسجد رمرمت دميعاتها حقت التماسيح... و قعدت ليهو في الارض و بقت تقول ليهو اعفي لي يا اخوووي... اعفي لي يا عمر.. انا والله كنت عايزه اضرب ليكم لكن بس تقول شنووو... استاهل الضرب اضربني لكن انا ما عندي غيركم.. امها مسكتهااا و بقت تبكي... وبي بكاهم عمر قلبو حن و بقا يبكي معاهم...وهي بقت تقول ليهم انا تاني ما بفوتكم... انا ماعندي زول احن علي منكم.. وهم صدقوها.. 

___________

ملك : سمعت من صحباتنا انو عسجد جات.. 

ميسر : وما تجي.. ان شاء الله تحرق.. نحن نعمل ليها شنو... 

موفق : ملك نحن مش طوينا الصفحه دي... بتفتحي الموضوع تاني لي؟..تجي ولا تقعد ولا تموت نحن تاني ما شغلتنا واقطعي علاقتك بيهااا وريتك..

ميسر : انت داير توصيها يعني.. هي مفترض تكون عارفه الكلام دا.. كدي بس اسمع اسمها في خشمك ساي.. خلي تواصل وعلاقات كمان.. 

ملك : هسي انتو بتكوركو فيني مالكم الاتنين... انا دايره اوصل معلومه بس.. الاتنين قالو ليها شكرا ليك و ميسر قال ليها اخير كان تحتفظي بيها لنفسك...مشت وهي زعلانه منهم.. موفق كورك ليها م تنسي تشتكينا لي مصطفي.. وهو ميسر قعدو يضحكو... 

____________

انا و رماح علاقتنا كانت ماشه اكتر من سمن على عسل... صح كنت بنفصم فيهووو مرات.. لكن هو بقدر يتحكم فيني... و صح هوو بكورك فيني مرات... لكن كنت بقدر امتص غضبووو... يعني كنا متفاهمين... وفاهمين بعض رغم انو ما حصل بيناتنا تعارف مسبق... ورغم انو عرسنا تم سرعه سرعه.. ورغم فرق العمر بيناتنا..لكن على قول رماح دا اثر الحب الحلال خلال اسبوعين بقينا حافظين بعض حفظ 

يوم جيتو وانا قلبي في يدي خايفه منو ... وهو كان عندو كوره بحضر فيهااا...قلت ليهوو رماح.. قال همممم وهو اصلا ما مركز معاي... تاني قلت ليهو رماح... قال هممم يا مهاد سامعك عايزه شنو... قلت ليهو عايزاك توديني المحل اشوف امي و عمر ماشين كيف... 

رماح من غير ما يعاين لي  : اضربي ليهم تلفون.. بتعرفي الحاصل 

انا : يا رماح ركز معاي... دايره اشوف بعيني.. واشوف التامي والناقص...

رماح : مهاد انتي عروس... ومفترض يعني دا شهر عسل.. شغل شنو ومحل شنو...وبكره خطوبه محمد.. بتلاقيهم هناك اسأليهم... وبعدت نتم شهرنا دا امشي المحل ما عندي مشكله 

انا : يا رماح ياااخ.. ما شغل.. منو نطلع ونغير جوو ونتعشى هناك عازماك...ولا رد علي مشيت خليتو وانا محموقه..بس قفلت الباب كدا جاني.. قال لي ارح امري لله كنت عزابي مرتاح ومريح بالي... و بحضر الكوره في النادي بي مزاج..براي عملتها في روحي..اجهزي.. ولا كضبت طوالي فردت وشي وقمت عشان اجهز... قال لي ما تتعودي تزعلي وتعملي حركات و بتاع.. المره دي انا اتحنكت ليك بالعزومه... المره الجايه ماف دلع وكلام فارغ...قلت ليهو رماح عليك الله قوم قوم اجهز و خلي النضمي حنتأخر... رفع لي السنفجه... قال لي هاك عليك دقيني... قعدت اضحك وقلت ليهو معقوله بس ادق العسل  دا كلو... قال لي  ماشه كويس... لكن ما ممكن تقولي العسل لي زول طول و عرض يعني.. احترمي الدقن دا ما ممكن... انا بتهزء يا عم... بقيييت اضحححك ومشيت الحمام وانا بقول ليهو عارفاك بتكسر في الزمن امشي  استحم في الحمام البرا خلينا نكسب الزمن...بعداك لبسنا ومشينا المحل وبعد عملت روج رماح مسحو لي.. انا اصلا ما بحبو بس مكاوه ليهو عملتو ..سلمت على. عمر... و بكيت مع امي عديل اول مره ابعد منها مده قدر دي..قالت لي الجابك شنو يا مهاد...رماح قال عاين نظام ما قلت ليك..و قال ليها جاين نتعشا.. ونغير جو.. وانا قلت سمعتي يعني ما جايه لشغل خلي عمر يعمل لينا اتنين شيش...فجأه اتزكرت الموقف يوم كنت بتخيل محمد و سرحت.. رماح قال لي مالك... قلت ليهو ماف حاجه... عمر لمن جاب لينا السندوتشات  قلت ليهو يا عمر انت شايف رماح صح ... ضحك و فهمني قال لي شايفووو يا مهاد و مشا... رماح قال لي يعني انا اسألك في شنو تقول لي ماف شي... يجي عمر توريهو... وتسأليهو كمان... قعدت اضحك و قلت بما انك طلعت  حقيقي اصبر النحكي ليك... قال لي ما تحكي لي سألت و قلتي ماف حاجه ما داير اعرف تاني ... قلت ليهو بحكي  مش المره الفاتتت حكيت لي قصه فله رجاله... قعد يضحك.. قلت ليهو انت مسبقا حكو ليك القصه لكن بحكيها ليك تاني و بديت احكي ليهووو...قال لي  الحصل داك كلو لي خيير.. عشان نتعرف على بعض يعني  لو ما كنتي اتخيلتي انك مع محمد اليوم داك ...ما كان اسي  انتي بتاكلي سندوتشات الشيش معاي يا مهاد...قلت ليهو طلعت انت الفرصه الحلوه المنتظراني يا رماح 

___________

تاني يوم مشينا خطوبه محمد و برووو...جو ناس ملك و البنات.. جابهم كمال.. عشان يلاقي نهله...ورجعهم موفق عشان يكلمني بي موضوع رفيده واظبط ليهو امورو ...

كلهم بي امي و خالتو سلوى اول شي علقو عليهووو الروج قالو لي  يا بت انتي عروس مالك ما عامله روج... بقيت اعاين لي رماح... وهو زي الحجر واقف... ولا كأنو هم بتكلمو ولا كأنو انا عاينت ليهوو.. طوالي كلهم سكتووو.. وتاني ماف زول جاب سيره للموضوع...

برو كانت زي الكانو ما جاين يخطبوها لافه عادي في البيت... و لمن يقولو ليها يا بت خشي.. تقول ليهم اخش لي كان ما جاي يخطبني محمد... انا حاسه انو جاي يشرب معانا شاي المغرب زاتووو... ما حاسه احساس عروس.. 

___________

بعد شهر.. رحلنا من الشقه.. لي بيت ناس رماح... ناس امو في الارضي ونحن فوووق... ورماح نزل شغلو... و بدا موضوع العزومات... كل يوم زول عازمنا..لحدي ما في يوم  ضربت لي حجه نفيسه قالت لي لو ما معزومين بكره.. تعالو لينا...

لحدي ما في يوم ضربت لي حجه نفيسه قالت لي لو ما معزومين بكره.. تعالو لينا...قلت ليها بكلم رماح لو ما عندو شغل بنجي ان شاء الله... قالت لي منتظرنكم يا بتي تعالو افطرو معانا...كلمي  راجلك وارجعي لي وقفلت...مشيت لي رماح قلت ليهو بكره عندك شغل قال لي لالا بكره ما عندي حاجه... طوالي رجعت ليها وانا واقفه جنبو  قلت ليها بكره بنجيكم ان شاء الله رماح قال ما عندو حاجه  فرحت شديييد.. و قالت لي ربنا يسعدكم يا بتي.. قلت ليها اللهم امين ويديك الصحه و العافيه يا خالتو وقفلت ...

رماح : بكره ماشين لي منو و دا رقم منو طلع ... مديت ليهو تلفونو.. وقلت ليهو دا رقم حجه نفيسه  الشغالين هي و امي في المقصف يحليها  شكلها امي ادتها رقمك عشان انا رقمي ما شغال .. عازمانا قالت... 

رماح : مش ياها حجه نفيسه الكان جيران ناس محمد...

انا : ومالك قايلها بالطريقه دي.. اي ياهااا...ام عمر...

رماح بكواريك : اسي انتي  كلمتيني... بتوعدي سااااي.. طرطور  انا

انا : يا رماح  سألتك عندك شغل قلت فاضي...

رماح : في فرق بين سألتيني... و كلمتيني.. اسي ماف مشي.. وتاني الحركه دي ما تتكرر يا مهاد.. 

انا بزهج: لي ماف مشي؟

رماح : كده.. 

انا : يا رماح ياخ انا وعدتها..

رماح : قلت ليك ماف مشي يا مهاد.. خلاص قفلي الموضوع دا..عملت فيها زعلانه و مشيت على اساس حيجي وراي ... واتربعت في نص السرير وبقيت منتظراهو يجي لكن ولا جا ولا اشتغل بي... بعد شويه سمعت صوت التلفزيووون اشتغل نظام عدييل اقنعي ..اتمليت فللل قربت ادفق.. مرقت ليهو برا قلت ليهو  دي ما اول مره اعمل الحركه دي... لمن ضربو لي ناس خالتو سلوى برضو سألتك فاضي او لا.. قلت لي فاضي... قلت ليهم خلاص بنجي... وانت اخدت الموضوع ببساطه و مشينا.. اسي الحصل شنووو...

رماح : الغلطه غلطي المشيت ليك الغلط.. لكن تاني محتحصل... 

انا : يا رماح خلاص انا عرفت غلطتي تاني بسألك اول و بكلمك بعدين بتصرف 

رماح: ماف مشي يا مهاد كلامي واضح.. 

انا : ما عندك مبرر لي عدم مشييك و بعدين لو اعتزرت ليها و قلت ليها ماجاين بكره.. كده كده حنمشي ليهم يوم تاني..

رماح : ما حنمشي لا بكره.. لا يوم تاني.. 

انا بغيييز : ولييييي.. 

رماح ببرود : كده قلت ليك .. قربت اشيل حاجه افلقو بيها... بس استغفرت و لبست توبي... ودايره افتح الباب كدا.. 

رماح : وين وين..؟ علي وين يا حلوه.. 

انا بغيز : نازله لي رفيده.. 

رماح : وانا قاعد هنا حيطه ما تكلميني تقولي لي نازله .. تعالي ما تمشي..قلت ليهو اربطني في كراع السرير عليك الله بعد دا... صحي حنيتكم دي بس حدها  الشهر الاول...قعد يضحككك...اتغزت زياده... قال لي وهو بضحك تعالي بعدين ما معروف نجي متين اخدي ليك نومه... عشان م تتعبي... انتي الليله صاحيه بدري 

انا بغيز : دا نظام شوفيني انا لسه حنين ولا كيف؟ ما فاهمه..

رماح وهو ميت بالضحك : تصدقي ما بتستاهلي.. امشي لي رفيده.. انا مالي ان شاء الله عنك ما نمتي.. قلت ليهو بسسس انت مالك.. ونزلت لقيت خالتو حليمه قاعده في مصلايتها بتسبح ..

خالتو حليمه : مهاد مالك نزلتي كنا مرسلين ليكم الغدا فوق.. 

انا : يا خالتو بناكل معاكم زهجنا من القفله..رفيده جات طالعه من المطبخ..سلمت علي و هي بتضحك قالت لي ليك حق تزهجي اسي مقابله رماح دا اليوم كلو كيف... تلقاهو محدد ليك ساعات للنفس.. وساعات للكلام و ساعات للسكات.. الحمد لله انا الله فكاني منو ... انا و خالتو حليمه قعدنا نضحك.. قلت ليها  رماح دا انتو ظالمنو والله.. 

رفيده بهظار: هددك صاح.. انا متأكده انو مهددك ما تتكلمي اخوي وعارفاهو..اها حتلبسي شنو بعدين... قعدت اضحك قلت ليها ما عارفه والله انا زاتي.. 

خالتو حليمه : ما تلبسي توب.. البسي ليك فستان.. التوب حيعزبك... 

رفيده : لازم تطلعي ظابطه... الليله بنات اهلنا الما جو العقد كلهم جاين يتفرجو في مرت رماح المفتري على قولهم...

خالتو حليمه : عروسنا زيينه..  ما محتاجه حاجه...مهاد اي كلام تسمعيهو بعدين دخليهو بجاي و طلعيهو بالجهه التانيه .. خليك بت واعيه.. وحافظي على بيتك.. 

رفيده : ما تدخلي الكلام اصلا.. عشان تطلعيهو..اعملي ميته بس 

انا بخوف : خوفتوني يخوانا... انا غيرت رايي ما ماشه اللمه دي ..خالتو حليمه حضنتني.. وقالت لي انا زي امك عشان كدا بقول ليك الكلام دا...ما عشان تخافي... لكن  البتسموهم شنوو يا رفيده... رفيده ضحكت وقالت ليها الشلابات..خالتو حليمه قالت لي بس ياهن الشلابات كتاااار يا بتي...انا مش كبيره كدا وسيف الدين عجز  بخاف عليهو من الشلب..انا ضحكت ضحك... قالت لي البنات بقن قادرات يختي بعرفو يلعبو براس الراجل...م تدي راجلك فرقه يعاين بره اتجيهي و اتدلعي عشان ما يفتش برااا...دايما خالتو حليمه بتخجلني بكلامها الكلو كلام كبار كبار.. وبتقول لي امك مسكينه م بتوصيك.. لكن انا بوصيك لاني شفت في الدنيا دي كتيير انتي زي رفيده بتي..ونهائي ما كانت بتحسسني انها نسيبتي.. بالعكس كانت بتحرشني على رماح .. و بتقول لي الولد دا ما تديهو فرقه يتحكم فيك... ولدي عارفاهو دكتاتوري... لمن رماح بقا يقول ليهم انا تاني ما بخليها تنزل ليكم... بتحرشوها لي...رفيده قالت لي بعد الغدا استحمي واجهزي وتعالي امكيجك...بتلقائيه قلت ليهااا بسسسسس ود اللزينه انا بعرف اخد حقي منو كيف... الليله الروج حدووو الاضان..خالتو حليمه و رفيده ديل قعدوووو يضحكووو...

خالتو حليمه وهي بتضحك: عفيت منك..

رفيده بضحك : انا ما قلت ليك يا امي مقطمها النفس.. اها انكشف المستور.. انا عرفتها نازله زعلانه من وشها.. بصوت ضحكنا رماح جا نازل... رفيده قالت لينا.. فلان جااا اسكتو... انا وخالتو حليمه بعد سكتنا...لمن قالت فلان قعدنا نضحك تاني...

رماح : صوت ضحكم واصلني فوووق...انتو قايلين نفسكم ساكنين براكم في الحله دي ولا شنو... 

خالتو حليمه : قاعدين في بيتنا ما نضحك فيها شنو 

رماح : ماف زول حاميكم الضحك.. اضحكو.. لكن براحه.. اصلو في شنو بضحك قدر دا..معقوله بس يا امي.. 

رفيده: مهاد سوقي سوقي البلوه بتاعتك.. دي بنرسل ليكم الغدا فووق... 

رماح بكواريك : رفييدااااا.. طوالي سكتت ونحن قطعنا مويه و نور ...ومشينا نخت الاكل..قعدنا كلنا في الصينيه الا خالتو حليمه.. قالت بتنظر عمو سيف الدين ابو رماح تتغدا معاهوو... يعني صح هي مره كبيره  لكن متشببه و مهتمه بنفسها وراجلهااا اهتمام لمن بتحيرني مرات .. بعد الغدا... رفيده طلعت ليها ماسك زبادي بي بن ولبن بدره من التلاجه .. عملت لي في وشي و عملت لي روحها... رماح جا عشان يقول لينا اعملو لي جبنه.. لقانا خاتين كراسينا تحت مروحه المطبخ والشوش ملتخه بالزبادي.. اتخلع.. وقال لينا دا شنو القرف دا...قومو غسلو وشوشكم دي... 

رفيده : رماح حتى دي عايز تتحشر و تتأمر فيها..

انا :اصلا قرب ينشف اسي بنغسلو.. 

رماح : غسلو بس  قرب ينشف ولا بتاع... واعملو لي كبايه حبنه و اجهزووو... ما تأخرونا.. وطلع.. ولا اشتغلنا بيهو خلينا الماسك نشف.. وعملت ليهو الجبنه.. و قلت لي رفيده البس و اجيك.. وشلت الجبنه طلعتها ليهو فوق شربها ودخل الحمام ..وانا ودخلت اجهز هدومنا انا وهو... الفهمتو من كلام رفيده و خالتو حليمه انو بنات اهلو خاتين عينهم عليهو.. وهو ما مديهم وش.. والليله اهل امو كلهم عاملين لينا لمه في منتزه...نظام يتعرفو علي وكدا... وحأكون تحت الانظار...خفت و اعصابي بردت.. و بقيت بقول لي نفسي اذا كان الفكره ساي خوفتك.. بعدين حتعملي شنوو يا مهاد..استغفرت..وحاولت اهدا.. و اروق لانو التوتر ما كويس معاي.. جاتني فكره اطقم مع رماح.. كيتا في العينهم عليهو ديل... ضحكت بنصر و بديت افتش في هدومي و هدومو.. عن الوان متقاربه... لقيت عندو قميص كحلي ساده.. و سبحان الله انا عندي فستان كحلي ساده.. طلعت ليهو معاهو بنطلون بيج.. ولي طرحه و شبط و بالبيج..وشنطه مشكله كحلي بي بيج...رماح لمن طلع من الحمام لقا الهدووم مشروره في السرير... عاين لي و ضحك.. قال لي طقم لكن...شكلو امي ورفيده ادوك الزيت كلو... قلت ليهو ادوني الزيت لكن انا كشحتو اصلا ما فارق معاي...رماح قعد يضحك وقال لي  دا كلو وما فارق معاك.. لو فارق كان جبتي كلبشات كلبشتي يدي في يدك ولا كيف... ولا اشتغلت بيهو شلت هدومي ودخلت الحمام.. بعد طلعت كوركت ليهو قلت ليهو ماشه لي رفيده وجايه.. و ما اديتو فرصه يقول حاجه.. نزلت ليها مكيجتني سرعه سرعه.. و طلعت تاني...عشان البس الطرحه والشبط.. اول ما شافني كنت قايلاهو حيتنرفز زي ما انا مخططه.. لكن ضحك ومشا جاب ليهو منديل...ومسك حضومي الاتنين بي يد وحده.. و مسح الروج وقال لي كدا احلا...وبعدين شك دا منور.. دا اثر الزبادي ولا شنو...مسكت نفسي بالعافيه عشان ما اضحك.. وقلت ليهو بعملو تاني.. قال لي ما مشكله وانا بمسحو تاني..ومشا جاب ليهو فازلين مسحو لي في خشمي بقيت زي الماكله زلابيه.. خشمي كلو مزيت...وقال لي قلنا الروج لااا 

انا : يا رماح ياخ.. ناس حجه نفيسه لا... روج لا..اي شي لا.. لا.. لا.. انا زهجت. 

رماح : يعني انتي مكرضمه كدا عشان قلنا ناس حجه نفيسه لا... قلت ليهو اي انا عايزه امشي... امي حتزعل اذا ما مشيت وهي برضو حتزعل.. لانها عزمتنا.. اذا كان الرسول قال اذا دعاك فأجبه.. انت مالك يا رماح.. خلينا نجبر بخاطرها.. 

رماح بنبره ما فهمتها :خلاص يا مهاد بنمشي.. ونجبر بخاطرها...ضحكت برضا  و قلت ليهو قالت نجي نفطر معاهم قال لي خيير.. دخل اخد ليهو صننه كدا و جاني راجع... شايل تلفونو.. و فتح الكاميرا قال لي تعالي قلت ليهو اصبر النمسح الفازلين دا.. قال لي ما تمسحيهو سمح والله.. 

انا : سمح شنو يا رماح.. خشمي بقا زيت زيت.. 

رماح بضحك : شكلو دا الزيت الادوك ليهو امي ورفيده وانتي كشحتيهو ..ضحكت و قلت ليهو لطيف لطافه...مسحت الفازلين ووقفت جنبوو.. جارني عليهو بقا حاضني بيد وماسك التلفون باليد التانيه .. قال لي المتزوجين بتصورو.. بقيت واقفه زي الصنم.. ... قعد يضحك وقال لي اقيفي زي الناس وركزي مع الصوره..اخد لينا كم صوره.. وباسني في خدييي وقال لي عشنا و شفنا مهاد كمال بتغيررر... لكن صدقي فكره الطقم عجبتني... تعالي نطقم طوالي حتى في البيت... قعدت اضحك.. قلت ليهو يلا يلا يا رماح اتأخرنا.. وطلعنا و انا وانا مبسوطه برماح.. لانو بتعامل معاي بشخصيه غير البتعامل بيها مع الناس.. ودا بحسسني اني مختلفه عندو عن الكل... يعني حرفيا انا لو حكيت لي اي زول عن تعامل  رماح و هظارو معاي في بيتنا... انا متأكده ميه في الميه ماف زول حيصدقني... رفيده شغلتها لينا لمن  شافتنا   نازلين مع بعض... و قعدت تصفر لحدي ما رماح شاكلها .. همست لي انتي قدرتي تقنعيهو  يطقم معاك... ماقدرتي تقنعيهو يخليك تعملي روج... قلت ليها اخوك دا بقتنع بمزاحو يختي...

__________

لمن وصلنا المنتزه... كانو مفرشين كميه من الفرشات..وفي كميه من الناس و الشفع والنسوان والرجال... يعني ماشاء الله عاملين دائرتين كبار... والشفع بلعبو في الكوره.. والشباب مدورين كوشتينه...والبنات ديل كل وحده احلا من التانيه..سلمت على الناس كلهم ورفيده بتعرف فيني.. دا خالي ودا خال امي.. و دي بت خالتي.. و دي امها خالتي..لحدي ما قعدت.. رماح كان قاعد مع الرجال و انا قعدت مع النسوان..رفيده قعدت يميني و خالتو حليمه شمالي... ضحكت حسيت بيهم حرس...وبدو الونسه... خلاتو ظريفات شديد.. زي خالتو حليمه... اتونسو معاي و دخلوني في الجو... لحدي ما جات مره كدا معاها بناتها من وشها كدا ما ارتحت ليهااا... اول شي قالت وينااااا العروس.. قلت ليها اهلا يا خالتو.. و سلمت عليها رفيده قالت لي دي بت خالت امي هويده...وديل بناتها... سلمت عليهم و قعدت وهم بعاينو لي بنظرات ما ريحتني نهائي... رماح جا سلم عليها قال ليها هويده كيف من غير خالتو.. وسلم على بناتهااا...وناداني قال لي مهاد تعالي...مشيت ليهو قلت ليهو نعم قال لي انتي كويسه... قلت ليهو مضايقه من نظراتهم هم لي بعاينو لي كدا؟...ملا لي الكوز مويه و فتح الشنطه طلع منها الحبوب وقال لي ابلعي ديل... بلعتهم..ورجعت ليهم... 

هويده : يعني اسي مناديك عشان تشربي مويه..غايتو جنس شي... سكت ساي... ردت ليها خالتو حليمه.. قالت ليها مرتو ان شاء الله يسقيها بي يدو... مش يناديها طوالي سكتتت وانا انبسط انبساطه قربت اعمل ليها بي يدي كيييييييه...بعد شويه البنات بقو يتونسو... وانا باخد وادي معاهم في الكلام.. الناس دي كلها كانت مريحه... وحبوبه الا هويده و بناتها ديل.. وحده من بناتها قالت لي... مالك حنتك باهته كدا يا منووو.. قلت ليها مهاد بغيز.. قالت لي يا مهاد انتي لسه عروس.. رفيده قالت ليها عايزاها تطلع عشان تخت شكل جديد... زهجت من الشكل دا ما عايزه ترددو.. هويده قالت ليهم هي البنيه دي ما عندها خشم تتكلم بيهو.. بتردو ليها انتي و امك...رماح لمن جا سمعها قال ليها البنيه دي ما بطلع من خشمها كلام شين ولا بترد علي كبير... ووقف قدام رفيده الفهمتو وزحت ليهو قعد جنبي... كميه الامان الحسيت بيهاااا ما طبيعيه بعد قعد جنبي حسيت بي راحه كدا.. و حسيت النار دي ولعت فيها هي و بناتهااااا... همس لي لازم نقعد جنب بعض عشان الطقم ما بظهر من بعيد...ضحكت و همست ليهو من شده ما ظهر... حاساهم حيبلعوني هم وامهم لكن احسن خليهم يولعو بجاز...قعد يضحك قال لي قلتي لي ما فارق معاك هااا...قلت ليهو صدق بعد شفتهم الموضوع اكل معاي جنبه البنات طلعو سمحات والله...ضحك وقال لي ما شايف زول سمح غيرك هنا.. العجب لو كان خليتي الفازيين و ما مسحتيهو... كان ختيتي الجماعه ديل كلهم في فتيل... انا متتت بالضحك... هويده قاطعتنا قالت لينا ضحكونا معاكم... يعني الناس دي كلها كانت بتتونس ونسه جانبيه ..وخلانا على راحتنا الا انتي يا هويده.. 

رماح ببرود : لو عايزين نضحكم معانا كان سمعناكم...لي اول مره احب برود رماح وانبسط منووو..سكتت ساي وتاني نهائي مافتحت خشمها معانا... رفيده والبنات  وزهو الشاي و الكيك والحلويات... والناس بقت تشرب في الشاي.. بعد الشاي اتلمو الرجال على الحريم  وبقو يتونسو في امور مختلفه.. سمعت وحده من بنات هويده بتقول للتانيه... رماح خلا بنات الاهل كلهم وفي النهايه عرس مجنونه كانت بتتعالج عندو...حسيت الدنيا دي ضلمت في وشي...ويادووب فهمت هم بعاينو لي كدا لي .. بقيت اصلا ما سامعه ونسه الناس ولا مركزه..بعد شويه انقسموو جزو قعد في الفرشات.. جزو مشو يتمشووو... و جزو مشو يلعبوو... وانا ابيت امشي مع اي واحد فيهم قعدت بس في الفرشه مدبرسه شديد منتظره متين نرجع البيت... 

رماح : مهاد مالك؟.. كان تمشي مع رفيده...او تعالي نتمشى برانا لو عايزه... 

انا : ماف شي نعست بس..ما قادره امشي 

رماح بهظار : اسي لو سمعتي كلامي واخدتي ليك نومه.. بدل مشيتي تتضاحكو زي المساطيل ما كان احسن ليك..ما اديت اي ردت فعل و فضلت على الحاله دي لحدي ما رجعنا البيت..

___________

في البيت قلت لي  رماح قبل اغير هدومي  اديني تلفونك اضرب لي برو... عاين للساعه بي استغراب قال لي الساعه ماشه على 12 يا مهاد... قلت ليهوو اشتقت ليها عايزه اتونس معاها بتكون صاحيه.. اداني التلفون وهو بعاين لي بتفحص  ودخل الحمام... وانا شلت التلفون ومشيت الغرفه التانيه... كنت حاسه اني عايزه اتكلم معاهااا... يمكن دي اول مره احس اني عايزه افضفض.. ضربت ليها اداني مشغول تلاته مرات... لحدي ما ردت.. وقالت لي الزول ما يخلط معاك.. ما تمشي تشوف راجلك بي وين يا بت الناس... ضحكت و قلت ليها مشتاقين والله اشتقت ليك... قالت لي بسم الله الرحمن الرحيم... يا بت انتي شديده... قلت ليها شديده ولضيضه ...نهله وين افتحي الاسبيكر عايزه اتونس معاكم... قالت لي نهله خالطه...و سكتت مسافه بعد شويه سمعت صوت نهله بتكورك يا برو يا حيوانه جيبي التلفون دا احسن ليك... قلت ليك ميه مره ما تختفي مني التلفون.. برو قالت لي كنت دايره ازيع ليك المحادثات راحت عليك بتكلمو مكالمه... قعدت اضحك...اشتقت لي مناقراتهم مع بعض شديد... بعد شويه جاني صوت نهله وهي بتقول لي راجلك وين يا بتنا الساعه 12... قلت ليها الواحد ما يشتاق ليكم يعني تشبكوهو راجلك وين راجلك وين... مع السلامه..برو قالت لي مالك انتي يا مهاد كويسه...طوالي  بكييت اصلا كانت العبره خانقاني و منتظره السؤال دا... وبقيت احكي ليهم بالكلام السمعتوو والحصل ... برو دي ردحت ردحت لمن الله غفر ليها.. ونهله نبزتها لي جدها الاخير و قالت لي انتي عويره.. خليك مركزه مع رماح بسس...وختي في راسك حاجه وحده يا مهاد رماح اختارك انتي...برو قالت لي م تدي زول فرصه يشكك في روحك...العملتي انتي هم ما بقدرو يعملو ربعو.. قلت ليهم اشتقت ليكم والله... ضحكو وقالو لي والله نخن برضو اشتقنا ليك وغيرو الموضوع و بقو يحكو لي بالشمارات الحاصله... قالو لي ملك و مصطفى. عرسهم قرب شديد خالتو نجلاء قالت.. اتظبطي دا اول عرس تحضريهو وانتي عروس ... برو قالت لي و موفق كلم اهلو بي رفيده  .. وسألوني انتي كلمتيها قلت ليهم لسه بكلمها بكره لكن.. نهله قالت لي موفق لو عرفك بقتلك.. اسي عايش على انك كلمتيها... بعد شويه برو حكت لي انها بدت تصمم ملابس لي محمد... واسي اول عينه حتطلع قريب... قلت ليهااا حلو طيب كدا يبقا عندكم ماركه بي اسمكم زاتو... بدل يجيب من برا..اتونست معاهم مسافه لحدي ما حسيت اني ارتحت بعدين قفلت..اول ما طلعت رماح وقف قدامي و قال لي دي المره التانيه اسألك مالك وتقولي ماف حاجه.. و تمشي تشتكي لي زول تاني.. المره الفاتت عمر.. واسي براءه... لي ما كلمتيني انك سمعتيها لمن قالت كدا.. عشان كنت اوريها مقاماااا.. مهاد اوعك اوعك زول يغلط في حقك تسكتي... واذا ما قادره اشري لي بس انا بخلص ليك حقك.. بقيت ابكي لمن بشهق... ضماني عليهووو.. ودخلني غرفتنا... قعدني في السرير...وهو حاضني وانا بشهق بالبكا..خلاني لحد ما سكت وهديت ارتحت بعد بكيت و بعد كلام برو ونهله ورماح... مشا جاب لي مويه.. شربت وقال لي اسي في داعي للبكا دا كلو وشك بقا متنفش.. ومورم.. وحالتك بالبلاء..يلا قومي غسلي وشك عشان نصلي... صلينا العشاء.. ولخدي ما نمنا هو بشاغل فيني... و يقول لي تنفوشه عيونك بقت ماف بالبكا... ومره يقول لي حلاتك وانتي متنفشك.. وانا بضحك وبقول  ليهو رماح عليك الله ما ناقصه ظرافتك..وهو لسه مواصل

__________

صحيت زي الساعه 9 لقيتو ماف.. بعد شويه جا.. وهو شايل كميه من القلوسات.. والمرطبات...وقال لي لقيت ليك بديل روووج.. و جبت ليك كل النكهات... موز تفاح.. فراوله... في علبه في انبوب.. شكل روج.. كلهم جبتهم.. بس خشمك دا ما القاهو ملون تاني وريتك... بقيت اضحك و قلت ليهوو الله يهدييك يا رماح... قال لي اميين و يهديك و تسمعي الكلام... بعداك جهزنا عشان نمشي ناس حجه نفيسه  ونحن طالعين قال لي مهاد ريحتك حلوه... قلت ليهو بفرح انت الاحلا دي اشترتها لي امي...قال لي ريحتك حلوه بمعنى ما حتطلعي بيها كدا غيري هدومك... اتريحي بيها في البيت تاني الريحه دي قويه ... بقيت متنحه بعاين ليهو... قال لي بدل مقهيه كدا اكسبي الزمن غيري ولا اسي نا بنمشي اصلا انا المشيه دي ما دايرها.. لمن قال لي كدا مشيت غيرت سرعه سرعه من سكات وطلعنا... 

________

خالتو نفيسه فتحت لينا الباب...وسلمت علينا بترحيب و فضلتنا وهي بتقول لينا بركه الحيتو ونورتونا...وكوركت لي عمر يا عمر تعال ناس مهاد جووو... عمر جا طالع سلم علينا ببشاه ورحب بينا... بعد شويه جاتنا طالعه عسجد شايله كبابي المويه

بعد شويه جاتنا طالعه عسجد شايله كبابي المويه...اول ما شافتنا اتخلعت لدرجه انها قلبت الكبابي...والواطه اتملت قزاز...وشها دا اتلون ميه لون .. وبقت تتلفت يمين وشمال.. وتغمض عيونها و تفتحها زي البتتأكد من االشايفاهو قدامها ...ما بنكر اني زاتي اتخلعت...الحاجه السمعتها انها مشت تتجند في الجيش القطري...ما اتوقعت خالص اني اشوفها تاني بعد  كل المصايب العملتها دي ...جات بي ياتو عين.. و بي ياتو وش؟.. ما خافت اهلها يكونو عرفو بعمايلهااا؟.. ولا ما خافت تتسجن بعد كميه القروش والدهب السرقتهم؟... يعني الزول مهما يصل مرحله من الواقحه و قوه العين مستحيل يصل مرحله عسجد...جا في بالي سؤال واحد بس.. هي ما عارفه انو حجه نفيسه عازماني انا؟.. مستحيل تكون ما عارفه... لانو سؤال الجاي منو؟ سؤال تلقائي بطلع من اي زول يعرف انو في ضيوف جايين البيت...طيب مدام عارفه قادره تخت عينها في عيني كيف بعد العملتو فيني... انا لو مكانها بتحجج بي اي شي..وبطلع من البيت...ومدام عارفه لي اتخلعت واتوترت بالطريقه دي لمن شافتني  ...راسي ضرب من التفكير .. لدرجه اني ما ركزت مع رماح.. القاعد زي الصنم جنبي.. وعيونو دي بتطق شرار...

حجه نفيسه : بسم الله يا عسجد مالك..عسجد دنقرت تلم القزاز.. وهي بتقول معليش يا جماعه اتعترت.. وامها بتقول ليها براحه ما تتجرحي... وتشيل وتعتزر لينا.. قلت ليها عادي يا خالتووو بتحصل.. ما مشكله.. الموضوع بسيط...عمر جاب لينا مويه تاني.. وقال لي رماح بهظار  اها العرس كيف نعرس ولا نقعد عزابه.. رماح ضحك ضحكه باهته و قال ليهو والله لو اخترت صح... حتندم على الايام العشتها وانت عزابي.. عمر قعد يضحك..حسيت رماح ما على طبيعتو..... قلت يمكن لسه تعبان من سهر امبارح...ما عارفه عسجد الدخلها شنو نطت وعملت فيها بتهظر... وقالت ليهو وانت ان شاء الله تكون اخترت صح ..ومدت يدها سلمت عليهو... سلم عليها و قبل علي... وقال ليها كيف ما اخترت صح... دي ربنا جعلها مهاد لقلبي..عاينت ليهو و ضحكت..وانا بقول لي نفسي رماح بحب فيك قدام الناس؟ دي الليله فاتت رفيده.. الولد دا بالجد شكلو نعسان.. عمر قعد يضحك وقال ليهو والله يا رماح البشوفك.. ما بقول الكلام دا بطلع منك.. رماح ضحك.. وقال لي مش قلت ليك الهيبه راااحت...قعدنا نضحك.. وعمر قال ليهو عقبال هيبتنا تروح...حجه نفيسه  قالت لينا ربنا يسعدكم يا اولادي...ويديك بت الحلال يا عمررر... قلنا ليها اميين.. و عسجد رفعت عينها عاينت لي عييين حقد وحسد ... لمن خفت و بقيت اقرا ليها في سري..بعد شويه عمر ورماح مشو صالو الرجال... وحجه نفيسه و عسجد دخلو المطبخ يرصو الاكل.. دخلت معاهم حجه نفيسه حلفتني...وساقتني من يدي قعدتني برا قالت لي ارتاحي والله م بتدخلي معانا... الحاجات جاهزه بس نرص..جاتني عسجد قعدت جنبي انا قايلاها عايزه تعتذر...قلت احسسها انو ماف حاجه.. وانو انا نسيت الموضوع.. قلت ليها عسجد كيفك.. 

عسجد بحقد: كيفي..وعندك عين تسألي..بعد العملتيهو... 

انا بصدمه : انتي بتتكلمي عن روحك ولا عني.. ما فاهمه..

عسجد : عامله فيها ما عارفه.. يعني عايزه تقنعيني انك ما عارفه انو رماح عايزني ومشيتي عرستيهو...انتي سمعتيني بتكلم معاهو بي اضانك.. بتتكلمي عن القذاره.. وتقولي لي طلعي محمد من دائره قذارتك... وانتي وحلانه في القذاره وحل..ومشت خلتني... راسي بقا قدر الليله و بكره...عشان كدا رماح ما كان على بعضووو.. و عشااان كدا ما عايز يجي هنا... وعشان كدا عسجد اتخلعت لمن شافتنا... طيب هو لي ما كان واضح معاي... قطع افكاري صوت حجه نفيسه وهي بتكورك لي عسجد و بتقول ليها خلي عمر يجي يشيل صينيه الفطور  و هي ما بترد... قلت ليها انا بناديهو... و مشيت على صالون الرجال لقيت عسجد واقفه و بتقول لي رماح... انا يا رماح قلت ليك قروش العمليه لي عمررر.. لاني خفت تعرف اني انا الحأعمل عمليه لي رجلي و تخليني...وعشان كضبت عليك ربنا عاقبني و القروش انتهت بس في الاجراءات و السفر و بعد وصلت انقطعت و ما قدرت اعملها... رماح قعد يضحك و قال ليها عسجد انتي سافرتي لي شغل... اتغشيت ليك مره لاني كنت معمي...المره دي  ما بتغشيني لاني فتحت و عرفتك على حقيقتك... قالت ليهو والله ماسافرت لي شغل انا كضبت على ناس بيتنا... ما كنت دايراهم يقلقووو علي و يشيلو هم ... انا المحتاجه عمليه ما عمر... ولازم اعملها قبل خمسه شهور... رماح انا عملت دا كلو من حبي ليك..يا رماح مهاد اصلا بتحب محمد.. وقالت لي الكلام دا بخشمهاااا وانا مستعده اواجهاااا..هسي انا ولا مهاد يا رماح.. كان على السماحه ما بتجي في ضفري..رماح  قال ليها تعالي شوفيها بعيوني وبعد داك قارني...و مهاد كان طقيتي السماء شفتي جنبها انتي نكره.. انتي وحده مريضه يا عسجد ما خجلانه اسي وانتي واقفه قدامي.. .. انا طوالي جيتها خاشه... قلت ليها واجهيني جيتك لحدي عندك... عشان تواجهيني  بي القروش و الدهب السرقتيهم .. وشبكتيها فيني..وخليتي اعمامي يقيفو في نص بيتنا و يقولو لي يا حراميه... وكمان اتكفت بي سببك...واجهي يلا واجهي  رماح انك زي م شلتي قروش منووو عشان بتحبيهووو.... شلتي قروش من ميسررر عشان بتحبيهو برضووو...قال عمليه قال..خساره والله خساره انك اخت عمر و بت حجه نفيسه... عمر جا داخل اداهاااااا كفففف وعدلها بالتاني...وقال ليها قصرنا معاااااك في شنووو... امي دي كان بتقطع من لحمها عشانك... حنستك تتمي قرايتك ابيتي.. يعني حتى دي كضبتي فيها تقولي لي امشي جيب عيش زياده... عشان تاخدي. راحتك في قله الادب... سودتي وشنا مع ضيوفنا وكسرتي عينا... قالت ليهو وهي بتبكي حرمتوني من اي شي... يا قاعده اخدم فيك  عشان رجلك... يا برا شغاله عشان اقدر اوفر قروش اشتري بيها حاجات تحسسني اني بت... عمركم ما عملتو لي شي يا عمررر لا انت لا امي لا اخواتي... عمر تاني اداها كف وبقا يكورك... مسكتو قلت ليهو عمررر... اسكت وما تكورك حجه نفيسه ما تعرف بالكلام دا... لانها ممكن تنجلط نحن ما كان غالبنا نحكي ليها.. عارفنها ما حمل كلام زي دا... اسكت عشان م تفقدها.. رماح مسكني من اكتافي الاتنين وزحاني من عمر هناااااااااك قربت اقول ليهو انت كمان دا وقتك...

رماح: عمر انت بي مييه راجل... و كلمه راجل زاتها عليك قليله... عينك ما تنكسررر.. ونحن ما ضيوف... واعتبر ما حصل شي...عشان اخفف التوتر و اقفل الموضوع...ضحكت و قلت ليهو امشي شيل الفطور ما عايزين تفطرونا ولا شنو... عمر ابتسم لي بي انكسار ومشا وهو بقول لي عسجد قوووومي ارح قدامي...رماح طلعو بي جاي قبل علي قال لي جابت ليها محاجزه  بتاعت رجال... حاجزه الولد مالك كمان لمن ماسكاهو من كتفو.. كنت عايزه اضحك لكن لازم اعمل فيها زعلانه.. حمرت ليهو و قلت ليهو ما تتكلم معاي يا رماح ومشيت... صح في البدايه كنت زعلانه لانو ما كلمني... لكن بعد سمعتو قال ليها تعالي شوفيها بعيوني فصلت..النصيحه عسجد مكمله كل مقاييس الجمال وبعد دا قال هي قدامي نكره يعني لي حق افصل و فيوزاتي تطق بالفرح..للحظه حسيت نفسي انجلينا و النجسيه عملت ميه في الميه.. وبعدين هو  مكلمني انو عندو علاقه قديمه... صح ما وراني انها عسجد لكن وراني في النهايه... فطرنا.. و اتونسنا معاهم شويه و شكرناهم و طلعنا رغم اصرار حجه نفيسه انو نقيل معاهم...

اول ما ركبنا العربيه وطلعنا من شارع ناس حجه نفيسه... قلت لي رماح وديني بيتنا....طوالي فحط ووقف العربيه... قال لي شنوووو

انا ببرود : وديني بيتنا عايزه اقعد مع امي يومين..

رماح : لا يعني اشمعنا قررتي الليله و هسي فجأة.. 

انا :اسأل نفسك... وديني بيتنا يا رماح ولمن تفكر تبقا واضح معاي تعال سوقني .. انا هسي  ما عايزه ارجع معاك البيت...

رماح : يا مهاد ما تنفزيني... انا براي الفيني مكفيني.. وانا كنت واضح ووريتك انو عندي علاقه قديمه حفرق لو كانت عسجد ولا غيرها.. 

انا : الفيك مكفيك.... ليك حق تكتفي ما الليله شفت حبيبه القلب.. وحيفرق يا رماح.. انا بالنسبه لي حيفرق.. وديني بيتنا قلت ليك.. 

رماح وهو ضاغط على اسنانو : مهاد ما تختبري صبري احسن ليك.. 

انا ببرود: عشان ما اختبر صبرك... وديني بيتنا.. رماح عشان ما امشي بدون رضاك... احسن توديني برضاك.. سكت ودور العربيه واتحرك علي بيتنا.. انبسط من نفسي... انا ما زعلانه لكن  لازم يتأدب و يعرف انو غلط لمن ما وراني انو كان رافض يمشي ناس حجه نفيسه.. عشان علاقتو القديمه مع عسجد.. وبعدين انا حسيت بالخطر.. واتزكرت خالتو حليمه لمن قالت لي الشلابات كتار.. والبنات بقو قادرات...صح انا واثقه في رماح لكن  فعليا عسجد قادره.. لازم اتظبط  وارجع بيتي بي شكل جديد... واهتم واقرب من رماح اكتر... بعد وصلني قال لي راجعه متين... قلت ليهو ما عارفه.. قال لي مش قلتي يومين.. قلت ليهو طيب بتسأل تاني مالك.. اخد ليهو نفسس.. وقال لي مهاد تتزكري مش قلت ليك انتي عالجتيني قبل انا اعالجك.. سكتت.. قال لي يعني انا عسجد انتهت بالنسبه لي من زمان.. بس ما كنت قادر احكي ليك انها غفلتني زي العوير...والليله اكتشفت اني اتغفلت ليها زي الاهبل اكتر من مره..يعني كانت لاعبه بي... وكمان الدهب السرقتو انا المشيت وبعتو معاها... مهاد انا اتعالجت من عسجد لكن هسي مرضان بيك... والله والله ما حصل حسيت الاحساس دا مع غيرك... قلت ليهو يعني ما كنت بتهظر معاها زي ما بتهظر معاي هسي ... ضحك و قال لي اصلا انا اول مره اهظر في حياتك معاك انتي بس...قلت ليك بقيتيني رفيده تاني في شنو... يعني في مقياس للعواره اكتر من رفيده.. ضحكت و قلت ليهو اي في برووو... عشان ارضا ليك لازم توصل مرحله بروو... قال لي خلاص ارح البيت ببقا ليك ارقوز.. ولو عايزه برقص ليك عشره بلدي... بقيت اضحككككك لمن دموعي جرت... وهو بي ضحكي بقا يضحك معاي و يستغفر و يقول  يا رماح شافعه تعمل فيك كدا.. قلت ليو انزل انزل ارح سلم واتخارج انا لسه زعلانه ما حتاكل عقلي بي كلمتين حلوات..ضحك نزل سلم علي امي واتونس حبه و قبل ما يطلع قال لي يومين يا مهاد و حأجي اسوقك سامعاني صح .. قلت ليهو فهمنا خلاص... باسني في راسي.. و قال لي ابقي عشره و طلع... 

___________

امي : مهاد انتي و رماح زعلانين من بعض... قلت ليها لالا.. جيت اتحنن والله... وتونس معاك حبه ما اجيك يا امي... قالت لي انا لاقياك وين... يا بتي... اليوم داك اتونسنا لي المغرب... ومشاينا لي ناس برو.. دخلتي كدا جو كلهم بي معاذهم اتشعبطو فيني... 

نهله : العرس بنسيك اخواتك.. يا بياعه.. 

برو : بنسيهاااا اي.. انا غايتو خلوني اعرس محمد... ما بجيكم زاتو لو اشتقتو لي رسلو لي جواب... تلفون زاتو ما تدقو لي.... قعدنا نضحككككك 

خالتو سلوي : غايتو عليك جنس خفههه... وامي قالت ليها كلنا قلنا كدا وبقا لينا حاره..قالت ليهم انتو عشان ما عرستو محمد.. لكن انا حأعرس محمد ما ببقا لي حار..يادوب ركزت قدر شنو برو بتحب محمد... وانا كنت حارماهااا الحب دا كلوو وما بتقدر تتكلم قدامي...دعيت ليها بيني وبين نفسي ربنا يسعدها و يتم لها على خير.. 

نهله : انتي محمد دا تشاكليهو و تنبزيهو في التلفون... وتجي تشكريهو و تفلقي لينا راسنا بيهو هنا... امشي قولي ليهو الكلام دا هناك... الولد نفسو يسمع منك كلمه حلوه...

برو : يا زوله نحن متفاهمين انتي اطلعي منهاااا...خليتهم بتناقرو ومشيت سلمن على خالو احمد السألني مبسوطه... قلت ليهو شديد يا خالو رماح ما مقصر معاي في حاجه... قال لي الله يسعدك يا بتي انتي تستاهلي كل خير... وسلمت علي جدو ومشيت قعدت مع برو ونهله .. حكو لي بي الفيديو الاخير النزلتو وانا ببكي.. قدر شنو عمل جوووطه... والناس كلها بتدعي لي و بتسأل مني لاني اختفيت الفتره الاخيره..وقالو لي لازم ارجع اعمل فديوهات... قلت ليهم رماح مانعني التلفون الفتره دي.. وخصوصا الميديا... اتونسنا لحدي بليل كل وحده بتحكي في الحاصل معاها.. حلفو الا نبيت معاهم لانهم طولو مني... شربنا الشاي واي وحده استلمت ليها سرير.. مسكت تلفونا... قلت ليهم انتو بيتوني معاكم عشان تخلطو تخلوني براي..قعدو يضحكو ولا اشتغلو بي ديك تتكلم مع محمد والتانيه بتتكلم مع كمال...نقنقت لمن فترت  في. النهايه نمت... صحيت الصباح بعد نضفنا قلت ليهم ارح معاي الكوفير.. واضربو لي رفيده تجينا هناك... ضربو ليها وفعلا جاتنا هناك... عملت حمام مغربي... ولونت شعري من تحت... واتحننت حنه بتاعت عرووس المهم اتظبط زييين...وديك عملو حمام زيت لي شعرهم... من هناك مشينا المحل نفطر هناك... وعلى قول برو دا ما عرفناهو فطور ولا غدا... سلمنا على امي و عمر... وقعدنا نحكي لي رفيده بموفق.. وهي تقوم وتقع بالضحك... قلت ليها رفيده انا بكلم رماح بقول ليهو سألني منها وكدا وزول جادي و عايز يتقدم... قالت لي شكلك عايزاني اموت قبل اتمتع بي شبابي... برو قالت ليها انتي عويره دا عرس هو شنو انتي حتقعدي ليهو في البيت كدا... 

رفيده: رماح يا زوله اي عريس يجيني كان بقول لي بعد تتخرجي.. اسي بعد اتخرجت.. بقول لسه ما حاني راجل عشان اديك ليهو.. 

انا : رماح خليهو علي.. انتي عايزه موفق؟ 

رفيده بضحك : فوقي قصدك..

برو وهي بتضحك: موافقه يعني.. 

رفيده : دا سؤال... خفه دم.. ووجاهه..من الليله انا حأقيم الليل عشان رماح  يوافق.. نحن قعدنا نضحك و نهله قالت لقينا زول خفيف اكتر من برو بعد اكلنا... كلمت امي و قلت ليها انا راجعه البيت مع رفيده... قالت لي تمام... و اتفقت مع نهله تكلم كمال اني حأكلم  رماح بي انو موفق عايز  رفيده عشان يكلموو...قالت لي تمام... سلمنا عليهم ورجعنا انا ورفيده البيت... 

__________

لمن دخلنا لقيت هويده و بناتها قاعدات... قلت انا من عسجد للفقر ديل... سلمت عليهم...وعلى خالتو حليمه وسألتها من رماح.. قالت لي في الشغل قايلك حتجي بكره... 

هويده : انتي عرستي متين عشان تخلي راجلك و تبيتي برا بيتك... قلت ليها براك قلتي بيتي وراجلي... يعني دي حاجه بتخصني... وحده من بناتها قالت لي البشوفك قدام رماح ساكته وكاتله ضلك .. ما يشوف فصاحتك هسي... رماح مغشوش قال ما بترد على كبير قال... ولا اشتغلت بيهم ولا رديت ليهم.. قلت لي خالتو حليمه ورفيده ما تكلمو رماح اني جيت وطلعت فوق..و بقيت قاعده منتظره رماح..عشان اشوف رد فعلو لمن يشوفني...قعدت احضر في التلفزيون... بعد نص ساعه جا داخل بكورك من الباب يا مهاااااد... قلت ليهو الكلمك منو.. ضماني وقال لي خليك من الكلمني دي شنو الحلاوه دي.. عملتي ماسك زبادي تاني ولا شنو... قعدت اضحك.. قال لي لو بتبقي حلوه كدا كل يوم بوديك ناس حجه نفيسه تتشاكلي مع عسجد... ومن هناك اوديك بيتكم..قلت ليهو انت قول بس عايزني امشي بيتنا والجو يفضا ليك... قال لي مهاد البيت فاضي من غيرك والله ..قلت ليهو زهجت صاح ما لقيت زول تتامر فيهو اعمل.. ما تفعل.. ما تنزلي ما تطلعي..ضحك و قال لي دي ممكن رفيده تسد ليك فيها...لكن في حاجات هنا واشر على قلبو... ماف زول بقدر يسدها غيرك... وساقني غرفتنا وهو بقول لي اول ما دخلت... هويده قالت لي مرتك جات...اول مره احب هويده تصدقي..

______

تاني يوم ضرب ميسر في تلفون رماح... وقال لي رماح...ابوي قال ليك جيب مهاد وتعااااال اسيييي

تاني يوم ضرب ميسر في تلفون رماح... وقال لي رماح...ابوي قال ليك جيب مهاد وتعااااال اسيييي...

رماح بحب : مهاد...يا مهاد.. يا بت.. صحصحي معاي...قلت ليهو بنعاس انا  صليت يا رماح.. والشاي في الصباره..قال لي قومي اشربي معاي طيب..

انا بنعاس : يا رماح ..كان شربت الشاي النومه حتطير..وغتيت وشي وانا بطنطن.. جر الغطا وقال لي بمكاوهه... قومي كبيهو لي خلاص م تشربي... قمت عين مفتحه و عين مغمضه وانا بقول سغيل سغاله... وهو بضحك وماشي بوراي وبقول لي يعني الواحد راضي بقسمتو.. صاحيه منكوشه وعيونك مورمه وحالتك بالبلاء...تجي كمان تكشري من صباح الرحمن و تقولي لي سغيل... الواحد معرس  عشان يسمع ليهو كلمه حلوه...اها الكلمه الحلوه خليناها على الاقل اضحكي تبسمك في وجهه اخييك صدقه.. ياااخ كرامه لله...ضحكت غصبن عني..و شلت كبايتين  من الدولاب...ختيتهم في الصينيه..وختيت السكريه وصباره الشاي... قلت ليهو اغسل وشي واجي.. قال لي تمام...

جيت لقيتو طلع الصينيه برااا... اول ما شافني تاني قال لي كرامه لله... قعدت اضحكك...

رماح بضحك: يعني الواحد يشحد مرتو شحده تضحك ليهو من الصباح..وين صباح الخير يا حبي..ويا وروحي وحياتي  والكلام البنسمع بيهو داك 

وانا بضحك : صحصح ياحبيبنا... انت في السودان..رماح قعد يضحك وقال لي حبيبكم انتو كم نفر... قلت ليهو نفرين انا ومهاد..

رماح وهو بضحك : خلاص خلي مهاد تكب لي الشاي... وانتي تعالي عايزك في موضوع...بقيت اضحك كبيت ليهو الشاي.. شربنا سوا وقلت ليهو.. اها الموضوع شنو...من صحيتني عرفت في ان في الموضوع...قال لي ميسر ضرب لي قال لي ابوي قال ليك جيب ليهووو مهاد وتعاال اسي...

قاطعتو بزعل : ما ماشه.. انا البييت داك حلفت ما بخشو تاني... طلعوني حراميه... وبعد دا اتسخسرو فيني كلمه معليش... وعزمتهم عرسي ما جووو... انا اعمامي ماتو مع ابوي.. ما عندي اعمام... واضرب لي ميسر هسي قول ليهو انا ما جايه..

رماح : خليني اتم كلامي ما تقاطعيني.. قلت ليهو اهااا ... قالي لي انا سألت ميسر الحاصل شنو وان شاء الله خير... قال لي ابوي عمل حادث...

انا بخلعه : شنوووووو...ودموعي طوالي جرت..

رماح وهو بمسح دموعي : مهاد ميسر قال لي كويس ما عندو حاجه بس اغمى عليهو...لمن ودو المستشفى.. قالو بس ضغطو مرتفع من الخلعه.. وتاني ما عندو شي..واول حاجه قالها بعد فتح عيونو  جيبو لي مهاد بت كمال اخووووي اسيي... واصررر شديد.. عشان كدا ميسر ضرب لي من الصباح... واسي هم منتظرننا في البيت  ونحن إتأخرنا عليهم... بكيييت قلت ليهووو وديني ليهو يا رماح ... ضحك و ضماني عليهو... وقال لي يا ربي القالت ما ماشه قبل شويه دي منو فيكم انتي ولا مهاد.... بقيت اضحك وابكي... رماح قعد يضحك قال لي والله انا بديت اشك انو انتو اتنين جدجد...نمشي ناس عمك مالك.. ومن هناك نمشي العياده.. شكلو الفصام دا انقلب انفصال في الشخصيه... قعدت اضحك وضميتو قلت ليهو مش بقولو رب ضره نافعه...مرضي كان الضره وانت النافعه يا رماح.. ضحك وباس راسي مساااافه قال لي كدا يادوب الواحد حس انو عرس MK وين الكلام دا من زمان..

انا بضحك: بالمناسبه دي حترجع لي تلفوني متين... قال لي نمشي ونجي نتفاهم موضوع التلفون..قلت ليهو تمام ولبست لي عبايه وطلعنا

_________

لمن وصلنا لقيت اعمامي ونسوانهم... وناس موفق و ميسر و مصطفي والبنات كلهم قاعدين... اول ما دخلت و قبل ما اسلم على زول.. عمي مالك.. جاااا علي وهو. ماشي يالله ياالله.. وهو ببكي بدموعووو.. و بقول لي اعفي لي يا مهااااد... اعفي لي يا بت كمااااال... كمال ما حوجنا لي حاجه.. ولمن اولادو احتاحو لينا ما لقوناااا... انا بقيت ابكي... ومشيت عليهو مسكتو عشان ما يقع... و قلت ليهووو عافيه ليك والله  يا عمييي... قال لي انا لمن العربيه ضربتني...جا قدامي شريط يوم السرقه وانتي بتبكي و بتقولي لينا انتو اعمام ... خفت اموووووت والله.. خفت من الموت... وبقيت ادعي بصووت عالي يا الله ما تشييل روحي.. قبل اخد العفو من بت كمال...يدي تنقطع الاتمدت عليك ظلم يا بتي...بي بكا عمي كلهم بقو يبكووو.. فكاني بعد مسافه...عشان عمي سليمان وعمي الصادق  و نسوان اعمامي  ياخدو مني العفووو... حرفيا شعور انك تكوون مظلوووم ..وربنا ينصرك دا اجمل شعور ممكن الواحد يحس بيهوووو.... موفق بعد الجو كان حزين ومتوتر.. والناس كلها منتنشنه... قلبو لينا ضحك و هظاررر...بعد داك عمتي وناس ملك دخلوني جوا... اتونسو معاي..ورماح قعد مع الرجال.. موفق انسحب براحه جاني... قال لي هسي راجلك دا بتفاهمو معاهو كيف... والله انا بخاف منو عديل... خايف افتح معاهو موضوع رفيده.. يديني كف بي يدو الكبيره دي اطرش كلو كلو... تاني فوقي لا اسمعها من رفيده لا من غيرهاااا...ياخ انا ضحكت ضحك.... وناس ملك ورنا رونق  دموعهم جرت عديييل بالضحك.. وميار قالت ليهم يحلنا الله من فوقي نحن...عمتي قالت ليهوو وهي بتضحك قصيت الراجل... قلت ليهو الليله رماح لو حصلت ليهو حاجه البلد دي ما بتشيلنا يا موفق... ضحك وقال لي انتي كلك قدر يدو... عايزه تعملي لي شنو يعني... قلت ليهو وانا ميته من الضحك موفق الله اكبر عليك... قال لي يلا عشان ما اسحرو ليك.. احسن تظبطي لي اموري عليك الله.. قلت ليهو مبدئيا كدا هي موافقه... رماح خليهو علي... موفق دا قرب يزغرت... عمتي قالت ليهو غايتو انت رايحه ليك عرسه... كان ما عرست بتموت.. الله يعرس ليك... قال ليها امييييييين من هنا لي بيت ناس رفيده...

ميسر جا داخل وهو بضحك وبقول ليهو اركززز حبه ياااخ ما ممكن تكون بالطريقه دي ..وقال لي مهاد رماح قال ليك اطلعي... فعلا طلعت ليهو برا.. ودعناهم ورجعنا البيت 

__________

عدت الايام ونزلت مع امي وعمر المحل  بقيت اساعدهم ونتيجه التقديم طلعت... انا قبلوني اعلام... و برو قبلوها تصميم داخلي... اليوم داك كوركت وزعلت... و قلبت الدنيا... لانو انا م قدمت اعلام... وديل برو ونهله اتفقو علي..وكتبوهو في التقديم من وراي... و قالو لي خساره زول يكون عندو صوت.. وموهبه زي دي يضيعها ساي... ورماح قال لي انا شايف كلامهم صح... وقال لي يلا نعمل تست..قلت ليهو كيف جاب تلفون مداهو لي قال لي دا تلفون جديد عشان ترجعي  تكسري الدنيا بفديوهاتك... واول فيديو حنعملو سواااا...الناس دي كلها منتظراك لازم كل الناس تعرف انو Mk ياها مهاد كمال ...ومنها نعمل تست نشوفك حتنجحي كإعلاميه او لا... قلت ليهو مستحيييل... قال لي ما على كيفك... فعلا اتظبطنا... و ظبطنا المكان وقعدنا في كرسين جنب بعض... وطلعنا في فيديو... انا اتكلمت عن سبب غيابي الفتره الفاتت... ورماح اتكلم عن الشيزوفرينيا... واعراضهااا...و كيف يتعاملو مع مريض الفصاااام.. واتكلم عن انو مريض الفصام عادي ممكن يكونو زول ناجح في حياتوووو...وقال ليهم ابسط مثال عندكم مهاد كمال... اللسه ما تمت ال20 سنه وبتعمل فيديوهات بستفيدوو منها ناس اكبر منها بسنوات وعندها محل بي اسمها.. ومقصف... وماسكه بيتها... يعني ناجحه في حياتها العمليه وناجحه في حياتها الزوجيه...في احلا من كدا...وانا وجهت كلام لكل المرضى النفسين بغض النظر عن مسميات الامراض... و قلت ليهم انتو قادرين تتجاوزو... ما تركزو مع كلام الناس الحوليكم المرض ما عيب عشان تخجل منو... وعلى قول رماح زي ما العندو تايفويد او ملاريا.. محتاج يتعالج عشان يقدر يواصل حياتو... العندو اكتئاب او اي مرض نفسي تاني محتاج يتعالج عشان يقدر يواصل حياتو برضوو..يعني انت ما مجنون انت بس محتاج علاج .. وقفلنا الفيديو على كدا...

الفيديو عمل ضجههه كبيره... كل الناس كانت بتتكلم عن Mk الطلعت مع زوجها دكتور رماح سيف الدين في فيديو بشخصيتها الحقيقيه وورت الناس اسمها الحقيقي

لمن شغلت حساباتي نزلت لي كميه من الرسايل... وكميه من البرامج طلبت مني اعمل معاهم مقابلات...وكذا اذاعه طلبت اشتغل معاهااااا...يعني فجأه لقيت نفسي معروفه للكل.. و كل الناس بتتكلم عن مهااااد كمال...امي وخالتو سلوى وخالو احمد شاكلوني شكل... قالو لي كيف ما تكلمينا.. عشان ندعمك...والعجب امي لمن عرفت انو القروش الفتحنا بيها المحل دي قروش الاعلانات ما عمولات... عملت لي عمايل ناس موفق اول ما شافو الفيديوووو... جوني كلهم في البيت مصدومين الا ميسر..كمال شغال لي.. موفق كمل النت كلووو في فديوهاتك... وموفق شغال لي النبي قولي لي فووووقي يامهاد.. برو قالت ليهو اليله رماح ما سمعك الله سترك...رماح جا من هناك قال ليهم  ما سمعت شنوو..موفق قال ليهو لالا ولا شي... مصطفى قال ليهو ولا شي يا كبييير نحن قعدنا نضحك...وحكو لي كل الحصل من الرساله الرسلوها لي بي اكاونت الشركه عشان اشتغل معاهم ... لحدي ما بي سبب الفيديو بتاعي... جو اعتذرو لي... كمال قال لي ميسر عشان استفزيتيهو...كان بشمك و غير الباسويرد بتاع الواي فاي عشان موفق ما يسمع ليك... موفق قال لي لكن انا بقيت انشط بي القروش  واسمع ليك... شفتي كيف يعني انا من اكبر المعجبين يا مهاد... اطلعي معاي في فيديو... رماح ضحك وقال ليهو انت شكلك دايرني اغير راي فيك..موفق قال ليهو معقوله بس يا ابو النسب.. من اسي مش مهاد بحظرهااا... وفيديو واحد تاني ما بحضرو ليها...اليوم داك حرفيا كملنا الونسه والضحك.. 

___________

في يوم مشيت المحل لقيت الدنيا مقلوبه فوقاني تحتاني... قلت ليهم في شنو.. قالو لي في قروش كتيييره انسرقت...قلت ليهم بخلعه كيييف يعننننني... عمر ناداني.. وقال لي  بي انكسار مهاد انا ما عارف زاتو اقول ليك شنو وبي ياتو عين... قلت ليهو في شنو يا عمر... قال لي عسجد جات معاها واحد ...وعلى اساس انها اختي وثقو فيها لمن قالت ليهم عمر قال ليكم ادوني الكاش الفي المحل كلو وبحول ليكم بنكك... ادوها كل الكاش...واسي الاشعار طلع مزور... وتلفوناااا مقفول... يعني حرفيا السرقه دي مرض...وعسجد بقت تتفنن في السرقه..حاولت اخفف على عمر لكن كان مكسور شديد... من حركه اختووو... لدرجه انو قال عايز يخلي الشغل في المحل... قلت ليهو يا عمر... انت اذا خليت الشغل انا بقفل المحل وانت حتكون السبب... القروش بتتعوض.. والعتره بتصلح المشيه... من يوم الليله تتأكدو من الاشعار اول بعدين تحولو..اختفا كم يوم لكن في النهايه اقتنع و رجع اشتغل معانا تاني...وبعدها سمعت انو عسجت سافرت تعمل عمليه في رجلها... 

_________

يوم عرس مصطفى وملك انا قاعده ساعه من فيديو لي فيديو... عشان اظبط الحجاب التحت  التوب زي حجاب ندى القلعه... بعد خلاص جهزت... رماح جاني قال لي ساعه بتربطي في الحجاب في النهايه رقبتك برا... قلت ليهو م يكون بس يا رماح عايز تقول لي فكيهو... رماح قال لي يعني عايزه تمشي  كدااااا.... قعدت في الواطه قربت ابكي...قعد يضحك قال لي م تكرضمي لي وشك دا خلاص قومي نتصور.... قمت بفرح اتصورت معاهو كم صوره.. على اساس خلاص  م حأفك الحجاب   ... اتفاجئت بيهو بقول لي يلا يا مهاد... قلت ليهو يلا شنووو... قال لي قلت ليك محتمشي كدا اتصورنا بيهو عشان ما هان علي  تعبك يروح ساي..

انا : يا رماح طيب لو ما هاين عليك خليني امشي كدا.. 

رماح بضحك : مهاد...هو حلو واي شي لكن رقبتك برا... كل ما تحسي نفسك عايزه تشوفي الحجاب.. تعالي لي بوريك الصور...

انا بزعل : يا رماح والله بعد تعبي دا كلو... ما قادره اطلع ولا دبوس..ضحك وقال لي تعالي انا بطلعهم... قعدني في الكنبه.. و بدا يفك في الدبابيس... ويقول لي تتزكري اول يوم...طلعت بالله من الحمام قلبي وقف بالخلعه...لقيتك في وشي والتوب كلو في وشك.. واقفه لي زي الزومبي... كتمت الضحكه... قعد يضحك قال لي اضحكي عادي و بعدين واصلي زعلك... ابيت اضحك ليهو كلو كلو ...بعد فكه الحجاب لف لي الطرحه شخبط لخبط ومن غير ما يطبقها يعني الطرحه بقا حدها بطني... قال لي بعد دا البسي توبك زي الناس...قلت ليهو حأمشي كدا؟ قال لي حلات الدنيا عليك...ضحكت غصبن عني.. قلت ليهو انت مش دايرني اغتي رقبتي انزل عليك الله لي ناس رفيده نظر ليهم حبه... انا بعد اخلص بجيك نازله...ضحك وقال لي لا... وقعد خلف لي رجلو... انتظرني لحدي ما خلصت... الححاب طلع حلو   ما زي داك طبعا...لمن نزلنا  رفيده اول ما شافت رماح... قالت ليهو...الطرحه دبستها بي كروصه دبابيس... الاكمام طويله... روج ما عامله...الفستان من شده ما كاري مع الارض الليله حمسح ليهم الصاله بي فستاني دا... ما عندك اي تعليق... بس امرقنا بالباب دا.... انا و خالتو حليمه قعدنا نضحك... وامو قالت ليهو قطمت البنات النفس... قال ليها و يتنفسو لي زاتو... رفيده قالت لي امها اي نتفس كيف يعني ونفس المرأه عوره..رماح قال ليها ظرافتك دي اوعك تمشي تتظارفيها مع موفق... ما اشوفك واقفه معاهو زاتو... تقعدو جنبي بس انتو الاتنين.. ومن هسي رقيص وعواره ماف..قلت ليهو ونحن ماشين لي... قال لي انتي ماشه عشان ترقصي ولا شنو... سكت سااااي... خالتو حليمه دي ماتت بالضحك... 

_______

لمن وصلنا الصاله لقينا برو ومحمد ونهله... برا لسه م دخلووو...سلمنا عليهم و رماح انشغل مع محمد و خلانا نتنفس حبه الحمد لله دخلنا باركنا...وسلمنا على ناس رنا  ووقفنا معاهم في الدائره حبه.. وهمست لي رفيده فلان على قولك ما يشوفنا ارجعاكي...وقلت لي برو ونهله ارح... الكلبات قالو لي مالنا ومالكم رماح لا اخونا لا معرسنا... الليله بنربها للصباح.. خليناهم ورجعنا الاتنين لي رماح.. موفق اشر للمصور يصور ليهو رفيده... قام لخبت صورني انا وثبتني في الشاشه... رماح همس لي دا شنو مالو مثبتك في الشاشه كدا... قلت ليهو وانا عرفني شنو يا رماح... بعد شويه موفق شكلو صحح المعلومه للمصور قام صور رفيده و ثبتها في الشاشه..

رماح بزعل : دا شنو الزول دا قاصدني عديييل... مره انتي مره هي مالو داير يقفلها معانا ...وقال لينا دقيقه بس جايكم... قلت ليهو ماشي وين ولا اشتغل بي... قلت لي رفيده امشي اتكلمي مع اخوك دا انا تعبت والله.. مشت وراهوو كدا... جاني ميسر سلم علي باركت ليهو وقلت ليهو عقبالك.. قال لي امين يا رب بعد شويه قال لي  يا مهاد انا اتغيرت بي سببك..  بي بساطتك... و قلبك الكبير.. و عفوووك عننا رغم العملناهو..قدرتي تغيري فيني حاجات كتييره... واشوف حاجات ما كنت شايفها في الدنيا دي...وضحك و قال لي اقول ليك مهاد ولا mk شكلي جدجد حقول ليك اعملي اعلان لي شركتنا في صفحتك..بعد الضجه العملتيها

في التايم لاين دي.. حقيقي بتمنا ليك كل الخير الفي الدنيا .. وربنا يسعدك انتي ورماح...ضحكت وقلت ليهو طوالي اعمل ليكم اعلان .. وانت برضو ربنا يسعدك ويديك بت الحلال يا ميسر و مشيت  ورا رفيده قبل رماح يكسر رقبتي ... خليتو واقف  بقول لي نفسو...طول عمرك يا ميسر اي حاجه بتتمناها بتلقاها على طبق من دهب وكلمتك مسموعه..اتعاليت و اتكبرت.. عشان كدا ربنا حرمك من اكتر حاجه اتمنيتها تكون ليك.. ومهاد عرست البستاهلها... 

_________

عدت الايام.. وموفق عقد على رفيده عشان خاف.. رماح يغير رايو ...وبرو ومحمد حددو عرسهم بعد تخلص الجامعه... واسمهم بقا معروف للكل...هي بتصمم وهو بعرض.. والحمد لله قدرو يعملو ماركه بي اسمهم...

انا و برو نزلنا الجامعه...رماح كان بوديني و يجيبني..مره وانا طالعه ليهو مع مروه البت الوحيده البعرفها في الجامعه... جا واحد رفع الكاميرا و قال لي مهاد كمال ممكن تتصوري معاي.. جاهو رماح قال ليهو ما بتتصور مع شباب.. طوالي الولد  لملم باقي كرامتو واتفكفك.. ورماح ساقني البيت واول حاحه عملها نزل بوست في صفحتي  مكتوب فيهو (تفاديا للاحراج انا  ما بتصور مع شاب يخوانا معليش).. قعدت اضحك... قلت ليهو طيب امسح صوري العندك كلها.. انت تعتبر من الشباب..قال لي دقيقه اعدل البوست واكتب ما بتصور مع شباب ما عدا رماح زوجي قره عيني ولا ما قره عينك... قعدت اضحك وضميتو قلت ليهو قره عيوني الاتنين..قال لي انا حبك الزايد الايام دي ما مطمن ليهوو... انتي عيانه... قلت ليهو عيانه بحبك وغمزت ليهووو... 

مات بالضحك..وقال لي انتي قدر كلامك دا.. 

__________

تاني يوم مروه ضربت لي  رماح قالت ليهو مهاد اغمى عليها في الجامعه.. واسي نحن في المستشفى.. خلال نص ساعه لقيتو قدامي..قال لي بخوف انتي كويسه؟ قلت ليهو نحن كويسين...

رماح : في زول راقد في المستشفي بهظر..وضحك وقال لي الاغمي عليها منو انتي ولا مهاد..

ضحكت وختيت يدو في بطني وقلت ليهو انا ومهاد اغمي علينا بسبب البيبي..عرفت لي حبي زايد الفتره الفاتت  رماح دفن راسو في السرير الانا راقده فيهو وهو بحمد في ربنا  وحرفيا بكا بالفرح 

_________

بعد تلاته سنه 

امي وخالتو سلوي : رناد يا بت يا رناد تعالي بابا وماما جووو.. رناد جاتنا جاريه من هنااااااااك بتكورك بابا ماما... 

رماح شالها وقال ليها : دا منو العمل ليك كدا يا رنوده... 

رناد : بلووو(برو)..بعد شويه جات طالعه برو..وهي بتقول  والله يا رماح ومهاد بتكم دي كزابه و مكاره تقول امها عسجد...جلبطت وشها براها بالروج.. و خربت لي حاجاتي... سرعه سرعه  تغرموهااااا لي انا م بعرف  دافعه فيها دم قلبي.. انا ورماح قعدنا نضحك... قلت ليهو على قول خالتو حليمه دي الحتقدر عليك يا رماح من اسي بتعمل روج.... وسألت برو من نهله قالت لي في الجامعه انا الليله عندي اوف.. قعدنا اتونسنا معاهم حبه.. قلت لي امي بكره بخلي رناد مع خالتو حليمه وبمشي الجامعه انتي امشي ساعدي ححه نفيسه في المقصف قالت لي تمام ..وسوقنا رناد ورجعنا البيت.. 

_______

عسجد جابوهااا عيانه بعد عملت العمليه وظهر ليها سكري فجأة... واضطرووو يبترو ليها رجلها اليمين..

عمر عرس وحده شافها صدفه في المحل  وبقا عندنا تلاته فروع لي محلات المهاد... وعملت كميه من المقابلات.. وتقريبا بقا ماف زول ما بعرف مهاد كمال.. 

كمال حجز نهله من خالو احمد... وموفق ورفيده عرسووو... والاتنين ماف زول بقدر يقعد معاهم اكتر من ساعه.. لانو حرفيا بعملو وجع بطن من الضحك... فوله وانقسمت نصين... ميسر خطب مياااار بعد ما اعترفت ليهو انها حبتو بعد ما اتغير  ودي كانت صدمه بالنسبه للكل..

مصطفى جاهو عقد عمل و سافر برا السودان معاهو ملك.. وملك حامل 

واعمامي ثابت كل يوم جمعه بجوني وبمشو لي امي يشوفو الناقصنا شنووو 

_________

 يوم وانا قاعده بحضر في فلم اسف علي الازعاح بتاع احمد حلمي... ورناد نايمه في حضني... رماح جا من الشغل... باسني في راسي وشال رناد رقدها في السرير... و جا قعد جنبي.. قال لي بتحضري في شنو... قلت ليهو فلم احمد حلمي... ضحك و قال لي دا مش الفلم البتخيل فيهو ابوهو عايش وبتكلم معاهو ... وبعيش قصه حب مع الممثله منه شلبي.. في النهايه بطلع خيال... ضحكت و قلت ليهو حرقت الفلم ماف داعي احضرو  تاني.. يعني في النهايه بطلع عندو شيزوفرينا زيي... رماح ضحك و قال لي اي وبتعالج و بعرس منه شلبي زاتا .... عاينت ليهو مسافه... رماح فهمني و جضمني شديد  وضحك و قال لي اها كدا حقيقي ولا ما حقيقي... قعدت اضحك قلت ليهو عارف لو طلعت ما حقيقي وانا بتخيل حأعمل شنو...

رماح بضحك : شنو 

انا : ما بتعالج بقعد كدا بس... اعيش معاك في خيال للابد...قعد يضحك وضماني عليهوووو شديييد قال لي نحن حقيقه...و محتاجين نعيش في خيال يا مهاد ..