لمة قهوه

 

رواية لمة قهوة

ياهبه ..خالتو صفيه قالت الليله القهوه عندها خلاص انا جاهزه يلا ورح

وطوالي طلعو وبهناك حاجه صفيه وجارتا اليقين مشو يجيبو الفحم من ناس حاجه امنه واثناء ماماشين لاقتم ام عروس ود التايا اسمها اجلال برضو مشت تشتري حاجات الغدا ومجرد ماشافوها طوالي بقو يجدعو كلامهم غايتو نسوان الزمن ده كان بناتم جاهلات هم جاهلين بري ياصفيه انا بناتي كلهم ختنتهم عشان مايجبوهم لي راجعات من اول يوم ..واجلال طوالي عرفت انو قاصدين بتها بالكلام بس ماقالت حاجه شالت زيتا وصلصتا ومرقت

وحاجه صفيه ولعت نار الجبنه واتلمو البنات والخالات عندها وبدو يقلو البن بالقيطعه هي ماشفتو الليله قعدتا ليكم اجلال في علبا زكرتها ببتها الجابوها راجعه من شهر العسل ..طوالي امل استلمت الكلام البركه ياخالتي القلتي ليها عشان لما جاها المهندس قعدو يتببرو جاها مهندس جاها مهندس ياهو هسي جابا راجعه عشان تاني ماترفع راسا العاجبه ده واستمر الحال

وعن ناس خالتو اجلال نادتا رواح بتها بزعل ونهير ..يابت رواح ..اي يأمي في شنو بتكوركي كده ..انتي السجم العرستي ده مافهمتي وضعك شنو ...لالا يامي ماسألني هو يعني انا اتخافف وامشي اقول ليهو براي

خلاص طيري البسي مودياك لدايه تختنك ...اجي ياامي بعد كبري ده ....اسوي شنو اخلي نسوان الحله ياكلو لحمي وينبزو جابوك راجعه ح تمشي يعني ح تمشي ...لالا ياامي حرام عليك ...تحرم عيشتك دايره تبقيني مضحكه لنسوان ورح قدامي

وتلبس رواح وتمشي مع امها وهي خايفه خوف شديد ..ومودياها من غير علم ابوها بالموضوع لانو لو رواح اطلقت كان ماحيخليها تختنا لانو زول متعلم وفاهم والدايه المودنها ليها بتختن البنات بالدس لانو ممنوع كان

ولما وصلو بيت الدايه اول شي اشترطت مبلغ كبير لانو دي مخاطره بالنسبه ليها وافقت اجلال على المبلغ عشان تبرد اضانا من كلام نسوان الحله وجهزو رواح للختان

واثناء مابيختنو فيها الدايه قطعت شريان داخلي لانو كانت ملبوشه بصريخ رواح وخايفه انو زول يسمع انها عندها عملية ختان ورواح طوالي في اللحظه دي طلعت صرخه وواحده وبعدها غابت من الوعي والنزيف ملا الغرفه والدايه بقت مقلعه عيونا وخايفه واجلال تكورك سجمي بتي مالا بقت زي الدلقان مابتحرك ساكن والدايه تقوليها تكون خافت ساي عشان كده ..وطوالي جاطت فيها ولبست بتها والنزيف شغال واقرب عربيه ولما وصلوها الدكتور قال البت دي ميته ليها ربع ساعه

وماتت رواح ماتت عروس الاسبوعين والحنه في ايديها وامها بقت تتكلم بره من راسا لانها ماسمعت كلاما وفقدتا للابد ولما ابو رواح عرف طوالي رمى الطلاق على اجلال بزعلتو على بتو والحله بقى ماليها كلام غير سيرة اجلال ورواح

بعد التفريقه بكم يوم اتلمو نفس الجماعه لقهوه تانيه وبعد ماكانو بقولو نسوان الزمن ده هم جاهلات بقو يقولو براها اجلال عملتا في بتها القاليها امشي اختنيها منو ده راجل ده البضيع ليهو بتي

مع انو بسببم هم الضاعت رواح ...

يأمل ...عايني ضحى جايا من المدرسه ورحكي الليله نشرب القهوه عندهم كيدا عليها كان الليله نلحق اجتهادا نعطلا من قرايتا ..لكن هم ياهبه ماعزمونا ..اي نمشي بس هو انت قايلا عندهم بيت بيت اليابا والتابا كلو تكل مطره واحده تهدو ...امنيه قالت لي ضحى بكره عندهم امتحان ...خلاص فرصتنا بنلحق حدو اجتهادا ده ...كيف يعني . ..ركزي معاي هو امتحان الشهاده ببدا بكره ...وانا بوريها تنجح كيف ...ح تعملي شنو اصبري بس يلا نمشي

ضحى ماشه في الطريق ومادايره ترجع البيت عشان ماعندهم حق فطور الليله لو رجعت البيت امها بطلع قروش العلاج حقها وتشتري بيهم ليها عشان تفطر وهي ممكن تقطع من لحما وامها مايغيب منها العلاج بتخاف عليها تمرض اصلا امها بتقوم من الصباح تعوس الكسره للنسوان بالقروش عندهم غرفه طوب اخضر ومعاها راكوبه وحوش ساترم وممشين امورم من حق الكسره وابوها شغال بخيط الجزم وورنيش وكده والحال ميسور

ولما خلصت يوم المدرسه كانت راجعه البيت لاقتا امل في الطريق ..ضحى حبيبتي ازيك ...اهلا يأمل كيفك ...تمام الليله قلتا نجي نشرب معاكم الجبنه طولنا ماتونسنا معاك القرايه شغلتك مننا ...في اللحظه ديك ضحى اتحرجت تقول شنو وبقت ماقادره تتكلم من جهه عندها امتحان شهاده ومن جهه ماعندهم الا قروش علاج امها البسبب الدخان الكتير من العواسه بقى يجيها ضيق نفس ولازما ادويه وبقت ممحنه بس اكتفت بانو تقول ..خير يامل تنورو ..

امل طوالي جرت كلمة هبه ولمت النسوان البتشرب معاهم الجبنه قالت ليهم الليله ضحى عازمانا قالت ..وهم بقولو اجي من سكرم ولا بنهم عشان يعزمونا. لكن بنمش ....وطوالي اتلممو ودايرين يمشو

ولما ضحى وصلت البيت كانت محنانه تقول لامها شنو وكان باين في وشها القلق .امها قالت ليها مالك ياضحويه وشك مخطوف كده ماتخافي يابتي الامتحان بجيك ساهل انتي شاطره ماتقلقي وابتسمت ليها مالك ماجيتي الفطور استنيتك ...يامي انا قلتا ماجيعانه ..لالا اكلي انتي عندك امتحان يابتي ..يامي الليله ناس امل جايين يشربو معانا القهوه ...امها لكن يابتي عندك انتي امتحان ..م مشكله يامي بقرا بالليل ..لكن ...امها طوالي فهمتا لالا يابتي ماتخافي الضيف رحمه انا بدبر حق البن والسكر والفحم ..اعفي لي يامي ...اجي يابتي مالك سويتي شنو ..امشي انت اقري وانا بمشي لعمك الصادق في الدكان بدين منو الحاجات وان شاء الله بعد اعوس لي لنسوان بسدد ليهو ..وضحى كانت بتتقطع من جواها على حال امها البتسدد هنا وهنا

مشت حاجه بتول جابت الحاجات وولعت النار والجماعه جو داخلين ومما دخلو قعدو ينظرو ولو واحده فيهم اتكرمت جابت ليها سكر معاها ..وبقو اول ماحاجه بتول تدخل الغرفه يقعدو يتلاكزو بيت اليابا من زمن الطوب الاخضر وهسي البن ده بكفينا نحن كلنا فصاحه ساي ..انا مش قلتا ليك ضحى دي فصيحه ساي جاريه ورا القرايه ..هسي كان جاها عريس برضى بوضعم ده مبشتنين كده ...خلاص اسكتي ضحى جات مارقه

في بيت ناس ضحى عندهم ازيار ورابطنهم بشوال خيش وماعندهم ثلاجه زي ناس أمل وهبه ...أمل حبت تحرج ضحى .....واي ياضحى انتي ماعندكم مويه بارده انا دي بتخليني اتعب مابقدر اشربا ...خلاص يأمل انا بمشي الجيران اجيب مويه بارده واجي ...مابتقصري امشي جيبي من ثلاجتنا ولو لقيتي المكيف واقف شغليهو عشان انا ح ارجع مسخنه من هنا عايزه هوا بارد ...لا انا ماشه ناس خالتو تهاني ...تمام ...

ضحى شالت جردل مويه تملاهو من ناس تهاني وامل استغلت الفرصه وطوالي قالت لام ضحى ياخالتو انا عايزه اصلح توبي ده ...ادخلي يابتي جوه الغرفه دي صلحيو ....طوالي امل دخلت وهي ماعايزه تصلح توبا هي دخلت فتشت شنطة امل شالت منها البطاقه الح تمتحن بيها وقفلتا وسرقت كتابا الممتحنه فيو الماده حقت الامتحان ودخلتم من جوه التوب وجات طالعه ...خلاص ياخالتي صلحتو ...

شربو الجبنه واي واحده رجعت على بيتا وهبه وأمل يقطعو في ضحى بت الكلب نجمتها ليك كان تنجح تنجح في راسي ده ..عملتي شنو يأمل ...سرقتا كتابا وبطاقتا الكتاب مافي زول ح يديها تاني تقرا لانو بكره الامتحان وكمان ماعندهم قدره يشترو كتاب ...والبطاقه ح تقعد تفتش والزمن يضيع ليها وماح تلحق تكتب حاجه لانو ح تعدي بكا ....شفته طلعتي يأمل لكن ....اي يابتي عشان بكره تنجح ويطلعوها لينا في راسنا والله امي ساي تحميني القعده في البيت بونستا بضحى ...اي يختي كلامك البركه السرقتيهم

وبهناك ضحى اول مالنسوان طلعو لمت العده وكنست الراكوبه ودخلت تقرا بس فقدت كتابا مافي وقربت تبكي بس اتمالكت نفسا عشان لو كلمت امها بتحلف وبتشتري الكتاب وفكرت انها تمشي ليسرا صاحبتا لو تلقى عندها حاجه زايده

يسرا كيفك ...ضحويه كيفك ..يسرا انا مالقيت كتابي لو لقيت عندك حاجه ان شاء الله مشرط بقرا منو ...استهدي بالله يابت هاكي كتابي انا اصلا ماعايزه اقرا منو بقرا من المذكره ساي ...طوالي حمدت ربها وشالت الكتاب ومشت وبقت تقرا لحدي الصبح صلت وشربت الشاي ودعت ليها امها ومشت

لما وصلت المدرسه العسكري قال ليها طلعي البطاقه فتشت شنطتا مالقتا والعسكري رفض انها تدخل وفي اللحظه ديك جا المدير وقال للعسكري اي دي ضحى دي انا مرشحا اولة المركز ماتاخد من زمنا خليها تدخل فرحت طوالي سمت ودخلت للامتحان

وبهناك امل وهبه يضحكو عليها وشمتانين واستناهو قريب للبيت عشان يشمشرو ..اها ياضحى الامتحان كيف ..الحمدلله تمام وفاتت طوالي عرفت انهم سرقو كتابا وبطاقتا

عايني ياهبه عيونا واقعات كيف ...مامن البكا ...ههههههههه عقبال ماتبكي في رسوبا

ضحى خلصت امتحاناتا وكان لونا شاحب من السهر والقرايه الكتيره وماقاعده تمشي دروس خصوصيه عشان ماعندهم قروش مكتفيه بس بقرايتا عشان كده ضاغطه نفسها شديد ولازم تنجح وماتعيد السنه عشان توفر على اهلا ومجرد ماخلصت امتحانات بقت تساعد امها في عواسة الكسره عشان ماتتعب ونفسا يضايق وامها بتمنعا انها تعوس بس هي بتصر بحجة انو لو جاها عريس يلقاها مره نجيضه اي شي بتعرفو وامها بتضحك عليها وبتقوليها انتي نجيضه من غير عواسه الله يديك ود حلال هدي ورضي يابتي ..

نجي لامل وهبه ....ديل لسه مع الجبنه ومباريات النسوان الكبار وقالو وقلنا ويقطعو في ضحى

هاي ياامل انتي قايله ضحى دي بتنجح تنجح شنو دي دروس عصر ماقاعده تمشي ولمبه زي الناس في بيتم تقرا بيها مافي ...اي ياهبه شوفتيها بس من راكوبتم لغرفتم المعتته دي ....ههههههههه اي يابتي بكره بنسمع رسوبا ...قايله كان قرت بتجيب ليها عمار وبوشها المبشتن عريس زي الناس مابتجيبو ....تجيب شنو يأمل ها بكره بتجيبو فقير زي ابوها احسن امها عندها راكوبه لكن هي بسكنا في تكل حق عواسه ...اصلا مصيرا العواسه دي زي امها ح تبقى دكتوره ولا مهندسه يعني ...وواصلو قطيعه واستهتار بضحى واهلا لحدي ماي واحده قامت مشت بيتم ..

ضحى وامها بقو ممشين امورم من حق العواسه على الحاجه البدخلا ابوها البيت ساتره حالم ومكفي حق علاج امها وكانت قنوعه جدا بوضعا الفيهو وماقاعده تسأل لامن كسوه ولا مصاريف بس كان أملا وعشما كبير جدا في ربنا انو حالم ح يتصلح للافضل ...

ومرو ايام على ضحى وهي مستنيه نتيجتا بفارق الصبر بس بتصلي وبتدعي انها تنجح عشان تساعد اهلا لقدام بس كانت هامه كيف ح تقرا الجامعه وهي ماعندهم قروش ولا عندهم البساعدم وده حمل كبير على اهلا بس دعت ربنا انو يسهل امورا وتقدر تكمل تعليما .....

بعد فتره ظهرت النتيجه وضحى كانت مقلقه شديد بس امل وهبه كانو مقلقين اكتر منها خايفين انها تنجح وتبقى شينه ليهم قدام الناس لانهم كانو بنبذوها بس قبل ماتظهر النتيجه حصل موقف مع ضحى ......

قبل اسبوع من ظهور النتيجه ضحى كانت ماشه تجيب زيت من الدكان شافت ليها راجل لاكبير ولاصغير يعني عمر ابوها كده كان قاعد ليهو تحت ضل حيطه وجلابيتو شبه وسخانه وظاهر عليهو انو ضيف ومافي زول جنبو وهو ماقاعد يتكلم مع زول ..مشت الدكان وجات لقت الراجل في قعدتو بس قالت تمشي عليهو وتسألو مالو يمكن محتاج حاجه

ضحى وصلت الراجل ..السلام عليكم ياعمي كيفك ..وعليكم السلام يابتي ...انا ضحى ياعمي شكلك مامن هنا محتاج مساعده ولا حاجه ..ابدا يابتي بس المكان ده انا اول مره اجيو عشان كده مابعرف زول قلتا اخد راحه في الضل ده وبعدين اشوف شغلي ...خلاص ياعمي اتفضل معاي البيت ابوي هناك اقعد ارتاح لحدي ماتقوم على شغلك ...كتر خيرك يابتي ورح بمشي معاك انا اسمي الخير ...اتشرفتا بمعرفتك ياعمي هدا وصلنا البيت

ولما الراجل دخل البيت لقاهو راكوبه وغرفة طين اخضر واستغرب من البساطه حقت البيت والبت الصغيره دي عزمتو مع انو الناس الوضعم كويس في البلد دي مافي زول فكر يجيب ليهو مويه ولاحتى يفضلو وهو قاعد من زمن تحت الضل ده افتكر انو واجبات الضيف انتهت في البلد ده ..بس البنيه دي شكلها مبروكه

ضحى نادت لابوها ابوي يابوي ...ايوا ياضحى ..ابوي في ضيف بره ..ابوها طوالي فهم انو عابر سبيل لانو مفهم ضحى من صغيره انو احترام الضيف واجب وانو الضيف بشيل اي بلا في البيت اول مايطلع وكمان بجيب رزقو معاهو ...

طوالي ابوها قام طلع على الضيف وسلم عليهو سلام معرفه ورحب بيهو وجات امها سلمت عليهو وفضلتو جوه البيت ...والراجل كان مستغرب في بساطة الناس ديل بس بقى قاعد بعاين ويتونس معاهم في الراكوبه

وابو ضحى دخل جوه الغرفه مشى جاب ليهو جلابيه نضيفه وضحى جهزت ليهو الحمام وجرت جابت ليهو مويه بارده وهو قال ليها لا انا بشرب من ازياركم السمحات ديل ..اتبسطت من كلامو انو اخيرا في زول قبل انو يشرب منهم

ضحى بتتكلم ...عمي الخير انا جهزتا ليك الحمام ودي الجلابيه مدة تخلص الغدا بكون جهز ...الراجل اتكيف من ناس ضحى شديد ..ودخل الحمام وجهز نفسو وجا لقى الغدا جاهز كان خضره مفروكه بكسره ومعاها سلطه وشطه خضرا بليمون ..الخير اكل مع ابو ضحى وام ضحى جوه تعمل في الشاي ...

الراجل اكل من الأكل البلدي لما اتكيف ومن خدمات ضحى طوالي بعد الغدا جابت الشاي ويشيل ويشكر فيها عاملوهو زي البعرفو ...وهي تقول لي ده الواجب ياعمي لو ودنا نجيب ليك النجوم بس الحمدلله ده الموجود ..لالا يابتي قالو اهلنا عيب الذاد ولاعيب سيدو ...وفي اللحظه ديك جاهو تلفون ايوا ياوضاح صلحتا العربيه اي ..ياابوي ...وضحى كانت بتسمع ...خلاص انا هسي بجي عليك

وفي اللحظه ديك قال للناس ضحى شكرا ليكم ماقصرتو انا عربيتي اتصلحت كانت خسرانه واقفه بره الحله عشان كده دخلت ...وضحى بجواها سبحان الله الراجل غنيان وماظاهر عليو صحي المظاهر خداعه ...قال لي ضحى ابوك قال لي امتحنتي ونتيجتك بعد اسبوع خلاص انا ان شاء الله ح اجي ابارك ليك

وبهناك بخيته جرت ودت الشمار لامل وهبه اجرو ضحى وامها مدخلات ليهم راجل غريب ...اجي ماقالو محترمه الناس دي كلها مااشتغلت بيهو ..يدخلو هم في اوضتم دي ...يابتي اصلا بكونو دخلو في غرفتم الواحده دي عشان يديهم قروش ويشفق عليهم قايله شنو انتي ...مااصلهم فقرا وبشحدو عادي ...على قولك

الراجل شكر ضحى وطلع وبقى مستني نتيجة ضحى تظهر بفارق الصبر عشان يجي راجع

بعد طلعت النتيجه ضحى كانت قاعده في المصلايه بتدعي ومتوتره وامها وابوها يصبرو فيها وعشان ماعندها تلفون تجيب بيهو نسبتا بقت مستنيه تعرف من اي زول وخلاص وتسمع الزغاريد عن ناس الجيران ويقولو جابت كده وخلاص هي قلقت ياربي تنجحني وبقو دموعا بس بتكلمو

هبه وأمل طوالي لفحو تيابم وجرو على بيت ناس ضحى الشمار حرقم وهم زاتم مقلقين لما شافو ضحى بتبكي بقو يتقارصو ويضحكو بتحت ويقولو ها اتلقي مانجحت عشان كده ...اصلا ياهبه ده المتوقع يعني ح تنجح لوضعا ده وهم عاملين فيها الواقفين معاها وبمياعه كده معليش ياضحى اذا مانجحتي السنه دي ح تنجحي في البعدا اصلو ماتهمي ...وامل تقرص في هبه ويعني هي كان نجحت الح يخليها تقرا جامعه منو ...صحي على قولك هم البعرفو بيهو حق النسبه ماعندهم ح يقدرو يقروها جامعه من وين

بس ضحى كانت ساكته واصلو مااتكلمت معاهم بس المدير جا جاري بلهفه ويكورك ياضحى ياضحويه ابشري ابشري يابتي الف الف مبروك رفعتي راسنا وراس المدرسه وان شاء الله تقدري تحققي احلامك ...وهي بفرحه ولهفه جرت عليهو اها يأستاذ انا جبتا كم ....جبتي الماجابو زيك قبلي كده ...انتي اولة المركز ياضحى جبتي 95.6بس فجاءه صرخت وجرت حضنت امها وابوها وقعدت تبكي معاهم باعلى صوت الف الحمدلله يأبوي انا نجحتا ...تعبتي يابتي وربنا عوضك مافي تعب بروح ساي ...وامها تشيل وتزغرد ...والمدير بهناك اي زول جا بيت ناس ضحى وزع ليهو بارد وحلاوه على حسابو وجاب كميه من الكراتين حقات الحلاوه والبارد واداها قروش كتيره وعمل ليها تكريم ليها في المدرسه

اما أمل وهبه بشربو في البارد زي البشربو في سم ومغيوظين لما ظهر في وشهم وباركو ليها بالبارد وطوالي طلعو فاتو زعلو زعل شديد بعد عملتم معاها اصلو مااتوقعوها تنجح

تاني يوم من النتيجه الراجل الاسمو الخير جا بعربيتو ومعاهو ولدو مهندس وقفو العربيه جنب بيت ناس ضحى ودقو الباب ..جات ضحى فتحت الباب اول ماشافتو فرحت عمي الخير انت جيت اهلا ببتي السمحه لازم اجي ابارك لي بتي النجاح بنفسي بس انت عرفتا من وين ياعمي ..يابتي معقول ماتنجحي الغيرك انتي جابو نسبه خليك انتي المجتهده وبعدين انا بتي زاتا ممتحنه عشان كده عرفتا منها كنت عايز اجي امبارح بس الضيوف كتيرين في البيت اعزريني ...العفو ياعمي مامشكله بتك جابت كم ...جابت 93.9...ماشاء الله الف مبروك ليها ....تعبتو يابناتي والله عوضكم ....الحمدلله ياعمي ..يانزار ..نزار ....نزار منو ياعمي ...ده ولدي ياضحى جا معاي ....وليه مخليو بره خليو يتفضل ...

نزار تعال ياولدي ....اهلا وسهلا ياولدي اتفضلو نورتونا ودخلو نزار وابوهو وكانو جايبين معاهم كميه من الحلويات والمخبوزات والبارد جاب معاهو طقم دهب هديه لضحى ...ضحى اول ماشافتو اتخلعت ده شنو ياعمي ....لالالا ياعمي كفايه علي الحلاوه انا مابشيلو ...يابتي الرسول قبل الهديه ...عليه الصلاة والسلام بس ياعمي ده غالي وانا ...يابتي عيب ماتقولي كده نسيتي انك وقفتي معاي وقفة رجال ولقيتك انتي واهلك لما كنت محتاج ...يابتي انا لما جبتا الهديه دي شايفه رخيصه لانو انت نوعك ده مابتقيم بدهب ..وان شاء الله تبقى لينا خوه وصحبه للابد ...يديك العافيه ياعمي ...يابتي انا داير منك طلب ...قول ياعمي...يابتي انا مامستقر هنا انا شغال في قطر واولادي ديل بجو السودان اجازات ...وبتي الامتحنت دي دايره تنزل تقرا في السودان ومابتعرف زول وانا خايف عليها من بنات الحرام

عشان كده عايزك تبقي ليها اخت ياضحى الذيك انتي نادرين في الزمن ده وانا ختيت ثقتي كلها فيك عايزكم تكونو مع بعض ومهما حصل ماتتخلي منها ...بوعدك ياعمي اشيلا في عيوني وابشر ماتشيل ليها هم ...وانا واثق فيك

الخير كان بتكلم مع اهل ضحى وقال ليهم ضحى بتكم ح تكون اخت لنهال بتي عشان كده انا مسؤول من كل تكاليف ضحى حقة الجامعه ..اهل ضحى دايرين يتكلمو بس طوالي قال ليهم حرررم ولاكلمه ده اقل حاجه اعملا عشان ضحى

ناس الحله كلهم طلعو يعاينو في العربيه السمحه الواقفه جنب ناس ضحى هم ناس فقرا ماحصل عجله ساي وقفت جنبهم دي شنو العربيه دي الليله وفي واحده من جاراتم لما حرقا الشمار طوالي لفحت توبا ومشت ناس ضحى تشمشر بس لقت الخير ونزار ولدو طالعين خلاص ولقت كميه من الحاجات الجايبم الخير لناس ضحى لما اتخلعت

طوالي اليوم التاني مشت محل الجبنه ناس أمل وهبه محل متجمعين ...اجي يأمل ماشفتو الراجل الكان قاعد تحت الضل عاد يايما جاب شي تقيل لضحى واهلا اتاريهو ماهين الراجل مرطب ترطيبه شديده وعندو ولد سمح جنس سماح وحاة النبي كان مامعرسه كان مشيت كتبتو وعرستو ...وديلك مفتحات خشومن بسمعن ...يعني ياسماهر الراجل ابو جلابيه وسخانه ده كان طلع مرطب ...اي يأمل زي مابقول ليك كده ...وعندو ولد وجيه ...عاد ياهبه ابوهو طلع مننا كان عملنا عملة ضحى كان سفيناهو ...لكن وحاتك مابفوت ولدو لازم يعرسني ...يعرسك شنو يابت الراجل شكلو دايرو لضحى ...قامت أمل بزهج وكواريك ضحى دي منو الشينه المبشتنه البعاين ليها معقول يشوفني انا سمحه ونضيفه كده ويعاين للبيتم تكل وامها شغاله عواسه للنسوان دي وابوها شغال ورنيش جزم عاين دي عليك الله ....اي كلامك صاح ح تعملي شنو عشان تلمي فيهو ....عاد دي خلوها علي لكن ح اغيب منكم كم جبنه كده عشان عايزه اتجلخ اكتر عشان لما يشوفني يتبهر ....ح تعملي شنو يأمل ....ح تشوفو شيلو الصبر ..

انتهت القهوه واي واحده فرتقت على بيتا وأمل ماخلت كريم ماجابتو وبقت تتمسح ليل نهار وبقت مصاحبه ضحى وتتظارف واي حاجه بتقول بتعملا معاها وهي فوق راي وتحت تشيل وتنبذ فيهم

ياضحى ..ايوا يأمل ..انتي ناس عمك الخير ماجايين تاني ..قالو جاين زياره لكن ماحددو ..ايوا تمام ..وهي بجواها يعني انا ح افضل لاصقه في التكل ده لمتين

بعد اسبوع الخير جا ناس ضحى وجاب معاهو بتو نهال ونزار المره دي ماجا ...نهال كانت عسل شديد وطيبانه وظريفه ومتواضعه حبت ضحى طوالي على حسب ماكلما ابوها بموقفا معاو وطوالي نزلت معاها ونسه وضحك كأنهم بعرفو بعض من بدري وماحسست ضحى انها اقل منها في حاجه حسستا انها محتاجه ليها كأخت لانو اول مره تتعرف على صاحبه وحست في ضحى الطيبه والأمان عشان كده طوالي خشت فيها

تعالو نشوف امل عملت شنو :

اول ماسمعت انو الخير جا طوالي مسكت سرحت واتمكيجت ولبست ليها لبسه ظابطه ومشت ناس ضحى على اساس انو نزار يشوفا بس كانت المفاجأه انو ماجا زعلت ووشها اتغير بس لقت نهال وحبت تعمل فيها الظريفه ونهال اصلا ماحبتا .....

أمل قعدت جنب نهال وتشيل وتعوج في الكلام عامله فيها بت عز وراقيه وانها زوله هاي ومتواضعه ....ونهال اصلا ماعبرتا فاهمه حركاتا بس عامله رايحه منها

نهال قالت عايزه مويه تشرب وضحى مشت على الأزيار تديها مويه ...طوالي أمل نطت ...ده شنو ياضحى انتي عايزه تديها من المويه دي بتبالغي دي ساخنه يلا يانهال اشربي من بيتنا ح اديك من التلاجه وكمان المكيف شغال ترتاحي ..ضحى اتحرجت ونهال حست بيها بس طوالي ردت لامل بحده كده ...موية ناس ضحى مافي احلى منها مااي تلاجه الزول بشرب منها وازيارم دي ولا اي كولر اما بالنسبه للمكيف الراكوبه دي بالف مكيف لانو هواء طبيعي انا ماصدقتا اني لقيت هواء طبيعي ..ضحى في اللحظه ديك ابتسمت لما دمعت وأمل كانت دايره تموت من الغيظ بس كتمتو جواها وبقلبا بتقول بعد اعرس اخوك برد ليك الصاع صاعين هسي مضطره اتظارف م مشكله نهال حبيبتي بيتنا وبيت ناس ضحى واحد ...لا ماواحد ضحى بيتم مافي زيو في الحله دي كلها ....وخلاص امل وصلت الحد وبتقول مالا البت دي فقريه كده يلا انا بستأذن ماما منتظراني يلا يانهال ممكن اشيل رقمك ...لا معليش رقمي ده مالي اي زول اها م مشكه يانهال نتلاقى تاني ...ان شاءالله ح تشوفيني مع ضحويه اختي كتير ...هههه كويس عن اذنكم

أمل طلعت منفوخه من نهال ونهال تشيل وتضحك وتقول لي ضحى انا مابحب النوع ده من البنات مالا هسي بتتمايص كده وبتدلع ..خلاص يانهال عيب نتكلم في الناس وبعدين هي زوله جاتنا مهما قالت احتراما واجب ...وحلاتي ياضحويه انتي مسكينه شديد والله عشان كده انا حبيتك ..وباست ضحى على خدها وتقول ليها اختي ضحويه ح نكون دايما سوا تمام ياستي يلا هسي عشان الغدا بعد ده ...انا عايزه اكل من ملاح الخضره القالو ابوي ياضحى بس كده عيوني ليك بس اول امشي اعوس الكسره عشان نتغدا .....ده شنو ياضحى انتي بتعوسي ايوا عادي امي علمتني ..اتاريك مره ونص ماهنجوكه زي فلانه ديك ...نهال قلنا شنو نحن ...خلاص خلاص م ح اتكلم تاني

ضحى عاست الكسره ونهال بس كانت قاعده حارساها ومبسوطه بضحى شديد لحدي ماخلصت عواسه ومشت جهزت الغدا واتغدو ابوها وعمها الخير ..وهي وامها ونهال اتغدو سوا ونهال تشيل وتاكل ومتكيفه والله ياخالتو ملاحاتكم رهيبه وضحى بضحك اسمو ملاح يانهال ماملاحات خلاص ده تاني انا كل يوم باكلو وبعدها عملو الشاي وقعدو في الراكوبه ديك واتونسو وضحكو

الخير ابو نهال قال لضحى انتو حتنزلو جامعه واحده وكليه واحده حتقرو هندسه في جامعة الخرطوم وحتقعدو مع بعض وماح تسكنو داخليه ..نهال اتبسطت شديد المهم انو ضحى حتكون معاها بس ضحى كانت مهمومه وظهر في وشها ....بس الخير سألا مالك يابتي في حاجه

وضحى بجواها انا اسافر الخرطوم واخلي امي تشقى براها مع العواسه وخدمة البيت وكان مرضت البقيف ليها منو بس ماقادره تقول كده للخير ...بس عمها طوالي فهما ...ياضحى يابتي اصلو ماتشيلي هم امك لو دايره كل جمعه بتجيها تطمني عليها في حاجه تاني ...حتى فرحت وفردت وشها .

نهال يلا ياضحويتي بجيك بعد يومين القاك جاهزه سامعاني لازم ننزل اول باول عشان ننجز .خلاص يانهال طوالي تعالي

نهال وابوها في اليومين دي مشو اجرو شقه قريب للجامعه وواسعه عشان لما اهل ضحى يجو يقدرو يرتاحو فيها ومشت السوق جابت شنطه كبيره لضحى مليانه ملابس واحزيه وشنط وعطور وكريمات ماخلت حاجه في السوق عاجباها ماجابتا ليها بس مستنيه ضحى بفارق الصبر تجي معاها الشقه

مرو اليومين جات نهال وابوها لضحى لقوها جاهزه وامل كانت قاعده تشمشر...نهال اول ماجات نزلت باست ضحى وحضنتا وسلمت على أمل بارد اصلو ماادتا فرصه ...ضحويتي يلا بعدده ح نمشي ..ضحى ودعت اهلا ومشت الجامعه

لما وصلت الخرطوم ودخلو الشقه كانت بس بتعاين وساكته ولابسه التوب اصلو ماطلعتو ...يابت ضحى طلعي توبك ده انا بت والله ماولد هههههههههه عارفه بس انا متعوده عليهو ....خلاص تعالي افرجك على الحاجات الجبتها ليك .....لما شافتم اتخلعت ده شنو يانهال كل الحاجات دي لي لالا انا ماعايزه عندي عبايتي بتقريني والله ...يابت انتي متخلفه دي اقل حاجه اعملا عشانك ...ضحى قعدت تبكي وتقول لنهال اعفو لي يانهال انا كلفتكم انتي وعمي الخير زياده عن اللزوم دقيقه دقيقه انتي هبله رسمي بالجدنحن لما جبناك هنا جبتك لي اخت ماواحده من الشارع وده اقل حاجه نعملا ليك ...ضحى حضنت نهال وبتبكي اكيد اختك واحلى اخوات ....وفجاءه باب الشقه ضرب ...وضحى بعد ماكانت حاضنه نهال مسكتا بقوه وتقولليها ده منوو الجايي في وقت زي ده

ضحى فكيني خليني اشوف منو الجايي ..لالا بيكون حرامي يانهال ...هههههه حرامي بدق الباب ياضحى ...خلاص ورح نشوف سوا ...يلا فكيني

ولما فتحو الباب لقوهو نزار ....نزار حبيبي ...نينا ازيك .....وين ضحى ...ياهدي بوراي ...ضحى كيفك مالك خايفه كده ....لالا مافي حاجه بس الوقت متأخر عشان كده .....اها ده طرد بالبارد يعني يانهال .....لالا ماقصدي ده بيتكم بس انا....بس خلاص انا اصلا مافاضي ليكم جيت اجيب ليكم عشا وطالع عندي مية برنامج ....دقيقه ماح تتعشى معانا ....اتعشا شنو ضحى طردتني ....لالا ياخ اتعشا واطلع ....لا ح اجيكم بكره اوديكم المشوار القلتي يانهال ...خلاص يانزار بننتظر يلا تصبح على خير ...

اول مافات نزار ..فتحو العشا كان فاخر شديد ..ضحى كانت تاكل حته حته وفجاءه قامت عليها نهال ...ضحى ضحى ضحى ..ايوا يانينا ..هنا في زول ..لالا ...وراك في زول ..لالا ..وطوالي نهال دخلت لضحى لقمه كبيره في خشما وبتضحك عليها ....وضحى اتخلعت ده شنو يابت ح تخنقيني ....انتي العاملا فيها خجوله اكلي يابت عشان عايزاك تلاكمي الحيط ده .....ليه جينا نقرا نحن ولانصارع .....الله ماقلنا خجولين يلا انا عايزه اهداف زيي دي في الاكل.....خلاص يانهال بطلي كلام عطلتيني من الاكل ......هههههههه ايوا كده ياوديع ارمي قدام ......

وبعد خلصو اكل وشربو عصير اسمعيني يامزه نحن بكره عندنا مشوار....مشوار شنو يانهال انا مابعرف حاجه هنا ...عارفه ح يجي يسوقنا نزار الكوفير ...كوفير لشنو يانهال نحن عروسات .....ههههههه ضحكتيني ياضحويه عروسات شنو ماشين نتشيك للجامعه عشان ننزل ظابطين ...يابت انتي عايزه تقري ولا تتكوفري حيرتيني يانهال ....اصبري بس انتي

من الصباح نزار اتصل لنهال انزلو انا بره ولبسو ونزلو نزار كان سايق عربيه رهيبه وهو يسوي كدي ..ونهال وضحى ركبو بورا ...اسمعو ياحلوين انا مالشوفير حقكم ....انا تاني مابنزل امشي انتي ياضحى بقدام ...لالا انا ...يابت امشي انا مابقدر انزل ...واثناء ماضحى نزلت تركب بقدام نهال غمزت لنزار اخوها

ضحى ركبت مع نزار ونهال عملت ماسكه تلفونا ومشغوله وهو يشيل ويفتح في مواضيع معاها وهي بترد بكل بساطه وأدب عجبتو ضحى شديد براءتا وطيبتا بس مااظهر رد فعل

نزلم جنب الكوفير كان معروف في الخرطوم ومشى شغلو ..اول ماضحى نزلت طوالي عايزه ترجع بس نهال مسكتا ماشه وين يابت ....لالا يانهال ده غالي وانا ماعايزه اكلفكم ....الله ياضحى شكلك عايزه تزعليني منك ....خلاص خلاص يلاكي ندخل

دخلو واي حاجه بتخص البنات عملوها ليهم في الكوفير طلعو يتلألأو نايرين شديد كانو بعد خلصت جلساتم طلعو استنو نزار يجي يرجعم ...نهال اتلفتت على ضحى ده شنو المززه دي ماعرفتك يابت والله انتي عسل ياضحى ..عسل شنو ماكلو صناعي ......ههههههه والله انتي حلوه طبيعه بس انتي اصبري لي جلسه تاني ولابتفضي لي كاترينا كيڤ....كاترينا دي منو ......ههههههههه لالا يابت انتي احلى منها ياضحويتي ...اي احم انا احلا منها ....ههههههه خلاص اتفقنا ياكاترينا

نهال بجواها بتقول انتي ياضحى مااقل من السمحات بحاجه بس الدنيا ظلمتك وان شاء الله ربنا يقدرني واخليك احسن منهم الطيبه والقلب الأبيض العندك ولاواحده من العرفتهم عندها وانا لازم اعرس ليك نزاى اخوي كده انا بطمن على أمي وابوي لو انتي معاهم الزيك انتي مابتخاف منو وكمان الحيوانه الاسمها امل تعرف انو انتي اجمل منها لازم اخليها تغير واحرق قلبا عشان نيتا سودا العقرب

نهال انتي سرحانه وين .نزار وصل ...ها .لالا مافي حاجه يلا نمشي ....

نزار لما شاف ضحى مارقه كان بعاين ليها من جوه القزاز ويقول البتي دي جميله خلقه واخلاق بس الظروف هي الماسمحت يظهر جمالك واول ماجات ضحى عمل رايح ومشغول بالتلفون

يلا نرجع يانزار ...لالا انا عازمكم غدا اول ...ي سلام اخوي العسل ......وضحى ساكته ساي ...لحدي ماوصلو المطعم نهال عاينت لضحى اقوم اعمليك حركة الشقه صاح ......لالا خلاص باكل ....عايني ياضحى نهال دي اعملي منها حسابك مجنونه دي ....خلاص يالواعي ......وضحى بس بتضحك عليهم

اكلو ونزار حاسب وطلع دور العربيه ونهال سبقت ضحى على بورا وعملت فترانه دايره تنوم في الكنبه عشان ضحى ماتقول بتجي معاها ....ضحى لما شافتا تلقائيا ركبت قدام ....ونزار اتكيف شديد

نهال رسلت رساله في الواتس لنزار ...اسمعني يأخوي ياعسل اختك فاهمه الحنك عشان كده تعال جيب المفيد ....نزار قرا الرساله وعاين في نهال بالمرايه وهي طوالي غمزت ليو

اول ما وصلو الشقه ودعم ...بس نهال قالت لضحى اسبقيني انتي في حاجات عايزه احولا من نزار في تلفوني .....تمام عن اذنكم تصبح على خير نزار ....وانتي من اهلو

اول ماضحى طلعت ....نهال جرت نزار فهمني ياصلي عشان اساعدك ماتعمل رايح عارفه انو ضحى مكسراك ...شنو نهال انتي ده كلام شنو ...قصدك عرفتا من وين ياروحي .....اها عرفتي كيف....انا اختك ياباشا ....اها وح تساعدني كيف ...لا دي مهمتي ضحويتي اختي وانا بعرف اجيبا ..

ضحويه نحن بكره ح نمشي الجامعه اخيرا ح اشوف جامعة الخرطوم اي والسنتر كمان تمام يلاننوم ..عشان نصحى بدري مانفوت المحاضرات سامعاني يانينا .....سمعا وطاعه ياضحويه

اصبحت من الصباح صلت الصبح ومشت عملت الشاي وصحت نهال ...اصحي ياكسلانه قلنا شنو ...تمام اخد حمام واجي ...يلا بسرعه انا اكون جهزتا ...تمام

ضحى جهزت ونهال جهزت ومشت جابت عصير ليهم ...ده شنو يانهال انا عملتا الشاي ...لالا يابت اول شي كباية لبن وعصير عشان جسمنا ينور ...تاني الشاي ...انتي يانهال ماشه يعرسوك في الجامعه دي ولايقروك ...الاتنين اهم شي يعرسوني لكن واشربي وانتي ساكته ...ههههههه تمام ...شربو العصير والشاي وطلعو

يلا المواصلات م ح تكون زحمه ..مواصلات شنو ح يجي نزار يودينا لحدي ماابوي يرسل عربيتي من قطر ...نزار يانهال لالا ح نعطلو من شغلو ياخي ورح بالمواصلات ...بعد النوره دي كلها نمسحا بالمواصلات مستحيل .اهو نزار جا زاتو يلاكي

نزار وقف العربيه وركبو معاهو وماشين ويتونسو لحدي مااتعودت على نزار بقى ليها زي نهال وصلم الجامعه

اول يوم مشو شافو جدولم ولفو الجامعه واتعرفو على اصحابم كانو برالمه فريدين من نوعم عكس البرالمه البنزلو جداد ..وضحى ساكه المحاضرات والدكاتره وبتجر نهال وراها اصلو مامدياها فرصه تغيب من محاضره ولما تجي واحده من صاحبات نهال تقول ليها ورح المحل فلاني بتقيف ليها ضحى تقول ليها معليش عندنا مشوار ..ضحويتي ماشين وين ...المكتبه يختي نحن ورانا مستقبل مافاضيين للجبنات يلا قدامي ...حرام عليك ياضحى نفرق شويه بس ...هس ولا كلمه نفرق بعدين لما نأجز او نتخرج لكن هسي لا ..عوضني الله يلا ياستي

واستمر الحال ده بين ضحى ونهال ونهال مرات تتحجج وتقول طلعت عشان تخلي نزار وضحى ياخدو راحتم براهم بس ضحى اتعودت عليهو عشان كده مابتزعل من نهال

وفي الفتره الفاتت نزار جاب لضحى تلفون سمح شديد عشان يقدرو يتواصلو معاها وكان كل يومين بتتصل لاهلا وتطمئن عليهم والخير عمها اداها بطاقة صراف تصرف منها لو احتاجت شي

ومشى نص السمستر الاول ورجعت لاهلاعشان تشوفم بس كانت معاها نهال جات بعربيتا المره دي وكانت ضحى متغيره شديد جميله بدرجه ملفت لما العربيه جات داخله اي زول كان بعاين العربيه السمحه دي جابت منو بس لقوها وقفت جنب ناس ضحى ونزلت على امها وابوها اخر سلام وبكا وقعدو اتونسو حبه ونهال قالت ليها ورحكي نسلم على الجيران ..اي يابتي انتو طولتو امشو سلمو ...بس قبلي ماتطلع نهال جرت ضحى وعملت ليها مكياج حلو وطلعت ليها لبسه راقيه وقالت ليها اول شي ورح ناس امل وهبه ..لشنو هم اول ...لالا ساي اشتقتا ليهم البنات ديل

طيب ورح اول ماوصلو امل لما شافت ضحى لما اتخلعت وعاملا فيها بتطعن بالبارد الناس اتغيرت نهال طوالي ردت ليها لا يأمول الطبيعه جبل لو كل الناس دي وقفت االكريم كلهم وشوشم وخلقم مابتتقابل البركه في الكريم ..أمل أشمازت من نهال ومن ردها واتحرقت من سماحة ضحى الناس الحله كلهم بقو بتكلمو بيها

ولما قعدو امل وهبه للجبنه كانو بقطعو ويقولو البركه في حق الراجل الخلا ليها لون يظهر كان مالراجل ده كان الجوع قتلم لكن في النهايه امها بتعوس الكسره للنسوان وابوها شغال ورنيش وبكره يافلينه بتطفحي وبتجينا

ضحى ونهال ودعو اهلم ورجعو الجامعه ..

نهال وضحى لما رجعو الخرطوم اتصل عليهم نزار وقال ليهم جاياكم رزان بت خالتي تعدي معاكم يومين وتسلم عليكم ...

ضحويه ...رزه بت خالتي ح تجي تقعد معانا يومين ...تنور ياضحى الشقه بيتا ...اصلا هم ساكنين هنا وبمشي ليهم مره مره عشان كده جايا تسلم علي .

اوريكم رزه *

دي بت كده لاسمحه ولاشينه ومفتريه وعاجباها روحا شديد وجنها تتعجن في الكلام النوع البكون عامل فيها هاي وهو اصلا داون واهلا ناس عاديين جدا بس ساكنين الخرطوم بتغير وبتاعت فتن ومتعلقه في نزار ودايراهو ليها باي طريقه ولما فكرت تجي تقعد مع ناس نهال ماعشان مشتاقه ليها وعايزه تسلم جايه تشوف ضحى القاعده مع نهال والبتكلم بيها نزار مع اخوها لما يجي البيت عايزه تطير ضحى باي شكل ونزار مايتعلق بيها ....

بعد وصلو الخرطوم ..المغرب جات رزان الشقه وبدت تسلم على نهال وتتعجن ازيو نينا حبيبتي كيفك مشتاقه ليك موووت يابت قلتا لي ماما لازم اقعد مع نينا يومين وبكل مياصه ومياعه ..نهول دي دحى اي دي ضحى اختي يارزه ...دحويه كيفك شرفتينا ..اتفضلي يارزه اقعدي

ضحى مشت عملت العصير وجابتو وتاني مشت عملت القهوه ورزان تتمايع في الكلام وتدلع وتعاين في ضحى من فوق لتحت باشمئزاز ..انتي عارفه يانينا دحى دي بتشبه البت ريتا الكانت شغاله لينا في البيت حقنا (قصدها يعني ضحى شبه الخدم والشغالين )..انتي عارفه يارزه المفروض تمشي تعملي قياس للنظر شكلك بقيتي مابتشوفي الجاب الكيكه للويكه شنو ...رزان بابتسامه باهته هههلا انا قصدي في شبه بيناتم بس ...لا مافي شبه يارزه كفايه انها الباش مهندسه ضحى ...

ضحى بس بتتبسم ماقالت ولاحاجه ورزان بتتثاقل ونهال بتضرب فيها بالبارد اصلا ماادتا فرصه في ضحى ..رزان لما شافت نهال بتدافع ليها كده قررت تستقل ضحى

دحويه ان عتشانه ممكن تچيبي لي مويه ...ضحى مشت جابت المويه ....بعد شويه دحويه ممكن قهوه تاني لأني مصدعه ..عملت ليها القهوه ...دحى انتي من وين ...انا من قرية ....بالچد انتي من قريه وووب انتي عايشه هناك كيف يابت القرى دي ناسا متخلفين وماكيوووت ......بس نحن مبسوطين بتخلفنا كفايه انكم انتو كيووت واتقال عليكم كيووت عشان ماتجو تنبزونا بالتخلف هسي انتي يارزه لما تتكلمي عن حاجه مابتعرفيها وتحكمي عليها من غير ماتشوفي الحاصل في القرى كده انتي راقيه وفاهمه على فكره الزول الفاهم كلامو في المليان مش في نبذ القرى ....قصدك شنو يادحى انا مابفهم يعني ...انا رديت على كلامك يارزان .....نينا تعالي شوفي البت الجايبنها من القرى دي بتقول عني في شنو .....لحظه لحظه انا سمعتا اي حاجه يارزان ضحى كلاما صاح انتي مافي سبب بخليك تنبذي ناس القرى وتاني شي وختي الحاجه دي في بالك انا ضحى اختي ماجايبنها ساي لو كان ساي كان جبتا اي واحده من الشارع تقعد معاي ..

رزان اتحرقت من دفاع نهال لضحى وقررت تطير ضحى من وشها بأي شكل ضحى بقت خطر عليها اذا كانت أثرت في نهال كده اكيد نزار ح تجننو كمان

اسمعيني يارزه نحن عايزين ننوم بعد كده لانو شغالين بدري محاضرات ...امم تمام تثبحو على خير

اصبح الصباح طلعو وجهزو نزلت نهال تدور العربيه عشان يتحركو ....ورزان استغلت الفرصه بقت تأخر في ضحى قاصده ...دحويه انا في الحمام ممكن تجيبي لي المنشفه ...مشت جابتا ...دحويه انا نسيت فرشتي ممكن .....مشت جابتا ...دحويه قبل ماتطلعي اعملي لي شاي دخلت تعملو ...طاخ نهال فتحت الباب لقت ضحى جوه المطبخ بتعمل في الشاي ...ضحى انا من قبيل بزمر تحت لمنو ....عايز اعمل الشاي لرزه يانهال ....نهال اتغبنت على رزان ...

ومشت ضربت ليها باب الحمام ....رزان ....نعم يانينا ....اسمعيني نحن ح نتأخر في الجامعه لما اجي الاقيك عملتي الغدا سامعاني اي حاجه في الثلاجه في .....رزان بقت منططه عيونا غدا شنو البتعملو ولضحى كمان ..نينا حبيبتي جيبو معاكم جاهز من بره ......معقول يارزان نحن ثلاثه نسوان في بيت ونجيب غدا من بره ...خلاث ح اعملو يانينا ...ونهال من جواها عشان كده نوعك ده يارزان مابمسك ليهو بيت عايزه تستقلي ضحى وانا بعرف استقلك ...ضحويتي يلا اتأخرنا ...يلا يانهال

وطلعو خلو رزان براها في الشقه ومحتاره تعمل شنو للغدا بعد ماعايزه ابقي ضحى خدامتي هسي تجي نهال تعملني ليها خدامه بجيهكم الاتنين اصبرو لي

نهال وضحى لما خلصو محاضرات مشو فطرو وشربو الجبنه في الجامعه ودخلو المكتبه صبوها قريب المغرب لانو مكتبة المين بتقفل متأخره .ولما طلعو على عربية نهال ...نهال اتصلت على رزان بمياصه ...رزه نحن في الطريق جهزي الغدا والشاي طوالي لانو نحن چوعانين شديد باي حبيبتي ...ولا انتظرت منها تقول كلمه ورزان دايره تطق من الزعل نهال تحقر بي انا عشان المقطعه الجابوها امس دي

قبلي مايجو مشت نبشت ملابس ضحى لقت ماعندها حاجه كده عبايتين وجزمه قديمه وقميص وتوب وتقول بالله دي العاملين لينا بيها جوطه ولاشي ماعندها

وقبلي مايصلو قفلت شنطة ضحى ونست ترتبا لانها بالرغم من انها بسيطه بس كانت مرتبه شديد

لما وصلو وفتحت ليهم الباب بكل مياعه نورتو حبيباتي غيرو عشان الغدا جاهز ..اصلا يختي ح ننزل في الغدا ....مشو اخدو ليهم دش وغيرو وجو للغدا

ختت ليهم الاكل نهال دخلت يدها وبمياصه ده شنو يارزه مالك مكتره الملح كده في الاكل عايزه تجيبي لينا ضغط ولاشنو ..ياضحى انتي مش امبارح خليتي من الاكلا العملتيها لينا ...في اي يانهال ...انا قايمه اجيبا ده ماببنفع معاي برفع ضغطي ...في اللحظه ديك رزان دايره تموت وتقول يعني يانهال ضحى بتعرف تعمل اكل احسن مني استني بجيهكم ...نهال مشت جابت اكل ضحى وتقول الله ياضحويتي اكلك رهيب انتي مره والنسوان ورا وانتي المفروض يعرسوك مش الهنجوكات ....رزان في اللحظه ديك وشها حمر عديل ايوا يعني يانهال دايره ضحى لنزار كويس برضو فهم جا الوقت الاضربكم فيهو بعد ده ضحى شنو المقطعه البتعرسو

رزان عملت خطتا ومستنيه نهال تطلع وتستقل الفرصه وعماله بتتظارف وبتتونس ونهال اصلا ماطايقاها مستنياها تتخارج باي طريقه

بعد نص ساعه اتصل نزار لنهال قاليها انا بره تعالي عايزك في موضوع نهال لبست عبايتا وطلعت لنزار

رزان خلت نهال طلعت وقفلت الباب وضحى كانت في الحمام ماعارفه نهال مشت لنزار ورزان كانت مستنيه ضحى تطلع وتعمل فيها بتتكلم بالتلفون مع نزار في البلكونه

اول ماضحى طلعت من الحمام طوالي جرت البلكون وبقت تتكلم بصوت منخفض عشان ضحى تتحسس وهي وقفت في البلكونه عشان لما تشوف نهال جايه راجعه تنزل التلفون وماتشك فيها ضحى لما دخلت الغرفه سمعت رزان بتقول :

الو ...ايوا نزار حبيبي ...عارفه انك مشتاق لي وانت خليتني اجي مخصوص عشان الاقيك مع ناس نهال ...حبيبي نحن لازم نتزوج خلاص انت عارف نحن مؤجلين الموضوع ده بسبب ضحى ...اي عارفه وضحى اول ماسمعت اسمها بقت مركزه شديد في الكلام ...اسمعني يانزار انا عارفه انها مكلفاكم زياده عن اللزوم وبقت عبء عليكم وعلى عمي وانكم بتصرفو عليها ...يانزار انا عارفه انو عمو الخير شفقان عليها مااكتر عشان وضعم سئ وماعندهم قروش بس نحن ذنبنا شنو ننتظر لحدي جامعتا ماتخلص عشان نعرس ...لالا حبيبي هي ماسمعاني لانو هي في الحمام ..نزار نهال برضو ضاغطه على نفسا عشان ماتكسر عمو الخير قالت في النهايه دي صدقه مطلعنها لروح جدي بس هي مفهماها انها اخت وانها بتدافع ليها عشان ماتحس بحاجه ...خلاص حياتي نكمل بعدين عشان ماتطلع وتسمع كلامنا وعملت قفلت الخط وهي عارفه ضحى بوراها وسمعت كل الكلام

ضحى بس بقت ماسكه دموعا وعملت فيها جات وطلعت من الغرفه ودخلت الحمام تاني وقفلتو عليها عشان رزان ماتشوفا بتبكي

بهناك نزار فتح لنهال موضوع انو عايز يتزوج ضحى وتكمل الجامعه هنا مره واحده عشان يكونو كلهم سوا ونهال فرحت شديد وقالت ليو والله ضحى مره ونجيضه وست بيت وانا زاتي دايراها لي اخت ح افتح معاها الموضوع طوالي واقنعا لانو انت شغلك هنا اصلا ...خلاص يانينا بستنى تلفون منك وعليك الله ماتتأخري علي ..لالا انا زاتي داير لي عرس قريب عشان اهجج وارقص خلاص انزلي كلامك كتير ...ههههههه كان تقولو قبيل ده قبلي ماتفتح موضوعك ..لالاخلاص اتكلمي اصرفي عربي قدر ماعندك

نهال بعد خلصت من نزار طوالي طلعت الشقه مبسوطه وتكورك ضحويتي وينك ..ولقت رزان جهزت شنطتا وطالعه ..رزه ماشه وين ...يابت انتو عندكم قرايه لو قعدتا بعطلكم يلا سلام حبيبتي اشوفك تاني ...خلاص تمام باي ...نهال ماصدقت انو رزان ماشه عشان تفتح الموضوع مع ضحى ...بس ضحى طلعت من الحمام عيونا مورمات من البكا نهال لما شافتا لما اتخلعت ...ضحى مالك في شنو ...عندي مغص بس يانهال هسي باخد لي راحه وبروح ..لالا ورح نمشي الدكتور ...لالا كده برتاح

خلاص تعالي اوديك السرير ..لالا بقدر بمشي

ومشت ضحى وقبلت على الحيطه واتغطت بتوبا وعملت نايمه وهي بتبكي روحا دايره تطلع وبتتكلم مع روحا يعني انا الناس الافتكرتهم اهل واصحاب طلع ده كلو شفقه وصدقه منهم علي يعني نهال برضو بتضحك علي ممثله علي دور الأخت ياربي انا كان قعدتا عوستا الكسره مع امي كان افضل مما زول يشفق علي طول عمري ساتره حالي انا مافي حاجه جابراني على كده ونزار كمان من حقو يعرس ومااكلفو ونهال من حقها تشوف صاحبات هاي زيها وانا اشوف الزيي بوين بس انا ح اكمل سمستر ده واجمد التاني عشان الم لي قروش اقرا بيهم كفايه الكلفتهم ليو قدر ده ونامت وهي بتبكي لحدي مااصبح الصباح ولاول مره نهال تصحى ضحى بالعاده ضحى البتصحيها للجامعه

ضحى اصحي اتأخرنا لما شافت وش وعيون ضحى لما اتخلعت ...مالك ياضحى ...لالا مافي حاجه انا بس اتذكرتا ناس البيت عشان كده ....خلاص نمشي ليهم يوم الجمعه ..لالا مابحتاج بتصل ليهم بس ..خلاص ورح

ضحى ونهال وصلو الجامعه وضحى ساكته سااي من جواها مكسوره شديد ونهال تتكلم معاها وترقي وضحى بترد ببرود ومرات ماترد ونهال استغربت من برود ضحى الحاصل عليها ولما قالت تسألا الدكتور كان جا داخل للمحاضره وبقو مركزين لما خلصت المحاضره نهال قالت ليها مالك ياضحى انتي امبارح قلتي مغص الليله مالك متغيره مافي حاجه يانهال ساي ..ماعايزه تحكي لاختك ياضحويه ...ضحى عيونا اتملو دموع بس مسكتم عشان نهال ماتحس وبجواها بتقول انتي مضايقه مني عشان كده انا ح ابعد بس انا وعدتا عمي الخير انو مهما حصل م ح اتخلى عنك

طيب ياضحى المحاضره التانيه اتلقت يلاكي نفطر ...لالا انا ماجيعانه امشي انتي ...كيف ماماشه ياضحى انتي من امبارح مااكلتي ....نهال لمااحس بجوع ح اضرب ليك تمام ....وشالت شنطتا وطلعت خلت نهال في القاعه محتاره من تصرفات ضحى

ضحى شالت شنطتا ومشت المكتبه ولاول مره تمشي من دون نهال وشغاله تقرا وتبكي على حالتا وماقادره تكلم زول قرت شويه ومشت قعدت ليها في بنش بعيد من الكليه حقتم عشان نهال ماتشوفا ومسكت التلفون طلعت الشريحه وقفلتو عشان نهال ماتتصل عليها وتصر انها تجي

مشت جابت ليها سندوتش طعميه وجات قعدت في البنش زاتو وغالبا تقول وتفكر وتقول خلاص ياضحى من اليوم صاحبي نفسك وبس انتي اصلا المفروض تدعسي على جرحك وتقري عشان تفيدي نفسك واهلك وماتحتاجي زول وانا اقوى من اي شي .خلصت اكل وطلعت المواصلات وفاتت الشقه

ونهال شغاله تضرب ليها تلفونا مقفول ولفت الجامعه كلها تسأل منها البعرفوها بس قالو ماشافوها عندها صاحبتا اسمها أروى ...يانهال انتي بتفتشي لضحى ركبت المواصلات وطلعت فاتت ...مواصلات كيف ضحى تفوت من غيري وكمان اتغيرت شديد

نهال ساقت عربيتا وجري على الشقه لقت ضحى قاعده ....حضنت ضحى شديد حرام عليك خوفتيني انتي مابتعرفي المواصلات وصلتي كيف وليه تفوتيني ...وضحى زحت نهال بكل قسوه انا قلتا اخليك تاخدي راحتك مع صاحباتك وانا تاني ح اجي بالمواصلات ....في شنو ياضحى انتي ...مافي حاجه بس ضغط القرايه والامتحانات قربت ...من متين القرايه ياضحى بتخليك تعامليني كده .....نهال انا عايزه انوم تصبحي على خير ...وخلت نهال واقفه محتاره وفاتت

ضحى اصبحت من الصباح لبست عبايتا وجزمتا حاجاتا القدام ولاشربت شاي طلعت خلت نهال قاعده في الشقه واتغيرت خالص بقى ماعندها لنهال اي حاجه بس يادوب تمشي الجامعه وتطلع تفطر وتدخل المكتبه وتجي الشقه زولة نوم الا نهال تسألا بترد على حسب السؤال بس نهال تموت وتعرف الغير ضحى كده شنو لانها فرقت عليها شديد حست نفسها وحيده في الجامعه وضايعه وضحى مافارق معاها حتى غيرت مكانا في القاعه وتطلع قداما عشان مايمشو مع بعض

ضحى بقت قاعده من غير تلفون ونزار كلما يضرب ليها بلقى التلفون مقفول اتصل لنهال وسألا انتي يانهال ضحى قافله تلفونا ليها اسبوع في شنو خسر ولاحاجه....نهال ماعارفه ترد تقول شنو لأخوها وانها اصلا اتغيرت وماوقفت على التلفون وبس ...الو نهال مشيتي وين ...لا ضحى دي بس قالت الامتحانات قربو ماعايزاو يشغلا عشان كده لازم تقفلو ...وانا يانهال قلبي ده اعمل فيو شنو مشتاق ليها ومابقدر اجي الشقه اعمل شنو ...ونهال من جواها بتقول لي احسن ماتجي تشوف الحاصل من ضحى ...عارفه يانزار انك بتحبها بس اتحمل ...اتحمل شنو انا خلاص بكره ح الاقيكم سوا ....لالا بكره عندنا امتحان مافي طريقه .....تمام اتصرفي طيب ...خلاص كويس بتصرف يلا سلام ...سلام

نهال قفلت من نزار وقررت تواجهه ضحى والبحصل يحصل مشت لقت ضحى قاعده في المكتبه بتقرا نادتا بره ....اسمعي ياضحى جيبي شنطتك وتعال لي بره عايزاك ....نعم في شنو مشغوله انا بقرا ...ضحى تعالي بره واكسبي زمنك براحتك تاني

ضحى ونهال طلعو بره وبدو يتكلمو ....اسمعي ياضحى انا ح ادخل في الموضوع طوالي انتي اتغيرتي وبقيتي مازي زمان وانا ماعارفه الحاصل شنو او انا عملتا شنو خلاك تتغيري مني كده بس انا مامستغربه لانو عادي بتحصل زول تديهو كل ثقتك ويتغير منك انا عاشىرتا كتير من البنات وكانو معظمهم مصلحجيات او خانوني ولما شفتك بصمتا بالعشره وقلتا اختي انتي المستحيل مهما حصل تتغيري بس انتي طلعتي زيهم ياضحى خاصمتيني من دون اعرف اي سبب بس ماعليك دي غلطتي انا البصدق اي حاجه نهال بتتكلم وتبكي ....ضحى ساكته وبتعاين فيها ....خلصتي يانهال كلامك ...اي ياضحى ...مسحت لنهال دموعا وقالت ليها عن اذنك انا ماشه ....استني ياضحى يعني انتي ماعايزه توريني مالك .....بس ضحى مشت وخلتا

ضحى واصلت تعاملا مع نهال بالطريقه دي لحدي ماامتحنو السمستر الأول واول ماخلصت لمت ملابسا القديمه ورجعت بالمواصلات اهلا من دون تكلم نهال وقبل ماتمشي رجعت التلفون لنهال وقالت ليها اديو لنزار وقول ليهو شكرا ....نهال احتارت في تصرفا ولما رجعت الشقه اليوم التاني لقت ضحى مافي وحاجاتا مافي عرفتا سافرت واحتارت تعمل شنو وتقول لنزار شنو وكيف ضحى تمشي براها اهلا وهي أمانه عندهم

ضحى وصلت البيت وسلمت على امها وتبكي بحرقه بردت نارا في حضن امها وامها تسأل فيها مالك ياضحى بتبكي وجيتي براك المره دي ...امي انابس ماحبيت اودع نهال مابقدر افارقا واشتقتا ليكم انتي وابوي عشان كده ......خلاص خلاص امشي استحمي وتعالي نتغدا

ضحى من قعدت مع اهلا حست براحه عجيبه عشان كده قررت تجمد السمستر وتعوس كسره مع امها لحدي ماتلم قروش السنه البتقدر تصرف بيهم على نفسها ..

التلفون خلتو في الخرطوم وبقت مقلقه على نهال وفي نفس اللحظه ماعايزه تسأل من الناس العملوها صدقه لجدهم وكلما تتذكر كلام رزان تتحرق من جواها وتبكي

اجازة السمستر كلها كانت اسبوع وهي كانت قاعده اسبوعين مامشت ......

الجامعه مشو فيها اسبوعين وضحى اصلا مافكرت تمشي ونهال بهناك مقلقه وكلما مره تقول بكره بتجي بكره بتجي ونزار كرها التلفون بسؤالو منها ..عايني يانهال الاسبوع ده ضحى جات جات ماجات انا بمشي بنفسي اجيبا واجي هي مامتسيبه عشان اخليها تقعد من جامعتا انا خليت شغلي وبقى تركيزي كلو ضحى ...انا زاتي بمشي معاك يانزار يوم الجمعه نجيبا ونجي ..خلاص اتفقنا ..باي

وبهناك في قرية ناس ضحى أمل وهبه اكلو لحما اكل وكلو مايلاقوها يطعنوها بالكلام ...انتي ياهبه الصدقه انتهت على حس كده ولاشنو ...لالا يأمول الشفقه اصلا عندها حد معين ..عشان كده خليتي المدرسه صااح ....ههههههههه اي خليتا ماعندي ليها قروش احسن اعوس مع أمي الكسره ...وضحى بس كاتماهو جوه ماقالت ولاحرف بتقول يارب تسترني دنيا واخره وتفرجا علي من اوسع ابوابك أملي فيك كبير يالله فوضتا امري ليك

اتلمو ناس أمل وهبه للجبنه وبدو يقطعو ..عارفه ياخالتي اليقين البشوف العربات الواقفات جنب ناس ضحى يقولو يعقدو هسي عليها ..ههههههههه يعقدو علي منو الامها عواسة الكسره دي ولاابوها بتاع الورنيش ديل ناس فوق مابعاينو لمستوى الطوب الاخضر والرواكيب ....هههههه صدقتي ياخالتي ضحى واهلا صدقو الوهمه وهسي خلوهم هم شفقانين عليهم بس ...يابتي دي مصيرا العواسه زي امها ...واستمرت القطيعه في لمة القهوه ....

نهال يوم الخميس مشت الجامعه سألت أروى من ضحى ...انتي يأروى ضحى ماقالت ليك حاجه قريب ...زي شنو يانهال ...قصدي بتجي متين ...لالا ضحى تاني ماجايه السمستر دايره تجمدو قالت ...نهال بقت عامله كده ..شنو وووو تجمد ليه الحاصل شنو ولشنو ....ماورتني السبب والله يانهال ...طيب عن اذنك

وبقت تفكر البت دي ماطبيعيه اكيد حاصله معاها حاجه اصلا مستحيل تتغير كده لدرجة انها تجمد السمستر وفجاءه اتذكرت انها لما طلعت تلاقي نزار خلت معاها رزان في البيت لانو رزان طوالي لمة حاجاتا وطلعت وضحى في نفس الوقت كانت بتبكي وخبت علي انا لازم اكتشف الموضوع ده بنفسي وساقت عربيتا وعلى بيت ناس خالتا عدل

كيف ياخالتو ..اهلين نينا ....وين رزان ...في غرفتا ..طيب ح ادخل ليها عشان مستعجله ...وطاخ فتحت غرفة رزان ...وبنهره كده رزان نينا ازيك نورتي ....بلا نورتي بلا زفت ...في شنو يانينا هايجه كده ....اسمعي من غير لف ودوران ضحى ورتني باي حاجه قلتيها .....انا انا قلتا شنو ....اوعا تكذبي ....قلتي ليها كده ليه ....انا بس بحب نزار اخوك وشايفه انها مامناسبه ليهو عشان كده انا قلتا ليها عاملينك صدقه وأجر بس .....نهال بقت منططه عيونا من كلام رزان .....وطوالي قطعت فيها كفين ..كيف تقولي كده على الانسانه الاعتبرتها اختي انتي حيوانه وانتي فاكره اني ح ارمي اخوي في واحده زيك ضحى ستك واحسن منك بالف مره ياوسخه عشان كده انا بكرهك وعلى فكره انا كنت شاكه فيك عشان كده قلتا ليك ضحى قالت وهي اصلا مااتكلمت عشان محترمه ماعايزه تفتن بينا بس طلعتي واطيه بكل معنى الكلمه خربتي سمعتنا قداما

وطلعت فاتت من رزان مغبونه وكانت بتناهد واتصلت لنزار يجيها سرعه طوالي نزار جا وحكت لي الحاصل كلو من رزان وضحى جمدت السمستر بسببانزار داير يجن لما سمع كلام نهال قال الا يمشي يدقها بس نهال مسكتو قالت لي اصبر بربيها بطريقتي اصلو ماتهم عندي ليها خطه تطيرا مننا خالص ...بس اول نمشي نجيب ضحى ونعتزر ليها ...تمام يلا

نهال ونزار ركبو في عربيه واحده ومشو ناس ضحى ..اول ماوصلو ضحى كانت مشتاقه لنهال شديد جرت عليها وحضنتا ونست اي حاجه وقعدت تبكي ..بس نهال مسحت ليها دموعا ماتبكي ياضحويتي انتي مابتستاهلي غير تفرحي صدقتي كلام الحيوانه الاسمها رزان وخليتيني زي الهبله في الجامعه براي وانا قلبي بتقطع ولاراعيتي لخوتنا لوانتي اعتبرتيني اختك بالجد كان تحكي لي ...انا يانهال ماعايزه اخرب بيناتكم ..اصلا رزان بتاعة فتن من زمان ...وقالت ليك شنو تاني قالت لي انو انو بتحب نزار ...وانتي صدقتيها نزار بحبك انتي يابت ضحى بخلعه نعم نزار يحبني انا مستحيل ...ليه مستحيل المستحيل شنو في الموضوع وانتي زاتك بتحبيو وعامله رايحه قايلاني ماعارفه ..نهال ده كلام شنو ..لالا انا انا بس ..عايني انتي بتحبيهو وهو بحبك وقلبو مقطوع فيك وخلوني اكل لاني جعانه هسي ...نهال انا مامستواكم عشان احب نزار ...طاخ نهال ادت ضحى كف انتي شنو مشغللاها لي مستوى مستوى شايفه عندنا مال قارون ولاابوي القمر مسجل باسمو ماكلنا عبيد الله اقول ليك انا كده ياضحى ثم ثانيا انتي اكبر من التفكير بالسطحيه دي ياضحى بالجد زعلتيني ...خلاص اسفه يانهال ...لوعايزين ارضى وافقي بنزار اخوي عشان تبقي لي اخت جد جد ..خلاص خلاص موافقه ...حبيبتي حبيبتي الف الف مبروك ياعروسة اخوي

طوالي نهال جرت ودت الشمار لنزار انو ضحى موافقه بيو عريس وكان داير يطير من الفرح وطوالي اتصل لابوهو يجي يحقق خطوبتو من ضحى وابوهو فرح شديد وقال لي انت جبتا مره ونص ياولدي وكلمو ناس ضحى واهلا وافقو على الخطوبه لحدي ماتكمل نهال الجامعه يعرسو

أمل وهبه دايرات يموتن من الغبينه ويقطعن يقولن كتبتو عن شيخ ..

ضحى اشترطت على نزار انو تكمل الجامعه وتشتغل عشان تساعد اهلا ونزار وافق بشرط انوتعرس من ثانيه جامعه عشان غلبو يصبر ..ضحى وافقت على العرس انو يكون في تانيه وعملو ليها عرس ولافي الأحلام كان رهيب شديد وأمل وهبه حضروهو ويشيلو وينبذو بس معليش معزروين قالو المابتلحقو جدعو

ونزار اشترى بيت كبير عشان تقعد فيهو ضحى واهلا ومعاهم نهال والخير ابوهم رجع قطر بعد حضر العرس وكانت حياتم حلوه شديد واهل ضحى مرات برجعو البلد يقعدو فتره ويجو لضحى تاني مابقدرو يقعدو مع نسيبم طوالي

ومرت السنين وناس أمل وهبه في جبناتم وقطيعتم وضحى خلصت جامعه واشتغلت في شركه كبيره ومصروفا كلو لامها وابوها عملت ليهم بيت كبير في قريتم وفرشتو فرش رهيب ولبست امها دهب وابوها عملت ليهو فرن في القريه بس هو يمسك الايراد بتاعو وهي مسؤوله من المواد التموينيه ريحتم شديد في كبرم واصلو ماخلت نهال الا بعد اتزوجت ورجعت قطر لاهلا وبقو متواصلين بالتلفون .

نجي لناس لمة القهوه الاساسيين أمل وهبه الكانو بتمسخرو على ضحى واهلا أمل جاها عريس ماعندو ولاحاجه وشين وابوها حلف عليها تعرسو وقال ليها مباريه لي الجبنات والكلام الفارغ قرايه مانافعه فيها مابخليكي تلفي بعرس ليك الراجل ده كسر رقبه تنستري بس ....لكن يابوي هو ماعندو بيت ...مالو عندو اوضة طوب اخضر تقعدي فيها بس كده لحدي ماتموتي فيها ..اضطرت عرستو وقعدت ...اما هبه عرست ليها راجل زاليها وحرم عليها المرقه مع النسوان وبضربا وقعت في نسابا كعبين شديد وعندها غرفه وحمام طوب اخضر صغير ومامعاهو شي ..

نسيت اوريكم نهال عملت شنو في رزان

نهال مشت لابو رزان قالت لي ياعمي انا رزان دي عارفاها عايزه ودعمها البدوي لكن ماقادره تكلمكم عشان مكسوفه وياريت ماتوريها اني قلتا ليك كده ....كتر خيرك يابتي داير القى ليها احسن من ودعمها وين ...ورزان بتكره بدوي عما قالت متخلف وعوير وابوها ماصدق طوالي جرا كلم بدوي يعقد وبتو موافقه من غير يستشيرا ..رزان اتفأجأت بالزغاريد انو عقدو ليها على بدوي وقعدت تبكي ...وابوها يقوليها اي دي دموع الفرح ابشري ابشري يلا لمو ليها حاجاتا خلوها تمشي مع راجلا واتصلت نهال بمياصه مبروك بدوي ههههاااي يلا مزه الى لقاء اي لقطه تانيه منك بكمل معاك الفلم وطق قفلت الخط ..وارتاحو من رزه للابد

تعالو شوفو ضحويه اقصد الباش مهندسه ضحى لما تجي القريه واخر شياكه ونازله من افخم عربيه واولادا وراجلا معاها تقضي اجازاتا من غير ماهبه ولا أمل يقدرو يقولو حاجه

يابنات لمة القهوه حلوه شديد وسط الأهل والاصحاب بس ياريت لو نستفيد منها بحاجات لنفسنا مش نعديها كلام في الناس والروايه دي للعبره انتي بطموحك بتقدري تنجزي مافي شي مستحيل بتصلي للقمه بس بالصبر والعزيمه والتوكل على ربنا والروايه دي ماللاطلاع بس عشان الناس تستفيد منها في حاجات كتيره مااي زول فقير ح يفضل فقير ولاي زول مفتري ح يتقدم في حياتو واتذكرو انو الدنيا بتلف وتدور وبتسقيك من نفس الكاس السقيت بيهو غيرك عشان كده ابقو عشره على نفسكم واشغلو نفسكم باي حاجه غير الناس وموفقين وشكرا لكل التابعوني الى ان التقيكم في مشوار جديد بإذن الله

*النهــــــــــــــــــــــــاية*