القائمة الرئيسية

الصفحات

تعديل المشاركة

قصة ولنا في الحلال لقاء


 


لفحت توبي وجيت طالعه وقلتا لازم ود المدينة دا يشوفني خايف يختارني وارتاح من الهموم دي! وارتاح من خالتي وابرار ديل لأنهم كاتمين علي نفسي من يوم اتولدت

_ربطته توبي وجيت طالعة لاقتني خالتي في قدام الباب قالت لي بسم الله لافحة توبك ماشة وين ان شاءلله يا شاطره مش انا قلت ليك اقعدي غسلي العده دي وبعدين كنسي الحوش ده
منى:_بس ياخالتي في الشمس دي بكنس الحوش كيف؟!
خلي الوطه تبرد بعدين بكنس
(طبعاً دسيت الصابون عشان اعمل لي بيهو حجه واقول ماشه اجيبه)
خليني هسي اغسل العدة لكن ياخالتي صابون مافي اديني امشي اجيب لي صابون بدره من دكان ادم الجنبنا دا
عشة:_كيف يعني صابون مافي؟!
امس انا جبت كيس فيهو صابون بدره كتير فتشيهو بتلقيهو
منى:_ياخالتي قلت ليك مافي ليه انتي م بتصدقيني غسلت بيهو كلو العدة بليل والليله الصباح
_عشة ختت يدها في رأسها ووووب الليله عليك يا عشه غسلتي بي كيس صابون عدة مرتين!؟!
الله يغسل كلاوينك ديل بركة الجمعه الجامعه دي والكلمه السامعه ان شاءلله يدينك يتكسرو عندك منو هنا بدفع ليك قروش قدر ده عشان تغسلي ليك خمسه صحون بليل وتلاته كبابي الصباح بي كيس صابون؟!
منى:_ياخالتي المهم انو خلص خليني امشي عليك الله م اتأخر ساااي هسي كان في فترة كلامك دي مشيت وجيت
عشة:_اجيب ليك قروش من وين؟!
قولي لي بس اجيب ليك قروش من وين عندك اهل هنا بدفعو ليك قرش ولا شايفه في راجل واقف لينا والله لو م الفول البفرقعو وببيعو لي العوين ديل روحك وروحنا تطلع
_قلتا ليها ياخالتي خلاص م دايرة منك اي حاجه عندي عشرين جنيه باقي الادتني ليهم خالتي فرح بشيلهم بجيب بيهم الصابون بس خليني اطلع
(خالتي دي كشفتني ولا شنو يخوانا لأنو نظراتها لي دي م مطمنانني نهائي والصراحه الخطه غبيه شديد كان اشوف لي حاجه تانيه غير الصابون دي اتحجج بيها لأنو هي امس جابت صابون كتير ومستحيل يخلص بين يوم وليله ههههه)
عشة:_عشرين جنيه ياجاحده داساهم مننا مالك وليه م قلتي لي فرح ادتك قروش ادتك كم ومسكتني من شعري انطقي يابت مشيتي شحدتيها مش عايزه تثبتي اني مقصره وم مسؤله مش دايرة تشيليني وش القباحه مع نسوان الحله والله الليله شعرك دا إلا اطلعو ليك في يدك
_بقيت ابكي قلت ليها والله كنت دايره اقول ليك ياخالتي بس نسيت وانا م شحدتهم منها هي ادتني ليهم براها
عشة:_هوي يابت احسن تعترفي قولي لي جبتيهم من وين مشيت لي منو وشلتيهم منو وجيتي قلتي اقشهم في فرح والله امشي اسألها
(يخوانا هسي دي بشرحو ليها كيف؟!
ودي شنو المصايب دي جيت عشان اطلع وقعت نفسي في مليون مصيبه تانيه)
منى:_ياخالتي هي عشرين جنيه م عشرين مليون عشان تعملي فيني كل ده
عشة:_هش اسكتي سااااي انتي القروش ديل سرقتيهم يعني سرقتيهم م دايرة اسمع منك ولا كلمة زياده مفهوم ولا لا
قلتا اتكلم قالت لي هششش ولا كلمه م تنطقيها يلا قدامي علي بيت فرح والله الليله لو طلعت م هي ادتك ليهم احبسك في البيت دا لا أكل لا شراب وساقتني من شعري وهي كاراني وانا بكورك لمن اخدت بي اللفه وكل ناس الحله بتفرجوا فيني وقالو عامله حاجه غلط
في القصر جهزو الكراسي والبنات بدت تجي والالوان دي زي حلاوة مولد ويتبسمن ويتكشمن ساااااي وهناك متوكل عايز يجهز نفسوا عشان ينزل
_خالتي دفرت باب ناس خالتي فرح بي رجلها وهي كاراني رمتني قدام رجليها لمن خالتي فرح اتفاجئت وحنت علي حالي قالت ليها دا شنو يا عشة العامله في البت دي وقال مالك دافره الباب ده كده؟!
خالتي غارت فيها وبقت ماسكها من شعرها قالت ليها هسي توريني سقتي البت دي مشيتي بيها وين واديتيها بي المقابل القروش دي......

​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
_فرح بقت تلز في عشه قالت ليها ياوليه انتي مجنونه قروش شنو وكلام فاضي شنو؟!
عشة:_القروش الاديتيهم لي الحيوانه دي وهي شالتهم وهسي اعترفت لي أنها باقي ليها منهم عشرين جنيه
فرح:_طيب يابت امي استهدي بالله القروش ديل حقاتي وقعن مني ومنى لقتهم وشالتهم جابتهم لي وانا اديتها منهم ميه جنيه دا كل الحصل عشان طلعت أمينه وم شالت القروش في حين أنها كانت بتقدر تشيلهم وتعمل نفسها م شايفاهم فهمتي؟!
_عشة انصرت علي الباب
فرح قالت ليها هوي ياعشة البت دي استحملتك كتير خافي فيها الله البت دي يتيمه الله بحاسبك في حقها والله كان حي ربنا يسختك بسبب عمايلك دي ويعملك قرد أكتر من كدة
_عشة قالت ليها عارفه اني غلطت اتسرعت بس م بسمح ليك تقولي لي قرد
(هي يخوانا كل دا م هاميني لا شدة الشعر لا الغيرو اهم حاجه امشي القصر واشوف الجمعه الكريمه دي بس خالتي لو فتحت خشمها دا والله الناس لمن تمشي انا م اطلع من المكان دا احسن حاجه اتصرف انا )
_(قشقشت دميعاتي ومشيت مسكته خالتي قلت ليها انتي اطيب خاله والله خايفه علي بت اختك انا كدة احترمتك زيادة يا خالتي الله لا يحرمني منك)
خالتي بقت تنطط في عيونها قالت المجنونه دي مالها وخالتي فرح قالت لي اقعدي شكري فيها زي دا وهي تدقدق فيك مافي حاجه خارباك غير سكاتك ومجاملتك ليها دي
_غمزت لي خالتي فرح سكتت عرفت في حاجه في راسي 😂
_رجعتا اتكلمتا مع خالتي تاني قلتا ليها ارح البيت والميه الادتني ليها امس اشتريت منهم بصل بخمسين وتوم بعشرين وباقي عشرين ولا تلاتين م عارفه خلينا نمشي نشتغل شغل بيتنا اريح لينا من الشكله الح تتعمل هنا دي
_خالتي قالت لي يلا اطلعي قدامي علي البيت قلت ليها عيب ياخالتي انتي الكبيره وانا بحترمك مستحيل امشي قدامك انتي قدام وانا وراك
خالتي صفقت يدينها قالت لا حوله ولا قوة إلا بالله العلي العظيم سمح الحقيني سريعك العدة دي الزباب لامي فيها زي الكمونيه
قلتا ليها وراك خلي بس اعتزر ليك من خالتي فرح دي عشان عارفاها شرانيه (طبعآ الكلام دا في أضأن خالتي اقدر انا 🤭😂)
_خالتي طلعت
خالتي فرح مسكتني من ضفيراتي وجرتني عليها،،، قلتا ليها ياخ انا ناقصه جرت شعر ياخالتي فرح كفايه خالتي كانت ح تطلع لي شعري في يدها
فرح:_اعترفي سريع ماشه وين وريني!
قلتا ليها ماشه القصر قالوا الترتيبات هناك مبالغه عديل وطبعاً اليوم دا بنات الحله منتظراتنو من زمان اكيد بكونن عملن البدعوه وعاملات زي حلاوة مولد عشان كده ماشه اشوفهن
فرح:_بي توبك ده؟!
منى:_اي توبي مالو م ياهو سمح وبعدين لو لبسته حاجه عديل خالتي بتشوفني وهي مانعاني امشي
فرح:_طبعآ يختي عشان انتي اسمح من بتها بتخليك تمشي كيف لكن الله يجازيها خالتك دي انا محيرني مستحملها كيف؟!
منى:_اتكلمت بي حزن 😔💔 اعمل شنو ياخالتي فرح قسمتي كده يلا مع سلامه بكره بجي بقول ليك الحصل معاي او بعدين المسا
فرح سمح راجاك اوعك تنسيني عشان م اجيك قدام خالتك وافضحك واقول ليها مشت القصر 😂💔 مع انك كنتي مانعاها تجي حتي بي الشارع بتاعه🤭
منى:_مافي داعي لي فضايحك دي يا خالتي فرح بجيك والله بجيك وبعدين بطلي استفزاز انتي كمان فيني انا م مستحمله وعرش الكريم 🥺💔 انتو يخوانا كلكم دايرين توصلوني لي وين انا زوله وعندي دم ولحم يااااخ🥺
خالتي فرح قالت لي خلاص خلاص يابت غوري كنت بهظر معاك ودموعك دي اوعك تنزل عشان غاليه علي شديد انتي مفتكراني زي الحربويه خالتك دي هو انا خالتك طايقاها لمن امشي اتكلم معاها واسايرها انا لو طولتها اخنقها ليك من رقبتها الطويله دي و كان ريحتك منها 😂💔
قلت ليها عارفاك م بتقصري ومعاها ضحكه من الاضان لي الاضان يخوانا الليله شمس العيد بتشرق اصلآ انا نفسي من زمان ادخل القصر دا 😍
_جريت البيت عشان اقول لي خالتي عايزه اشيل القروش وماشة الدكان اجيب الصابون ،،،، خشيت طلعته القروش وجيت طالعه خالتي قالت لي م تمشي مشيت هسي الدكان وجبت ليك صابون وفتشت القديم لقيتو قاعد وابرار م كشحتوو زي م قلتي ياااااكلبه......
اها يعني هسي لي بكره ح اقعد ابرر في حكايه انو ابرار م كشحت الصابون بس انا شفتها لمن كشحت الصابون وم افتكرتها خمتو ورجعتو كيسو تاني دي مصيبه شنو دي يخوانا 🥺
_لا لا والله ياخالتي م كدة اسمعيني بس انا شفتها لمن اتكشح منها وانتي عارفه ابرار مهمله كيف عشان كده افتكرتها خمتو وكشحتو عشان كدة قلتا ليك كشحتو
وبعدين مالك متعبه روحك ياخالتي وماشه تجيبي الصابون بي نفسك كان تنتظريني انا بمشي بجيبو هسي في داعي تتعبي رجلينك بي المشي
عشة:_يابت رجليني شنو الدكان فركت كعب وبعدين تعالي هنا مالك متردده كده قولي لي كنتي ماشه وين بتمشي وين بدون م تكلميني؟!
منى:_(والله خالتي دي يخوانا شفتو الويكه لايوق خالتي اكتر منها)
ماشه وين ياخالتي كمان؟!
عشة:_ماشه القصر مش بعرفك انا
منى:_بلعربي كده ياخالتي امشي القصر كيف بتوبي ده؟!
قولي لي انتي!
في زول بعاين لي بتوبي المكرفس والوسخان دا بس م كنت دايراك تتعبي وتمشي الدكان
عشة:_يابت يدك روحك علي مصارينك والله كان شلته العكاز دا البلد دي انطتطك ليها جاريه مالك كلامك كلو الليله دكان دكان العجبك فيهو شنو م أول لو قلت ليك اتناولي لي الملح دا تنقنقي لمن تمشي وتجي هسي عجبك خلاص؟!
ولا عندك علاقه مع ادم سيد الدكان ؟!
انا عارفاك م عرفتا اربك وطلقت ليك صراحك
يخوانا انا عيوني بقن كده 😳😳
يعني الحكايه من صابون بقت علاقه مع ادم سيد الدكان؟!
ادم دا لو ابوي عايش بكون اكبر منو 🥺
_ياخالتي ادم بتاع الساعه كم عليك الله بعمل لي علاقه مع واحد قدر ابوي بكون الله يرحمو
عشة:_عرفني شنو بكون عشان يديك ليك حاجات واكل مجان م انتي همك كلو كرشك نهارك دا كلو تلهطي افقرتيني ولو ابوكي كان حي كان افقرتيهو الحمد لله مات هسي تلقاه مرتاح منك وطلقك فيني هو واختي واترطت بيك م عارفه انا عملتا شنو لمن ربنا يبتليني بيك؟!
منى:_ياخالتي اهلي ديل ماتو ريحيهم عليك الله واذكريهم واترحمي عليهم بالخير
عشة:_دايره توريني انا يابت ياقليلة الأدب والله والله لو قمتا من مكاني دا اطلع روحك دي في يدي طيري من قدامي غسلي العدة دي هسي انا بتكلم معاكي من متين والله عارفاك بتاخري في الزمن عشان م تردي لكن لو بليل الليله تمشي الخزان عشان تجيبي المويه
منى:_خلاص ياخالتي 🥺😭
عشة:_اتبكي كويس وارفعي صوتك في الحي خلي الناس كلها تسمعك ويقولو انا ظلمتك
منى:_خلاص ياخالتي ياهو ماشه واطمئني المويه دي لو بليل بجيبها ليكم م اصلآ انا الحماره في البيت ده ومشت تكشح في يدينها ودموعها في عيونها
عشة قالت ليها اي حماره يتحامرو في جرك يابعيده بكره ده اول واحد من الحله دي يجيني تاني والله اديك منو وارتاح منك خلي بس انتهي من حكاية عرس ابرار دي وارسلها المدينه وامشي معاها واشوف دنيه وانتي خليك في الحله دي عشان انتي شبهها وهي شبهك
(طبعآ عشه عندها امل كبير انو ابرار هي البختارها متوكل بس وين خلينا نشوف كمان لمن املت مشيت المدينه😂💔)
_مشيت اغسل العدة بي دموعي قبل المويه انا بحصل معاي كل ده ليه ليه بس؟!
كل م اقول فرجت بتتقفل في وشي شديد يااااخ
لحدي م جات خالتي داخله قالت لي تعالي ارسل لي خالتك فايزه في نهاية الحله ديك ودي ليها مد الفول دا وجيبي لي منها القروش دايراهم (انا هنا أبتسمت وقلت خلاص شكلها فرجت يا منى 😂💔)
_قلت قبل م امشي اتدلع شويه عشان ضمنت كده كده ح امشي 😂
_قلتا ليها طيب ياخالتي بعدين بمشب هسي خليني اخلص العدة دي من يدي نشفت زاتها وصح صح برضو خليني امشي اجيب المويه عشان الخزان بعيد والحق اجي قبل المغرب بي شويه
والحوش الحوش م كنستو لا حوله ولا قوة إلا بالله هسي انا اعمل شنو ولا شنو ياربي اتقطع ولا اتقطع؟!
عشه:_يابت الدنيا دي م طايره قومي طيري لو علي العدة دي انا بتمها ليك امري لي الله وعندنا المويه البتصبحنا لي الصباح ولو علي الحوش داك ياهو نضيف م عندنا شفع بخربو لينا
منى:_لا لا ياخالتي مستحيل اخليك تتعبي وتغسلي العدة انتي انا قاعده لي شنو لمن تشتغلي انتي 😂
وبعدين المويه كل م تكون كتيره في البيت احسن ولو م عندنا شفع كويس يكون حوشنا نضيف ودرب المكنسه فيهو خالتي فايزه بتنتظر م مشكله الصباح بجري جري اودي ليها ولا اقول ليك امشي انتي ياخالتي طلقي رجلينك ديل شويه 😂💔
عشه:_يابت انتي دايره تشليني هسي م كنتي تموتي وتطلعي الدكان خلاص قعدت البيت فجأه كده عجبتك وبقيتي م قادره تطلعي ولا تفارقي البيت؟! 🙄
منى:_دا كلام شنو ياخالتي البيت دا بيتي وانا بحبو والله عشان كده بتبقي لي حاره لو طالعه لي الدكان القريب دا وبعدين قلت ليك خالتي فايزه بتنتظر
(كنتا خايفه تقول لي خلاص وابقي ركبت السمبك 😂 يا الله م تقول خلاص عشان م اتشل )
عشه:_يابت هوي خالتك فايزه دي لا بتنتظر ولا جاي وبعدين م عارفه انها الايامات دي جاريه في عرس ولدها عشان بتجهز في الحاجات وقالت دايره تضيف المد دا علي العندها الشالتهم مني المره الفاتت عشان تمشي تعملها فول أبيض لي الروب وقالت لي ضروري هسي تجيبي لي او تدي لي زول يجيبو لي وانا حاسه الرطوبه الليله دايره تقوم علي عشان كدة م قادره امشي وإلا م كان خليتك طلعتي وشغل الموت الدايره دا خليتك تموتي فيهو بس يلا ملحوقه امشي وديهو وجيبي القروش انا دايراهم بكره بدري ماشه السوق 🙂
_نفضت يدي من المويه ومسحتها في جلبابي دا وقمتا فوق اتقنعتا قنيعه تمام علي قول حبوبه (اتقنعت يعني ربطت التوب في نصها يخوانا الماعارفين 😂)
وشلتا منها مد الفول وبقيت ألوح في الكيس الليله لو اتشرط خالتي بتشرط بطني
من الفرحه قلتا لي خالتي م تدخلي يدك في العدة امشي واجي اغسلها عشان عندك الرطوبه خالتي حمرت لي بس ولا هماني 😂💔
_متوكل نزل والبنات بقن مقهيات فيهو والله يخوانا البحصل في بلدنا دا في الأفلام الهندي م حصل البنات يقعدن والراجل يجي ماشي فيهن يشوف العجبتو منو قريتنا دي حقوو يسموها نيو دلهي 😂💔
متوكل ماشي وحبوبتو ماشه بي وراه تقول خيالوه 😂💔
قالت لي لو في وحده عجبتك اشر عليها ونحنا بنسأل من اهلها وبنمشي نخطبها ليك
والبنات عاجبهم الوضع زي البضاعه المعروضة لي البيع الله يقطعك ي المدينة خليتي بنات حلتنا زي سوق الهدوم (الهدوم الملابس 🙄 لي غير الناطقين بها 😂💔)
_بلولح في كيسي لقتني حبوبه مريم
(طبعآ حصل مشهد الدوبلاج ولا شنو م منعرفو البجيبو في المسلسلات لمن الزول يشوف حاجه مخيفه داك شفتو؟!
بس خلاص 😂💔)
يخوانا انا من لقيت حبوبه مريم خلاص موضوعي انتهي 🙂💔
بقيت ادعي يارب حبوبه مريم عامله كرعيها المكربجات ديل م تشوفني لو شافتني بي عويناتها الدقاق ديل خلاص انا موضوعي انتهي اشردي بس يا منى يخوانا م عندك حل تاني غير كده وكمان م بقدر اجري عشان الشارع ونظام انا مؤدبه وكده بس ح امشي سريع سريع وانتو أدعو معاي م تشوفني 😂💔 عشان م ناقصهه
هي يايمه بلولح في كيسي زي الشافعه وماشه بي وراها سريع سريع لحدي م مشيت قدامها خطوتين وقلتا أكبر الخطوه شويهه لقيت ليك في العكاز في كتفي و جاريني عليهو
وااااااي يا الله
(شايفين اصلآ م دعيتو من قلوبكم عشان كدة اتقبضت😂💔)
جاني الصوت ثابت ولا حركه ولا حركه؛
(يخوانا حبوبه مريم دي اظنها اكبر عجوز في الحله دي عمرها قطع التمانين ولسه تتحاوم في الحله وماشاء الله ماشاء الله حال البنات يايمه لسه رجلينها بمشن 😂💔
وعيونها بقن جلود بس برضو بشوفن
عندها حدبه قربت تصل الأرض وعندها عكاز مكنجر لو دخلتو ليك في رجلك بتكتلك بتكتلك وغير كده والمصيبه الأكبر عندها زهاااااايمر بتنسي في ثانيه عندها ذاكره ياعوذ بالله منها ذاكرة السمك اطول منها 😂😭💔 وصوتها عالي قطر بس داخل المحطه 🥺 وعيالها كل م يدخلوها يلقوها طلعت كل م يدخلوها يلقوها طلعت آخر حاجه زهجو منها وخلوها علي راحتها ونهايه اليوم يطلعوا يفتشوها في الحله يجيبوها اصلآ الحله صغيره وكل الفيها عارفين بعضهم ولو ناس قعدت معاهم لي المغرب او زول لقاها في الشارع برجعها بيت عيالها )
_ثابت دي انا عارفاها يخوانا 🥺
ياهو الصوت ال م بغباني اقسم بالله 🥺💔
كلمه ثابت خلت في عيال صغار قدامي وقفوا وبقو يضحكو علي ويأشرو علي بي يديهم كان جاي علي بالي الم فيهم خبط🥺💔
_جاني الصوت ال م بغباني تاني
يعني م دايره تسلمي لي يابت عبدالكريم؟!
(يخوانا اقسم بالله ان م بت عبدالكريم والحله دي كلها م فيها زول بي الإسم دا الله يمرقني بس الليله 🥺💔)
بشكته سنوني وضحكت ليها في وشها قلتا ليها انا بت الهادي يا حبوبه مريم م عرفتيني ولا شنو؟! 🥺
هوي يابت والله لو ضربتك بي العكاز دا اجيب اجلك مريم دي منو كمان؟!
تجيبي لي اسم من راسك
وانتي بت عبدالكريم وامك اسمها عرفه سرقت مني جردل خبيز يوم داك وم قدرتها الحقها بس وحيات جدي الناجي الليله م اخليكي ولا اخليها
(الموضوع اخد شارع تاني يخوانا 😂💔)
والله ياحبوبه انا م بت عبدالكريم خليني امشي مستعجله ياخ شديد واهلي راجني
هوي يابت هاااا والله م تتحركي من هنا مالم تجيبي لي جردل الخبيز السرقتو امك مني؟!
(امي الله يرحمها وقت تسرق تسرق ليها جردل وحق خبيز وحقك انتي ال م بتبل في خشمك فوله؟!)
خلاص خلي اتفق معاك اتفاق ياحبوبه انا امشي واجي وانتي امشي اقعدي جمب شجرة النيم ديك بجيب ليك جردلك حق الخبيز وامي تعتزر منك عشان سرقتو اتفقنا؟!
شويه كدة وقالت لي هي مش انتي ام سعيد بت محمد خير امك رسلتك تجيبي باقه من بيتي عشان تردي بيها ولقيتي باقتي مليانه مويه سرقتيها بي مويتها وجريت وراكي م حصلتك وحلفتا كان مسكتك اقتلك؟!
(لا يخوانا الموضوع اخد منحني تالت خالص شديد 😂💔)
قلتا مافي في يدك غير تجري يا منى وبعدين هي رجلينها تعبانات م بتقدر تجري بوراك قبل م تطلعك انتي السرقتي الدوله بحالها
شلتا كيسي ودايره اقوم جاريه دخلت العكاز في الكيس والكيس اتشرط والفول اتدفق وهي بتقول لي اقيفي هنا يا حراميه ماشه وين......
_لا يخواااانا يااااخ الكيس اتشرط خلاص انا هسي الفول دا المو كيف ولحدي م المو الناس بكونو اي زول مشي ليهو علي إتجاه
روحي حرقتني قلتا ليها ليه كده ياحبوبه مريم هسي انا اعمل شنو والله خالتي إلا تقتلني 🥺
_رفعتا راسي لقيتها مافي يخوانا المره دي شيطان والله هسي بتين لحقت تختفي من قدامي بي السرعه دي 🥺💔
الشفع كلهم بقو يضحكو علي وواقفين بوفق لي راسي وانا اخمخم في الفول من الرمله زي المجنونه،،،،قلتا ليهم تعالوا يا حلوين لقطوا معاي الفول دا واي واحد بعدين بكتح ليهو فولايات في يدو يكتحهم في خشموو
الأولاد م صدقو لمو لي الفول في ثواني واي واحد لامي في ملابسو قالو لي ننتهي ونكبو ليك في الكيس بعد م تعدليهو ،،،،شلتا الكيس وربطتو وقلتا ليهم يلا كبوهو،،،،كبوهو لي اي واحد اديتو لي عشره فولايات في يدو وعاينته لي الشمس لقيتها خلاص قربت تغيب خليني اجري القصر قرب ان شاءلله الحق لي شوية حاجة اشوفها اصلآ انا شقيه
_متوكل بعاين بي ضيق،،،،حبوبتو قالت لي مالك يا يامتوكل مافي وحده عجبتك ولا شنو؟!
متوكل قال ليها كل ديل متصنعات بس يا حبوبه انا داير لي بت حقيقه هسي شوفي دا شنو العاملتنو في وشوشهم ديل؟!
حبوبتو قالت لي عاد ياولدي ابوك شرطو تتزوج من البلد دي نعمل ليك شنو تاني
متوكل:_بس ياحبوبه ديل كلهم م عاجباتني والله
حبوبتو قالت لي عااااد تاني نجيب ليك بت من وين الشايفهم ديل بنات الحله كلهم الحله دي صغيره زاتها شوف ليك وحده منهم زي دا احسن ليك من كلام ابوك اصلآ ابوك قال ليك نهاية الأسبوع بجي ويلقاك خلاص اخترتها
متوكل:_انتو يعني الزول بختاري سااااي؟!
انا م شايف واحده تنفع تكون زوجتي
متوكل رفع صوتو شويه
حبوبتو قالت لي هس م تفضحنا مع الناس وخليك ساكت وقاعد لمن نشوف صرفه في الموضوع ده
_ااااااوف يخوانا وأخيراً وصلتا القصر والفول مصرور في يدي 😂🤭
وصلتا القصر والفول مصرور في يدي صراحه منظري كان بيش شديد بس اعمل شنو يخوانا لو كان عملتا زي البنات كان خالتي شكت فيني وم كان طلعتني حتي من باب البيت ولا خلتني اعتب ولا خطوه 🥺💔
_شايفه الباب فاتح وناس تدخل اشكال والوان وبنات زي بنات اللعب هي يخوانا هي ديل م بنات حلتنا والله 😂💔
مالهم عاملين زي ده البشوفهم هسي م بقول ديل البنات المعفنات ديلك عاملات فيها بخجلن بس وين ان شاءلله ود المدينه م يتخدع سااااي
_بشكلي ده مستحيل اقدر ادخل توبي بدل كان مكرفس ذاد كرفسة زياده وحتي رجليني مليانات غبار وطين هسي دا انا جبتو من وين اي والله اتذكرته لمن جيت ماشه بي حبوبه مريم عشان م تشوفني وامشي سريع دخلتا في الطين وانا م حاسه اصلآ بلدنا دي طينيه وطينها كعب شديد
اها هسي كده لو دخلتا وحات الله رجليني ساااي يملن الدنيا عفن وقرف 😂💔وغير كده حرمان م دايره ابرار تشوفني عشان م تقول لي خالتي حاجه عني
_بتاوق بجاي وبجاي هي يخوانا القصر دا م فيهو مكانات تانيه غير الباب دا يدخلو بيها والزول يكون في الصوره برضك 🥺
لا م هو انا لازم ادخل لازم ادخل بي اي طريقه وبرضك لازم اعمل حسابي من ابرار بقيت ألف في القصر بجاي وبجاي لحدي م شفته الشباك ختيت الفول وبقيت اصفق واقول يافرج الله 😂💔
فرجت يخوانا بس في مشكله الشباك بعيد شويه عن الأرض وكان مختوت كم طوبه تقدر تخت فيهم رجلينك بعدين تكون فوق وتشوف الحاصل هي هاااا كدا ببقي زي الزول المتعشلق في الهواء 😂
بس وين وحات الله الليله لو م شفته بنات الحله ديل قاعدات كيف وبعملن في شنو م افوت من مكاني دا عاد انا بلعب ولا بلعب صح انا خالتي وبتها كسرات شوكتي بس وحات الله بفكر هااااا النقوم نطلع كمان نشوف الحاصل شنو ونبطل كلام كتير لمن صدعته من روحي وافكاري الجهنميه دي 🤭
ختيت لي طوبتين وحده رفعته فيها الفول جنبي عشان م يجي شافع يطقو سااااي شفع حلتنا ديل حراميه وانا عارفاهم كويس 😂
والطوبه التانيه رفعت فيها رجلي ومنها رفعتا رجلي في طوبتين الفي الحيطه لحدي م وصلتا فوق وبقيت في الصوره بس والله م مرتاحه الله يستر من الطلعه دي 😂💔
_بهناك فايزه اتصلت علي عشه بتتكلم معاها
فايزه:_بتكضبي علي مالك يا عشه مش قلتي لي هسي برسل ليك البت بي الفول ياخ انا ولدي واقف راجيني من قبيل عشان اتم ليهو الفول عشان يوديهو السحانه لو م دايره ترسلي كان تكلميني بدري عشان اشوف لي واحد من مكانات تانيه اتم بيهو
عشه:_هي كفين الكلام ده والله رسلتا ليك البت من الشمس كانت في نص السما
(عشه كضابه يخوانا)
رسلتها ليك الشمس كبيره من قفلتا منك كده قلتا لي منى تشيل الفول تودي ليكي هسي افتكرتها وصلتك زمان وجايه راجعه في الشارع
فايزه:_لا وصلتني لا شفتها وبعدين انا قلتا ليكي جيبي لي الفول انتي عشان سريعه والبنات م مضمونات وبعملن لي الدرب كليوات هسي تاني احمد ولدي برضي يمشي لي مرتين والله م برضي ومافي مره بتمشي الحله الجنبنا عشان تعمل لي العايزه قلتا الم حاجاتي كلهن بس انتي خربتيها علي
عشه:_بقول ليك انا م عندي يد في حاجه ورسلت ليك البت والله م عارفاها بس م وصلتك لي شنو اصبري وبتجيك
فايزه:_لا م تجيني ولا اشوف وشها ده تاني ولو جات برجعو ليكي خليكي عارفه
عشه:_هي لو م دايره خلي شنو يعني بحنس فيكي من الصباح يختي مليون وحده في البلد دي بتتمني تبيع مني سايرتك وسايرتك بس لو سمحتي رسلي لي باقي قروشي العندك
فايزه:_قلتي كده مش طيب مافي ليكي قروش وم عندك عندي حاجه وامشي شوفي بتك وبت اختك بمشن وين وقفلت السكه في وشها ااا
_عشه بقت تفكر ياربي البت دي مشت وين خسرتني البيعه الله ينتقم منها انا كنته شاكه فيها زمان وقلتا تلقي عندها ليها واحد بتطلع عشان تتلاقي معاه بس والله الليله م اخليكي يا منى وإلا اعرف مشيتي وين ولبست توبهااا وطلعت
_متوكل كان قاعد وبعاين لي البنات بي قرف بس كمان م يقدر يقول كلمه عشان يحرج البنات وحبوبتو كل مره تنخس فيهو نظام ابتسم ان شاءلله سااااي لي البنات ديل وهو يطلع أسنانه ثانيه ويرجع يدخلهم تاني 🤭
وطبعاً البنات مقهيات شديد عاجبهم متوكل وفي نفس الوقت عاجباهم الطلعه من البلد دي والسفر لي المدينه أكتر وصراحه معاهم حق البلد دي فقر و الواحد بتمني يطلع منها الليله قبلي بكره ناس متخلفين وجنهم يدخلوا في خصوصيات الناس وكل همهم شمارات وأكل ونضافه وورود 🙂
_هي يايمه انا مستمتعه في الشباك بعد م طلعتا وختيت يديني الاتنين عشان امسك بيهن ولزيت الشباك شويه عشان اشوف عديل وطبعاً كده بقيت في الصوره شديد 😂
هي ديل منم الجوه ديل وحات الله يستاهلن يتعمل بيهن فلم رعب بقيت اركز في الوشوش شديد وال م بعرفها من وشها بعرفها من هدومها يخوانا مش قلت ليكم الحله دي ضيقه 😂🤭
كل شويه اتلفت علي وحده واضحك واقرب اقع تاني اكتم الضحكه لحدي م جات عيني في ود المدينه يشهد الله يخوانا ملاك ملااااااااااااك انا م شفته ولد زي ده غير في التلفزيون حق خالتي كوثر الفي نهاية الحله 😂
ليهن حق البنات يكونن ميتات اي وحده بتعاين ليهو ونهائي م بترمش بس دقيقه ليه هو قرفان كده 🤭
الصراحه ليه حق دي م وشوش تتقابل بنات حلتنا حتي المكياج م بعرفن ليهو وحده تعمل الفازلين في شلاليفها تقول ماكله لحمه شحمانه الله لا وراكم 😂
طبعاً صح بقولو الجمل م بشوف رقبته عوجه ولا عديله وانا م شايفه الوساخه الفيني بس م علينا هسي خلونا في الولد الزي صباح العيد ده 😂
وكل شويه بدنقر رقبتي الطويله دي عشان اشوف الفول قاعد ولا اتنشل في الحله دي اصابعك لو بتتشال بسرقوها منك
بس اشوف ليك الغنمايه شرطت الكيس ودخلت راسها جوه الكيس جيت متلبه من هناك في ضهر الغنمايه واديتها لبعه حاره يااااخ لمن يدي حرقتني 🤭💔
وبعدين تاني صريت الكيس كده الكيس بقي فيهو صرتين بجاي وبجاي والفول بقي نص ربع يشهد الله من وقع وشريط والعيال والغنم م علينا المره دي شلتو معاي وطلعتا في مكاني عشان كده كده بقي بسيط م بأثر بي حاجه
طلعتا وركزت مع ود المدينه 🤭
_عشه طلعت منفوشه من بيتها والتوب م صبرت عشان تلبسو عديل مشت لي فرح قالت ليها هوي يافرح لي آخر مره بسألك م عارفه منى دي يومي بتمشي وين يومي برسلها م بتوصل المكانات البرسلها ليها معناته في مكانات تانيه بتمشي ليها وريني سريعك هي بتتونس معاكي واسرارها كلها معاك وريني سريعك
فرح:_هوي ياعشه احسن تختيني عشان والله المره الجايه افتح ليكي راسك المربع ده بي الطوبايه دي ياخ كرهتيني البيت ده والجيره هسي انا كان مالي بي جيرتك الحله دي م كبيره كان اشوف لي اي ركن اتركن علي بعيد عن جيرتك الشوم دي الناس حزروني منك ومن جيرتك وقالو لي بتتعبي م سمعتا كلامهن كان ياريتني سمعتو والبت دي حابساها وتشغلي فيها م بتخافي من الله انتي هسي بتك الذي التور دي م ترسليها وتشغليها ولا بس فالحه تستغلي البت اليتيمه دي والله انا منى دي لو كان بتربطني بيها مجرد علاقه ولو من بعيد م اخليها ليكي طيري من قدامي م فاضيه ليكي ولو عارفه مكانها نجوم السماااا اقرب ليكي من اوريكي مشت وين
عشه:_يعني داسه مني منى بتمشي وين مش؟!
سمح بلقاها وبعدين بحاسبك انتي وهي اصبري لي بس
عشه طلعت وبقت تمشي في الحله لحدي م اتذكرت قالت هي انا فاتت علي دي كيف هي كانت دايره تمشي القصر وانا ابيت ليها كده النمشي علي القصر واشوفهااا هناك.......
طبعا كلكم عايزين تعرفوا السبب الخلي فرح تتصل لي قرار انها تمشي البلد بعد ما كان وعدت منى خلاص انها ح تقعد معاها بي المره عشان تقيف جنبهاااا!
فرح نزلت المطبخ تحت عشان تجيب لها كبايه مويه وهي اثناء مطالعه صدمت في امل المويه اتكشحت فيها امل بقت تتكلم معاها بصوت عالي انت حيوانه دا شنو العملتيهو دا ودي شنو طريقتك الهمجيه المتخلفه دي قايله نفسك ماشه في الخزان الفي البلد؟!
وبعدين تعالي هنا انتي منى دي بتبقي ليها شنو؟!
علي م اعتقد ولا امها ولا خالتها ولا حتي قريبتها دي الحاجه العارفاها،،،، المقعدك معاها هنا شنو؟!
عايزه تصلي معاها لي شنو؟!
غرتك القصور بس م اكتر وجاايه تتسكني فيهم!
اصلآ انا عرفتك من تمثيليتك العملتيها في البلد انك دايره تستعطففي منى وتخليها تجيبك معها المدينه
جد برافووو تستاهل عليها صفقه قدرتي تتتحصل على الحاجه اللي عايزه بس انا لو منك و مكانك ما بقعد في بيوت الناس والله دي نصيحه منى ليكي يعني!
فرح رد ليها العلاقات عمرها ما كانت بالدم العلاقه بالمواقف
وبعدين يا ستي مالك جايه على نفسك كده؟
انتي ممكن تكوني نسيتيني يا امل بس انا لسه ما نسيتك وبتذكرك من زمن كنتي في البلد والبتعمليهو تحبي اسمع ليك الحاصل بي التفصيل؟!
بس خلي الطابق مستور احسن عشان انا لو نطقت بي كلمه فضايحك ح تكون ماليه الدنيا واكيد الناس بعد تسمع م ح تنظر ليك علي انك امل مرة راجل الاعمال المشهور تحبي اقول ليك ح تنظر ليك علي اساس انك شنو؟
انا شفتك وعرفتك من زمن م ختيتي رجلك في البلد بس قلت انك اتغيرتي احسن انسى الفات وربنا بسستر الزول بدل انا منو لمن اتكلم بس شكلك م ناويه تجيبيها لي البر!
امل عاينت ليها بغضب
وقالت ليها احترمي نفسك وطيري من قدامي عشان انا ما فاضيه ليك
ولا رايقه و بصراحه بقوله ليك للمره التانيه انا لو منك ما بقعد في بيوت الناس ومشت وخلتها
فرح زعلت شديد عشان كده لمن منى جاتها قالت احسن اقول ليها راجعه البلد وارجع بعد الزفاف 💔
*(في الحاضر)*
منى كانت نايمه في الرجول حقت فرح و فرح كانت بتمسد ليها في شعرها منى قالت لها دايره اسالك سؤال يا امي؟!
فرح قالت لها خير يا بتي قولي سامعك!
منى قالت لها انا متاكده حصلت حاجه خلتك تاخدي القرار
متاكده بتكون في واحده من الربع حق العقار قالت ليك كلمه كدا ولا كدا
زعلتك بس قولي لي يا امي عايزه اعرف وقبل م اعرف عايزاك تقعدي معاااي لي الأبد وانا وانتي نتفق انو البلغط علينا من اليوم م نخليهو ولازم نجيب حقنا كفايه السكوت الكنت بسكتو لي خالتي وبتها لمن بسببو طيعت طفولتي وحتي احترامي لي نفسي حياتي اتغيرت وانا نفسي عايزه اتغير !
عايزه اكون يا امي البت البتحسب ليها مليون حساب قبل م زول يغلط في حقها وانا من ناحيتي م بلغط في حق زول لكن برضو م من حق اي زول يتعدي علي انا في النهاية انسان يااااخ وعندي قدره محدده
فرح قالت ليها دي الحاجه العايزه اوصلها ليك من زمان من زمن البلد وم عايزه تفهيها
قلت ليك الزول يبقي مسالم لكم م لي درجه العواره لا لازم يكون معتدل في كل حاجه
بس قولي لي الخلاك تاخدي القرار دا شنو
منى قالت ليها والله تابعت لي برنامج ليهو يومين غير حتي طريقتي في الحياه وعرفت منو حاجات كتيره بعدين لمن يبدا بنادي ليك تجي تحضريهو معاي
فرح سمح انا زاتي دايره اشوف البرنامج العمل حاجه انا م قدرت اعملها لي سنين 😂
منى ههههههه بس برضوا قولي لي الزعلك منو؟!
فرح خليك من الزعلني انا موافقه نثبت نفسنا انا وانتي ونثبت انو البجي من البلد انسان وبرضو ليهو الحق في الحياه وبقدر يكون انسان مهم اكتر من ناس المدينه نفسهم
منى اتفقنا خلينا نبدأ حياه جديده واول حاجه ياخالتي عايزين نتصرف زي تصرفاتتهم واحد نراقبهم لحدي م اي حاجه تتركن في الدماغ دا 😂
(والله وبقيتي زول يا منى 🤭)
*_في البلد*
ابرار جات ماشه بي الشارع الفيهو دكان يونس قالت بس جات لحدي عندك يا ابرار امشي علي يونس الكلب دا الدكان وحاولي اطلعي منه بي حاجه!؛
والسلام عليكم يا يونس!
يونس عاين ليها وحمر ليها عيونه وقال ليها خير يا ابرار!
عايزه شنو مني او من دكاني؟!
عشان انا عارف تمامآ م بتمشب مكانات مالم يكون عندك خطط في راسك دايره تنفذيها ؛
ابرار بقت مسكينه
قالت ليهو يخسي عليك يا يونس! معقوله خلاص كرهتني؟!
لو م متذكر انا ابرار كنتا في قلبك كنت تتحايل علي عشان اقبل بيك وبي حبك واخليك تجي تتقدم لي خلاص الحب الفي قلبك كلو اتمسح؟!
يونس ههه انتي شايفه اني لعبه بس في يدك يا ابرار؟!
وقاصده اكون قاعد رهن اشارتك عمري كلوه مش؟!
والله اطمئني يا اختي انا طلعت موضوعك من زمان عندي اكتر من سنه لو م عارفه!
وهسه حاليا في قلبي ما في اي شيء
لأني عارف عقلك مليان بكره وحقد علي الناس وتفكيرك عفن شديد كل همك تبقي الأفضل لو علي حساب الناس البحبوك
ابرار بقت تتمسكن يعني ما في اي طريقه تانيه يا يونس؟!
انا خلاص عرفت غلطي و قبلانه بيك وبحبك ما عليك انت إلا تسامحني
يونس عاين لها بعصبيه اسامح منو يا مجنونه او ادي فرصه لي منو؟!
هي ي ابرار انا ولا حملك ولا احمل مشاكلك تاني من اول وجديد ولا داير منك حاجه ولا انتي دايره مني حاجه لو سمحتي اتفضلي اطلع امشي من هنا قبل ما اخسرك ساااي والله يا ابرار اشوفك قريبه منى ساااي انتحر بيك كفايه العملتي في اختك منى
والما عندو خير لي اهلو كيف يكون عندو خير لي الناس انا عارف ومتأكد مليون في الميه جيتك دي م ساااي جيتي تعرفي مني حاجه او عايزه حاجه عشان كده قلتي ترسمي علي الحب بس احسن ليك تبعدي مني لاني انا لا عندي حاجه لا عارف حاجه يلا طيري من قدامي
يونس ما خلا تنول الحاجه اللي في باله ودي افضل حاجه عملها لي اليوم ولو منى عرفت ح تبعت لي جواب شكر 😂
ابرار بقت ماشه وتتشاكل مع طوب الارض
قالت كمان الكلب دا لمن انا عبرتو و جيت وقلت ليهو يلا بينا نرتبط يقعد يعمل لي امور وسين وجيم ويهني؟!
والله انت كمان يا يونس م اخليك خلي بس افوق ليك
عليك الله شوف ده الولد كان بريل علي فجأة كده عمل ليهو رويشات الله يقطعك يااااخ
*(في الخرطوم في واحد من اكبر المولات)*
شوفي يا سوزان مش الفستان ده حلو انا اخترت دا خلاص
على اي حال من الصباح لافين لمن رجلينا وجعونا وم لقينا حاجه عديل غير ديل انا بشيل الكبدي وانتي شيلي البصلي هم احسن اتنين لحدي هسي!
سوزان:_ اي يا زوله ديل الحلوين!😍 خلينا نشيلهم ونمشي بيهم،،،، بس يعني باقي المكياج لكين خليهو لي بكره والله لمن رجليني وجعوني وجع مبالغه عديل انا من امشي البيت بس بنوم انتي م تعبتي
سديم م تعبتا ياخ شنو؟!
والله روحي طلعت يلا خلينا نطلع من المكانات دي اوصلك وبعدين امشي بيتنا
سوزان وسديم حاسبو علي الفساتين وشالوهم وطلعو
*(في العربيه)*
سديم:_ انا خايفه
سوزان؛:_ خايفه من شنو بس يا سديم؟!
سديم خايفه من الحكايه دي متزبط 🥺
وم تنسى منى دي متوكل هو الاختاره زي م قلتي لي يعني لو م كانت عاجبه م كان طلبها واتزوجها يعني تفتكريني ح الفت انتبهوا؟!
وبعدين تعالي هنا قولي لي هي سمحه ولا لا لي يوم الليله م شفتها 💔
سوزان:_ يا ختي ما تخافي ساي البت عاديه زي وضعه 😉
وبعدين مش انت عايزه توصليني ؟!
ادخلي معاي واعملي نفسك عايزه تسلمي لي امي و اطلعي اوريك ليها
(كضابه يا سوزان البت قمر 😂
بس سوزان بتشوفها عاديه م عارفه ليه ودايما م بتقول الحق في حقهااا)
سديم: لا مدام عاديه زي م قلتي يبقي انا فرصتي أكبر في الحكايه يلا انا م بدخل خليها تتفاجئ بي لمن اطلع منها اتفقنأ
سوزان:_اكيد اتفقنا يلا خلينا نمشي 🙃
منى جات طالعه من غررفه فرح وماشه على المطبخ
جا متوكل نازل شكله طالع لانه شايل مفتاح العربيه في يده 😍
منى بقت تعاين ليهو كده 😍😍😍
(كان لابس بنطلون جينز كحلي قميص اسود وجزمه سوده والقاش والساعه لونهم مع بعض يعني حاجه تخليك تعمل زي منى واكتر 😂😂)
متوكل جا باسها في خدها وضحك قال ليها منبرشه في راجلك ولا شنو وغمز ليها 😉
منى اتلبكت قالت لي لا لا م كده بس شايفاك نازل قلت انتظرك 😂
اها قول لي ماشي وين؟!
متوكل:_دي تحقيقات زوجه 😂
منى:_لا بس فضول
متوكل:_دخل يديهو في جيب البنطلون وعمل حركه ورجع لي ورا قال ليها بحبك 😂😍
منى:_😍😍😍😍😍
متوكل:_نفسي اسمعها منك عليك الله قوليها مره وحده 😂🥺
منى:_شنو هي؟
متوكل:_منى م تتهابلي الكلمه القلتها هسي دي
منى:_صراحه هو بين الحاسه بيها ولا بس لما احس بيها بجد ح تطلع ليك ومن كل قلبي 🤭
متوكل:_انتي قايلني بزهج ولا بمل لا وحاتك انا معاك لي الموت 😂
قولي الود دا لايوق قولي اي حاجه
يلا انا طالع عندي شويه شغل اخلصو وبعدين بجي اسوقك نمشي تشوفي الفستان وتقيسيهو ونشوف بتاعت مركز التجميل بتقول ليك شنو الصراحه كان لازم سوزان توديك بس انتي عارفه سوزان وحركاتها انا بسوقك ومعاك خاله فرح وانا متفق مع البت علي كل حاجه م تخافي ح تعمل ليك اي حاجه سمحه يا سمحه 😍
منى:_م نتحرم 😍
متوكل:_اخرتيني يااااخ ورح قدميني لحدي الباب زي الرجال المتزوجين ديل نفسي احس الشعور ده 😂
منى:_طيب عشان م تقول حارماك من حاجه يلا ورح 😂
متوكل:_هو انتي الحارماني منو بسيط؟! 😂🤭😉
منى:_نحنا قلنا شنو يا متوكل 🙄
متوكل:_خلاص خلاص مالك منفعله كده انا كنت بشوف فيك م تخافي مافي حاجه بتحصل بدون رضاك وصح جبت ليك فستان فوق شوفيهو والبسيهو بعدين عشان عارف م عندك حاجه مناسبه
منى:_حااااضر 😍
متوكل طلع ومنى كانت مبسوطه شديد وم عاينت جات داخله وزينب طالعه كانت شايله شوربه في يدها وبدون م تحس منى كشحتها فيها والكوريه وقعت اتكسرت وزينب بقت تعيط بطول صوتها 😭
*‏بالغ بي ، جُن علي ، أفرط فيني ، لا تحبني بتعقُل.*
قبل م منى تفتح خشمهاا جات عاشه كابسه وشايله ليها عود كبير في يدها
سندس بقت تضحك وضربت ابرار في يدها قالت ليها شوفي كملت 😂😂😂 امك يختي كملت المقصر والحاجه الكعبه بعودها ده تدق منى قدام الموجودين شوفي ليكي حفره ادخلي فيها 😂🤭
ابرار قالت لا حوله ولا قوة إلا بالله العلي العظيم خلاص كملت يخوانا اقسم بالله امي ومنى ديل التخلف مكتوب ليهم في وشوشهم
منى من شافت عشه والعود الجايه بيهو عليها وتصرصر ليها في وشها اتدست ورا حبوبه متوكل وبقت تقول ليها واااي الليله بتقتلني امسكيني منها
ومتوكل بقي مسرت عيونو قال هسي المره دي جاده دايره تدق بتها قدام الناس ديل كلهم؟! 😳
حبوبة متوكل قالت ليها لا لا م تخافي م بخليها تهبشك بس قولي لي دي امك؟!
منى قالت ليها بدموع لا لا دي م امي دي خالتي امي متوفيه من انا صغيره وخالتي دي هي المربياني والفول دا حقها 🥺
متوكل كان بعاين ليها قلبوو وجعوو عليها
عشه جات وقفت في قدامها قالت ليها انتي قايله او اتدسيتي ورا المره دي بتحميني منك؟!
والله والله الليله يامنى افرط روحك دي جت انا تكضبي علي وارسلك وتاريك قاعده هنا تعالي لي هنا
(وكل شويه عشه تقرب ليها منى تبعد منها وحبوبه متوكل بقت خايفه علي روحها ينزل فيها عود ساااي يجيب اجلها 😂💔
وكمان لو خلت منى لي عشه منى هي الاجلها بجي)
متوكل قال ليها م صح كده ياخاله كل حاجه بتجي بي الهداوه هسي البت دي لو ضربتيها بي الحاجه الفي يدك دي بتعوقيها
عشه قالت لي اسكت انت م بتعرف البت دي حماره وم بتفهم وبعدين انا الليله حرقتي منها دي لو م ضربتها بتجيني حاله او بجيني شلل ويقتلني
متوكل ضحك ومسك منها العود قال ليها طيب روقي يا خاله واشربي ليكي مويه
عشه اتنفست شويه تاني قامت قالت لي لا انا ماشه بيتي
متوكل ضحك قال ليها طيب الله معاك
قالت لي م هو انا م بمشي براي مالم اسوق قليلة الادب دي معاي وبقت تاشر علي منى
ومنى ماشه مع حبوبة متوكل يمين وشمال وكل م عينها تجي في عين عشه عشه تصر ليها عينها نظام اصبري والقاعده وراها دي م بتحلك مني الليله
حبوبة متوكل قالت لي منى فكيني يابتي انا مره كبيرة وم حمل دا كلو وخالتك م بتسالك م تخافي
عشه قالت لو قعدته اتعصب كده م بخلوها تمشي معاي وكده البت ح تلصق في حبوبة الولد ده اكتر ودي حاجه اخطر واصلآ طول م هي معاهم م بخلوني اهبشها عشان كده خليني امثل لحدي م اسوقها وتطلع بيها من هنا وبعدين عندي معاها حساب تاني واقدر اعمل ليها الدايره بي راحتي
عشه عاينت علي ابرار لقت ابرار صاره وشها ووشها م بتفسر نظام بتقول لي امها سوقي الوسخانه دي وطيري بيها من هنا خربتو علينا اي حاجه
والبنات بقن يتكلمن نظام نحنا جاااين لي شنو وهسي الحصل شنو وليه متوكل كان صاري من منى جات وبقت تعمل حركاتها دي بقي يضحك مع كل كلمه بتقولها
وفي بنات بتقول بضحك عليها
وفي بنات بتقول بضحك معاها وزعلان عليها
عشه قالت هي انا نسيت ابرار تلقاها هسي من جوه فايره لبن بس الله يقطعك يامنى
قالت لي منى معليس يابتي كنتا زعلانه بس م كان اعمل معاك كده تعالي ورح البيت وخلي الناس يعملوا الكانو بعملوو فيهو
منى خايفه وعارفه الممكن تعملوه عشه عشان ابرار شنو؟!
بس كمان صح كده كفايه عروض لي هسي واحسن تطلع لو في باقي حاجه تتمها هناك 🥺
متوكل قال ليها نحنا م ح نسيبك تسوقيها مالم تحلفي انك م بتتعرضي ليها بي ضرب
عشه قالت في قلبها احلف ليك شنو؟
والله اليله إلا اقطع لحمها انا تعمل فيني كده انا عشه العندي شنه ورنه في الحله دي كلها فايزه الوسخهه تعيني بي سببها التصبر لي
قالت لي متوكل دا كلام شنو انا قلتا ليك م بهبشها خلينا نمشي عشان عندنا شغلانيات تانيه
متوكل قال ليها طيب سوقيها بس م اسمع انك عملتي ليها حاجه عشان حلفتي
عشه قالت لي تمام وساقت منى قدامها وهي ممغوصه منها شديد والليله حالفه م تخليها
متوكل قال لي حبوبتو خلاص ياحبوبه خليهم يمشوو انا تعبت
حبوبتو قالت لي اجي دا كلام شنو نحنا يعني نادينا البنات عشان يجن نعاين ليهن ويرجعن بدون م يفهمن حاجه هوي كلامك ده غلط ياولدي
متوكل:_ياحبوبه والله تعبان ومصدع خليهم يمشوو وانا بتصرف
حبوبتو قالت لي يعني يا ولدي البنات رهن إشارتك وبعدين بتعمل شنو في ابوك الجاي الأسبوع الجاي ده عشان يسألك عايز منو ويعرسها ليك
متوكل:_ياحبوبه لي الأسبوع الجاي انا بتصرف خلينا م نتسرع سااااي يلا انا طالع فوق وطلع وخلي البنات تابعاتنو بي نظراتهن
حبوبة متوكل قالت لي البنات ولدي تعبان ومصدع شويه بس الحكايه م خلصت علي كده لسه باقي أيام بنرسل ليكم تاني اعفوو لينا بس
البنات طلعن واي وحده بتقول شايف نفسووو شايف نفسووو بس عشان المدينه كلوا يهون
_ابرار غضبانه غضبه تقول تطق جرت جري عشان تلحق امها ومنى
وبهناك عشه تشيل وتفرص في منى وهي سايقاها قدامها ومنى الدموع م تديك الدرب بس كمان برضو منى م بتقدر ترفع يدها ولا حتي عينها علي خالتها لأنو لو مهما كانت خالتها بتعاملها كعب في النهايه هي خالتها وربتها من زمن كانت صغيره ومجبوره تتحملها لمن تعرف ربنا ح يوديها علي وين
منى:_ياخالتي والله قلت ليك م كنتا ناويه امشي القصر بس تاني الشيطان غشاني وقلتا امشي اشوف البنات بعملن في شنو؟!
وانتي كمان ياخالتي ابيتي لي امشي لو كان هسي خليتيني امشي م كان كل ده حصل 🥺
عشه:_يعني بتتحديني وبتكسري كلمتي يامنى مش؟!
منى:_والله م قصدي اكسر كلمتك ياخالتي بس كمان انا برضو بت وعندي نفس واحلام زي احلام البنات ديل كلهن بفوق ليهن ابرار
عشه:_يعني بتقارني نفسك بي ابرار مش؟!
ابرار انتي بتشبهيها من وين؟!
هو يا يمه في زي سماحة ابرار ولا آدب ابرار اليتك تبقي زي ضفر منها
بس انا حلفته م اخليكي الليله انتي عارفه انو فايزه اتصلت لي ونبزتني وقالت لي م دايره معاي تعامل تاني ولا بتديني قروشي العندها
وفوق لي دا كلوووو كاشحه لي مد فول عندي اسبوعين بفرقع وبنضف فيهو عشان يجيب المصاريف هسي قولي لي بناكل من يوين؟!
(وادتها لبعه بناكل من وين تاكلك الارضه ياااااخ الله ينتقم منك يارب)
منى:_ياخالتي عليك الله م تمدي يدك علي في الشارع كفايه فضايح لمن نصل البيت عليك الله اقتليني وارتاحي
عشه:'_م انتي البتحددي امد يدي عليك بتين وتاني فرصتها من جضمها ولبعتها نظام قدامي سريع منى جرت دخلت البيت وهي بتبكي وفرح شافتها لمن بتبكي عرفت دي عشه لكن حلفت الليله م تخليها
ابرار لحقت امها قالت ليها انا ليه جيت بتك كان اليتني جيت بت مره تانيه فضحتيني مع البنات كنتا شايفه نفسهم علي نظام انا افضل واحسن وارقي وحده فيهم جيتي انتي وخربتي لي اي حاجه انتي وبت اختك الكلبهه الحيوانهه دي البنات بقن يضحكن علي ويقولن لي امك وبت خالتك متخلفات
ليه كدهه يا امي والله الليله م اخليها بت اختك دي ونهائي م تمسكيني منها وجرت دخلت علي منى البيت
عشه جات داخله فرح اتناولتها قالت ليها تعالي هنا وقسمآ عظمآ الليله البت دي تمدي يدك عليها افتك فته إلا اطلع روحك تطلعي روح البت ااتي وبتك الله يطلع روحكن لو م قادرات عليها وم عايزاتنها ادني ليها انا بمسكها معاي لمن عدلها يجيها لكن اوعاكي تتصرفي معاها بي الطريقه دي تاني
عشه :_دفرتها قالت ليها غوري مني الله يطلع روحك وبت اختي م بديك ليها كان تموتي وانتي م تدخلي في الموضوع ده دي اسرتي وانا بتصرف معاها وللمره المليون خليكي بعيده من الموضوع دا
وخلتها ودخلت البيت
ابرار دخلت لقت منى قاعده وبتبكي قالت ليها تعالي هنا فضحتيني الله يفضحك وبقت تكفت فيها،،،،منى م حملت الظلم ده كلو قالت لي ابرار سكته لي خالتي عشان خالتي بس انتي م بحق ليكي ترفعي يدك علي ومنى نفسها بقت تضرب في ابرار والموضوع جايط بينهم دي ترسل بجي دي تستلم وترجع بجاي 😂💔
عشه جات مسكت منى وكفتتها قالت ليها كمان خربتي لي بتي وعندك نفس تدقيها الدقة ليكي انتي يا حماره
منى:_كده كتير ياخالتي ياخ انا طاقتي خلاص انتهت فاهمني انتو كفايه مستعبدني من زمن صغيره وانا ساكته ياخ م عندكم احساس أنتو؟!
عشه قالت ليها اي م عندنا احساس ولو م عاجبك الباب يفوت جمل مش كفايه نحنا الربيناك وصرفنا عليك لمن بقيتي مره وبقيتي ترفعي صوتك علي لو م عاجبك يله ورينا عرض كتفاك ودقني يقوم في الظلط لو فتشته عليك ولا شفتك طرتي وين آخر الزمن والله صح خيراً تعمل شرآ تلقي
منى قالت ليها بي حزن والدموع في عيونها انا لو كان عندي بس مكان اخت فيهو راسي والله ياخالتي من كان عمري خمسه سنين كان مرقته منك 😭💔
بس حكمت ربنا م يكون عندي زول تاني عشان امشي اقعد معاه
ابرار مسكت امها وبقت تتكلم معاها براحه قالت ليها م تشدي معاها كده يا امي هسي لو مشت البشتغل لينا منو م تنسى هي مريحانه من كل حاجه ولو عديتيها والله القي البشتغل ليك لو علي انا دي والله كوز من الأرض م برفعو وانتي اقعدي قولي عندي رطوبه وم عندي رطوبه وم بهبش حاجه لمن الجوع سااااي يقتلنا وبعدين بكره ده لمن ود المدينه يوافق ويجي يتقدم لي ويعرسني البشتغل في عرسي منو؟!
خلي عرسي دا يتم وانا بسوقك معاي المدينة وهي ان شاءلله تطرديها لو م عايزها تقعد في البيت دا بعدين دي حاجه قرريها انتي
عشه قالت ليها براحه اي والله انا زاتي قلتا هي دايره ليها فرصه عشان تطلع من البيت دا وتمشي تقعد مع الحربويه فرح وبعدين تعمل العايزه انا بوروني ليها منى دي مافي زول عارف قلة ادبها زي م انا عارفاها
ابرار قالت ليها شنوووووو؟؟
منى قالت ليهم اتكلموا معاي انا ردو لي انا قرفت فاهمني قرفت ياااااخ
عشه قالت ليها طيري ادخلي جوه المطبخ تمي العده دي وبعدين انا عندي معاكي تصرف تاني
منى قالت ليها نفسي افهم انا شنو في البيت دا خداااااامه؟!
عشه قامت ليها بنهره يابت طيري جوه الخدم الينتهو منك شايفاك وشايفه طول لسانك البقيتي فيهو الليله ده انا والله لا بخاف لا في حاجه بتهمني ورب العرش لو قمتا اندمك علي حياتك طيري جوه يعني طيري جوه ولحدي بكره الصباح م اشوف وشك عشان م اتذكر السويتي يلا طيري
منى م كانت عايزه تكبر النقاش اكتر من كده عشان عارفه خالتها م عندها رحمه وممكن تخليها باقي الليل ده تنوم بره البيت قالت احسن اخد النقاش وادخل بيهو وهي بس بتدعي في بالها أنو ربنا يصبرها ويجفف دموعهااا بي الخير ليها
عشه رجعت تتكلم مع ابرار تاني قالت ليها عديتها عشان نتكلم براحتنا الله يقطعها يااااخ نفسي الصباح القها ميته ادفنها وارتاح منها ومن عمايلها غير جابت لي الفقر م لقيت من ورا وشها دا حاجه
ابرار:_والله أحياناً بجي علي بالي اقوم اخنقها بس وارتاح منها بس بخاف اشيل لي روح زول وهي ذاتها م لامه علي الناس وتنحسب علي روح
عشه:_م تخافي بنتخلص منها بس كل حاجه بزمنها انتي بس انتظري وشوفي امك بتعمل فيها شنو والله اتعبها تعب اخو الموت
منى كانت بتتسمع لي كلامهن من جمب الراكوبه عشان حست أنو خالتها طردتها عشان دايره تقول مع ابرار كلام وم عايزاتنها تسمعوا
بعد منى سمعت الكلام ده م قدرت تكمل قلبها وجعها شديد ومشت المطبخ تبكي قالت ياربي خالتي دي انا غلطت معاها في شنو لمن القي منها كل المعامله الكعبة والجفه دا كلو؟!
ياخ انا ربيت علي يديها ومن قمتته وفتحته علي الدنيا فتحتها عليها عشان كده بحترمها لأنو مهما كان ربتني لو بسمح او كعب
ياااااخ انا اقسم بالله الإحترام البحترمها ليهو بتها المن لحمها ودمها م بتحترمها ليهو
كانت دايمآ بتنهرها وبتنفذ الفي رأسها كأنو ابرار الأم وخالتي البت ياتري ناويه لي علي شنو تاني لسه م شفتوو منك؟!.
ابرار:_يا امي م عارفه متوكل كان بعاين ليها كيف ويضحك
عشه؛:_متوكل دا منو كمان؟!
ابرار:_متوكل يا امي ود المدينه م عارفه اسمو انتي ولا شنو؟!
عشه:_بري يقطعني م عارفه بس اسمو سمح سماحة 🤤
ابرار:_هسي دا م وقتو يا امي
عشه:_صح صح اها قولي لي كنتي بتقولي في شنو عنها؟!
ابرار:_قلتا ليكي كان بعاين ليها تقول عاجبه نحنا قاعدين ساعه ونص قدامه م فكر يفتح أسنانه عشان يضحك بس من هي جات الضحكه م فارقت وشوووو
عشه:_اهبل هو ولا شنو في زول بضحك لي مع وحده شكلها تقول شحادة؟!
ابرار:_والله م بعرف بس انا بعرف كيف اوقعو في شباكي لو فكر يعاين ليها انتي بس انتظري وشوفي بتك ولو قمتا لي الخباثه زول بلحقني فيها مافي.........
هوي يا ولد مالك نايم كده ومن قبيل سرحان قول لي مالك الحاصل عليك شنو عشان انا نفسي بقيت م فاهماك ولا فاهما تصرفاتك!
متوكل:_مافي حاجه يا حبوبه م تشغلي بالك بس
(حبوبتو اسمها زينب)
زينب:_كيفين م اشغل بالي مش انا جيت معاك البلد دي ومسؤله منك لحدي م ابوك يجي؟!
متوكل:_مسؤله مني شنو ياحبوبه؟!
هو انا شافع يعني
م تنسى انا جيت عشان اتزوج 😂
زينب:_م تلعب علي بي الكلام قول لي مالك كنتا بتفكر في شنو؟!
وغير كده قول لي ليه م اخترته واحده من بنات الحله تفتكر تاني بجن ليك عشان تشوفهن؟!
متوكل:_م يجن ياحبوبه ولا عايز اشوفهن اصلآ
زينب: _هي كيف الكلام ده يا ولدي هو نحنا جايين البلد دي عشان شن؟!
مش عشان نشوف ليك بت تتزوجها؟!
هسي تقول لي م عايز تشوفهم تاني؟
اتكلم معاي يا ولد فهمني حاجه!
متوكل:_م تحسبيها كتير يا حبوبه بتتسهل
زينب:_هي يا ولد م احسبها كتير شنو نحنا جاين البلد دي عشان عرسك م عشان نقضي أجازه يبقي خلينا نشتغل الشغل الجايين عشانو ونفتش ليك علي العروس
متوكل:_بس انا م عايز من الشفتهم ديل يا حبوبه كلهم بنات مصطنعات انا عايز بت كده تكون علي طبيعتها وتكون بت علي حق وحقيقي
زينب:_هي بت علي حق وحقيقي نجيبها ليك من وين نمشي لي البنات ونلف ليهن في بيوتهن ونقول ليهن م تعملن مكياج وخليكن علي طبيعتكن عشان ود ولدي م داير مره مصطنعه ولا اقول شنو اقسم بالله انا غلبته معاك حيله يا متوكل
متوكل:_هسي الغلط في كلامي دا شنو يا حبوبه؟!
زينب:_الغلط انك عايز حاجه م موجوده في الحله دي
متوكل:_ومنو بس قال ليك م موجوده يا حبوبه انتي بس اصبري معاي عشان الحكايه دايره صبر
زينب:_شوف هنا يا ولد انا تعبت من الحركات دي حدك معاي الأسبوع الجااااي لمن ابوك يجي تاني يصطفل معاك انا جيت معاك هنا عشان اساعدك تختار وحده تكون بتناسبك
متوكل:_تفتكري هسي بتكون عملت فيها شنو يا حبوبه
زينب:_دي منو دي كمان وعملت فيها شنو؟!
انت قاصد منو يا ولد؟!
متوكل:_منى البت القبيل الخالتها عملت معاها المشاكل
(من جانب تاني)
_والله ياخالتي فرح م عارفه عملت ليهم شنو في الدنيا دي عشان يتعاملو معاي بشكل دا بلعكس انا م عملتا معاهم غير كل خير والله خالتي دي لو اتكلمت معاي وهزئتني م برفع عيني بعاين ليها مرتين عشان انا بحترمها وبقدرها وبختها في مكانات امي الله يرحمها بس هي ليه بتتعامل معااااي بطريقه الكعبه دي؟! 🥺😭
فرح:_يابتي الذي خالتك دي م بنفع فيها الإحترام والله ولا هي ولا بتها القدر الدب دي الذي خالتك وبتها ديل دايرات مره مانعه تفطرهن وتغديهن دق بس لقنك مسكينه الله ينتقم منك وم راعن لي إنك يتيمه
منى:_مش بقولو البت بتتخلق في خالتها الأول وبقولو برضو الخاله أم حتي في وجود الأم؟؟
طيب ليه خالتي م فيها الطيبه البتكون في الخالات البحبو بنات اخواتهم وبخافو عليهم؟!
فرح:_ديلك ناس وخالتك حربويه هوي يا منى خالتك دي والله عشان بتها مستعده تقتل عشان كده م تتاملي حاجه ساي مالم تحصل
منى:_اصلآ انا بطني طمت من كل حاجه ومن البيت داك
فرح:_طيب م تجي تقعدي معااااي والله اشيلك في راسي لحدي م اسلمك لي راجلك بي يدي وعلي الأقل تونسي لي وحدتي
منى:_ابتسمت ابتسامه صغيره وسط الدموع قالت ليها والله نفسي شديد يا خالتي فرح بس م عايزه اتلوم م عايزه الناس يقولو تعبت فيها وربتها وبعد كبرت خلتها ومشت قعدت مع جارتها عشان تجاكرها وانتي عارفه كلام الناس وانا م حمل كلام كتير من زول وخصوصاً ناس البلد ديل والله عشان كده خليني قاعده لمن أشوف ربنا بوديني علي وين
فرح:_اسمعي كلامي وتعالي عندي كده كده الناس ديل بتتكلم اشتري راحة بالك بس وكبري دماغك
منى:_لا معليش يا خاله خليني هسي معاهم يلا اقوم امشي عليهم عشان الدنيا مغربت وهسي لو اتأخرت اكتر من كده بتفهمني غلط وبتقول كنتي لي مع زول
فرح:_سمح امشي يابتي وكل م تحتاجي لي خالتك فرح اتذكري انها قاعدة وخالتك دي ربنا يحلك منها بركة الله دا يا الله حل البت دي ويسر ليها امورها
صح قبل م تمشي ود المدينه الحصل في حكايتو شنو مش قلتي بتجيبي بتجيبي؟!
منى:_شكلوو م من نصيبي يا خاله م بتشابي سااااي ولو لي فيهو نصيب بتلاقي معاهو في بيت الحلال ولو كمان نصيب وحده تانيه الله يهنيهم بي بعض بس انا مستحيل ولد زي دا يعاين لي عشان كده م دايره افكر في الموضوع كتير يله ودعتك الله يا خالتي لحدي بكره بمر عليك وطلعت سريع عشان تمشي البيت مع أنو الباب جمب الباب
(فرح اتوضت وصلت المغرب وقعدت في المصلايه وبقت تدعي يارب اجبر بخاطر البت المكسوره دي يارب ابعت ليها نصيبها السمح البغير حياتها انت وحدك عارف البيها والعليها كون ليها عون وسند يارب هي م عندها غيرك )
جيت داخلهه البيت لقيت خالتي وابرار قاعدين في نص الحوش وخاتين ليهم اكل وبالكو لا فكرو قالو الحماره دي مافي ولا من الصباح م اكلت حاجه ننتظرها علي الأقل عشان هي العملتو قلت م اشتغل بيهم كتير اي يوم اصلآ خالتي قالت لي امشي ختي اكل وتعال ناكل مع بعض ونتونس وتحكي لي عن مشاكلك حتي وانا صغيره زمن كان بجي زمن الأكل بتخت لي اكل بسيط في صحن وتقول لي امشي هناك واكلي واتاكل هي وابرار مع بعض ويتونسو ويضحكو إلا بعد كبرت بقيت اشبع من الأكل عشان انا البعملو لو حتي بي الدس عشان الجوع لمن يكبس م بعرف عوارض
_جيت داخلهه قلت اختصار النقاش وامشي طوالي انوم لي نوم ينفعني عشان انا م ناقصه
جاني صوت خالتي
منى
_عاينت ليها بنعم يا خاله
عشه:_يخلخل ضروس يارب هسي حايسه ولايسه مع امغارب ديل عندك شنو ولا كنتي معاه
منى:_رفعت حاجبها كنته مع منو؟!
عشه:_حبيب قلبك البتطلعي يوم بليل تلاقيهو
منى:_انا اتخنقت يخوانا خالتي لو بتعرف انا أمور الشك دي بتقتلني قتل عديل كده
قلت ليها كلامك دا عيب يا خاله
عشه:_العيب اليقتلك انتي بتوريني العيب والحرام م صح م عرفتا اربيكي إلا يطيرك مني علي خير لو سمح او شين
منى:_م تخافي ياخالتي بتتخلصي مني سوأ قريب او بعيده
وبعدين كنت مع خالتي فرح لو م مصداقني اطلعي امشي شوفيها
عشه:_يابت طيري جوه م تقولي لي اعمل شنو وم اعمل شنو وتاني م اشوفك مع المغارب طالعه وحتي لو كنتي في نهاية الدنيا شفتي المغرب داير يجي تكون هنا مفهوم ولا لا
ولا اقول ليك م تطلعي لي اي ونسه اطلعي بس لي المرسال والحاجات الضروريه مفهوم
منى:_حاضر يا خالتي اي أوامر تانيه؟!
عشه:_غوري من وشي سديتي نفسي من الأكل ولو عندي أوامر تانيه كان قلتهم م خايفه من حضرتك
(في القصر)
زينب:'_انت جنيت يا متوكل؟!
منى شنو وعفن شنو؟!
هسي انا بتكلم معاك في موضوع مهم عشان تقول لي منى وم منى هي مش خالتها قالت ان شاءلله تقتلها
متوكل:_لا يا حبوبه قصدي البت مسكينه ونظرتها كانت نظره زول بستنجد بي الناس وفي نفس الوقت كانت يتيمه م شايفه خالتها وبتها الوصفتها ديك لابسين كيف وهي مدينها ملابس كيف تلبسم؟؟
زينب:_والله دا م مجال اختصاصي ولا انت قاضي العدل وبعدين هي في زمتها كبيره زي دا هسي ديل ملابس تطلع بيهم من البيت لو تخلي الطلعه ودا شنو جسمها دا ولا الطين والقرف ولا الفول الجات شايله في يدها وغير كده والاكبر المصيبه الأكبر طالعه في الشباك في الشباك يا متوكل؟!
بت هي ولا حيوان انا لمن وقفت بوراي ومسكتني قرفت منها والله بس م حبيت ابين قدام البنات حاجه احسن ليك خلي كل حاجه في البلد دي زي م هي واعمل الحاجه الجاين عشانها ومن بكره مش قلتا مافي وحده عجبتك تنزل البلد وتمشي المكانات الفيها بتردد بنات زي السوق والخزان وبعض البيوت نعمل ليهم زياده مفهوم؟!
متوكل:_انا م قاصد حاجه يا حبوبه بس عشان الحصل قبيل مع البت دي م بسيط لذلك شاغله تفكيري في الحصل معاها بعد كده
زينب:_البت البت البت هو يا ولد انا بعرف أمور الشباب ديل كويس وم بتخدع بسهوله انت تشيل البت دي من راهلك مفهوم؟؟
متوكل:_ههههههه بت شنو يا حبوبه؟!
هو انا بعرف اي حاجه عنها عشان اختها في راسي؟!
زينب:_ايوه خليك كده ومن بكره الصباح تطلع عشان تعمل القلت ليك عليه عشان نطلع من البلد المعفنه دي م عارفه ابوك كمان عاجبو فيها وفي بناتها شنو ومصر عليها كدة وحالف م يسمع كلامي
متوكل:_انتي عارفه يا حبوبه ابوي بفكر بطريقه مختلفه وم بتفهم ببساطه 😂
زينب:_والله معاك حق اذا كان انا اموو الوالده ومربيه م قدرت افهمو لحدي م بقي زي الشحط 😂
متوكل:_😂😂😂😂😂😂م خايفه اقول لي قالت لي انت زي الشحط؟!
زينب:_هوي يا كلب الفتنه كعبه يلا النقوم نمشي ننوم عشان الليله تعبت
متوكل:_تصبحي علي خير
زينب:_تلاقي الخير يا ولدي وعايزه تطلع محمد ولدها اتصل محمد دا ود زينب الوحيد وياهو أبو متوكل وسوزان م عندو غيرهم لكن برضو متحكم شديد بس سوزان بتتعامل بي تحت بخباثتها
زينب:'الو اهلين يا ولدي
محمد:_كيفك يا حجه انتي والشحط داك انا بتصل عليه في تلفونه مقفول
زينب:_كويسين يا ولدي بس انت عارف متوكل م بريد يمسك تلفونوو كتير
محمد:_م علينا اها الأمور سلكتت وقدر يختار ليهو بت؟!
زينب:_والله م عارفه اقول ليك شنو لكن م أختار لسه اي بت
محمد:_انا عارف هو بتماطل عشان م داير ينفذ رقبتي ويعرس من بلدي لكن قولي ليهو ابوك قال ليك لو جا الأسبوع الجاي ولقاك م اخترته ليك عروس بعرس ليك هو بطريقوو وبطل الدلع والحركات البتعمل فيها دي وقفل الخط.........
زينب:_سامع ابوك كان بقول في شنو يا متوكل؟!
متوكل:_سامع اي حاجه يا حبوبه زي م قلت ليك بحصل خير ان شاءلله
زينب:_ان شاءلله يكون زي م بتقول يله انا ماشه انوم وانت كمان نوم عشان الصباح تلف في البلد وتتعرف عليها وان شاء الله تلقي نصيبك ونخلص من كل الموضوع دا
متوكل:_ان شاءلله
بعد م متوكل حبوبتو طلعت بقي يفكر قال يارب الحصل معاها شنو؟!
هي كان باين عليها في حزن عميق شديد في عيونها وشكلها م قادره تطلعوا من جواها
بس انا مهتم بيها كده ليه؟!
بنسبه لي بشكله دا احسن من كل البنات الجو وشفتهم علي الأقل هي حقيقه يلا الصباح بنشوف البحصل معانا شنووو؟!
منى كانت نايمه في سريرها وبتفكر في الحاصل معاها فجأة جا في بالها متوكل قالت بجد كان باين عليه شخص طيب شديد!
وقف معاي قدام خالتي وخلي خالتي تحلف انها م تمد يدها علي بعدين طلعني معاها؛
م كل الأغنياء شكلهم كعبين والله
بس خليني صريحه مع نفسي حتي لو هو طيب مستحيل يعاين لي وحده زيي وبعدين شكلي الشافني بيهو قبيل دا والله خدامه م يجيبني عشان اشتغل عنو تلقي بس داير يتخلص مني سريع عشان يرجع يعاين لي البنات ويتمعن فيهن عشان يختااااار
هسي انا لو كان عندي لبس زي حق ابرار دا او مكياج كان طلعت احلاااا منها بكتير بس يله هو م من نصيبي ولا شكلو ح يكون خليني انوم احسن بدل التفكير حقي دا بكره لو قمته متأخره خالتي بطين عيشتي
*(الصباح)*
*(منى بتحكي)*
صحيت زي العاده أول زول في البيت كنسته وعملت الشااااي ولسه خالتي وابرار نايمات وم اقدر اصحيهم إلا يصحو بي نفسهم
شويه وكلهم صحوو
قلتا لي خالتي صباح الخير
قالت لي الخير بجي من وين والزول اتصبح بي وشك ده هسي م كان بتقدري تقعدي شويه قبل م تطلعي لي في وشي مره وحده وتعكري علي صباحي ويومي
قلت ليها الله يسامحك يا خالتي برضك
عشه:_شايفاك كلامي م عاجبك وبقيتي تطلعي ليك كلمات
جات ابرار قالت ليها عشان سكتنا ليها كتير يا امي لو هسي كان من تتكلم معاك او ترفع صوتها بتدقيها كف لمن بترميها هسي كان الوضع غير وم كان ردت ليكي لكن نقول شنو لقتك طيبه واستغلت الحته دي
(يعني هسي خالتي دي طيبيه؟!
طيب لو كان شريره كان عملت شنو؟!
دي م باقي ليها إلا تمشيني علي الحيط يخوانا 😂💔
بعد مرات بقول ابرار دي اقتلها وارتاح منها بس بنعل الشيطان)
عشه:_ والله صح كلامك ي ابرار يابتي عشان قلبي طيب وبحن عليها وبقول هي بت اختي مهما كان وامها الله يرحمها احتويها بس هي م خاته اعتبار لي الحاجه دي
منى:_بلعكس ياخالتي م تظلميني عشان بجد انا بحترمك جدآ لكن انتو الظالمني والله م بحب الظلم
ابرار:_قصدك في القصه الطويله دي كلها واللف والدوران ده كلو نحنا الكعبين طلعتينا نحنا الكعبين؟!
يختي كان ترضي وكان تابي انتي شقيه والشقاوه مكتوبه ليك في وشك قتلتي امك وابوكي تاني شقاوه أكتر من كده وين تخلصي علينا نحنا الباقين وترتاحي
اصلآ دا البحصل الأسرة دي باقين ليكي فيها إلا انا وامي وبتقتلينا وترتاحي تقعدي براك زي الركائز في السيل
عشه:_دا الخايفه منو ذاته يا ابرار نموتو بسبب تأثير شقاوتها هي
(شوفو ديل عليكم الله والله انا لو عندي الموت اعدي عليكم الليله قبل بكرا 😂)
*(في القصر )*
متوكل كان نايم لسة
جات زينب بتشكي من برا يا ولد يا متوكل
يا متوكلللللللللل
متوكل فتح عيونو من النوم قال ليها هسي في زول بصحي زول بي الطريقه دي يا حبوبه ليه م بتحترمو حقوق النايم ياااااااخ
زينب:_هي يا ولد م دايره معاك فلسفه وكلام كتير م فايقه ليك مش انا امس بليل قلت ليك م تكتر في النوم عشان تبدأ لف في الحله قبل م النهار يقيل؟!
متوكل:_النهار يقيل يا حبوبه ديك ياها قلتيها يعني لسه خليني انوم عليك الله
الزمن لسه بدري
زينب:_زمن شنو البدري البتقول عليهو قلت ليك قوم والله تنوم تاني اجيب جك حق مويه اكبو فيك وانت عارفني م بتكلم ولا بحلف ساااي الساعه تسعه داير تقوم متين قايل نفسك في المدينه الناس هنا بتصحي بدري وبتباشر كل شغلنياتها قوم وم تخليك كسلان يلا وانا راجياك برا اشرب معاك الشاي استحم والبس وتعالني
متوكل:_قال ليها بضيق
طيب يا حبوبه خلاص خلاص ياهو قمتا اطلعي انتي بجهز وبجيك ومشي علي الحمام بي كسل بعد م حبوبتو طلعت من الغرفه
قال هسي ليه جااات معاي حبوبه دي ياااااخ كلامها كتير وقرراراتها صارمه تقول قاعدين في معسكر م بيت أوف ياااااخ
*(عند منى )*
كانت بتعاين لي ابرار وعشه وبتضحك علي كلامهن وتقول في نفسها معقوله هم شايفني بي الوساخه دي وقلوبهم سوده لي الدرجه دي؟!
يعني لو م كنا بنوم وبنصحي وبناكل في نفس البيت كانو طلعوني شنو؟!
يااااخ ديل هم المربيني المتربيه معاهم في البيت واكتر ناس قعدت معاهم ليه كل الحقد ده يعني انا عشان يتيمه يعني؟!
طيب افرض اني يتيمه وم عندي زول غير ابرار وخالتي دا ليه اتحمل النتايج عليهو انا وكل حاجه مقدرها ربنا!
معقول في ناس بتحمل عقل فاضي بي الشكل دا؟!
ابرار:_طيب عشان نحنا بس ح نحن عليك لانو في النهايه بت خالتي امي بتخلي ليك البيت دا تعيشي فيهو براك احسن م تسرحي في الشارع سااااي امشي اشتغلي وجيبي ليك قروش وتعالي عيشي بيهم والبيت مخيره معاه ان شاءلله تمليهو رجال
منى:_رجال شنو يا ابرار البملي بيهم البيت في ذمتك دي حصل لقيتني بنوع الغلط واقفه لي مع راجل بتكلم معاهو ولا بضحك معاهو
ولا انتو نفسكم قاعدين تدوني نفس عشان اخد نفسي واطلع اشم ان شاءلله هواء واغير جو من الشغل القاتلني بيهو دا انا ساكته علي الاهانات بس دا م بعني انك تتمادي ولو خالتي اتمادت بسكت ليها عشان خالتي لكن انتي م بسكت ليك والله
ابرار:_شوفي انا م عايزه معاكي مشاكل هسي وبعدين زمن نحنا ح نساعدك ونخلي ليكي البيت تسكني فيهو تاني دايره تموتي؟!
وبعدين مستحيل نسوقك معانا المدينه عشان شكلك دا م شكل مدينة وبعدين أسرة متوكل مستحيل تتقبلك
(يخوانا زول يمسك ابرار م باقي ليها غير تقوم تلم ملابسها عشان تسافر مع راجلا متوكل 😂🤭)
_ضحكتهه بطول حسي قلتا ليها منو متوكل؟!
هو انتي ضمنتي خلاص أنو ح يتزوجك؟!
والله سبحان الله ياخ 😂
ابرار:_عيونها حمرت قالت ليها اي ح يتزوجني م بتزوجني شنو كمان ح يتزوجك انتي فاكره نفسك ولا شنو؟!
عليك الله شوفي دي يا امي بتحاول تكسر لي فرحتي 🥺
عشه:_هي طيري من قدامنا كده ولا كده وبعدين ح يتزوجها ودا موضوع منتهي تمامآ وبعدين الحله دي كلها م فيها بت تستاهل تبقي مرت ود المدينه وتسافر المدينه غير ابرار واعملي حسابك علي كدة
منى:_احم احم
م علينا اصلآ ما دام عايشين بنشوف البحصل شنو 🤭
_زينب كلمت واحد من شباب البلد قالت ليهو يطلع مع متوكل ويلفلفو علي البلد ويعرفو عليها
الولد اسمو يونس رحب بي الفكره وجا القصر عشان يسوق متوكل
متوكل خلص وطلع شرب مع زينب الشاي لقي يونس وصل كلم زينب وطلع مع يونس وهو خاتي في بالو قال ان شاءلله اشوف منى عشان اعرف لو هي كويسه ولا لا........
اقتباسهه
*- هل تتفهم معنى أن تكون ممتلئاً بالغضب بالحزن بالندم بالحب بالكراهية بالحنين وبأنهارٍ رماديةٍ لم تخترع لها اللغة ألفاظاً بعد؟!*
*تخيل إذن حيرتي وأنا أحاول تحديد مصدر هذه الدمعة، ثم أضف هذه الحيرة للقائمة أعلاه".*
*تخيل إنك تكون في المنتصف المميت لا تقوي علي مواصله الطريق او الوقوف في المنتصف تخيل انك اصم وتتمنى فقط صرخه تخرج من حنجرتك لكي تتخلص من الألم 💔*
اثناء م متوكل كان ماشي مع يونس قال انا ليه م اسأل يونس ده عن منى احتمال يكون عارف حاجه عنها لا م احتمال اكيد بكون عارف حاجه عنها عشان هم من نفس البلد!
متوكل:_بقول ليك شنو يا يونس
يونس:_اتفضل يا أستاذ متوكل
متوكل:_صراحه م عارف اقول ليك شنو بس في وحده هنا عايز اسألك منها عايز اعرف عنها بعض المعلومات عشان حصل حاجه كده صغيره بقولها ليك بعدين
يونس:_اتفضل يا استاذ عايز تعرف عن منو انا وبلا فخر بنات الحله ديل كلهم بعرفهم نحنا هنا في الحله دي يا استاذ شبه متربين مع بعض تقول متربين في بيت واحد
متوكل:_كويس وده كان العشم كنتا متأكد بلقي الجواب عندك هو يا سيدي شوف انا م بعرف عنها كتير كل م في الأمر جات هي وخالتها عملو مشكله صغيره في القصر قالت اسمها منى وامها وابوها متوفين وعايشه مع خالتها لكن خالتها دي باين عليها كعبه م مريحاها قول لي بتعرف وحده بالمواصفات دي
يونس:_منى،،،،، منى
حلتنا دي يا استاذ م فيها غير منى وحده وفعلاً بتنطبق عليها كل المواصفات الحضرتك قلتها دي يتيمه أم واب وعايشه مع خالتها عشه وبتها ابرار
بس البت دي مسكينه والله بتحنني وبتحنن كل ناس الحله ديل
متوكل:_عاين ليهو بلهفه بعد م وقف قال ليهو خير قول لي مالها محنناكم البحصل معاها شنو انا برضو لمن شفت الحزن الفي عيونها حسيت في حاجه كبيره وراها
يونس:_البت دي بتتحمل اهانه وضرب من خالتها وبتها مافي زول يقدر يتحملو كل شويه خالتها عامله ليها فضيحه في الحله وماده يدها عليها قدام الناس لمن الناس بتشفق علي حالتها!
وهي بحكم انها مسكينه وبتحترم خالتها برغم من كل البتعملو فيها م بترد عليها نهائي وبس بتكتفي بي الدم وياريت خالتها الدموع بتأثر فيها دي مره قلبها حجر الله لا وراك العمايل البتعملها
وغير كده علمت بتها تعمل العايزه وحصرت منى في مكانات معينه عاملها زي الخدامه
متوكل:_لا حوله ولا قوة إلا بالله العلي العظيم طيب والبت دي م عندها اهل تاني؟!
قصدي م عندها حبوبه لا خال لا جد عشان تمشي تقعد معاهم وتتخلص من الحاجه الهي فيها دي؟!
يونس:_لا م عندها زول هنا غير خالتها وبتها دي
والحاجه دي بترجع لي سبب؛
متوكل:_سبب شنو؟!
احكي لي م تدس حاجه صراحه قصه البت مشوقه انك تعرف العليها شنو وانت من البلد بتكون كل القصص معروضة عليك!
احكي لي احكي واحنا لافين في الحله دي براحه براحه
يونس:_قال ليهو حاضر طيب اسمع
*(في العاصمة)*
*(وفي بيت اهل متوكل بالتحديد)*
سوزان:_هسه الحاصل ده عاجبك يا امي؟!
أمل:_مالك يابت؟!
سوزان؛:_محمد اخوي ود وحده من أغني الاسر يتزوج من البلد وحده متخلفه عشان يجيبها لينا هنا تقرفنا في عيشتنا!؟!
أمل:_والله انا برضك الحكايه م عاجباني يا سوزان البلد دي م بدورها نهائي ولا بدور ناسها الحكايه دي م عارفه طلعت في ضماغ ابوكي دي كيف؟!
سوزان:_لا م هو ابوي لازم زول يتكلم معاه ويتفاهم معاه في الموضوع دا
أمل:_بري يختي منو البتكلم معاه؟!
اتكلمي معاه انتي دي؛
انا اليوم داك حاولتا اتكلم وابوك كان ح يطلقني فيها وقال لي م تفتحي خشمك
اجي بعد الزمن دا افتح خشمي ويطلقني وتبقي عيبه في حقي بري والله اوعاك خشمي وعندي
سوزان:_يعني تشوفي ولدك بغرق في الحكايه دي وساكته عشان مصلحتك يا امي دا تفكير شنو ده؟!
انتي م أم ولا شنو؟!
الأمهات بهمهم مصلحه اولادهم اكتر من نفسهم بس في اسرتنا دي شايفه العكس
أمل:_هوي يابت بطلي كلماتك البتسوي فيها دي كيف يعني م بتخمني مصلحه أولادي؟!
بتهمني وكتير يا ستي
بس كمان ابوك لمن ياخد قرار م ينفع زول يناقشو فيهو لو مين م كان م عارفه عصبيه ابوكي ولا شنو؟!
وبعدين لمن شاطره كده وخايفه علي مصلحه اخوكي قولي لي ابوك خلي متوكل يرجع واقفل علي الموضوع دا وخلينا نختار ليهو مره من هنا
سوزان:_بري دي منو وحياتك م عندي استعداد تتقلع مني عربيتي الجديده ولسه م لحقت اتهني بيها
وبعدين انا مالي مش متوكل وافق وحتي رفض يناقش ابوي خلي ربنا يوريهو الكلب
أمل:_طلعتي انتي الكلبه هسي م بقيتي تتكلمي مصلحه مصلحه مالك فصلتي ولا انتي بتهمك مصلحه نفسك بس؟!
*_(عند منى)*
كانت بتكنس وعفاريت الدنيا راكبها ومتمنيه يوم يمر علي خير بدون مشاكل وتعيش زي الناس الطبيعين بدون الضغوط دي كلهااااا
ابرار:_كانت قاعده مع امها في الراكوبه وامها كانت بتفرقع ليها في فول وبعاينن لي منى وبتكلمن فيها
ابرار قالت لي امها البت دي بقت متمرده والوضع م عاجبها يا امي والحكايه دي من ناس متوكل وصلو هي مأمله ولا شنو يا امي؟!
عشه:_انتي جنيتي يا بت تأمل شنو كمان؟!
هسي مصدقه واحد زي متوكل تلفت انتباههو بالمنظر الشافها بيهو دا؟!
ابرار:_م بعرف بس قلبي متوقوش من الحكايه وكل م اتذكر الطريقه الكان بعاين ليها بيها وبضحك النار بتشلع في قلبي وبجي علي بالي الم فيها اقطعها النفس
عشه:_بضحك عليها يا هبله م بضحك معاها بضحك علي الوضع الشافهااا فيهو
ابرار:_ان شاءلله يكون كده وم يكون الفي بالي صح لأني ساعتها م بسكت وياهو وريتك
عشه:_ومنو وقتهاااا بسكت اسكتي اسكتي عليك الله م تتوقعي حاجه من المستحيلات وتخربي لينا بيها جونا
_منى خلصت كنيس وخمت وساختها وجات لي خالتها قالت ليها انا خلصت نضافه باقي المويه دايره امشي اشد الحمار واجيبها واجي اديني القروش حقتها
عشه طلعت تلاتين جنيه ورمتهم ليها قالت ليها طيري م تتأخري عشان ابرار من قبيل قالت دايره تستحم ولقت مويه مافي
منى قالت ليها م هو انا م ح اطير يا خالتي وعارفه الخزان بعيد شويه من البيت وابرار بتصبر م ماسكاها حكومه
_ابرار بقت تحمر ليها وعشه قالت ليها الحكومه التمسكك انتي طيري امشي وم تتأخري وإياك تعملي لي الدرب كليوات عشان م اطلع كليواتك ديل من حشاك بي يدي
منى بس اكتفت تعاين ليها وشدت الحمار وعملت السرج والسلبه ورفعت الباقات ونطت في حمارها عشان تمشي علي الخزان
*(عند متوكل)*
كان متحمس ومشدود يعرف قصه اهل منى دي شديد وفاتح خشمو ليها 😂💔
يونس:_الحكايه جد منى كان قتل ليهو واحد في الأرض بتاعتو
جد منى لقي الراجل مدخل الغنم بتاعتو في الزرع بتاعو قال لي الراجل طلعهم الراجل رفض وبقي يتحدي في جد منى
جد منى الموضوع حرقو عشان استفذاهو في رجولتو وهو في الزرع بتاعو
قام عندو سكين من الغضب ركبها لي في الكعب حق الرجل الشمال مع الشريان ودبلها لي تاني
الراجل ماااااات
ناس الحله اتلمو وفي النهايه المرحوم كان هو الغلطان بس برضو كان لازم جد منى يطلع من الحله هو ومرتو وبناتو الإتنين عشان اهل الميت اتحلفو م يخلو جد منى حتي لو كان ولدهم غلطان قالو جد منى كان لازم يمسك نفسه وم يتسرع في رفع السكين (وهنا معاهم حق ضبط الأعصاب في لحظة الغضب مهمه جدآ عشان الزول م يندم)
المهم يا استاذ متوكل جد منى واسرتو طلعو من البلد حقتهم وجو بلدنا دي هنا واستقرو فيها وكونو علاقات مع الناس وبقينا نعتبرهم زي الكانهم من حلتنا
اداخلنا معاهم وجد منى حكي لي ابوي ومعاه بعض الرجال ديل بي الحكايه وابوي جا حكاها لينا عشان ناخد عظه منها والواحد فينا م يتسرع علي حاجه
المهم عرفنا جد منى كان عندو اخت واحده في بلدهم وكان متواصل معاها وتاني اخبارها اتقطعت قبل كم سنه من وفات جد منى وبعد كده لحقتو مرتو وبعدين أم منى وم باقي غير عشه بس خالتها الهي قاعدة معاها هي وبتها دي يعني فعلآ منى م عندها زول غير عشه وابرار بتها دي
متوكل:_لا حول الله البت دي مسكينه والله وبعد عرفت قصتها اتعاطفت معاها اكتر
يونس:_م انت بس ناس الحله ديل كلهم متعاطفين معاها وفي ناس بتقول ليها خلي خالتك دي وتعالي عيشي معانا بدل العذاب دا هي كانت بترفض وبتقول في النهايه هي خالتها والزول الوحيد الباقي ليها من اسرتها كلها يبقي لازم تتحملها
متوكل:_طيب باين انها ملامحها كتيره م جاها عرسان عشان تعرس وتتفك من التصلت ده؟!
يونس:_لا كان بجيها عرسان بس خالتها عشه بترفض ليها تعرس وم عارفين السبب البخلي عشه ترفض شنو برغم من انها كانت ح ترتاح من مسؤلية منى وتسلمها لي راجلها الناس بتقول م دايره تخسر خدمتها بس انا بقول في حاجه تانيه في راس عشه مافي واحد فينا عارفها
متوكل:_قصه تخت العقل في الكف والله يا يونس م عارف بس نفسي اساعدها والله
يونس:_م تتعب روحك لأنها م بتقبل منك مساعده
*_(عند منى)*
جات ماشه بي حمارها علي الخزان لاقتها صفاء صحبتها جاااايه
صفاء:_كيفك يا منى اتاخرتي الليله
منى:_والله بس مشغوله كنتي بي النضافه
صفاء:_الله يعينك علي الفيك يختييي
منى:_قالت ليها المكتوب ليهو الشقي م بضوق الراحه يلا فتك بي عافيه لمن اجي عليك تاني عندي وصيه من فوق قالو لي م اتأخر
صفاء:_سمح يختي بس تعاليني عليك الله امي فاتت المدينه وجابت لي كم لبسه حلوه عايزاك تديني رايك فيهم وتعزلي ليك منهم وحده
منى:_ان شاءلله فتك بعافيه
_منى مشت وخلت صفاء صحبتها لسه بتعاين ليها ومتحسره علي الوضع الصحبتها فيهو شديد
*_(في بيت متوكل)*
سوزان لسه كانت مواصله كلام مع امها في الموضوع
قالت ليها انا الموجعني شديد بعدين لمن متوكل يجيب البت المتخلفه دي ح اعرفها علي صحباتي كيف؟!
أمل:_ومين سمعك انا البقول شنو لي صحباتي وناسي البجوني ابوك فضحتنا ونحنا أسرة مرموغه ولينا سمتتنا ووضعنا قدام الناس
سوزان:_لا وكمان دايرني امشي معاكم البلد ديك واحضر العرس كان مالي انا ومال العرس امشو براكم جيبوها وتعالوا تلقوني قاعده وم طرت اي مكان
أمل:_هههههههه والله عجايب والله ابوك م يخليك كان تنططي قومي بس قومي امشي علي جامعتك عشان م تتأخري ولمن ترجعي نقعد قعده تانيه ونشوف لو لقينا لينا حل وانا ماشيه علي الكوفير اصبغ لون شعري
سوزان:_م أنو م عندي نفس لي حاجه بس طيب يلا سلام نتلاقي بعدين
*_(عند فرح)*
بتنادي لي عشه بي فوق قالت ليها منى مشت وين؟!
عشه:_مشت تجيب المويه دايره منها شنوووو؟!
فرح:_يدور راسك ان شاءلله ح اكون دايره منها شنو دايره اطمئن علي البت اليتيمه المطلعه عينها دي الله يخلصها منك اليوم ده قبل بكرا
عشه:_هوي يافرح ادخلي بيتك وصمي خشمك دا عليك وم تدخلي لا في بيتي ولا في الناس القاعدين في البيت عشان انا متحملاك كتير والحاجه دي ضد طبيعتي
فرح:_بدخل بيتي اصلآ لا محال لكن لو م خلصتها منك وزفيتها قدام عيونك وقتها م يكون اسمي فرح
عشه:_سمح يختي نشوف البحصل شنو بس بعدين م تقعدي تتبكي
فرح:_انا م ببكي ببكي زول تاني وقتهاااا
*_(عند منى)*
وصلت الخزان لكن لقت الناس كتيره بقت تفكر وتقول ياربي هسي انا برجع متين انتظر ولا امشي الخزان التاني ولا اعمل شنو
لكن لو مشيت الخزان التاني الزمن بفوت وم بجي غير قريب لي المغرب احسن حاجه اقعد هنا
ختت جركاناتها وقعدت في وحده منهم جمب الصف وكل م ينقص زول هي بتقم زياده
*_(عند متوكل)*
كان لافي مع يونس وكل شويه يسأل يونس من حاجه بخصوص منى ويونس بيرد عليهو بدون كلل ولا ملل لأنو يونس نفسه متعاطف مع منى ومتمني يجي زول ينتشلها من كل الظلم دا
متوكل:_بلدكم حلوه لكن م كبيره شديد
يونس:_هههههه لا لا ياخ بس سكانها م كتار لكن هي كبيره وانت هسي بس قطعت حتهه معينه لسه باقي لينا الخزان خلينا نمشي عليهو عشان برضو بتجمعو فيهو بنات احتمال تلقط ليك وحده كده ولا كده
متوكل:'هههههههه مع انو بنات حلتك الشفتهم امس ديل م عندي فيهم رغبة بس برضو ارح من باب اشوف الخزان وعشان اكون عملتا العلي كلوا
يونس:_سمح أرح 😂
متوكل:_ليه حلتكم دي م فيها أولاد كتار بمشوو وين هم عشان من جيت شايف لي شباب يتعدو بي اصابع اليد الوحده
يونس:_ههههه عشان الشباب في بلدنا راغبين في التعليم ونحنا هنا في حلتنا عندنا مدرسه أساسية بس لكن م عندنا ثانوي ولا جامعه ف الشباب لمن يخلصوا الأساس اهليهم برسلوهم علي القري الجنبنا الفيهم مدارس وبعدين يمشوا الولاية القريبه منهم عشان الجامعات
*_(جامعه الخرطوم)*
كانت سوزان قاعده في القاعه وسرحانه وكل همها برستيجها القدام صحباتها الممكن يتخرب بس بمجرد متوكل يجيب بت من البلد ويعملها مره ليهو وهي كان نفسها تخلي متوكل يتزوج من سديم صحبتها
لحدي م جات سديم وبقت تشاغل فيها هي
سوزان
ياسوزان
سوزان اتخلعت
مالك ياخ يا سديم خلعتيني قولي لي اها مالك
سديم:_يختي سرحانه مالك أول مره اشوفك ساكته وسرحانه 😂😂
سوزان:_الأسبوع الجاي ماشين البلد
سديم:_طيب وهو الماشي البلد بزعل وبعمل وشوو كده؟!
سوزان:_م هو انتي م عارفه الحاصل ولا عارفه ماشين لي شنو؟!
سديم:_طيب قولي لي
سوزان:_ماشين عشان نتم زواج متوكل اخوي
سديم وشها جاب كل الألوان وشالت المرجع القدامها ومشت وسوزان بتنادي ليها رفضت ترد عليهاااا.
*_(عند منى)*
دورها جا وملت الباقات بتاعتها وجو ساعدوها رفعتهم في الحمار وقالت تمشي بي رجليها ولحسن الحظ جات ماشه بي نفس الشارع الماشي بيهو متوكل ويونس بس لسه بعيده منهم لا هم لا هي منتبهين
اما متوكل كان لسه بتكلم مع يونس قال ليهو طيب وانت مالك م مشيت عشان تكمل دراستك؟!
يونس:_انا قريت لحدي الثانوي في الحلهه الجنبه وبعدين امي واخوي احتاجو لي خليت المدرسه وجيت هنا عشان اقعد معاهم وقلت اكسر حنك القرايه بي المره وافتح لي دكان وابقي جنبهم وفعلاً دا الحصل
متوكل:_طيب رايك شنو تمشي معاي المدينه انا هناك عندي شغل كتير ممكن تشتغل فيهو وتكسب قروش احسن من بتاعت الدكان دي وتعز امك واخوك وممكن بعد تثبت نفسك وتاسس ليك بيت ترسل ليهم يجووو يقعدو معاك
يونس:_فكره حلوه والله خلاص بفكر وبرد ليك
متوكل:_تمام
يونس عاين كده شااااف منى جاااايه عليهم ومتوكل م انتبهه كان شغال في تلفونه
يونس قال لي متوكل شوف البتسأل عنها!
متوكل اتلفت شاف منى
بس شكلها المره دي مختلف ونضيفه احسن من المره المضت وملامحها وضحت عديل يعني حلاتهااااا 🤤
متوكل بس بقي يعاين ليها وهي عرفتو لكن خجلانه من العملتو آخر مره وبقت تتبسم لمن اتذكرت الوقعه قالت هسي الولد ده الجابو شنو ذكرني فضيحتي العملتها 😂💔
متوكل مره يقول يمشي يكلمها تاني يقول لا تاني يقول بس امشي اتكلم معاها يا متوكل ويحصل اليحصل
متوكل قال لي يونس طيب خليك هنا بتكلم معاها شويه وبجيك راجع م بتأخر
يونس قال ليهو تمام !!!!
متوكل مشي عليها وهو مبتسم البت دي برغم من ملامحها طفوليه بس كمان تصرفاتها مضحكه وممكن تخليك تنسى همومك كلها وتركز بس معاها هي ومع تفاصيله
منى من شافتو جااااي عليها قلبها قرب يقيف قالت هي دا قاصدني عديل احسن اسوق حماري سريع واتوكل من المكانات دي وبقت تضرب في الحمار عشان يمشي سريع وكل شويه تعاين لي متوكل جااااي عليها
(بلعربي هو متوكل جاااي عليها من قدام هي تمشي بسرعه كيف 😂🤭💔)
متوكل وقف قدامها قال ليها كيفك
منى:_تمام وهي والحمار ماشين وهو تابعهم من وراهم 😂
متوكل:_م تقيفي بس عايز اتكلم معاك كلمتين
منى:_بري يا اخوي عشان بكره يقولو شفنا منى واقفه ليها مع واحد في نص الحله مالي قال جنيت ولا جنيت
متوكل:_ههههههه م جنيتي قولي لي خالتك يوم داك عملت ليك شنو؟!
منى:_م تخت في بالك كتير المهم شايفني كويسه قدامك
متوكل:_المظاهر م بتعكس الحاجه الداخل الزول
منى:_وانا دواخلي احسن ابقيها مكتومه
متوكل:_بتتكلمي زي الناس الأدبية
منى:_الزمن بعلم وبخليك لو جاهل تفهم
متوكل:_طيب اقيفي شويه اتكلم معاك عديل رجليني وجعوني م باخرك والله 😂💔
منى:_انت يا ود المدينه م قدر المشي البنمشيهو نحنا دا عشان كده خليك في حالك عااااد ونطت في حمااارها ومشت
متوكل احتار في البت دي
قال البت دي فيها حاجه مميزه شديد انا عايز وحده زيهااا تبقي شريكتي،،،، مشي لي يونس قال ليهو خلاص ورح نرجع عشان انا لقيت شريكتي خلاص.........
اقتباسهة
*‏أنا الخاسرُ الوحيد هنا*
*ما زلت أدقّ مسامير العُزلة*
*في جسدي*
*لأنني كبئرٍ جفّ ماؤه باكرًا*
*وما زال الخوف عالقًا في ريقهِ*
*ولأنني*
*حين إنتهيتُ من صلبِ نفسي*
*في حديقتك الصغيرة*
*كانت يدك*
*من بعيد*
*تومئُ لي بالرحيل.*
*- علمت وقتهااا أن الحزن الذي تملكني لفتره طويله بث فيني روح اللامبالاة......!*
متوكل قال لي يونس انا عرفت منو العايز اتزوجها مافي داعي نلف اكتر من كده خلينا نرجع
يونس؛:_متأكد انت يا استاذ متوكل
متوكل:_اي متأكد يا يونس خلينا نرجع!؛
يونس قال ليهو تمام زي م تحب وغيرو طريقهم رجعوا علي القصرر!
_منى بعد عاينت وراها ولقت متوكل رجع زعلت من نفسهااا قالت هسي لو كان وقفتا واتكلمتا معاه زي الناس كان مالي اصلي عارض وفقر
هسي الولد ساعدني بدل اقيف واشكره واتكلم معاه زي الناس في داعي اقعد اتعولق واخلي جاري وراي؟!
الفرصه دي اي بت في الحلهه دي بتتمناها إلا انا اتعوبطت فعلآ استاهل ضرب الجزم
*(في الجامعه)*
سوزان مشت ورا سديم وبقت تنادي ليها يا سديم يا سديم اقيفي ياااخ انا وريتك عشان تمشي وتسيبيني؟!
سديم:_عايزاني اعمل شنو يعني اقيف اصفق ليك ولا شنو لمن اخوكي عايزين تخطبو لي من بلدكم معرفاني بيهو ومعشماني ليه؟!
سوزان:_والله معاك حق وانا عازراك يااااخ بس الحاجه دي م كانت بي يدي ولا يد امي كل حاجه بيد ابوي وابوي قال لي متوكل م تتزوج من هنا إلا تمشي البلد وتتزوج من هناك وانتي عارفه ابوي مافي زول بقدر يكسر ليهو كلمه
سديم:_طيب لمن عارفه ابوك بخطب لي اخوك من البلد معشماني ليه؟!
ليه بس؟!
لمن انا وماما املنا في حكايه اني ح اتزوج متوكل اخوك
سوزان:_والله اسفه يا سديم بس انتي عارفه ابوي وطريقه تفكيرو وبعدين انا م كذبت عليك والله ليوم الليله انا وامي دايرنك لي متوكل اخوي
سديم:_دايرني شنو المهم انا تاني م ح اثق فيك نهائي يا سوزان لأني رفضت كل العرسان الاتقدمو لي وخربت معاهم وش بي سبب اخوكي وكنتا متامله فيهو بس من اليوم م بصدقك يا سوزان سامعه؟!
م بصدق ومشت وخلتهااا واقفه ومتحيره تعمل شنو!!
*(عند منى)*
وصلت وهي زهجانه وم شايفه حولها من العملتو مع متوكل نزلت ونزلت الباقات دخلتهم وربطت الحمار بعدين شالت معاها الباقات جوه البيت لاقتها عشه قالت ليها كان تنومي هناك في ذمتك مشيه الصباح تجي الضهر؟!
منى:_ياخالتي المكانات كانت زحمهه والناس كتار شديد ولو كان مشيت الخزان التاني الفي نهاية الحلهه كان المغرب م جيتك عشان كده انتظرت الصف بس
عشه:_سمح طيري جوه كبيهم ابرار رجتك لمن روحها طلعت م جيتي كانت طالعه إلا شحدت ليها مويه من الجيران حدين استحمت وطلعت
منى:_زي م قلت ليك الناس كتار ياخالتي
عشه:_طيب طيري كبيهم واكلي ليك اكل وارتاحي شويه وبعدين تعاليني هناك في الراكوبه دايراك تضفري لي مسيراتي ديل
منى:_سمح يا خالتي
*(في القصر)*
متوكل جا داخل لاقتو زينب قالت لي بسم الله بتين جيت هسي انا قلتا المغرب م بتجي
متوكل؛:_كان مافي لزوم ياخالتي اقعد كتير عشان كده
زينب:_اها احكي لي ان شاءلله لقيت ليك بشاير خيرررر؟!!!؟
متوكل:_فيكي تقولي كده يا حبوبه مع انو الحلهه دي م كنت متأمل منها حاجه
زينب:_فرحت وبقت تزغرد
ايويووووووووووووي
مبروك يا ولدي اها فرحني منو العروس وبت منو؟؟
متوكل:_منى يا حبوبه منى
زينب:_منى دي منو انا بعرفها؟؟
جات مع البنات الأمس؟!
متوكل:_انتي نسيتيها ولا شنو يا حبوبه منى البت اليتيمه الأمس
زينب:_وشها جاب مليون لون شنو؟؟
قلتا شنو؟؟
متوكل:_قلت ليك البت اليتيمه يا خالتي
زينب:_قصدك الوسخانه العامله زي المجنونه؛
متوكل:_م تقولي عليها كده يا حبوبه صراحه انا حسيتها بتناسبني وم فيها عيب بس الدنيا لاعبه معاها ضاغط لكن انا عايز اتزوجها وانشلها من كل الظلم والتعب المرت بيهو
زينب:_هي يا ولد اظنك جنيت وراسك دا م في مكانه انشلها شنو وكلام فارغ شنو انت بتهظر معاي مش لو بتهظر بلاش الهظر التقيل دا معاي عشان عارفني م بدور الهظار ولا بتفق معاهو
متوكل:_هظااااار شنو يا حبوبه كمان قلت ليك انا اخترتها وخلاص الموضوع منتهي بالنسبه لي تمامآ
زينب:_انا م موافقه عليها ولا دايراها ولا بخليك تتزوجها خليك عارف
متوكل:_انتو مشكلتكم معاي شنو؟!
قلتو لي امشي البلد جيت
قلتو لي اختار ليك عروس
ختيت في خشمي ألف جزمه قديمه وفتشت لحدي م لقيت البت الممكن تصوني وتناسبني تاني دايرين مني شنو ياااااخ؟!
اي حاجه وليها حدود وانا خلاص صبري نفد
زينب:_هوي م تجنن فيني البت الاسمها منى دي م بتعرسها لو تموت
متوكل:_طيب وانا م عايز غيرها كمان عشان اوريكم نهائي لا أبداً
زينب:_قلة ادبك دي بطني طامه منها اقيف هسي بتصل ليك لي ابوك وبكلمو بي العايز تعملو وخلي يجي يتصرف معاك وقبل م متوكل يرد زينب اتصلت لي محمد وفتحت الاسبيكر
*(عند ابرار)*
مشت بيت ناس صحبتها سندس اكيد متذكرنها!!!
سندس:_شايفاك متأكده من حكايه انو متوكل بختارك مع أنو م اداك اي دليل علي الكلام ده ولا حتي كلنا م ضحك مجرد ضحك في وشوشنا
ابرار:_انتي بتتكلمي سااااي يا بنتي ولا شنو؟!
اكيد اكيد يعني مافي وحده احسن مني ولا مناسبه ليهو في البلد دي انا افضل وحده فيكم يا بنات الحلهه كان ترضو ولا تابوووو
سندس:_شكلك بتحلمي طيب م تخلي غرورك يصور ليك حاجات م بتحصل
ابرار:_انتي م بتصدقي كلامي غير لمن تسمعيهم واقفين في باب بيتنا وخلاص منتظرني بي العربيه وانا مودعاكم
سندس:_ههههههه نفسي اعرف الثقه دي كلها بتجيبيها من وين انتي؟!
ابرار:_يختي دي هبه ربانيه سمحه وفهم وثقه انا حتي لمن اتخيلت شكل بيتي هناك بكون كيف اتخيلي اذا كان القصر حقهم القديم دا هنا كيف طيب هناك بكونو ساكنين في شنووووو؟!
سندس:_ابوي م شغال هناك وهو بعرفهم قال لينا هم أكبر الاسر الهناك عندهم قصور وشركات يعني البتعرسهم والبتكون من نصيب متوكل يا بختها وياهناهه وياسعادتها
ابرار:_يختي كلهم ح يكونو ملكي
سندس:_خليك بتحلمي انا م بقطع ليك احلامك الورديه
بس عندي سؤال
ابرار:_سؤال شنو؟!
سندس:_معقول كلنا م نكون عجبنا لي متوكل عشان م شايفه عاين لينا بي بشاير خيرررر كلنا!
ابرار:_انا عجبتو لأنو الأغنياء ديل واولاد المدن م ببينو حاجه ولا بخلو حاجه تظهر علي وشوشهم احساسي بقول لي انا عجبتو وفي الأيام الجايه دي بسأل من بيتنا وبجي عشان يطلبني
سندس:_يختي انا م بكسر مقاديفك لكن لو بقي كلامك صح برضك بفرح ليكي عشان انتي صحبتي وعارفاك م بتنسي سندوسه صحبتكو حبيبتك!
*(عند منى)*
كانت بتكوتف لي خالتها في شعرها وهي سرحانه في متوكل وبتقول والله الولد سمح سماحة استغر الله العظيم بس 😂
الولد انضف من ضميري صراحه مستخسره في اي بت في الحلهه دي حتي في نفسي وهو شكلوا مافي بت في حلتنا دي عجبتووو 😔عشان كده احسن يرجع المدينه ويشوف ليه وحده من البنات الهايات القمرات الشبههو 😔💔
منى في سرحتها دي شعر عشه اتشربك ليها في يدها وم انتبهت تفكو وجرتو ليها
عشه:_واااااااااااي
الله يصلت عليكي تنكسر يدك ان شاءلله
منى:_بلهفه معليش معليش يا خالتي كنته سرحانه بس والله وم انتبهت
عشه:_لا انتي م سرحانه انتي قاصداني ودايره تنتقمي مني الله ينتقم منك
هو انا كان م غلطانه اقول ليكي انتي تعالي اعمليهو لي يعملك صلطه بركة من صلى وقال يا الله
منى:_والله يا خالتي قلت ليك م قاصده
*عشه :_*
قاصده ولا م قاصده فكيني وقومي من جنبي وفرصتها
قالت ليها طيري الله يطيرك ابرار لمن تجي تتمو لي الله لا حوجني ليكي يا ام قلب اسود
_فكيتها ومشيت الفرصة حرقتني بس م بكيت 😂💔
قلتا في بالي شوف منو عليك الله البتكلم عن القلب الأسود
والله صح الجمل م بشوفو رقبتو
بس م علينا الله يسامحك يا متوكل بسماحتك دي خليتني أقرب اطلع لي خالتي ضفيرتها في يدي 😂😂😂
*_(عند متوكل)*
زينب كانت بتتكلم مع محمد ولدها وفاتحه السماعه الخارجيّة عشان متوكل يسمع
قالت ليهو شوف هنا يا محمد انا ولدك ده البت الاختارها دي م معاه فيها وانت نفسك لو شفتها م بترضي تعرسها ليهو
ياخ بت م مناسبه ليهو نهائي ولا من كل الاتجاهات وفوق لي دا كلو يتيمه وخالتها مطلعه روحها
محمد:_دا كلام شنو يا امي اليتم عيب يعني؟!
زينب:_م عارفه بس قلت ليك م بخلي يعرس البت دي
متوكل:_يا ابوي انت قلت لي البتختارها بعرسها ليك وانا خلاص اخترت البت دي وم شايف اي وحده بتناسبني في الحلهه دي تاتي غيرها لأني حسيتها البت الوحيده البتتماشي مع افكاري وبت حقيقه مش زي البنات البتصنعن ديل وبعدين الفقر ولا موت الأهل م عيب
(زينب تشيل وتحمر لي متوكل)
محمد قال لي متوكل وانا موافق انك تتزوج من البت القلتها دي عشان قبل م تمشي وعدتك وقلت ليك البتختارها من البلد ديك بعرسها ليك كان شحادة
(متوكل اتبسط وم باقي لي غير يطير من الفرح طير عديل 😍
وقال لي أبوه دا العشم يا ابوي )
أما زينب اتغاظت شديد من كلام محمد قالت ليهو بدل تعقل ولدك وتقول لي كده عيب وتشوف ليك مره تانيه احسن تقعد تقول لي انا موافق علي البت الاخترتها؟!
محمد:_الكلام دا خلاص منتهي يا امي وانا م عايز اتناقش فيهو تاني أكتر من كده
زينب:_اصطفل انت وولدك غلطانه انا العايزه المصلحه لي الكل
محمد:_خلاص يا امي م تنكدي علي وعلي الولد وانا قررتا ابدر في الجيهه بعد يومين بنجي البلد هناك وفي خلال كم يوم بنتم العرس وبنرجع كويس الموضوع دا معاك يا متوكل؟!
(متوكل رد ليهو بفرحه كويس جداًجداً جداً يا ابوي)
محمد:_خلاص انا عندي اجتماع يلا ودعتكم الله لحدي م نتلاقي بعد يومين
متوكل:_في حفظ الله يا ابوي
_بعد محمد قفل زينب عاينت لي متوكل بي ضيق قالت ليهو طبعآ فرحان ومبسوط والفرحه م سايعاك مش؟!
متوكل رفع ليه حاجبه وقال ليها قمة الانبساط والله 🤭🤭🤭
طبعآ زينب مع انها أم محمد بس برضو بتتحاشه 😂😂
ولو قال ليها الحاجه دي كده بتسكت حتي لو م راضيه
ومحمد كلمتو بتمشي علي الكبير والصغير في البيت وحتي في الشغل
*_(عند أمل)*
رجعت من الكوفير ولقت سوزان جاااات قاعده بتشرب ليها في قهوه ومتحيره
امل:_بتي السكر مالها رجعت بدري؟!
سوزان:_سديم شاكلتني يا امي عشان متوكل هي كانت قافله عليه من زمان وانا رغبتها فيهو لي درجه بترفض كل الناس الاتقدمو ليها عشانه
أمل:_اي صح نحنا عشمناها بس هي م كان تعشم لي الدرجه دي لو متوكل م اتكلم معاها بي نفسووو!
سوزان:_م عارفه بس سديم دي صحبتي الوحيده ومن زمان م بسمح لي حاجه تعمل شرخ في علاقتنا
أمل:_هي وانا اسوي ليك شنو اعتزري منها بس
سوزان:_حالفه م تقبل اعتزار وقالت لي هي فقدت ثقتها فيني
(قبل م امل تفتح خشمها وترد علي سوزان جاتها مكالمه من محمد قالت ليها اسكتي ساااي خالي اشوف ابوك دهه عايز شنو وفتح الخط ردت ليهو شويه ولونها اتغير)
_بعد قفلت سوزان قالت ليها خير قال عايز شنو؟!
وليه لونك اتخطف كدهه
امل:_ابوك قال متوكل اختار البت العايزه وعايز يعجل بي مشيتنا لي البلد بعد يومين نسافر ليهم وقال لي اوريك عشان تعملي حسابك في الجامعه
سوزان:_يعني خلاص الحكايه كملت ومافي اي طريقه لي المفر منها مش؟!
انا البلد ديك م ماشه ليهااااا
امل:_ومين سمعك انا البلد دي عندي فيها ذكريات زبالة ذكريات الفقر والناس الخسيسين الله لا وراك ليها والله لو م شويه م امشي لكن بس ابوك عارفه م برضي زول يقول ليه لا
سوزان:_اوووووووف ياااااخ من البيت دهه اي حاجه علي زوق ابوي ونحنا قاعدين زي الألعاب م لينا اي رأي الله ينعل ابو دي عيشه وقامت طلعت غرفتهااا.
_متوكل كان اكتر زول مبسوط في الدنيا وم باقي ليهو إلا ينطط هو م شاف منى غير مرتين وزاتو م اتكلم معاها عديل بس حساها مست جواه شديد الحزن الفي عيونها دا كان عايز يتزوجها عشان يخلي يختفي من حياتها نهائيآ وم يشوفها يوم زعلانه تاني
وهو بقول في نفسو منى تستاهل
اما بطلتنا السمحه
ف م كانت خاته الموضوع دا في بالها ومستبعده تمامآ وشايفه زي فرق السماء والأرض بس كلنا متشوقين نشوف رد فعلها اليوم داك ح يكون شنو بعتقد مافي حاجه ح تقدر تصف الفرحه الهي فيها لأنو اول م جا متوكل الحلهه أول امنيه ليها أنها تطلع بي مبارك من البلد دي 💜
_انتشر شمار انو متوكل لقي البت العايزه في البلد كلها بس كان مافي اي توضيح أنو البت دي منى
واي بت في البلد كانت متوقعه خلاص دي هي ولازم تجهز نفسها
يعني البنات في الحلهه كانو عايشين حرب اعصاب وجو من المنافسه علي الفاضي جداً 😂💜
_اما ابرار
ف م عايزه اقول ليكم الفرحه الهي فيها كانت شنو وكانت شغاله شئ عروكان وشي ماسكات وم خلت حاجه م جلبطتها في وشها عشان تبقي جاهز لي العرس علي طول علي قولها هي 😂
_الشخص الوحيد ال م اهتم بي الموضوع كتير منى م عملت اي حاجه في نفسها وهي بتقول متوكل اختار يعني اختار؟!
الله يوفقو يارب معاها انا مالي قال بحلم سااااي الناس الزيي م ينفع انهم يحلمو احلام كبيره زي دي عشان لمن م تتحقق م تتقلب ليهم بكابوس وانا متوكل بنسبه لي الثريااااااا
_ابرار داخلهه ومارقه تغيظ في منى وتقول ليها مش انا قلت ليكي مافي بت بختارها متوكل غيرييييي؟!
يلا موتي غيظ ح اشوف المدينه والدنيا وانتي ح تفضلي منغطسه في الحلههه دي لمن عمرك ينتهي وتحصلي اهلك ونرتاح منك
منى قالت ليها انتي لسه م ضمنتي حاجه ومافي زول قال ابرار عشان م تتعبي روحك 🤭😂
ابرار قالت ليها عارفاك دايره تخربي لي فرحتي بس وحاتك يا جبل م يهزك ريحك ومشت وخلتهااا
(الله يديني نص ثقة ابرار دي 😂)
_محمد وامل وسوزان جهزو نفسهم وجابو كل مستلزماتهم،،،، محمد قال مافي داعي يعزمو زول من العاصمه يجي عشان يحضر العرس لمن العرس يتم ومتوكل يسوق مرتو ويمشي هناك يعمل ليهم عزومه كبيره ويعزم فيها كل المعارف بتاعتو
_زينب كانت مستاءة شديد من حكايه متوكل يتزوج منى بس برضو مدام الولد موافق والأب موافق هي م بتقدر تعمل اي حاجه قالت اصلآ هم بعاملوني شبه مافي
_وصلووو ناس محمد الحلهه ولقي كل الناس مستقبلهم احسن استقبال في الدنيا وفرحانين بيهم شديد بس أمل وسوزان كانو مشمزين شديد منهم كأنهم جاين من عالم آخر وخصوصاً سوزان
وامل نست حكايه أنها كانت عايشه في الحلهه دي ونست ال م عندو قديم م عندو جديد 😂💔
المهم البنات والاهالي يتكافتو وكل واحد داير يقدم حاجه مختلفه ومفتكر انو بتو هي العليها العين في القصه دي 😂
حتي عشه خلت منى في البيت وقالت لي ابرار البسي واتمكيجي وخلينا نمشي ابرار لبست كأنها عروس واتمكيجت وطلعت مع امها عشان تمشي لي القصر
منى قعدت واتحسرت وفي لحظه اتذكرت امها وابوها الحتي م متذكره ملامحهم عديل وبقت تبكي علي حرقتهااا من نفسها ومن الدنيا ومن الناس الظلموها 😭💔
قالت هسي الزول لو انتحر مالو يكون ارتاح وريح والله بس تاني استغفرت وقامت صلت ليها ركعتين 😔
جاتها فرح لقتها بتبكي وبتدعي مسكتها حضنتها وقالت ليها خلي املك في ربنا كبير ربنا ح ينصرك
منى:_انا م عايزه حاجه والله يا خاله فرح يشهد الله ده اني م عايزه غير بس شويه حب واحترام من خالتي وبتها يعني انا م انسان؟!
ليه بستعرو مني؟!
فرح:_بستعرو منك عشان انتي احسن منهم بكتيرررررر خليهم ربنا بحاسبهم ليكم
منى:_ونعم بالله يا خاله
ونعم بالله
_الناس اتجمعت في القصر وكلهم قعدو يتكلمو عن فضل وكرم الاستاذ محمد وولده واي واحد بقول لو متوكل عزل بتي ح اكون اسعد واحد في الدنيا
المهم كلهم كانو قاعدين محمد وقف وقال ليهم نحنا قررنا متوكل يتزوج من بيت ناس عشه متوكل قال شاف البت وعجبتو ونحنا عشان نعمل الأصول ح نمشي ليهم في بيتهم ونطلب يد البت
عشه وابرار فتحو عيونهم كبار😳😳😳 والموجودين كلهم بقو عاملين كده 😳
ابرار بقت مره تضحك ومره تبكي وتشيل وتحضن في امها وتقول ليها مش انا قلت ليك عاجبه خلاص ح نطلع من البلد المعفنه دي يا امي خلاص
عشه هي كمان الضحكه لي الضرس الأخير وقلبها مطمئن علي الآخر
(انا حنيت عليهم والله 😂)
_المهم كل زول رجع بيتو بعد م محمد كلم عشه وقال ليها بنجي بكره نزوركم في البيت
ابرار بقت ماشه في الحلهه ورقبتها زي السيف 😂
والنسوان في الشارع يباركن ليها ويقولن ليها مبروك ونلتي وكلام كتير حق كسير التلج داك 😂
وهي تقول م تسلم لي زول بي يدها من الفرحه والافتري النزل عليها بين ساعه ودقيقه 🤭
_امل قالت لي محمد هسي بتستفيد شنو لمن تخلي الولد يتزوج من البلد المعفنه دي؟!
محمد:_معفنه في عينك م اسمعك تقولي اي كلمه م عديله عن البلد دي وبعدين نسيتي انك كنتي قاعده فيها ولا جزورك اتغيرت لمن بقيتي زوجتي زوجة محمد المنا رجل الأعمال المشهور!
أمل:_اتلبكت لا م قصدي حاجه بس قصدي يعني البت ح تكون متخلفه وم بتناسب المستوى البقينا فيهو وعمتي زينب حكت لي اي حاجه عنهت وشكلها هي م حابها شديد وخايفه تفضحنا مع المجتمع الراقي
محمد:_شوفي هنا انا حركات النسوان دي لا بريدها لا بتنفع معااااي وبعدين انتي هسي م يتيمه مالو مافي زول قال عليك حاجه
(امل عملت كده😳 😂)
الولد داير البت وانا دايرها عشان من بلدي دي وعشان انا م عايز اقطع جزوري المن البلد دي عشان البلد دي كانت وش الخير علي
وبعدين انتي زمن مشيت العاصمه برضو كنتي متخلفه وم بتعرفي تتكلم في المجتمعات بس عرفتي مع الزمن وبقيتي أمل الفي قدامي دي،،،، هي زاتها بتعرف علميها انتي وقام طلع خلها
(أمل ندمت انها فتحت خشمهاااا 😂😂😂عجبني ليها 🤭)
ابرار وصلت البيت ومشت لي منى قالت تغيزها لقتها قاعده قالت ليها مش قلتا ليكي متوكل م بختار غيري عشان انا احسن وحده في البلد دي
منى:_اتبسطت ليك مبروووووك
ابرار:_م لقت العايزه تصل ليهو عشان منى اتكلمت معاها ببرود ولا كأنها هاميها والبرود بقتل فرحه الانتصار
عشه قالت ليها تعالي عملت ليك بخور ابخرك عشان الليله الناس حسدوك كتير واكبر حسود ياهو في قدامك
ابرار قالت ليها ااي اي عليك الله يا امي حاسه نفسي مصدعه ذاتي عشه ساقتها ودخلت بيها
وخلت منى بتضحك علي خالتها وبتها وعقلها الفارغ
الصباح
عشه وابرار جهزو نفسهم ومنى خلوها تشتغل كل شغل البيت والنضافه والضيافه يعني كلوا كلوا،،،،، بقوا جاهزين وابرار م خلت حاجه م ختتها في وشها وداك يا الفستان ال م خمج،،،، اما منى بس استحمت ولبست ليها جلباب وتوب وبدا كلو حلاتهاااا 😜☺️
المهم ناس متوكل واهله جوا واتضيفو منى هي القدمت الضيافه وم عارفه انها العروس ومتوكل يشيل ويتبسم ليها وزينب لمن شافت منى نضيفه وحلاتها حتي بي التوب بقت تتبسم والموضوع شكله عجبها وامل م تقدر تتكلم عشان الاحراج بجيها علي الطايررررر 😂🤭
سوزان تشيل وتتزحزح بس زول شغال بيها مافي
المهم كلهم اتجمعو ومحمد قال ليهم جينا عشان نطلب يد منى لي متوكل ولدي
وهنا خلاص الشلل ملئ المكان 😂...
_محمد قال ليهم جيت عشان اطلب يد منى لي متوكل ولدي
هنا خلاص منى صينيه العصير وقعت من يدها وم باقي ليها إلا تنصدم وبقت بس عاملهه كده 😳
ابرار:_من فوق طارت ومشت وقفت لي محمد في قدامهه قالت لي هي شكلك فاهم خطأ يا عمي انا العروس م منى 🙃
عشه مشت وقفت قدام بتها وقالت لي محمد اكيد في خطأ في الموضوع نحنا قاعدين وجاهزين عشان انتو تجو تطلبو يد بتي م يد منى
محمد قال ليهم هي ياناس مالكم انا م غلطان في حاجه وبعدين انا م حددت زول عشان تقولي بتك يا عشه انا قلتا ليك جااااي بيتك وفعلاً متوكل اختار منى عشان كده انا جيت اطلبها ليهو
عشه عاينت بي وراها لقت لسه منى عامله كده 😳😳😳
قالت ليها عاجبك كده جاااايه تسرقي عريس بتي وجرت عليها كفتتها
فرح مسكت عشه ورجعت ليها الكف قالت ليها الموضوع م يحرقك ساااااي زمن ربنا قسم قسمه كويسه لي البت كمان دايره تخربيها ليها لكن والله المره دي اقيف في قدامك انا دي ال م بقربكم بس عندي دم وبحس كأنسانه
ابرار لمن الموضوع حرقهااا جرت علي منى ومسكتها قالت ليها اتكلمي قولي م دايره
(طبعآ الفضايح دي كلها قدام محمد وجزو كبير من ناس الحلههه😂😂💔)
ابرار بقت تخنق في منى وتقول ليها قولي م دايره كلمي متوكل قولي لي م دايراك
متوكل جا مسكها وكفتها قال ليها كنتي ح تكتلي البت بي انانيتك دي
ابرار الكف حرقها نطت لي متوكل في رقبتو وبقت تخنق فيهو 😂💔
وتشيل وتقول تضربني انا تمد يدك علي انا؟
انا اذا كان امي م مدت يدها علي تمد يدك انت عايز تتزوجها مش؟!
والله اقتلكم أنتو الاتنين قبل م تفكرو تعملوا حاجه
متوكل دفرها لمن رماها وبقي يسأل في منى انتي كويسه منى هزت راسها من وسط الزهول الحصل ده كلو وقالت لي انا كويسه 😂😂
(امل كانت خايفه علي ولدها وسوزان خايفه علي نفسها وكل شويه تسأل امها اها عاجبكم كده؟!
امل بتقول ليها اسكتي ساااااي هسي م ناقصين تنظير خلينا نطير من هنا وبعدين قولي العايزه تقولي )
(منى برغم من كل حاجه ولي آخر لحظه كانت دايره تقول لا عشان خاطر ابرار والاحلام الحلمتها لكن قالت مدام جابت ليها دق وفضايح قدام الموجودين انا بوافق وبخلي ليهم البلد دي بحالها انا برضو متوكل كان حلمي من اول م جا البلد زي وزي كل البنات وانا خلاص تاني ح افكر في نفسي مش نفسها خالتي الأغلبيّة الوقت بتنومني جيعانه مش نفسها خالتي البتهد حيلي في شغل البيت من زمن كان عمري خمسه سنه مش نفسها خالتي البتتهمني بشوف الرجال في حين اني م بطلع من البيت إلا عشان اجيب حاجه مش نفسها خالتي الناويه لو متوكل اختار ابرار بتسوقها وتمشي معاها المدينه وتخليني برااااي يلا انا الليله م بفكر غير في نفسي دي فرصه جابها لي ربنا مستحيل اضيعها بس الله يستر عم محمد أبو متوكل م يغير رايو بعد الحاجه الشافها قدامه دي لكن انا بوافق يعني بوافق )
عشه:_وقفت المشاكل والخبط الحاصل وقالت ليهم طيب اسألو البت لو قالت موافقه نحنا بننهي كل الموضوع دهه وبقت تغمز لي منى نظام اوعك توافقي 😂
محمد قال ليها بعصبيه كويس بسألها،،،، اها يا منى قولي لينا عايزه ولا م عايزه؟!
ابرار شويه وتموت وماسكهه في يد امها بكل قوتها وبتقول ان شاءلله م توافق ان شاءلله م توافق
عشه بتعمل حركات لي منى بي وشها نظام لو وافقتي بقتلك 🤭
منى بعد تعب فتحت خشمها وقالت موافقه
ابرار جرت جوه وعشه قالت ليهم مش اتخطيطيني ووافقتي كمان إلا كان تعرسي براكي اطلعي لي من بيتي سريعك وم دايره اشوف وشكك دهه هنا تاني
منى بقت عامله كده 😳
نظام بيتك اصلآ بقي م بلزمني يا خاله إلا م تتعبي روحك
متوكل اتبسط بسطه جد ومحمد كمان ارتاح لي منى شديد
ابرار جات داخلهه شايله السكين وقالت الليله والله إلا اقتلك مش قلتا ليكي لو وافقتي تتزوجي م بخليك؟!
انا في الخباثه م بتحصل لو قمت عليها الليله اصبري لي بس وبقت تقول ليهم بقتلها ليكم بقتلها
ومنى الخوف قطع قلبها قالت المره الوحيده الضحك لي فيها القدر ابرار بتقتلني فيها والله صح الشقي شقي 😂😂💔
المهم ناس الحلهه بقوا يتجارو واي واحد بقول نطلع عشان عارفين ابرار مجنونه وقالو عشان بعدين الشرطه م يجيبوهم شهود في موت منى 😂💔
فرح بتقول لي متوكل امسكها البت دي بتقتل منى مجنونه وانا عارفها،،،، متوكل امو بتقول لي خليك بعيد يا متوكل عشان م تتاذي انت برضو بس متوكل م جايب ليها خبر الهاميهو منى في الموضوع
المهم بعد تعب مسكو منى من ابرار لأنو منى قلبت عليها وبقت تضرب فيها وكل م تتذكر حاجه من الحاجات العملتهم فيها تضربها زياده 😂
عشه مسكت بتها وطردتهم كلهم برا بي منى معاهم وقالت لي منى أنسي حاجه اسمها خالهه او بت خالههه
منى بس اكتفت تعاين ليها
فرح قالت لي محمد انا برضو زي امها خلي اكمل ليها عرسها في بيتي وحضنت منى عليهاااا
منى بقت تبكي من الحنيه ال م لقتها في خالتها لكن لقتها في الغريب 🥺💔
محمد قال ليهم مدام كده انا زاتي بعتبر منى زي بتي بسوقها معاي القصر وانتي يا فرح لمي ملابسك وتعالي معاها القصر لمن العرس يتم وبعدين لو عايزه سافري معاها وانا زاتي بعد الشفتو دا العرس بكره بعملو وخلينا نسافر خلاص
فرح ومنى بكوو شديد مع بعض وشكروو ربنا ومشو معاهم القصر
*في القصر*
بليل منى كانت قاعده متوكل جا قعد جنبها قال ليها مالك مهمومه مش مفترض تتبسطي
منى:_انا مبسوطه بس كمان بكده خسرته آخر ناس في اسرتي وم بقي لي زول
متوكل:_هم ديل م اسرتك ديل م بتمنو ليك الخير واكبر دليل الحاجه الشفتيها الليله دي
خالتك دي يا منى م بتحب غير نفسهااا وبتهااا ولو كان فضلتي معاهااا اكتر من كده كان قتلتك انتي نفسك
هسي عندك نفس تفكري فيها بعد م بتها رفعت عليك سكين عديل وكان عندها نفس تقتلك بس عشان الماده؟!
منى:_انا م زعلانه عليهم هم زي م قلت ليك عشان تصرفاتهم الاتصرفوها قدامكم دي ولا نص الحاجات الاتعملت معاي بس موجعاني قصه م بقي لي زول من اهلي
متوكل:_ح ابقي ليك كل اهلك وناسك يا منى وعد ح ابقي اهلك وناسك
*في اليوم التاني*
محمد عزم ناس البلد كلهم فطور عشان المسااا ح يسافرو كلهم،،،، القصر اتملي زي دلوكه وشي ناس بتاكل وحاجات مفرحه كتير
منى لبست التوب الأحمر والجدله واحلي عروس فيك يا دنيا،،،، وواقف جنبها متوكل ولابس الجلابيه والعمه ومافي ولد اسمح منو في كل الحلهه ولا في عيوني
*عندما يأتي عوض ربنا يشمل كل شئ 💜*
*(علي لسان منى)*
برغم من كل حاجه حصلت حلوه حسيت فرحتي ناقصهه كان نفسي خالتي وبتها يكونو معاي ونطلع من البلد دي مع بعض بس هم اختارو حاجه تانيه وم اختاروني عشان كده بنساهم في البلد دي ولا آسف عليهم!
خالتي فرح مقطوعه من شجرهه زي كده م كانت دايره تمشي معاي بس انا حلفتها وبقيت اتحايل عليها عشان تمشي معاي وم تخليني هناك براي وبعد تعب وافقت
بالمساء ركبنا العربات وطالعين من المدينه وانا بودع حلتني وناسي ال ياما اتعاطفو معاي 😭💔
طلعتا من البلد دي وانا منصوره ويدي في يد المبرووووووك 😍
لقد إلتقينا في الحلال 💜
*النهــــــــــــــــــــــــــــــــــــــــــــــــاية* 💜
مليحيظهه
معليش علي الشحتفه
وم تقولو اتسرعت في النهايه عشان انا من البدايه قلتا ليكم خربشهه صغيره
كنت بكتب وم مفكراها بتشبه قصه سندريلا 😂
المهم لقيت نفسي فاضيه قلتا اتموضع 🤭
*سلامات 😘.(مني الهادي)*
*كـــــــــــــــــــــــــــــل الـــــــــــــــــــــــــــــود*



أخر المواضيع من قسم : مقالات

التنقل السريع