رواية السارة 2
بقلمي قرارة بت منصور
حاج مصطفى حس بالجميل والعرفان تجاه التومة وبقى حاسي انه شايل حمل تقيل على اكتافه وبقى يحاول يسعدا بقدر المستطاع كان بجيب ليها كل حاجة تطلبا وبوفر ليها طلبات البيت نسوان الحلة بقن يغيرن من التومة كيف انها سمحة ومجيهة وكل حاجة عندها وراجلا بكسيها طوالي بجيب ليها الجديد حتى من غير عيد وهن في العيد مالاقيات الكسوة وخاصة في قعدة الجبنات التومة بتمشي مجيهة وترقش والعجب لامن يجنها البيت ويكون قعدة الجبنة عندها التومةبتعمل جبنة ماحصلت وكل حاجة فيها
التومة عايشة مع حاج مصطفى سعيدة سعادة شديدة وماحاسة انه ناقصاها حاجة لكن حاج مصطفى دايما سرحان وشايل هم الدنيا كلو
استمروا كده اربعة سنوات تاني بعدها جات اخته العرست ليه التومة زاتا وقالت ليه تعال لي البيت بكرة ان شاءالله انا عايزاك ضروري حاج مصطفى شال الهم افتكرا عندها مشكلة مع راجلا قال ليها خير يا زينب قالت ليه كل خير بس انت تعال
صبح تاني يوم بعد فطر قال لي التومة انا ماشي لي زينب اختي قالت عايزاني ضروري التومة قالت ليه امشي وان شاءالله يكون خير ولو احتاجت حاجة ماتقصر معاها
حاج مصطفى مشى لزينب اخته بعد السلام قال ليها انا قصدت اجيك واحمد في الشغل عشان تاخدي راحتك وانا خليت شغلي وجيتك ان شاءالله خير يااختي تعالي اقعدي جنبي واحكي لي كل حاجة وماتشيلي هم طول ما انا موجود في وش الدنيا
قالت ليه يامصطفى انا حالك ده ماعاجبني وانا ندمت اصلا علي اختياري لمنى( التومة)هديك تومتا مزدلفة مالية البيت اولاد وانا افتكرتها ولادة زي مزدلفة لامن اخترتها ليك لانهن تومات لكن هسه ماحصل شي انا دايرة اصلح غلطتي
رواية السارة 3
بقلمي قرارة بت منصور
طوالي حاج مصطفى وقف علي حيلو وقال ليها بركة يازينب اختي انك بخير من كلمتيني امس شلت همك
اها ودعتك الله واتحرك طوالي علي الباب زينب مسكته من يده وقالت ليه اها قلت شنو يامصطفى في كلامي ده؟؟
قال ليها انت مصرة تسمعي رايي؟؟ قالت ليه طبعا
قال ليها شوفي يازينب انت عارفاني وعارفة طبعي مابدور الكلام الكتير لكن بقول ليك كلامي واتمنى تاني مااعيده وانت تاني ماتفتحي معاي الموضوع ده
اول حاجة انت فعلا الخليتيني اعرس تاني وبرضو انت الاخترتي لي التومة وكتر خيرك لكن ده مامعناه تتدخلي في حياتي لانه من يوم انا عرست التومة خلاص بقت مرتي والبمسها بمسني وغير انه التومة مرة بمليون مرة مافيها كلمة ولافيها عيب وانت التومة مفروض تشكريها انها صبرت وقعدت معاي وماطلبت الطلاق لانك عارفة انا من المرحومة ماجبت اولاد ومن التومة برضو ماجبت معناها السبب مني وانا بعد وقفة التومة معاي لو جاني دكتور في البيت وقال لي السبب مامنك السبب من التومة انا لا بعرس ولا بفرط في التومة وانت لو دايرة خوتنا في مكانا تاني ماتجيبي لي سيرة التومة زينب اتصدمت طبعا وبقت فاتحة خشمها مترين وهو طوالي طلع علي الباب وقفله وراه
مشى للتومة وسلم عليها في راسها وقال ليها يلا سوي لبنا الجبنة انا باقي اليوم ده ما ماشي الشغل داير اقعد معاك
قالت ليه غريبة انت بتريد جبنة زينب مالك ماشربت معاها نعلها عيانة ولا عندها حاجة قال ليها شديدة وبتسلم عليك قالت ليه الله يسلما من كل بلاء طبعا حاج مصطفى قرر انه مايكلم التومة بكلام زينب عشان مايعمل فتنة بينهم
طوالي مشت التومة جهزت الجبنة بقعدة حلوة وماخلت حاجة حاج مصطفى شرب القهوة واتبسط لكن كلام زينب اثر فيه وبقى يقول في نفسه هسه نحن والتومة بعد نكبر البخدمنا منو؟؟؟رواية السارة4
بقلمي قرارة بت منصور
حاج مصطفى مانام الليل كله بكثرة التفكير تاني يوم التومة جابت ليه شاي الصباح قال ليها تعالي يا التومة عايزك في موضوع قالت ليه خير قال ليها يا التومة العمر ماشي وان عشنا في الدنيا وكبرنا بنحتاج البخدمنا ومابنلقاه عشان كده انا فكرت نتبنى لينا جنى يتيم لا عنده ام ولا ابو ونجيبه صغير يفتح فينا عشان يرتبط بينا وانا ابقى ليه ابو وانت ام منها نكسب فيه ثواب ومنها يبقى لينا جنى ولازم تكون بت عشان البنات حنينات مابفوتن اهلن
التومة فرحت فرح شديد وقالت ليه انا موافقة والبت موجودة قال ليها البت منو قالت ليه ريم بت مزدلفة اختي اصلا الشافعة دي متعلقة بي قال ليها ياالتومة انت مافهمتيني ولا شنو انا ماقصدي جنى امه وابوه حيين قصدي جنى يتيم جنى الناس مصيره لاهله يا التومة برجع ليهم طال الزمن او قل وانت دحين ريم دي مش كبيرة قالت ليه لا ماكبيرة اربعة سنة بس وكمان يامصطفى ماتنسى مزدلفة دي اختي وتومتي كمان والخالة والدة
والله يا التومة اربعة سنة ماصغيرة كبرت وفتحت وعرفت امها وابوها واخوانا واتعلقت بيهم
التومة اصرت علي كلاما وحاج مصطفى ماحب يكسر خاطرا وقال ليها خلاص امشي لمزدلفة وكلميها وان وافقت جيبي البنية مع اني متاكد كان مزدلفة وافقت علي راجلا مابوافق لكن امشي جربي
قالت ليه انت نسيت يامصطفى ولا شنو من متين علي عنده كلمة مع مزدلفة اختي
التومة لبست وطلعت مع حاج مصطفى من الصباح هو علي شغله وهي جري علي بيت مزدلفة
دقت الباب مزدلفة اتخلعت لامن لقت منى جاياها من الصباح قالت ليها خير يامنى قالت ليها خير كبير مزدلفة لامن شهقت من الفرحة قالت ليها اكيد حامل وجاية تبشريني
هنا منى وشها اتغير واتحولت كل ملامح الفرح لحزن قالت ليها ابدا والله ماحامل وكدي دخليني من الباب وان شاءالله يكون علي قاعد لسه ماطلع الشغل قالت ليها بري مشى قبيل العواليق السجمان المابشبه الرجال
منى قالت ليها والله عيب يامزدلفة تتكلمي عن علي كده وكمان قدام اولاده كده غلط قالت ليها هو بعرف الغلط المهم خشي يا اختي ووريني الجابك جارية من الصباح كده شنو
انا جيتك عشمانة يامزدلفة وبتمنى ماتكسفيني وتجبري بخاطري وتحققي لي حلمي
والله يامنى لو طلبك عندي مابكسفك ولا بردك وانت عارفة معزتك عندي
طيب يامزدلفة انا بدور اسوق ريم اربيها وتعيش معاي وتبقى لي بترواية السارة 5
بقلمي قرارة بت منصور
منى شافت تعابير وملامح في وش مزدلفة عمرها ماشافتا مزدلفة اتفاجات بطلب منى لكن بسرعة لحقت نفسها وقالت ليها انت يامنى لو طلبتي روحي ماتغلى عليك وريم بتك واولادي كلهم اولادك والخالة والدة بالرغم من كلام مزدلفة الطيب لكن احساس مزدلفة وصل لمنى مباشرة وانها ماراضية تدي بتها لمنى لكن بتجاملا وماعايز تزعلا
منى حزنت حزن شديد والوجع اعتصرا من جواها لكن سكتت وقررت انها ماتخلي الشعور ده يتملكا
مزدلفة نادت ريم وقالت ليها منى خالتك عايزة تسوقك معاها بيتا تعيشي معاها فيه وتنومي عندهم ومنى تبقى امك وعمك مصطفى يبقى ابوك رايك شنو؟؟
ريم بقت تنطط من الفرح وقالت الله بيتم حلو وعندهم عصافير وخالتو منى حتجيب لي حاجات كتيرة
منى مسكت ريم وحضنتا وقالت ليها بجيب ليك العاب وكل حاجة نفسك فيها..مزدلفة طوالي مشت لمت لريم كل اغراضا وقالت لمحمد ولدا وصل ليهم الشنطة
التومة طلعت ساقت ريم معاها البيت لكن ماقادرة تنسى ملامح مزدلفة ولا نظرات عيونا وهي بتودع ريم والحاجة دي كانت منقصة عليها فرحتا
اخدت ريم وورتا غرفتا وختت ليها ملابسا في الدولاب ريم طبعا بحكم انها متعودة علي بيت التومة طوالي انتشرت وفي دقايق قلبت البيت كلو وفتحت باب قفص العصافير الملونة وكل عصافير حاج مصطفى طارت
التومة اتخلعت طبعا وطوالي نادتا وقالت ليها ياريم هسه اقول لعمك مصطفى شنو طيرتي عصافيرو وتاني حاجة انت ماصغيرة ياريم ماتخربي البيت وخليك مرتبة ومنظمة ونضيفة
التومة قالت في سرها والله مزدلفة اختي خمجانة وتربيتا كعبة لكن مامشكلة حاحاول اربيها من جديد والبت لسه صغيرة مافات شي..حاج مصطفى جاء داخل البيت واول حاجة قابلو قفص العصافير اتخلع وبقى ينادي في التومة وين العصافير ريم جات جارية قبال التومة وقالت ليها العصافير طيرتا انا ياعمو خليها تطير انت ليه حابسا
حاج مصطفى غضب غضب شديد وبقى مابشوف قدامه في اللحظة دي التومة جات قالت ليه حاج مصطفى كيف قيلت مارد ليها وكانت اول مرة حاج مصطفى مايرد السلام للتومة من يوم اتزوجارواية السارة6
بقلمي قرارة بت منصور
حاج مصطفى دخل غرفته طوالي خلاف العادة دايما بقعد في العريشة لامن يتغدى ويشرب الشاي حتى يدخل الغرفة ..التومة دخلت وراه وقالت ليه ماتزعل علي العصافير يامصطفى وانا اسفة بس اديني فرصة قبل تتم كلاما جات داخلة ريم جوة الغرفة وبقت تجوط في الغرفة طبعا التومة كانت قافلاها منها وبقت تهبش في كل حاجة التومة طوالي اخدتا من يدها وطلعت بيها عشان حاج مصطفى ياخد راحتو
التومة مشت المطبخ وبدت تخت في الغداء بعد ختت الغداء قالت لريم ورح الغداء وتقعدي بادب وتاكلي بادب بدون ازعاج وبعد عمك مصطفى يتغدى ويشرب الشاي نلعب انا وانت سوى ريم سكتت طبعا ماعجبا الكلام لانه لحظة الغداء عندهم في بيتم اجمل لحظة وكلهم بتكلموا فيها وكل زول بحكي القصص الحصلت ليه خلال اليوم ابوهم بحكي عن شغله واخوانا بحكوا قصصم في المدارس وهي بتحكي قصصها في اللعب مع اطفال الجيران...التومة نادت حاج مصطفى وقالت ليه تعال اتغدى..حاج مصطفى جاء وقعد للغداء وقعدوا معاه التومة وريم وبدوا يتغدوا يلا ريم بدت تجوط الصينبة طبعا مزدلفة نهائي مامعلماها اداب الاكل وانها تاكل مما يليها وبدت تتكلم والاكل في خشمها..حاج مصطفى طوالي قام وماكمل غداه...التومة قامت وراه وقالت ليه طيب اجيب ليك غداك براك قال ليها لا شبعت بهناك ريم ولا هماها كملت غداها عادي وجاطت الصينية كلها وقامت..
التومة سوت الشاي ودخلته لحاج مصطفى الغرفة وبدت تكب ليه في الشاي في اللحظة دي يسمعوا ليك صوت حاجة وقعت وكسير صحون...التومة طوالي جدعت الملعقة وجرت لقتا دي ريم شالت صينبة الغداء عاملة فيها عايزة ترتب المطبخ وعشان هي طفلة وقعت منها..التومة قالت ليها اهم حاجة ماتكوني اتجرحتي وطلعتا بره المطبخ وقفلته..مشت الغرفة تتم كب الشاي لحاج مصطفى لقته كباه وشربه وماانتظرا هم متعودين دايما بشربوا الشاي سوى
دنقرت تشيل الصينية اتلفت عليها وقال ليها اقفلي الباب وراك وانت طالعة..
رواية السارة7
بقلمي قرارة بت منصور
التومة قفلت لحاج مصطفى باب الغرفة وطلعت لقت زينب في وشها قالت بسم الله الرحمن الرحيم زينب قالت ليها مالك شفتي شيطان ولاشنو ده بدل تقولي لي حبابك يازوبة التومة قالت ليها ابدا والله حبابك الف بس عشان شفتك قدامي فجاة قالت ليها ريم فتحت لي الباب وقلت ليها هوي ياشافعة الجابك مواعيد راحة اخوي شنو؟؟ قالت لي انا جيت هنا من الصباح جابتني خالتي منى وقالت عايزاني ابقى بتهم وتبقى امي منى وابوي مصطفى...بالصح ياالتومة الكلام ده؟؟
ايوة بالصح يازينب ريم حتعيش معاي طوالي وتبقى لينا بت انا ومصطفى وتنفعنا وتخدمنا في كبرنا
زينب سكتت وقالت للتومة نادي لي مصطفى اخوي دايراه في موضوع مهم التومة قالت ليها اخوك في غرفته ولسه مانام دقي ليه الباب وخشي طوالي
زينب مشت دقت باب الغرفة لحاج مصطفى قال ليها امشي العبي بعيد ياريم انا عايز اخد لي نومة
قالت ليه انا ماريم انا زينب حاج مصطفى اتخلع وجاء بسرعة فتح الباب قال ليها خير يازينب قالت ليه خير لكن اول حاجة دي شنو البت الجايبنها تربوها دي والله يامصطفى ريم دي اكتر شافعة قليلة ادب ومزعجة في اولاد مزدلفة اسالني انا
انت وقت داير تتبنى شفع الناس ماكان تسوق معتز ولدي ولا تغريد بتي اهو قريب من عمر ريم وعلي الاقل مربيين
قال ليها والله ماحبيت اكسر بخاطر التومة لانها بتحبها وهي بت اختا وتومتا ..المهم انت مالك قالت ليه والله احمد ده مقبوض في قروش من الصباح ولهسه مافكوه قالوا لازم ضامن وضمان طوالي دخل لبس ملابسو وطلع التومة جرت وراه ماوراها ماشي وين..رجعت سالت زينب قالت ليها مشوار خاص
