رواية السارة 15
بقلمي قرارة بت منصور
فجاة زينب دقت تلفون حاج مصطفى رد سريع قالت ليه عازماك يامصطفى شاي مغرب بلقيمات زي لقيمات امي البتحبها...طبعا فرح وقال ليها بجيك تب بصلي المغرب ومن الجامع بجيك بهناك..معتز ولد زينب طبعا جاء فت لامه كل حاجة خلال اليوم وخاصة اللعبات الوداهن من الصباح قبال الفطور زينب صابتا المغصة وقالت لعبات شنو البضيعوا فيهم قروش لبت مزدلفة وهي شافت اللعبات وين الليلة اجي مصطفى الا احرشه تاني مايجيب ليها شي هو صدق حتبقى ليه بت ولا شنو والله باكر تسف الوراه والقدامه وترجع لاهلا
حاج مصطفى اتوضا وطلع لصلاة المغرب بس طلع بهنا التومة جري علي التلفون دقت لعفاف وحكت ليها كل حاجة عفاف قالت ليها شفتي عشان تاني تسمعي كلامي انت طول عمرك طيبة وغشيمة ومافاهمة للدنيا دي حاجة يلا هسه خلينا في المهم مش حاج مصطفى وافق بالسفر يلا طوالي نقوم بكرة من الصباح وانا هسه بتصل علي عواطف اختي ترسل ولدا يحجز لينا هسه بباقي الليل ده لبكرة ان شاءالله التومة قالت ليها موافقة وانا معاك في كل شي تقوليه لي ياعفاف اختي الماولدتا امي البتقوليه لي كله بسويه عفاف بهناك دموعا جرن وقالت للتومة اها ودعتك الله للصباح ان شاءالله قفلت التلفون وبقت تدعو للتومة وتبكي جاء الطيب راجلا داخل وشافا وبقى يقول امين امين قال ليها ياعفاف انا بتوضا سمعت كلامك كله امشي ياعفاف وربنا يسهلا ليكم ويرزق التومة بالبنين والبنات وده عمل خير ربنا يسهله وانا من هسه حادعو ليها في كل صلاة...عفاف صلت المغرب واتصلت طوالي علي عواطف وكلمتا عواطف قالت ليها تمام وربنا يوصلكم بالسلامة بس تعالوا بدري...عواطف طوالي رسلت ولدا للحجز قالوا ليها حجز الصباح مقفل الا المساء عواطف قالت ليه احجز ليها المساء طوالي واتصلت علي عفاف قالت ليها الحجز بقى مساء لكن ماتكلمي التومة عشان ماتكسل من الجية وعشان حاج مصطفى يمكن مايقبل مبيتا بره البيت بس انت جيبيها هنا والباقي هين عفاف قالت ليها تمام
عفاف اتصلت علي التومة وقالت ليها ياالتومة ظروف الدنيا مامعروفة شيلي معاك شنطة فيها غيارات وفيها حاجاتك البتستخدميها احتياطي التومة قالت ليها سمح
التومة قفلت التلفون وبسرعة حضرت شنطتا فيها كل حاجة وعفاف كمان جهزت شنطتا وبقت تطبخ لاولادا طبيخ يكفيهم كم يوم..بهناك حاج مصطفى مشى لزينب وهو بشرب في الشاي زينب بتتونس معاه قالت ليه اها ريم بت مزدلفة كيف معاكم قال ليها ريم اليوم من الصباح جات امها اخدتا قالت ليه اخدتا كيف قال ليها نهائي خلاص غيرنا راينا ماحنتبناها..زينب طوالي زغردت عديل بطول حسها لامن الجيران سمعوها خديجة جارتا قالت يطرشني مرة تزغرد في بيت الحبس دي ماسمعنا بيها..حاج مصطفى اتصدم قال ليها ده شنو يازينب هي باللبشة قالت ليه والله يامصطفى لعبات الصباح ديل امانة ماكان واجعاتني بس هسه خلاص كرامة وسلامة والمركب التودي تاني ماتجيب..حاج مصطفى قال ليها دقيقة يازينب انت عرفتي لعبات الصباح كيف وطوالي نادى معتز وقال ليه مش عيب عليك انت راجل تنقل الكلام؟؟؟
رواية السارة 16
بقلمي قرارة بت منصور
معتز خجل ودنقر في الارض امه فضحته وصغرته حاج مصطفى بقى مارق من زينب وهو طالع قال لمعتز ورح نصلي العشاء سوى في الجامع وفي الطريق قال ليه يامعتز ابوك مات وانا مكان ابوك وانت واخوانك انا بعتبركم زي اولادي يلا انت راجل ولازم تكون اخلاقك اخلاق رجال يعني نقيل الاخبار ده حق النسوان وفي النسوان زاتم المرة كان مربية كويس مابتنقل الكلام فدحين يامعتز ياولدي تاني ماتنقل كلام لامك ولا لايي زول وده لمصلحتك قبل كل شي انا ماعندي حاجة غلط خايف تنقلا لامك ولا بخاف من امك
معتز قال ليه حاضرياخال وصلوا العشاء سوى معتز رجع بيتم وحاج مصطفى مشى بيته لقى التومة منتظراه علي احر من الجمر وقالت ليك يامصطفى انا وعفاف نوينا نسافر بكرة ان شاءالله من الصباح قال ليها بالسرعة دي قالت ليه المرض مابتاجل قال ليها تمام بس قوموا بدري عشان تمشوا باول بص طالع قالت ليه سمح..فتح الدولاب واداها مبلغ كبير قال ليها عشان تساعدي معاك عفاف في العلاج وبرضو عشان الظروف مامعروفة التومة فرحت وشالت المبلغ لانه هي فعلا محتاجة لمبلغ كبير واخدت معاها برضو كل المبالغ المحوشاها وقفلت الشنطة وصلت استخارة ونامت حاج احمد قام الفجر وصحى التومة قال ليها قومي اتجهزي التومة قامت صلت الصبح ولبست وسوت الشاي اتصلت علي عفاف لقتا جاهزة هي والطيب ..الطيب طبعا عايز يوصلهم المواصلات ...عفاف عارفة الدكتور المساء لكن لازم تقوم بدري عشان التومة تفتكر انها حترجع المساء..التومة وعفاف ركبوا البص وبقوا يحكوا في ذكرياتم كلها مع بعض ماحسوا بنفسهم الا في الميناء البري وولد عفاف قابلم هناك وبجاي حاج مصطفى مقلق اصلا ماعرف يشتغل لامن التومة وصلت واطمن عليها اما الطيب مبسوط انه عفاف حتعمل عمل الخير ده وبدعو انه ربنا يوفقها
التومة وعفاف وصلوا بيت عواطف وعواطف استقبلتم استقبال حافل التومة كانت مبسوطة جدا وحاسة انها بين اخواتا بعد الفطور التومة قالت لعفاف يلا قومي ورح الدكتور عفاف قالت ليها صراحة ياالتومة الحجز المساء ونحن اليوم حنبيت هنا..التومة ابدا ما اتضايقت لانها حست انه عندها قضية ولازم تصبر ولانها برضو واثقة في عفاف..قالت لعفاف خلاص لازم اتصل علي مصطفى اوريه عشان مايشفق..التومة اتصلت علي حاج مصطفى وكلمته قال ليها براحتكم ياالتومة واصلا ده طريق علاج لو ماخلصتوا ماتجوا عشان الرجعة صعبة قالت ليه تسلم..التومة وعفاف ومعاهم ولد عواطف مشوا الدكتور المساء ..لامن جاء دورهم عفاف دخلت مع التومة والدكتور اول سؤال سال التومة متزوجة ليك كم سنة قالت ليه قربت اتم 11 سنة قال ليها في الفترة دي مشيتي لطبيب؟؟ قالت ليه لا هنا الدكتور استغرب قال ليها السبب شنو قالت ليه انا اصلا زوجي كان متزوج قبلي مرة وماتت وماجاب منها اولاد وجاء اتزوجني انا وبرضو ماجبت عشان كده اعتبرنا السبب منه ومافتشنا لينا درب ولادة قال ليها طيب هو مشى لطبيب؟؟قالت ليه لا قال ليها طيب كيف اتاكد السبب منه لانه قصة انه اتزوج اتنين وماانجبن فدي عادي ممكن تكون صدفة وزوجاته الاتنين عندهم موانع..عموما انت طالما وصلتيني انا بشوفك انت اول واعمل ليك فحوصات وتحاليل وصور بالصبغات الملونة
رواية السارة 17
بقلمي قرارة بت منصور
الدكتور كشف علي التومة كشف سريري وبالجهاز الفي عيادته لقى ماعندها ايي حاجة كتب ليها تحليل هرمونات وصورة بالصبغات الملونة للرحم عملت التحاليل بالليل والصورة عملوها تاني يوم لكن كان عليهم ينتظروا تلاتة ايام عشان تكتمل كل النتايج عشان يدخلوا بيها للدكتور تاني... التومة اتصلت علي حاج مصطفى وقالت ليه حنتاخر تلاتة ايام تاني قال ليها انا قلت ليك ياالتومة اخدوا راحتكم وربنا يكتب الشفاء..التومة وعفاف رجعوا بيت عواطف وبقوا منتظرين
حاج مصطفى بفطر في السوق وكل يوم بمشي يتغدى عند زينب واولاد زينب جارين تحته جري بس حاضر ونعم احترام وخدمة شديدة حاج مصطفى ارتبط بيهم شديد
زينب كل يوم تهرج براها وتقول شوف النسوان ديل مرض شنو عفاف سمينة وامينة وتلمع شكلا ماشكل مرض تلقاهن مشن يتفسحن في الخرطوم الهاملات
حاج مصطفى موقف زينب ماتجيب سيرة التومة لا بالخير ولا بالشر بس زينب كاتمة وساكتة وتهري وتنكت في نفسها
انتهت التلاتة ايام وظهرت الصورة وشالوا التحاليل والصورة ودخلوا للدكتور شافا قال ليهم الحمدلله الهرمونات كلها مظبوطة شاف الصورة قال ليهم بس ظهرت لي في الصورة مشكلة بسيطة وعلاجها من اسهل العلاجات عندنا بس عفاف من الفرح قاطعت الدكتور وبقت تقول انا ماقلت ليك يامنى قلت ليك ولا ماقلت ليك منى دموعا بس جاريات وعفاف كمان الدكتور قال ليهم هدوء لو سمحتوا خلوني اتم كلامي وركزوا فيه مظبوط عندك علاج لمدة تلاتة شهور بتاخديه بانتظام وفي مواعيده تعتبريه زي المضاد الحيوي في الدقة وتجيني بعد تلاتة شهور اعمل ليك صورة تاني..
التومة وعفاف طوالي شالوا الروشتة وعلي الصيدلية صرفوا الدواء غشوا عواطف شالوا الشنط وودعوها وعلى المواصلات طوالي ركبوا البص وبقوا يتونسوا فرحانات وسعيدات بالانجاز الحققوه..التومة قالت لعفاف بعد كده الموضوع بقى في الجد و مصطفى لازم يعرف عفاف اتخلعت من كلام التومة وقالت ليها طبعا بتبالغي تكلميه كيف هسه كده اتعرف السبب منك طيب افرض لاقدر الله مااتعالجتي حيقوم يعرس فوقك التومة قالت ليها كان كده ياعفاف انت مافاهمة مصطفى مستحيل يعرس فوقي عفاف قالت ليها والله يامنى مافي راجل مضمون التومة قالت ليها حتى كان عرس فوقي وجاب جنى انا رضيانة ماعندي مانع بنفعنا الاتنين عفاف قالت ليها يامنى انت نسيتي امه الحتكون ضرتك ينفعك شنو يامنى بنفع امه وابوه بس التومة قالت ليها منو القال ليك ياعفاف والله انا بعرف قصص كتيرة زوجة الابو ربت مع زوجة راجلا اولادا وحبوا زوجة ابوهم اكتر من امهم وخدموها وحججوها وماخلوا ليها حاجة انت بس خليني اكلمه عشان ياعفاف هسه انا شايلة معاي علاج واكيد حيشوفه اقول ليه شنو؟؟ عفاف قالت ليها والله انا خايفاه يزعل منك انك كذبتي عليه وتاني مايصدقك ولا يثق فيك اصبري يامنى ده ماوقته الموضوع ما بالسهولة دي وكان علي الحبوب دسيها منه وابلعيها في المطبخ يعني ماموضوع
التومة وعفاف وصلوا الحلة وكل واحدة مشت بيتا عفاف اخدت معاها الصورة والتحاليل حقت التومة ..التومة وصلت بيتا و طوالي دخلت ودست الحبوب زي ماقالت ليها عفاف
حاج مصطفى طبعا متابع التومة لامن وصلت خلا معتز ولد زينب في الدكان وجاء جاري التومة واحشاه وحشة شديدة
رواية السارة18
بقلمي قرارة بت منصور
حاج مصطفى وصل وسلم علي التومة بلهفة وكانه ليه سنين ماشافا وقال ليها ياالتومة اول مرة تفارقيني من يوم عرستك ان شاءالله ياالتومة مايفرقنا غير الموت
وبقى يحكي ليها عن الايام الهي كانت غايبة فيهم قصصه كلها عن اولاد زينب وكيف هم بقوا متعلقين بيه وهو متعلق بيهم التومة قالت في نفسها الحمدلله المانع بقى مني انا لو كان من مصطفى ما كان مشى ولا كان اتعالج لانه خلاص شكله اكتفى باولاد زينب ونسى مشكلتنا
التومة بدت علاجا وبقت تاخد فيه بانتظام ودقة زي ماوصاها الدكتور وعفاف متابعاها وداعماها معنويا..حاج مصطفى مع دكانه واولاد زينب اخدوا جزء كبير من وقته وماله وتفكيره..مزدلفة من يوم اخدت ريم مازارت التومة ولا اتصلت عليها والتومة انشغلت بعلاجا وبقت متواصلة مع عفاف بس حتى الطلعة في الجيران بقت مابتطلع بس تاخد في علاجا وتصلي صلاتها وتقرا قران وتدعو الله وتلح في الدعاء في النهار وفي جوف الليل..انتهت التلاتة شهور حاج مصطفى ماحصل يوم شاف التومة بتبلع في حبة ولا شاف الحبوب بعد كده بقوا في الرجعة للدكتور تاني..التومة كلمت حاج مصطفى انها راجعة مع عفاف المقابلة قال ليها تمام وبرضو اداها تاني مبلغ شالته منه وشالت معاها غويشتين احتياطي عشان لو القروش ماكفت تبيعم بهناك الطيب كان ظروفة كويسة ادي عفاف برضو مبلغ وقال ليها انا عارف حاج مصطفى ماعارف انه منى بتتعالج عشان كده اكيد ماعندها مبلغ يكفي وانا المرة الفاتت ماساهمت عشان ظروفي ماكانت كويسة..التومة وعفاف اتحركوا بعد الفطور والمرة دي براهم خلاص عرفوا السكة وصلوا بيت عواطف والمقابلة كانت المساء الدكتور كشف علي التومة وقال ليها بكرة تعملي الصورة باتوا وتاني يوم عملت الصورة طلعت الصورة ودخلوا بيها للدكتور مرة تانية شافا قال ليهم الحمدلله الحمدلله خلاص يامنى انت كده اتعالجتي ارجعي اقعدي ستة شهور لو ماحصل حمل لازم زوجك يحلل عشان اتاكد انه سليم حتى ابدا اديك منشطات وان شاءالله امركم ساهل.التومة قالت ليه يارب يحصل حمل لانه قصة زوجي يحلل دي صعبة والله يادكتور
التومة وعفاف رجعوا الحلة تاني والمرة دي حاج مصطفى اتعود علي غياب التومة جاء المساء بعد قفل دكانه ههههه
التومة استمرت في صلاتها والدعاء وقراءة القران ..زينب طلعت من الحبس واول حاجة جات زيارة للتومة البيت وحاج مصطفى في الشغل الشمار قاتلا في اختفاء التومة من فتحت ليها التومة الباب شمت ريحة العطور والكبريت كانه بيت عروس التومة جاتا محننة ومدخنة وتلمع بس طوالي زينب انفصمت فيها وقالت ليها كيف تتحنني وانا محبوسة اتاريك مختفية عشان مااشوف حنتك يخسي عليك ياماعندك عشرة انت احمد مابتعرفيه وعاش معاك في الحلة كنتي علي الاقل خجلة ساي علي عين الناس تنتظريني اطلع من بيت الحبس هسه كده فضحتيني مع حريم الحلة تلقاهن بتونسن بينا بالجبنات
التومة خلت زينب خلصت كلاما كله وقالت ليها بكل برود اتفضلي زينب قالت ليها مامتفضلة وتاني بيت مصطفى اخوي ده ماخاشاه الا مصطفى قاعد وبجي لمصطفى بس اما انت كان متي مابجي اعزي فيك ..التومة ولا ردت ليها وبعد طلعت قفلت الباب وراها ورجعت لشغلتا عادي بعد خلصت اتصلت علي عفاف كلمتا عفاف قالت ليها ولا تعبريها وخليك في حنتك وجيهتك ودخانك ودايما خلي جوك في البيت سمح ومعنويات حاج مصطفى ارفعيها ليه دايما واوعك تحكي ليه قصة زينب دي ولا كلاما قالت ليها اصلا ياعفاف انا مامفكرة اكلمه انت عارفاني مابحب الفتن
رواية السارة 19
بقلمي قرارة بت منصور
زينب رجعت بيتا ومتاكدة انه التومة حتكلم حاج مصطفى بالحصل كله عشان توقع بينهم وقالت هسه تلقيها ممغصة من شغل معتز ولدي مع مصطفى وتلقيها ماراضية صرفه علينا عشان كده انا لازم احتاط ليها لو سالني اقول ليه شنو المهم بدت تالف في كم قصة كذب..حاج مصطفى رجع بيته والتومة استقبلته بالغداء والعصير والابتسامة الحلوة سوت ليه الشاي بعد الغداء وبقت تتونس معاه ويضحكوا حاج مصطفى قال ليها يا التومة انا سعيد ومبسوط معاك شديد وحاسس مافي راجل في الكون ده كله سعيد زيي الحمدلله على نعمة وجودك في حياتي التومة قالت ليه انا كمان سعيدة معاك ربنا يخليك لي منور حياتي ودنيتي..تاني يوم حاج مصطفى غشى زينب وهو جايي من الشغل مع معتز هو متعود يتفقدا دايما وجاب ليها حاجات واداها مصاريف يلا زينب راسا كبر واتنفخت افتكرت التومة كلمت حاج مصطفى وطنشا ومااشتغل بيها قالت الحمدلله مصطفى بدا مايشتغل بالتومة ولا يعبرا هسه لو احمد عايش كنت عرست ليه كيتن في التومة لكن هسه مامن مصلحتي يعرس ولا يجيب جنى
مزدلفة يادوب اتذكرت منى واتصلت عليها قالت ليها وين يامنى مختفية منى قالت ليها بخير كيف انت واولادك مزدلفة قالت ليها طيب مدام بخير مالك بطلتي تجينا ولا تسالي مننا منى قالت ليها قلت اديكم فرصة انتوا التسالوا مني لكن اتاخرتوا في السؤال واكتشفت انا الكنت بسال منكم دايما مزدلفة قالت ليها انت عارفة المشغوليات والعيال منى قالت ليها وانا مالايمة انت السالتيني
حاج مصطفى رجع البيت لقى التومة بتستفرغ وعندها مغص شديد ختت ليه الغداء ومااتغدت معاه ماقدرت تاكل
قال ليها ياالتومة قومي البسي اوديك المركز قالت ليه للصباح كان مابقيت شديدة بمشي
حاج مصطفى دخل الغرفة يرتاح التومة اتصلت علي عفاف وورتا الحصل ليها عفاف بقت تزغرد وتبكي وقالت ليها انت يا التومة حامل اعراضك القلتيها دي كلها اعراض حمل..التومة قالت ليها لا ياعفاف ماتتسرعي وتعشميني وتزرعي في قلبي الامل خلينا لمن نتاكد..الصباح حاج مصطفى قال ليها التومة ورح المركز قالت ليه امشي شغلك انا بمشي مع عفاف قال ليها تمام لبس وطلع بعده عفاف جات جارية جري وتشيل وتحضن في التومة وتبكي وقالت ليها يا التومة انا بعرف الحمل مابتغالطيني فيه..طوالي مشوا المعمل للتحليل وحللوا الحمل في الدم وبقوا قاعدين منتظرين النتيجة
رواية السارة20
بقلمي قرارة بت منصور
حاج مصطفى بعد وصل السوق فتح الدكان وخلا معتز ولد زينب فيه وقال ليه عندي مشوار بمشي وبجي راجع هسه..طوالي مشى المركز للتومة وقال في نفسه بس معقولة التومة تمرض واخليها تمشية مع عفاف تعالجها وانا موجود وصل المركز مشى محل الدكتور مالقى لا التومة ولا عفاف استغرب بقى يفتش فيهم مشى ناحية المعمل شافهم من بعيد قاعدات في كنبة والتومة خاتة راسا في كتف عفاف ورافعة رجولا في الكنبة استغرب برضو في طريقة القعدة دي..مشى عليهن لمن شافنه اتخلعن خلعن عجيبة حاج مصطفى لاحظ انه في خلعة وارتباك واضح وماطبيعي لكن افتكر عشان جاء فجاة والتومة فاكراه مشى السوق قال ليهن لي شنو انتن بجاي مامشيت محل الدكتور وبعدين التحليل ليه؟؟ بس بقن زي الحيطة لا حراك ولا كلام!!!
في اللحظات دي بدوا ينادوا باسماء النتائج الطلعت ومن ضمنهم نتيجة التومة..حاج مصطفى سمع منى حسن طوالي مشى لاستلام النتيجة..دكتور التحاليل من اولاد الحلة من شاف حاج مصطفى قام وجاء سلم عليه وقال ليه مع الاسف ياعمو مافي حمل ربنا يرزقكم حاج مصطفى قال ليه حمل شنو يا ولدي نحن طالبين تحليل ملاريا بتكون الاسامي اتلخبطت ليك ودي نتيجة مرة تانية قال ليه ابدا ياعمو خالتي منى وخالتي عفاف طلبن تحليل حمل حاج مصطفى شال النتيجة وبقى طالع مذهول طلع بره جات عفاف جارية وقالت ليه الحمدلله طلع حمل مش؟؟عاين لمنى وقال ليها التومة ورحكي البيت عندي معاك كلام ولا اتكلم مع عفاف اصلا ولا رد ليها عفاف جرت لدكتور التحاليل وقالت ليه اها النتيجة طلع فيها شنو قال ليها مافي حمل ياخالتي عفاف ..عفاف اتصدمت صدمة شديدة وبقت راجعة بيتها تكلم في نفسها
حاج مصطفى والتومة وصلوا البيت وحاج مصطفى قال للتومة تعالي اقعدي هنا والمرة دي مابقول ليك جنبي اقعدي قصادي في السرير داك شفتي يا التومة احكي لي حكايتك كلها من بداية سفرك انت وعفاف الخرطوم لغايت هسه وماتدسي مني شي وماتكذبي علي..التومة طوالي حكت ليه القصة كلها بدون زيادة ولا نقصان..حاج مصطفى قال ليها لاحول ولاقوة الا بالله والله يا التومة القصة دي لو حكاها لي زول غيرك مستحيل اصدقا وكنت قلت ليه التومة صادقة مابتكذب حتى لو ختوا السيف علي رقبتها وكنت قلت ليه التومة مابتخون ثقتي فيها وكنت قلت ليه انا بثق في التومة اكتر من نفسي
انت ياالتومة خنتي ثقتي فيك واستقليتي طيبتي معاك وخليتيني اضحوكة قدام الطيب راجل عفاف وهو عارف كل حاجة وانا كل يوم بسال فيه من صحة عفاف وفحوصاتها وعملت شنو لا وكمان نازلة في بيت عواطف وولدا بحجز ليك وراجلا اكيد عارف هسه يقول عني شنو وانا فاكيك براك واخر حاجة هسه صغرتيني فيى المركز الصحي قدام دكتور التحليل ودصديق الشافع وصديق خشمه خفيف هسه يملا بالكلام ده الجامع كله..بعدين كمان بالدس شايلة غويشتين عايزة تمشي الصياغ في الخرطوم تبيعيهن من وراي دي عدم امانة وسلوك غلط مهما كانت اسبابك والجنى زاتو ياالتومة البجي باللف والدوران والكذب مامنه فايدة ..المهم هسه يا التومة انت تاني مابتلزميني لانه ثقتي فيك اتهزت قومي لمي اغراضك
